Professor Bayram Allahverdiyev: “Dövlət
tərəfindən nəşriyyat sisteminə nəzarət
edən müəyyən bir qurumun olması vacibdir”
“Bu gün kadr problemi ilə əlaqədar kitabların
çapında böyük səhvlər var”
Layihə çərçivəsində
növbəti müsahibimiz BDU-nun Kitabşünaslıq və
nəşriyyat işi kafedrasının müdiri, tarix elmləri
doktoru, professor Bayram Allahverdiyevdir:
- Hazırda ölkədə bir çox nəşriyyatlar fəaliyyət göstərir. Bununla yanaşı yeni nəşr olunan kitablarda bir çox səhvlərə rast gəlinir. Bunun səbəbi nə ilə bağlıdır?
- Ölkəmizdə
istər sovet, istərsə də müstəqillik
dövründə nəşriyyat sistemi sürətlə
inkişaf edir. Əgər kitaba tələbat olmasa, nəşriyyatlar
yaranarmı? Azərbaycanda əvvəllər "Gənclik", "Neft ədəbiyyatı",
"Şərq-Qərb", "Yazıçı" kimi
10-a qədər dövlət nəşriyyatı var idi. Ancaq
indi ölkədə 250-yə qədər nəşriyyat
qeydiyyatdan keçib və onlardan 100-dən çoxu fəaliyyət
göstərir ki, bir çoxunu özəl nəşriyyatlar
təşkil edir. Bu nəşriyyatların sayının
çoxluğu dövlətin siyasəti ilə əlaqədardır.
1998-ci ildə ulu öndər Heydər Əliyev mətbuata
senzuranı ləğv etdi və ona görə də
çap işlərinə tam sərbəstlik verildi. Həmçinin
Heydər Əliyevin sərəncamı ilə nəşriyyatlar,
mətbəələr özəlləşdirildi, ümumiyyətlə,
bazar iqtisadiyyatında özəl sektora böyük önəm
verilir. Tam sərbəstlik verilir ki, özəl nəşriyyatlar
inkişaf etsin, kitab çap olunsun, rəqabət olsun,
yaxşı kitablar nəşr olunsun. İndi böyük nəşriyyat
təcrübəsi olan özəl nəşriyyatlar
yaranıb ki, məsələn, "Adiloğlu" nəşriyyatı
ildə 400-500 kitab çap edir, "Çaşoğlu",
"Mütərcim" nəşriyyatları var ki, kitab
çapında fərqlənirlər. Amma dövlət tərəfindən
nəşriyyat sisteminə nəzarət edən müəyyən
bir qurumun olması vacibdir. Məsələn, bu gün mətbuatın
fəaliyyətinə nəzarət edən MŞ olduğu
kimi, nəşriyyat sistemi üçün də bu önəmlidir.
İndi nəşriyyatlarda kitab çapında bir çox nöqsanlar nəzərə çarpır. Bunun səbəbi isə kadr çatışmazlığı ilə əlaqədardır. Çünki fizika, kimya, tarix və digər ixtisaslı kadrlar nəşriyyatda işləyirlər. Nəşriyyatda bu sahədə təhsil alan, bu işi bilən insanlar çalışmalıdır. Bu baxımdan BDU-da 1991-ci ildən kitabşünaslıq, kitab nəşri ixtisası üzrə kadrlar hazırlanmağa başlanıb. Kitabşünaslıq və nəşriyyat işi kafedrasından indiyədək hər il 25 nəfər mütəxəssis məzun olur. Hər bir sahədə kadrın olması əsas amildir. Bu gün kadr problemi ilə əlaqədar kitabların çapında böyük səhvlər var. Məsələn, orfoqrafik səhvlər var və yaxud ölkə əhalisi 9 milyon olduğu halda 7 milyon göstərilir və s. Beləliklə, kadr çatışmazlığı ilə bağlı tədris, dərs vəsaitləri, monoqrafiya, elmi-kütləvi kitabların dil və üslubu bərbad haldadır. Çünki kitablar redaktə olunmur. Dünya təcrübəsi göstərir ki, hər bir nəşriyyatda 3-5 redaksiya olur. Məsələn, sovet dövründə "Azərnəşr"də "İctimai-siyasi ədəbiyyat", "Kənd təsərrüfatı ədəbiyyatı", "Elmi-kütləvi ədəbiyyat", "Uşaq ədəbiyyatı" və s. redaksiyalar vardı. Bu gün nəşriyyatda məsələn, “Bədii ədəbiyyat redaksiyası”nda bu sahəni bilən, onu redaktə edən kadrlar olmalıdır. Bu gün kitablarda çoxlu səhvlər gedir. Hər hansı bir nəşriyyata gedib onun maddi-texniki bazası ilə bağlı məlumat almaq istədiyimi deyərkən kompyuterdə iki nəfər yığıcı, mühasib və bir də rəhbəri görürəm, nə redaksiya, nə də mətbəə var. Bu, nəşriyyat demək deyil. Ona görə də kitablarda bu qədər çatışmazlıqlarla rastlaşırıq. Bəzilərinin mətbəəsi var və onu nəşriyyat adlandırırlar. Mətbəə kitabı sifarişlə çap edən poliqrafiya müəssisəsidir. Bu nöqteyi-nəzərdən onlar mətbəə ilə nəşriyyatı qarışdırırlar. Çünki onlar ixtisasçı deyillər. Hər ikisi birlikdə olan nəşriyyatlar da var. Məsələn, 1922-ci ildə yaranıb 1927-ci ilə qədər fəaliyyət göstərən "Bakı fəhləsi” kooperativ nəşriyyatı sonradan "Azərnəşr"ə birləşdirilib. Bu nəşriyyatın özünün kitab mağazası, mətbəəsi və s. olub. Hələ inqilabdan əvvəl bizdə "Orucov qardaşları" nəşriyyatı olub. Üç qardaş tərəfindən 1906-cı ildə bu nəşriyyat yaradılıb və onların özlərinə məxsus mətbəəsi və kitab mağazası olub.
Əvvəllər məzunları
təyinatla göndərirdilər, indi bu yoxdur. Gərək
ehtiyacı olan qurumlar kadrla bağlı BDU-nun rəhbərliyinə
müraciət etsinlər. Fizika, kimya və digər sahələrdə
kadrlarla bağlı bizə müraciətlər olur, ancaq nəşriyyatlar
bunu etmirlər. Bir vaxtlar mən bu sahədə
ixtisasartırma kursu təşkil etmişdim. Bizim kitab ticarətində
çalışanların ali təhsili olmadığından
onlara ixtisasartırma kursu keçirdik. İndi naşirlər
kadr üçün müraciət etmir. Məzunlar isə
müxtəlif yerlərdə iş axtarmalı olurlar. Gərək
kadrı öz təyinatına görə istifadə edəsən.
Onda dövlət çox səmərə götürə
bilər. Naşirlər tələb qoysalar, biz onu yerinə
yetirərik.
- Son zamanlar oxucuların
azalması ilə bağlı fikirlər səslənir. Sizcə,
kitaba tələbat azalıb, yoxsa kitab?
- Sovet dönəmində ölkəmizdə 1200-1400 adda kitab buraxılırdısa, indi 4 min adda kitab buraxılır. Ancaq indi kitabın tirajı azalıb. Bunun səbəbi isə odur ki, kitab mağazası yoxdur, satılmır, yayılmır və buna görə də tiraj artmır. Ancaq kitabın oxucusu heç zaman azalmır. Çünki kitabı ən çox oxuyan üç zümrə var ki, bunlardan biri şagird və tələbə kontingentidir və hazırda ölkədə 3 nəfərdən ikisi təhsil alır. İkinci zümrə elmlə məşğul olan alimlərdir və nəhayət, 3-cü qrup kitaba maraq götərən geniş oxucu auditoriyasıdır. Bu gün oxucu sayı deyil, kitabın oxucuya çatdırılması problemə çevrilib. Əvvəllər bütün kitabxanalara, o cümlədən M.F.Axundov adına Kitabxanaya məcburi nüsxə SSRİ-nin hansı respublikasında, ölkəmizdəki hansı nəşriyyatda çap olunmasından asılı olmayaraq çatdırılmalı idi. İndi bizdə "Kitabxana işi", "Nəşriyyat işi" haqda qanun var və dövlət bu sahəyə qayğı göstərir, amma naşirlər kitabları təqdim etmirlər. Müəlliflər də, naşirlər də kitabın hər birindən 4 nüsxə verməli olsalar da, heç 2 nüsxə də vermirlər. Kitab orada olmadığına görə oxucu getmir və axtarıb tapa bilmir. Məsələn, 100 il bundan öncə fəaliyyət göstərən "Orucov qardaşları" xüsusi nəşriyyat kataloqu buraxırdı ki, burada nəşriyyatın çapdan buraxdığı kitabların siyahısı öz əksini tapırdı və onu kitab mağazalarına göndərirdi. Sonralar bizdə dövlət nəşriyyatı - "Elm” nəşriyyatı, "Maarif” nəşriyyatı, "Gənclik” nəşriyyatı var idi və onlar kataloqlar buraxırdı. İndi bu yoxdur. Bəs kitabla bağlı məlumatı biz hardan əldə edək? Mən bir alim kimi bu məlumatları çox çətinliklə əldə edirəm. Bu gün həm kitab bolluğu, həm də kitab yoxluğu var. Bütün bunlara baxmayaraq 9 milyon ölkə əhalisinin 6 milyonu kitab oxuyur.
- Bəs kitabın yayılmasında müəlliflər niyə maraqlı deyillər?
- Bir vaxtlar
topdansatış, bir də pərakəndə satış var
idi və nəşriyyatlar kitab buraxanda topdansatış idarəsi
onu alırdı və pərakəndə satışa verirdi.
Nəşriyyat bu prosesi həyata keçirirdi və müəllif
üçün də rahat idi. İndi bu qurum
olmadığından məcbur qalır ki, ya təklif etsin, ya
küçədə kitab satan birinə, ya da mağazaya
versin. Əgər sistem olsa, yaxşı nəticəsi olar. BDU-nun bir kitab mağazası
açılıb və universitetdə çap olunan kitablar
burada satılır. Kitab mağazası ən gəlirli sahədir.
Sovet dövründə fəaliyyət göstərən
mağaza rəhbərlərinin hamısı çox gözəl
həyat şəraitinə malik idi. Məsələn,
Almaniyada "Şippinger” nəşriyyatı və dünyada
bu kimi digər çox böyük nəşriyyatlar var ki,
onların gəlirləri milyard dolları keçir. Müasir
dövrdə kitabın müxtəlif formaları
buraxılır və buraya kasset kitablar da aiddir, yaxud
mikrokartlar var ki, kitabın mətni buraya yazılır. Yaponlar
kitabları sintetik materialdan hazırlayırlar və istənilən
vaxt kitabı yuyub yenidən buraxırlar. Kitab istehsalında
böyük irəliləyiş var. Bizdə bu sahədə
problem olsa da, mən inanıram ki, tədricən bu öz həllini
taracaq. Dövlətin kitab çapı ilə bağlı
böyük qayğısı oldu. Ölkə
başçısı tərəfindən 2004-cü ildə
imzalanan latın qrafikası ilə kütləvi nəşrlərin
buraxılışı haqqında sərəncamın
böyük əhəmiyyəti oldu. Çünki
kitabxanalarda latın qrafikalı ədəbiyyat yox dərəcəsində
idi. Bu sərəncamdan sonra buraxılan kitabların tirajı
da artdı və 20-25 min nüsxə ilə kitab
buraxılır. Bu kitablar pulsuz olaraq kitabxanalara göndərilir
və bu, heç bir ölkədə yoxdur. Heydər Əliyev
kitaba böyük qiymət verərək deyirdi: "Kitab nəşri
hər bir ölkənin, xalqın mədəniyyətində,
ümumiyyətlə, mənəvi, ictimai həyatında
çox görkəmli yer tutur. Hər birimiz ilk növbədə
ancaq kitab vasitəsilə təhsil, elm almışıq, həyatda
yaşamağa, fəaliyyət göstərməyə
hazırlaşmışıq. Ona görə də hər
birimiz kitablara borcluyuq. Həm kitabları yazıb-yaratmaq, həm
də onları nəşr etmək əsas vəzifələrimizdən
biridir. Bunun üçün mümkün olan bütün tədbirləri
görməliyik". Mən ulu öndərin bu fikirlərini
bütün kitablarımda yazmışam, çünki
bunlardan nəticə çıxarmaq lazımdır.
Nigar
Palitra. -2010. -14 may. – S.6.