«Humay qızlar üçlüyü»nün ilk klip təqdimatı

Gənc tarzən Humay Qədimova 4-5 il öncə ilk müsahibələrindən birini məhz “Palitra” ya vermişdi. O zaman Humay bir sıra qonşu ölkələrə Azərbaycan musiqisini tanıtmaq üçün qastrol səfərlərinə gedirdi. Azərbaycan tarı bu gənc qızın ifasında bir daha xarici ölkələrdə tanındı və sevildi. Yaratdığı ansamblla o bir sıra türk sənətçilərini də müşayiət etdi. Onlar arasında meqa-star Tarkanın və Rafət El-Romanın adını çəkmək olar.

Bir sözlə, Humay qədim çalğı alətlərimizin müxtəlif janrlarda olan musiqilərin ifası ilə gündəmdə qalmasına da səy göstərir. Ötən həftə sonu «Muğam ocağı»nda keçirilən tədbir onun yaratdığı «Humay qızlar üçlüyü»nün (tar, ud - Humay Qədimova, kamança- Sevinc Bağıyeva, nağara- Mahirə Qurbanova) ilk klip təqdimatına həsr olundu. 2003-cü ildə yaradılan və bir sıra tədbirlərdə iştirak edən, beynəlxalq festivallarda qalib olan üçlük milli musiqimizin təbliğatı istiqamətində çalışır. Lakin onların ilk klipi türk musiqisinin kralı kimi tanınan İbrahim Tatlısəsin son hitlərindən olan «Hadi-hadi»nin instrumental variantına həsr edilmişdi. Burada millilikdən uzaq olmaq istəməyən musiqiçilər ekran işini Elmira Rəhimovanın ifasında tanınan «Gecə yaman uzundur» musiqisinin sintezi ilə maraqlı ediblər. Buna baxmayaraq, tədbirdə iştirak edən bir çox qonaqlar üçlüyün milli musiqimizə, yaxud milli rəqslərimizdən birinə müraciət etmələrini daha məqsədəuyğun hesab etdilər. Sənət adamlarının fikrinə bir qədər başqa prizmadan yanaşan Mədəniyyət və İncəsənət Universitetinin dekanı Vamiq Məmmədəliyev öncə vurğuladı ki, respublikada tar çalan çoxdur, lakin üçlüyün ifaçısı olan Humay qədər çalışqan və sənətini sevən ifaçı, özü də qadın ifaçı yoxdur: “ Klipi çox gözəl çəkiblər. Və ilk dəfə idi ki, musiqinin səslənməsində kamança ilə birgə udun da müşayətini gördük. Klip adamı yormur. Rejissor 3 dəqiqəyə baxımlı bir klip süjeti təqdim edə bilib. Qaldı ki, üçlüyün işinə bilirsinizniz ki, əvvəllər də qızlardan ibarət ansambllar olub. Bunlardan ən çox yadda qalan biri Ceyran Haşımovanın rəhbərlik etdiyi “Lalə” qızlar ansamblıdır. Ceyran xanımın artıq davamçısı var. Ceyran xanım ansamblın qastrol və konsert proqramlarının təşkilati və inzibati məsələlərinə baxıb. Ancaq Humay həm ifaçı, həm də təşkilatçıdır. Xalq musiqimizin təbliğində mən onu layiqli bir davamçı olaraq dəyərləndirirəm. Humay artıq bir sıra kişi tarzənlərdən heç də geri qalmır. Klassik muğamlarımızı və xalq mahnılarımızı çox gözəl ifa edir. Bir də onun xoşagələn cəhəti də ondadır ki, hər zaman bu sənəti öyrənir. O gün də mənim yanıma gəlmişdi ki, bir sıra xırdalıqları öyrənsin. Humay hər zaman öyrənməyə həvəslidir. Bu da musiqiçi üçün çox müsbət bir keyfiyyətdir ”. Humay isə öz növbəsində bildirdi ki, rejissor Rüfət Nəzərlinin ekranlaşdırdığı bu klipdə vacib məqam udla kamançanın üçlükdə bir araya gəlməsidir. Eyni zamanda burada istər geyimlər, istərsə də, çalğıda milli çalarlar üstünlük təşkil edir: «Burada fikirlər səsləndi ki, klipi sərhəddən kənara çıxarmağa səy göstərək. Biz bu barədə hələ instrumental əsəri hazırlayarkən düşünmüşük. Bu səbəbdən orada Azərbaycan ladına uyğun və Şərq üslubuna yaxın olan variantı seçmişik. Aparılan danışıqlar artıq başa çatmaq üzrədir. Güman ki, tezliklə ilk klipimizin görüntüləri qonşu ölkənin telekanallarında da yayımlanacaq». Sonda öyrəndik ki, «Humay qızlar üçlüyü»nün növbəti klipi də çəkilib və montaj işləri görülür. Bu barədə ətraflı məlumat veriləcək.

Nüşabə

Palitra. -2010. – 2 mart. – S.13.