Təbii fəlakətin nəticələri operativ və kompleks şəkildə aradan qaldırılır

Xəbər verildiyi kimi, baş verən təbii fəlakət nəticəsində qısa müddət ərzində bir çox rayonda subasma və sürüşmə halları baş vermişdir. Təbii fəlakət baş verdikdən dərhal sonra Azərbaycan Prezidenti İlham Əliyev bütün məsələləri nəzarətə götürüb. Daşqın baş verən kimi, dövlət başçısının rəhbərliyi ilə iki müşavirə keçirilib, təbii fəlakətin nəticələrinin aradan qaldırılması üçün dövlətin bütün resursları səfərbər edilib. Müvafiq dövlət qurumlarına məsələ ilə əlaqədar olaraq konkret tapşırıqlar verilib.

Beləliklə, bu tapşırıqların əsasında vaxtında təxirəsalınmaz tədbirlərin həyata keçirilməsi nəticəsində daha böyük faciələrin qarşısı alınıb. Fəlakət bölgəsində operativ qərargah yaradılıb, genişmiqyaslı bəndbərkitmə işlərinə başlanıb, zərər çəkmiş sakinlər çadır şəhərciklərinə köçürülüb, onların ərzaq, sağlamlıq, təhlükəsizlik və digər məsələləri qısa zamanda həll edilib. Təbii fəlakətin nəticələrinin aradan qaldırılması və təsirinin azaldılması sahəsində həyata keçirilən qəti tədbirlər vəziyyəti yaxşılaşdırıb. Bununla da Azərbaycan ictimaiyyəti gördü ki, Azərbaycan dövləti istənilən çətinliyin öhdəsindən gəlmək iqtidarındadır. Prezident İlham Əliyev hər bir vətəndaşın probleminə öz şəxsi problemi kimi yanaşdığını, hər bir vətəndaşın Prezidenti olduğunu əyani şəkildə nümayiş etdirdi. Prezident operativ olaraq təbii fəlakət baş verən rayonlara səfər etdi, təbii fəlakətin nəticələri ilə əyani şəkildə və yerində, təfsilatı ilə tanış oldu. Bu, dövlət başçısının təbii fəlakətin aradan qaldırılması, zərər çəkmiş vətəndaşların kompensasiya edilməsi işini çox ciddi şəkildə və birbaşa nəzarətdə saxladığını bariz göstərir. Qeyd etmək lazımdır ki, məhz bu məsələdə dəqiq koordinasiya və ciddi tədbirlərin nəticəsidir ki, hazırda Azərbaycanın müvafiq qurumları əlindən gələni edirlər ki, dəymiş ziyan aradan qaldırılsın. Görülən tədbirlər nəticəsində daha böyük fəlakətin qarşısı alındı. Bütün müvafiq qurumlar öz vəzifə borcunu ləyaqətlə yerinə yetirirlər. Bu baxımdan da onların fəaliyyəti yüksək qiymətləndirilməlidir. Dövlətin bu məsələdə zərər çəkmiş vətəndaşlarını tam mənada təminata götürməsi də bu işdə görülən ən önəmli tədbirlərdəndir. Belə ki, təbii fəlakətin nəticələri aradan qaldırılandan sonra dəymiş ziyan hesablanacaq, insanlara köməklik göstəriləcək, onlar üçün yeni evlər tikiləcək. Göründüyü kimi, zərər çəkmiş insanların zəruri və sabit yaşayış şəraiti bərpa ediləcək. Prezident təbii fəlakətə həsr olunmuş müşavirədə, eləcə də bu məsələ ilə bağlı səyyar müşzvirədə bildirib ki, təbii fəlakətlə bağlı köçürülən ailələrə əlavə diqqət və qayğı göstərilməlidir: “Hər bir məmur, vəzifəli şəxs elə hesab etməlidir ki, onun evi uçub, onun ailəsi evsiz-eşiksiz qalıb. Hər kəs bu məsələlərə böyük vicdanla yanaşmalıdır, biganə olmamalıdır”. İnsanların köçürülməsi, onların müvəqqəti məskunlaşdırılması, ərzaqla, tibbi xidmətlə təmin edilməsi məsələləri operativ şəkildə həll olunur. Eləcə də sahilbərkitmə, bəndbərkitmə işlərinin sürətlə davam etdirilməsinə ciddi nəzarət həyata keçirilir. Bununla bağlı zəruri texnika, canlı qüvvə səfərbər olunub. Fəlakətin fəsadlarının aradan qaldırılması üçün uçan evlərin bərpası ilə iş bitmiş hesab edilmir. Belə ki, baş vermiş və gələcəkdə də baş verə biləcək hər hansı təbii fəlakətlə bağlı bütün məsələlərin kompleks şəkildə öz həllini tapması dövlət başçısı tərəfindən prinsipial olaraq qarşıya qoyulub. Dövlət başçısının bütün məsələlərin kompleks şəkildə həll olunması ilə bağlı tədbirlər planı hazırlanması tapşırığını qoyması fəlakətdən gələcəkdə də sığortalanma üçün düşünülmüş bir proqramın olacağını deməyə əsas verir. Gələcəkdə də təbii fəlakətlərdən qorunmaq üçün yeni strateji yanaşma tətbiq ediləcək. Prezident bu barədə bildirib: “Biz elə etməliyik ki, gələcəkdə özümüzü təbii fəlakətdən maksimum dərəcədə qoruya bilək. Azərbaycanda elə idarəçilik sistemi yaradılıb ki, hər bir qurum və hər bir qurumun rəhbəri istənilən anda öz vəzifə borcunu bilir və çalışır ki, onları şərəflə yerinə yetirsin. Bütün qurumlar vahid idarəçilik formatında işləməli, hamımız birlikdə çalışmalıyıq”.

Məlumat üçün onu da qeyd edək ki, Prezidentin sözügedən sahədə ciddi tapşırıqlarından və birbaşa nəzarətindən sonra müxtəlif dövlət strukturları və nazirliklər fəlakətin nəticələrinin aradan qaldırılması üçün güclərini səfərbər ediblər. Fəlakətlə bağlı göz altına alına bilən hər hansı kiçik risklə bağlı olaraq dərhal operativ tədbirlər görülür. Qurumlar bunun üçün tam hazır olduqlarını işdə sübut edirlər. Məsələn, Azərbaycan Kənd Təsərrüfatı Nazirliyi yanında Dövlət Baytarlıq Xidmətinin həkim briqadası fəlakət zonasına ezam olunub. Buna Sabirabadın bəzi kəndlərində heyvanlar arasında yoluxucu xəstəliklərin yayılması barədə xəbərlərin dolaşması səbəb olub. Fəlakət zonasına səfər edən Dövlət Baytarlıq Xidmətinin rəisi Sialə Rüstəmova isə jurnalistlərə açıqlamasında yayılan məlumatların təsdiqini tapmadığını bildirib: “Analizlərin nəticəsi olaraq deyə bilərəm ki, heyvanlarda hər hansı infeksion xəstəlik aşkar edilməyib”.

Tibbi yardım baxımından da vəziyyət tam qənaətbəxşdir. Fəlakət zonasında olan səhiyyə naziri Oqtay Şirəliyev deyib ki, baş verən təbii fəlakətlə bağlı çadırlarda məskunlaşan insanlara hər cür tibbi yardım göstərilməkdə davam edir: “Fəlakət bölgəsində su basan ərazilər dezinfeksiya olunur. Artıq bir sıra insanlar öz evlərinə qayıdır. Əhali arasında əvvəlki təlaş, stress aradan qalxıb. İnsanlar görürlər ki, bu qədər işlər görülür. Bütün bunlar onlara sakitlik gətirir. Cənab Prezident çadırda məskunlaşan insanlarla görüşdü, bu da insanların ümidli olmasına təkan verdi. Cənab Prezidentin göstərişi ilə bölgələrdə yaradılan tibbi infrastruktur imkan verdi ki, burada tibbi yardım göstərmək üçün kifayət qədər imkanlarımız olsun”.

Nazir fəlakət zonasında bu günə kimi hər hansı yoluxucu xəstəliyin qeydə alınmadığını da deyib. İnsan tələfatının olmaması üçün çox ciddi və məsuliyyətli tədbirlər görülür. Sevindirici haldır ki, xarici ölkələrdə daşqınlar zamanı çoxlu tələfatlar qeydə alındığı halda, bizdə belə itki yoxdur. Son bir həftə ərzində isə fəlakət zonasında 65 nəfər xilas edilib. Bu barədə Fövqəladə Hallar Nazirliyinin rəsmi internet səhifəsində məlumat yerləşdirilib. Kürün səviyyəsinin qalxması ilə bağlı 7-14 may 2010-cu il tarixlərində Dövlət Sularda Xilasetmə Xidməti tərəfindən görülən tədbirlər nəticəsində su basmış ərazilərdən köməksiz vəziyyətdə qalan 65 nəfər xilas olunub.

“Fermerlərə də ziyana görə yardım olunacaq”

Onu da qeyd edək ki, sel-daşqınlar nəticəsində 18,4 min hektar taxıl sahəsinə dəymiş ziyana baxmayaraq bu il çörək qıtlığı baş verməyəcək. Bu barədə Kənd Təsərrüfatı Nazirliyinin mətbuat katibi Murtuzəli Hacıyev xəbər verib: “Çünki, havaların yağmurlu keçməsi dəmyə zonalarında dənli bitkilərin inkişafı üçün əlverişli zəmin yaradıb. Ona görə də bu il biz dəmyə sahələrindən məhsuldarlığı daha çox gözləyirik. Əgər hava şəraiti imkan verərsə, biz gözlədiyimiz proqnozu əldə edə biləcəyik”. M.Hacıyevin sözlərinə görə, seldən ziyan çəkmiş fermerlərə dəyən vəsaitin miqdarı hazırda Dövlət Komissiyasında hesablandıqdan sonra fermerlərə yardım olunacaq. İkinci əkin üçün taxıl toxumu fermerlərə pulsuz veriləcək. Ev təsərrüfatına dəyən zərərin də hesablanması aparılır və bununla bağlı kompensasiya veriləcəyi gözlənilir.

Müdafiə Nazirliyi köməyə daha 200 nəfər göndərdi

Qeyd edək ki, Müdafiə Nazirliyinin əlavə olaraq daha 200 nəfərlik əsgər və zabit heyəti Kür çayının daşması nəticəsində baş vermiş təbii fəlakətin fəsadlarını aradan qaldırılması işinə cəlb olunub. Hazırda general-leytenant Kərim Vəliyevin rəhbərlik etdiyi 1200 nəfərlik hərbi qüvvə bölgədə problemlərin aradan qaldırılmasında bilavasitə iştirak edir.

Çadırda 8 yeni doğulmuş körpə

Fəlakət zonasından olan son xəbərə görə, Şirvan şəhərində Sabirabadın su basmış kəndlərinin əhalisi üçün qurulmuş çadırlarda məskunlaşmış insanlar arasında ağır infeksiya xəstəlikləri, ilanvurma qeydə alınmayıb. Bu barədə çadır düşərgəsindəki tibb məntəqəsinə rəhbərlik edən Şirvan şəhər Təcili və Təxirəsalınmaz Tibbi Yardım Stansiyasının baş həkimi Mehparə Səmədova məlumat verib: “Tibb məntəqəsinə müraciət edən şəxslərə elə oradaca ilk yardım göstərilir, onlar pulsuz dərmanla təmin edilir. Nisbətən ağır xəstələr, o cümlədən bütün hamilə qadınlar Şirvan şəhər Xəstəxanasına yerləşdirilib. Hamilə qadınların sayı 24 olub. Onlardan 8-i körpələrini Şirvan şəhər Xəstəxanasında dünyaya gətirib. Digər hamilə qadınlardan ikisi çadır düşərgəsinə buraxılıb, 14 qadın isə hazırda xəstəxanada yatır”.

İlkin Ağayev

Palitra. -2010. -18 may. – S.4.