Konstitusiya Məhkəməsinin yeni hakimləri təsdiqləndi

Milli Məclisin növbədənkənar sessiyasının daha bir iclası keçirildi. İclasda Azərbaycan Respublikası Konstitusiya Məhkəməsinin yeni hakimləri təsdiq olundu. Milli Məclisin Hüquq siyasəti və dövlət quruculuğu komitəsinin sədri Əli Hüseynov məlumat verdi ki, Kamran Şəfiyev, Ceyhun Qaracayev, Fikrət Babayev, Rövşən İsmayılov, Rafael Qvaladze və Sona Salmanovanın namizədliyi irəli sürülüb. Qeyd edək ki, namizədlərdən ikisi Milli Məclisin əməkdaşıdır. Kamran Şəfiyev Milli Məclis Aparatının Kadrlar İdarəsinin müdiri, Ceyhun Qaracayev isə parlamentin Qanunvericilik şöbəsinin müdir müavini vəzifəsində çalışıb.

Əli Hüseynov layihənin Prezident İlham Əliyev tərəfindən Milli Məclisə təqdim olunduğunu diqqətə çatdırıb: “Azərbaycanda Konstitusiya Məhkəməsi qanunun aliliyini və insanların hüquq və azadlıqlarını təmin edir. Konstitusiya Məhkəməsi ölkəmizdə 1998-ci ildə fəaliyyyətə başlayıb. 2000-ci ildə onun fəaliyyəti daha da genişləndirilib, 2003-cü ildə isə “Azərbaycan Respublikasının Konstitusiya Məhkəməsinin hakimlərinin təyin edilməsi haqqında” Qanun qəbul edilib. Qanuna müvafiq olaraq Konstitusiya Məhkəməsinin 9 hakimi var və onlar 15 il müddətinə seçilirlər. Konstitusiya Məhkəməsi bu günədək 176 qərar qəbul edib”.

Daha sonra isə namizədliyi irəli sürülən hakimlər 103 səs lehinə olmaqla təsdiq olundular.

Hakimlər Milli Məclisdə millət vəkilləri qarşısında and içdilər. Konstitusiya Məhkəməsinin sədri Fərhad Abdullayev Milli Məclisdə çıxış edərək, onlara göstərilən diqqətə və qayğıya, hakimlər üçün yaradılmış hərtərəfli şəraitə görə minnətdarlıq edib, Konstitusiya Məhkəməsinin bundan sonra da Azərbaycan dövlətinin və xalqının mənafeyinə xidmət edəcəyini, qanunun aliliyini hər şeydən uca tutacaqlarını bildirib. Qeyd edək ki, dünənki iclasda Ali və Apelyasiya məhkəmələrinin hakimlərinin təsdiq olunması ilə bağlı məsələ də müzakirə edildi.

Bu məsələ haqqında da MM-in Hüquq siyasəti və dövlət quruculuğu Komitəsinin sədri Əli Hüseynov çıxış etdi. Millət vəkili dedi ki, Ali Məhkəmənin hakimi vəzifəsinə 22, Apelyasiya Məhkəməsinin hakimi vəzifəsinə isə 49 nəfərin namizədliyi irəli sürülüb. O da diqqətə çatdırıldı ki, son illər ölkədə məhkəmələrin fəaliyyətində ciddi irəliləyişlər əldə olunub: “Öz işində qüsurlara yol verən 40 nəfərdən çox hakimin səlahiyyətinə xitam verilib, 100 nəfərdən çox hakim isə cəzalandırılıb” .

Müzakirədə millət vəkili deputat Aydın Mirzəzadə bidirdi ki, Azərbaycanda yeni məhkəmə və hakimlər korpusu yaranmaqdadır: “Hakimlərin əmək haqqının artırılması, avtomobillə təmin olunmasına yenidən baxılmalıdır”. Müzakirələrdən sonra sənəd səsə qoyularaq millət vəkilləri tərəfindən təsdiqləndi.

İlkin Ağayev

Palitra. -2010. – 23 iyun. – S.4.