“Kulturologiya təkcə etik yox, həm də
professionalizm baxımından insanlara universal biliklər verdiyi
üçün vacibdir”
Professor Fuad Məmmədov: “Bu sahə artıq dünyada
strateji elmə çevrilib”
Layihə çərçivəsində
vacib ictimai elmlərdən sayılan kulturologiya, onun Azərbaycanda durumu və problemləri
ilə maraqlandıq. Mövzu ilə
bağlı suallarımızı “Simurq” Azərbaycan Mədəniyyət
Assosiasiyasının prezidenti, kulturoloq, professor Fuad Məmmədov
cavablandırır:
- Azərbaycanda humanitar elmlərin inkişafı
məsələsi olduqca aktualdır. Hamımız gözəl
bilirik ki, Prezident İlham Əliyev artıq bəyan edib ki,
iqtisadiyyatda keçid dövrü qurtardı və indi ölkə,
dövlət yeni prioritetlər müəyyənləşdirir.
Bu yeni prioritetlər məhz insan kapitalının
formalaşması ilə bağlıdır. Prezident bəyan
edib ki. Azərbaycanın strateji resursu neft yox, insan
kapitalıdır. Ziyalılar və xalqımız bunu necə
başa düşməlidir? Əlbəttə, söhbət
fiziki gücdən getmir. Burada birinci növbədə
geniş mənada insan mədəniyyətindən söhbət
gedir. Məhz mədəniyyət insanın əsas
kapitalıdır. Mədəniyyətdən danışanda bəziləri
təkcə zurna-balaban başa düşür. Belə deyil.
Mədəniyyət birinci növbədə necə dərk
olunmalıdır? Mədəniyyət ruhi və maddi mədəniyyətdən
ibarətdir. Ruhi mədəniyyət əqli və mənəviyə
bölünür, maddi mədəniyyət isə ruhi mədəniyyətin
tədqiq olunmuş nəticəsidir. İnsan ona verilmiş
ağıl vasitəsi ilə dünyanı dərk edib dəyişir,
öz maraqlarına uyğun həyatını qoruyub
saxlayır, bunu yaxşılaşdırmaqdan ötrü
xüsusi strukturlar, qurumlar yaradır. Həmçinin həyat
tərzi, ənənələr, din, dil, incəsənət,
elm, təhsil və başqa sahələr formalaşır ki,
bütün bunlar mədəniyyətə daxildir. Bu
baxımdan çox vacib kulturoloji problemin qoyuluşu yarana bilər.
Belə ki, mədəniyyəti öyrənən elmlə
bağlı müxtəlif baxışlar var. Bir sıra
hallarda mədəniyyətşünaslıqla
kulturologiyanı qarışdırırlar. Bu, kobud səhvdir.
Çünki hər bir terminin öz mənası var. Mədəniyyətşünaslıq
mədəniyət haqqında biliklər deməkdir. Amma elmlə
biliyin çəkisi bir deyil. Elm biliklərin sistemidir. Bu
baxımdan kulturologiya mədəniyyət haqqında elmdir. Elm
deyərkən, buraya metodologiya, müəyyən inkişaf
qanunlarının öyrənilməsi, ümumiləşdirilməsi
kimi məsələlər daxildir. Mədəniyyətşünaslıq
isə orta məktəb səviyyəsində və həmin
elmin nəticələrinin insana aydın olan rahat formada
yayılması deməkdir. Bu baxımdan Mədəniyyət və
Turizm Nazirliyinin nəzdində olan elmi-metodik mərkəzin
adının “Mədəniyyətşünaslıq”
qoyulması doğru deyil. Hesab edirəm ki, həmin yer “Mədəniyyətşünaslıq”
adlandırılırsa, onda orada elmdən söhbət gedə
bilməz. Əgər həmin mərkəz dövlətə
elmi araşdırmalarla kömək etmək istəyirsə,
onun adı mütləq dəyişib “Kulturologiya”
olmalıdır. Kulturologiya insanın həyat fəaliyyəti
haqqında elmdir. Buraya mənfi prosesləri çıxmaq
şərtilə, hər bir nüans daxildir. Bu baxımdan sual
oluna bilər ki, dünya tarixi ilə kulturologiyanın fərqi
nədədir? Dünya tarixi bəşəriyyətin
bütün proseslərini izləyən bir elmdir. Bütün
faktları, onların izahlarını,obyektiv
qanunauyğunluqları, pozitiv proseslərlə birgə
destruktiv prosesləri də əhatə edir dünya tarixi. Amma
kulturologiya isə mədəniyyət haqqında elm olaraq
dünya mədəniyyəti və sivilizasiyası, o cümlədən
milli mədəniyyətlər və sivilizasiyaların tarixi və
nəzəriyyəsidir. Dünya mədəniyyəti tarixindən
kulturologiyanın əsas fərqi ondadır ki, onda yalnız
pozitiv, müsbət, yaradıcı proseslər öz əksini
tapır. Yəni kulturologiya müharibələri,
savaşları, siyasi çaxnaşmaları və sair
dağıdıcı prosesləri xüsusi olaraq öyrənmir.
Kulturologiya yaradıcılıq prosesinin fonunu, müəyyən
səbəblərini göstərməyə ciddi diqqət
ayırır. Bu baxımdan bu diqqət insan, cəmiyyət və
bəşəriyyət səviyyəsində özünü
büruzə verir. Bu sahə artıq dünyada strateji elmə
çevrilib. Platon və Aristotelin vaxtında Herodotun da
olmasına baxmayaraq, fəlsəfəyə elmlərin
şahı deyirdilər. Ötən əsrin ikinci
yarısından isə kulturologiya o yeri tutmaqdadır. 19-cu əsrdə
fəlsəfənin əvəzinə tarix şah rolunu
oynamağa başladı. Ona görə də həmin əsrə
industriya və tarix əsri deyilir. Çünki Herodotun
vaxtında tarix əsasən müəyyən faktları
qruplaşdırırdı. Amma zaman keçdikcə - ötən əsrlərdə fəlsəfənin
imkanlarından psixologiya, sosiologiya, siyasət elmi kimi yeni sahələr
yarandı. Nəticədə belə bir fikir formalaşdı
ki, tarixi-fəlsəfi təfəkkürü olmayan insanlar
idarəetmədə bacarıqlı ola bilməzlər. Təkcə
fəlsəfə ilə mümkün deyil bu iş. Eyni zamanda
tarixi təfəkkür də olmalıdır. Çünki fəlsəfə
tarixlə müqayisədə mücərrəddir. Buna
görə də pozitivizm, neopozitivizm kimi cərəyanlar
ortaya çıxdı. Bu cərəyanları yaradanlar da elə
filosoflar idilər. Onlar görürdülər ki, fəlsəfə
getdikcə elmi çərçivədən kənara
çıxır.
- Bu şəraitdə
kulturologiyanın yaranmasını şərtləndirən
amillər hansılar idi?
- Kulturologiya fəlsəfə,
tarix, sosiologiya və psixologiya zəminində
formalaşmağa başladı. 1949-cu ildə amerikan
professoru, kultur-antropoloq Lesli Uayt mədəniyyət
haqqında elm - “kulturologiya” anlayışını elmə
daxil etdi və beləliklə də bu barədə yeni kitab
yazıldı. Bu kitabda göstərildi
ki, zaman gələcək, mədəniyyət
anlayışının ixtirası, kulturologiyanın yaranması
insanın həyatının hüceyrə formaları və
Kopernikin heliosentrik nəzəriyyəsinə bərabər səviyyədə
dünyada qəbul olunacaq. Doğrudan da görürük ki,
kulturologiya yavaş-yavaş humanitar və sosial elmlərin
şahına çevrilməkdədir. Çünki
kulturologiya sistemli bir elmdir.
- Azərbaycanda
kulturologiyanın bir elm kimi intişar tapması barədə
fikirlərinizi bilmək maraqlı olardı...
- İlk dəfə olaraq kulturologiyanın Azərbaycanda elm, maarif və tədris sistemi kimi əsası “Simurq” Azərbaycan Mədəniyyət Assosiasiyası tərəfindən qoyulub. Bu assosiasiya 1990-cı ilin aprelində yaradılıb. Yüksək səviyyədə - dövlət səviyyəsində assosiasiyamız təsdiq olunub. Əsasən Milli Elmlər Akademiyası başda olmaqla bir çox ziyalılarımız tərəfindən bəyənilib və bizim fəaliyyət müddəalarımız təqdir və təsdiq edilib. O vaxtdan Azərbaycanın milli maraqlarına uyğun şəkildə fəaliyyət göstəririk. Problem orasındadır ki, kulturologiya ilə mən ilk dəfə olaraq 80-ci illərin sonlarında maraqlanmağa başladım. O vaxtlar təlatümlü idi. Ermənistanın təcavüzü, müstəqillik ab-havası şəraitində mən də bütün ziyalılar kimi Vətən üçün bir kömək mexanizmi formalaşdırmağa çalışırdım. Fikirləşdim ki, düzgün dünya təcrübəsinin sistemli təhlili və müəyyən əldə olunmuş nəticələr əsasında hazırlanmış, sabit inkişafa, təhlükəsizliyə aparan həyat texnologiyalarının formalaşdırılmasına nail olmaq lazımdır. Bu məqsədlə araşdırmalara, bir çox ədəbiyyatlara müraciət etməyə başladım. Gördüm ki, kulturologiya misilsiz dərəcədə strateji önəmi olan bir elmdir. Dövlətə, cəmiyyətə xidmət etmək üçün proqramlar, layihələr reallaşdırmaq lazım idi. “Simurq”un yaradılması təşəbbüsünü irəli sürməklə bir çox tanınmış akademikləri, professorları və dövlət xadimlərini bu işə cəlb etdim. Çoxusu bunu dəstəklədi. Beləliklə, assosiasiya yüksək səviyyədə yaradıldı. Əsas məqsəd o idi ki, Azərbaycanın mill-mədəni irsini dünyaya təqdim edək, tanıtdıraq, Azərbaycana dünyada çoxlu rəğbət göstərən dostlar qazandıraq. Həm də dünyanın qabaqcıl kəsiminin sosial tərəqqi konsepsiyalarını, texnologiyalarını öyrənərək, bunları Azərbaycanin xüsusiyyətləri, mahiyyəti şəraitində tətbiq edib dövlətimizə, cəmiyyətimizə müəyyən bir qüdrət qazandıraq. Bu assosiasiya artıq 20 ildir ki, fəaliyyət göstərir. Qurum artıq dünya miqyasında tanınır. BMT-nin təşkilatları ilə əlaqələrimiz, dünyanın bir çox ölkələrindən 30-a yaxın fəxri üzvümüz var. Bunlar əsasən tanınmış alimlərdir. Məsələn, Rusiyanın, ABŞ-ın, Macarıstanın və başqa ölkələrin kulturoloqları və xarici diplomatlarını bu sıraya aid etmək olar. Biz onlarla xalq diplomatiyası yolu ilə, Azərbaycanın milli maraqları əsasında, mədəniyyətlərin dialoqu baxımından əməkdaşlıq edirik. Şərəflisi odur ki, hələ 2000-ci ilin fevralında nailiyyətlərinə görə “Simurq” Azərbaycan Mədəniyyət Assosiasiyası və onun prezidenti Avropa Şurasının kulturologiya və mədəniyyət siyasəti problemləri üzrə baza toplusu siyahısına daxil edilib. Bunun özü böyük bir hadisədir. O zaman Azərbaycan hələ Avropa Şurasının üzvü deyildi. Biz bundan 9 il öncə - 1991-ci ildə Kosta-Rikada olduq və orada çıxışlar düzənlədik. Həmin çıxışların böyük əks-sədası oldu. Bu ölkə bizim təbliğatımızla Azərbaycanın yeni müstəqilliyini tanıdı. Beləliklə, Kosta-Rika bizim müstəqilliyimizi tanıyan 4-cü ölkəyə çevrildi. Ötən illər ərzində assosiasiya az iş görməyib. 9 kitab və məcmuə nəşr edilib. Bunların 3-ü dünyanın ən məşhur kitabxanalarında istifadə olunur. Biz təşəkkür məktubları alırıq. ABŞ Konqresinin kitabxanası, İngiltərə, Almaniya, Avstriya, Rusiya, Çin, Türkiyə, Yaponiya, Macarıstan, İran və bir çox ölkələr Azərbaycanı bu cəhətdən də tanıyırlar. Bundan əlavə, 10-larla elmi məqalə xarici ölkələrdə çap edilib. Assosiasiyanın prezidenti iki beynəlxalq akademiyanın bilavasitə akademikidir. Bunlar İntellektual İnkişaf Problemləri Beynəlxalq Akademiyası və Rusiyanın Pedaqoji və Sosial Elmlər Akademiyasıdır. Bundan əlavə, ABŞ Bioqrafik İnstitutunun şərəf medalı ilə təltif olunmuşuq. Ölkə daxilində də fəaliyyətimizə müəyyən qiymət verilib. “Humay” və sair kimi mükafatları almışıq. Bunlar “Simurqun” kulturologiyanın banisi kimi tanınmasının göstəriciləridir.
- Kulturologiyanın ali məktəblərdə tədrisi səviyyəsi sizi qane edirmi?
- Məni
ümumiyyətlə, Təhsil Nazirliyinin bu barədə
mövqeyi qətiyyən qane etmir. Mən neçə il
Bakı Sosial İdarəetmə və Politologiya
İnstitutunda Kulturologiya kafedrasının rəhbəri
olmuşam. Sonra isə bu kafedranı bağladılar. Biz tədrislə
bağlı fəal iş aparırdıq, tələbələr
kulturologiyanı bütün fənlərdən çox
sevirdilər. Kafedra ləğv edildi, daha sonra isə
kulturologiyanın tədrisi dayandırıldı. Halbuki kulturologiya
siyasi idarəetmə üçün əvəzolunmaz bir mənbədir.
Çünki insanlara
universal biliklər verir. Təkcə etik yox, həm də
professionalizm baxımından. Bundan əlavə, mən Əmək
və Sosial Münasibətlər İnstitutunda dərs
deyirdim, orada da kulturologiyanı ləğv etdilər. Mən
bu barədə nazirlə də danışdım. Dedim ki,
xahiş edirəm, bir kollegiya çağırılsın.
Başa düşülməli idi ki, Prezidentin siyasi kursu -
insan kapitalının formalaşdırılması kimi məsələlərlə
kulturologiyanın tədrisi, onun inkişafı bilavasitə məqsədəuyğunluq
təşkil edir. Nazirlikdən bununla bağlı müzakirə
olacağını desələr də, iki il keçməsinə
baxmayaraq, hələ də bir xəbər yoxdur. Gec-tez buna gəlinməlidir.
Amma biz vaxt itiririk. Vaxt itirəndə isə başqa ölkələrdən
geridə qalırıq.
İlkin Ağayev
Palitra. – 2010. – 4 iyun .- S.6.