Qloballaşma və Azərbaycan

YAP Qadınlar Şurası və Ailə, Qadın və Uşaq Problemləri üzrə Dövlət Komitəsinin (AQUPDK) birgə təşkilatçılığı ilə «Qloballaşma: müsbət və mənfi cəhətlər» mövzusunda konfrans keçirildi. Konfransda çıxış edən Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bildirdi ki, bu gün bütün dünyada qloballaşma prosesi gedir və bu özünü bütün sahələrdə göstərir.

Ümumiyyətlə, XXI əsrdə bəşəriyyətin inkişafını qloballaşmanın müəyyənləşdirəcəyini deyən komitə sədrinin sözlərinə görə, xalqların, dövlətlərin birləşməsinə, inteqrasiyasına dəfələrlə cəhdlər olub: «Amma bütün dünyaya sahib olmaq heç kəsə nəsib olmayıb. Hətta dünyəvi dinlər də bəşəriyyəti vahid bayraq altında birləşdirə bilməyib». Heç bir xalqın qloballaşma prosesindən geri qalmaq istəmədiyini deyən komitə sədri qeyd etdi ki, ölkəmiz də ondan kənarda qala bilməz: «Lakin bu, milli-mənəvi dəyərləri itirmək hesabına olmamalıdır. Bu gün elm və texnikanın tərəqqisinə, sürətli iqtisadi inkişaf getməsinə baxmayaraq milli-mənəvi dəyərlərin qorunmasına ehtiyac daha da artıb». Ötən minilliklər ərzində Azərbaycanın bəşər sivilizasiyasına çox töhfələr verdiyini deyən komitə sədrinin sözlərinə görə, hətta ulu öndər Heydər Əliyev qeyd etmişdi ki, «Biz nadir bir irsin varisləriyik». Məhz həmin xətti uğurla inkişaf etdirən ölkə başçısının apardığı siyasət və həyata keçirdiyi tədbirlər nəticəsində bu gün tarixi irsimiz, abidələrimiz qorunur. Huydər Əliyev Fondunun prezidenti Mehriban Əliyevanın irsimizin qorunmasında çox böyük zəhməti olduğunu deyən komitə sədri bildirdi ki, muğam tariximizin qorunması sahəsində həyata keçirilən tədbirlər məhz bu zəhmətin nəticəsidir. YUNESKO-da Azərbaycan mədəniyyəti ilə bağlı bir çox işlər görülür. Azərbaycan torpaqlarının 20 faizinin ermənilər tərəfindn işğal olunduğunu xatırladan H.Hüseynova onu da qeyd etdi ki, bir məsələ heç zaman unudulmamalıdır ki, bu, yalnız torpağımıza deyil, tariximizə olan təcavüzdür. Ermənilər torpaqla yanaşı bu gün musiqimizi, abidələrimizi mənimsəyirlər: «Bütün bu faktları unutmamaq üçün tariximizi daha dərindən öyrənməliyik. Mühüm amillərdən biri kimi ailə dəyərlərini qorumalıyıq. Bu gün cəmiyyətdə bir boşluq əmələ gəlib və insanlar özlərini bu cəmiyyətin içində hiss etməlidirlər. İlk növbədə ailədə formalaşma fikri önəmlidir. Bu baxımdan mənfi amilləri aradan qaldırmağa çalışmalıyıq. Məsələn, çalışmalıyıq ki, erkən nikahlar olmasın. Bu gün cəmiyyətdə buna münasibət bir qədər dəyişsə də, yenə də belə hallar var. Əsas odur ki, hər bir insan hiss etməlidir ki, bu dövlətin vətəndaşıdır və onun hüququ var. Gənc qızlarımız bilməlidir ki, onların təhsil almaq hüquqları var. Ailə kiçik icmadır və biz onlarla işləməliyik».

Müasir dövrü səciyyələndirən əsas cəhətlərdən birinin sivilizasiyaların dialoqu prosesi olduğunu deyən millət vəkili Bəxtiyar Əliyev bildirdi ki, bu baxımdan tarixə nəzər saldıqda intibah dövrü xatırlanır. Azərbaycanın da bu dövrü yaşadığını deyən millət vəkili bildirdi ki, bu gün də həmin dövr yaşanmaqda və təlatümlərlə müşahidə olunmaqdadır: «Məsələn, Novruz əsrlərdən bəri xalqımızın qoruduğu bir ənənədir və bu adət zaman keçdikcə bir az da dərinləşib. Yetişən nəsil adət-ənənələrin çox gözəl daşıyıcısıdır. Bəzən deyirlər ki, Qərb və Şərqən gələn ənənələr Azərbaycan üçün təhlükə yaradır. Lakin ulu öndər Heydər Əliyevin yaratdığı Azərbaycan fəlsəfəsi çox güclüdür. Bugünlərdə ABŞ Departamentinin hesabatında yer alan fikirlər hər birimizdə hiddət doğurdu. azərbaycançılıq gəncliyinin, xüsusilə də onun öndə gedən hissəsinin, tələbələrinin narkoman adlandırılması heç bir çərçivəyə sığmır. Ölkədə gəncliyin təhsilinə xüsusi diqqət yetirilr və bu baxımdan ölkə baçısı tərəfindən 5 min gəncin xaricdə təhsil alması üçün yaradılan şərait bunun bariz nümunəsidir». Milli-mənəvi dəyərlərin böyük önəm daşıdığını vurğulayan millət vəkili onu da vurğuladı ki, Heydər Əliyev 2001-ci ildə məhz bu mövzuda çıxış edib və AŞ-nin tamhüquqlu üzvü olduğu zaman həmin sözləri bir daha səsləndirib: «Azərbaycan Avropaya yeni milli-mənəvi dəyərlər verə bilər». Millət vəkili onu da qeyd etdi ki, heç bir yerdə Azərbaycanda olan tolerantlığın olmadığı bir faktdır. Bu gün də Azərbaycan xalqı öz dövlətçilik ənənələrini davam etdirir. Ölkəmiz dünya sivilizasiyasının inkişafını müəyyən edən real bir dövlət kimi çıxış edəcək.

Qloballaşmanın bütün dünyanı vahid bir iqtisadi, siyasi, sosial məkanda birləşdirmək arzusu olduğunu deyən millət vəkili Rəbiyyət Aslanova bildirdi ki, bu gün Heydər Əliyev Fondunun prezidenti Mehriban Əliyevanın dünyaya klassik musiqimizi təqdim etməkdə məqsədi odur ki, hər bir azərbaycanlı hansı irsin sahibi olduğumuzu dərk etsin: «Bu gün ölkə başçısının ən böyük rolu odur ki, ölkəmizin asılılığna yol vermir. Ulu öndərin «Mən fəxr edirəm ki, azərbaycanlıyam» ifadəsini heç bir vətəndaşımız unutmamalıdır. Bu gün Azərbaycan gəncliyinin necə olması bizlərdən asılıdr. Hansısa bir nöqsan varsa, demək, düzgün istiqamətləndirməmişik».

Qloballaşma prosesi getdiyi bir zamanda milli-mənəvi dəyərlərin önəmli amil olduğunu deyən təhsil nazirinin müavini Elmar Qasımov bildirdi ki, vacib amillərdən biri də dövlətin immuniteti olan təhsildir. Bu gün inkişafla yanaşı ölkəmizdə milli dəyərlərin mövcud olduğunu deyən E.Qasımovun sözlərinə görə, Azərbaycan tolerant ölkə kimi də tanınır və övladlarımıza müxtəlif dinlərdən olan xalqların adlarının qoyulması da bunun bariz nümunəsidir. Bu gün azərbaycanlı gənclərə qarşı narkomanlıqla bağlı irəli sürülən ittihama gəldikdə isə nazir müavini bildirdi ki, bu sadəcə bir təzyiq vasitəsidir və zərərli vərdişlər Azərbaycanda tüğyan etmir.

Nigar

Palitra. -2010. – 19 mart. – S.2.