Qlobal iqlim dəyişikliyi planetimiz üçün təhlükə
yaradır
Bəşəriyyətin
inkişafının bütün dövrlərində insanlar
təbii sərvətlərdən öz sosial tələbatlarını
təmin etmək məqsədilə istifadə etmiş və
onlardan lazımınca bəhrələnmişlər. Lakin həm
insanın antropogen fəaliyyəti, həm də təbii fəlakətlər
nəticəsində Yer, onun atmosfer və hidrosfer təbəqələri
tullantılarla həddindən çox çirklənmiş və
ekoloji tarazlığın normal ahəngi tamamilə
pozulmuşdur. Dünyanın, o cümlədən
respublikamızın torpaq ehtiyatları eroziyaya
uğradığına və şoranlaşdığına
görə onun xeyli hissəsi yararsız hala
düşmüş və məhsuldarlığını
itirmişdir.
Su ehtiyatları da öz
normal ekoloji durumunu itirərək onun bioloji müxtəlifliyi
zəifləmiş, bəzi planktonların isə nəsli kəsilmişdir.
Sənaye, kənd təsərrüfatı müəssisələri,
dünya müharibələri, nüvə-raket
sınaqları, kosmosda aparılan elmi tədqiqatlar, nəqliyyat
vasitələri, terrorçuluq aksiyaları, eləcə də
planetimizdə baş verən təbii fəlakətlər Yer
təbəqəsi, dünya okeanı (bütün okean, dəniz,
göl və çayların məcmuu) ilə yanaşı həm
də Yerin atmosferini zəhərli, zərərli qazlarla
(karbon, azot, kükürd oksidləri) çirkləndirərək
onlarda çox ciddi ekoloji fəsadlar törətmişdir. Həmin
neqativ fəsadların yaranmasında ənənəvi-klassik
yanar yanacaq növlərindən (neft, onun məhsulları, qaz,
daş, kömür, oduncaq və s.) XIX-XX əsrlərdə
maksimum istifadə olunması çox mühüm rol
oynamış və qlobal iqlim dəyişmələri,
parnik-istilik effekti, ozon təbəqəsinin deşilməsi və
pəncərənin (dairənin) əmələ gəlməsi,
turşulu yağışların peyda olması ilə nəticələnmişdir.
Qeyd olunan ekoloji fəsadlar isə hazırda bəşəriyyət
üçün olduqca qorxulu təhlükə mənbəyinə
çevrilmişdir.
XX əsrdə atmosferdə
karbon qazının (CO2) konsentrasiyası 13%, toz bulanması 20%
artmış, Yer səthinin işıqlanması isə 10%
azalmışdır. Hər il klassik yanar yanacaqlardan
müxtəlif məqsədlərlə istifadə olunması
nəticəsində Yer atmosferinə 20 milyard ton CO2
qarışır, havada karbon qazının miqdarı 0,5, metan
- 0,9, azot oksidləri - 0,25, hallogenlər isə 4% normadan artıq
olur. Həmin qazların təsirindən yaranan parnik effekti
qlobal iqlim dəyişmələri ilə müşayət
olunduğu üçün havanın orta illik temperaturu
0,8-10C, Arktika, Qrenlandiya və Antarktika yarımadasında isə
2-2,50C artmışdır. Havanın temperatur tərəddüdü
və iqlim dəyişmələrinin bu sürətlə
dinamik inkişaf etdiyi təqdirdə həmin göstəricinin
yaxın gələcəkdə 60C olacağı gözlənilir.
Böyük və çox
ciddi narahatlıq törədən odur ki, Yer kürəsində
gündən-günə əhatə və təsir dairəsi
genişlənən qlobal iqlim dəyişkənliyi planetimizin
mövcud buzlaqlarının əriməsi təhlükəsini
yaradır. Həmin buzlaqlar planetimizdə hava cərəyanının
tənzimlənməsində, iqlim və onun amillərinin
formalaşmasında, eləcə də biosferin və ekosistemlərin
homeostazının (sabitliyinin) təmin olunmasında və şirin
su ehtiyatının toplanmasında (dünyanın şirin su
ehtiyatının 90%-i, planetin buzlaqlarının isə 85%-i məhz
Antarktida materikində toplanıb) misilsiz, planetar və bəşəri
əhəmiyyət kəsb edir. 1945-ci ildən indiyədək
olan müddət ərzində Antarktika yarımadasında orta
illik temperaturun 2,50C artması nəticəsində
buzlağın əriməsi pinqvinlərin
populyasiyasının 33% azalmasına səbəb olmuş,
1980-ci ilə nisbətən 2007-ci ildə buzlaq sahə 40%-ə
qədər azalmışdır. Antarktida materikindən, həm
də Antarktika yarımadasındakı buzlaqlardan iri aysberqlərin
qoparaq ayrılması məhz qlobal istiləşmənin təsirindən
baş vermişdir. Antarktidanın qərb buzlaqlarından 1,5
milyon il əvvəl Vilkins (sahəsi 570km2) və 2002-ci ildə
Larsen (sahəsi 5,5 min km2) aysberqlərinin təbii buzlaqdan
ayrılması və sürətlə əriməsi ən
mühüm təbii ekoloji fəlakət sayılır.
Qlobal istiləşmədə
bəzi başqa amillər (Günəşdə baş verən
partlayışlar, radiasiya fonu, Yerin maqnit sahəsinin və xəyali
oxunun, Yerlə Günəş arasındakı məsafənin
dəyişilməsi, zəlzələ və vulkan
püskürmələri və s.) iştirak etsə də, bu
prosesdə aparıcı amil parnik effektidir. Alimlərin
fikrincə, Antarktida materikinin buz təbəqəsinin tamamilə
əriməsi havanın temperaturunun indikindən 80C artıq
olması ilə nəticələnər, Yerdə iqlimin
kontinentallaşması yaranar və ətraf mühitin biotik
(canlı) aləminin mövcudluğu üçün
qarşısıalınmaz böhran və fəlakətlər
yaranar, bəşəriyyət məhv olma təhlükəsi
ilə üzləşər. Dünyanın buz təbəqəsinin
indiki sürətlə əriməsi nəticəsində Yer
kürəsində suyun səviyyəsinin XXI əsrin
ortalarına qədər 0,5-1 m, sonunda isə 2 m-dən
çox artacağı və planetimizin ərazisinin bir hissəsinin
su altında qalacağı gözlənilir. Prosesin bu cür
geniş vüsət alması və onun tezliklə
qarşısının alınmadığı təqdirdə
buzlaqların tamamilə əriməsi nəticəsində
suyun səviyyəsinin 80-90 m qalxması təhlükəsi
gözlənilir. Ona görə də buzlaqların
hamısının qlobal iqlim dəyişkənliyinin təsirindən
qorunması, atmosferin parnik effekti yaradan qazlarla çirklənməsinin
qarşısının alınması artıq bütün
ölkələr, bəşəriyyət üçün
beynəlxalq və planetar əhəmiyyətli məsələ
kimi qarşıya qoyulur.
Antarktida planetimizdə mövcud olan
materiklərdən ən hündürü
(hündürlüyü- 20-40 m, sahəsi 52,5 milyon/km2,
ümumi həcmi- 24 milyon/km3) və soyuğu olmaqla onun
buzlaqlarının altında plankton, xüsusilə su
yosunları, şibyələr və mineral duzlarla zəngin
olan 140 göl vardır. Antarktida buzlaqlarında həm də
dünyanın nadir bioloji inciləri sayılan su heyvanları,
100 milyondan artıq müxtəlif növə mənsub olan
quşlar (ən çox isə Adel pinqvinləri), balinalar,
suitilər, kalmarlar, osminoqlar və s. yaşamaqla onun daimi
sakinləridir. Hazırda Antarktidada 80 min dəniz pişiyi, 200
min dəniz fili, 15 min suiti, 220 min Ross suitiləri, 730 min Ueddell
suitiləri, 10-a qədər balina növləri, eləcə
də xeyli dəniz bəbirləri və xərçəngyeyənlər
yaşayır. Burada yaşayan nadir balina növlərinə
göy balina, donqar, sinval, kaşatka, kaşalot, finval və s.
aid olmaqla onların ən nəhəngi mavi balinadır
(uzunluğu 30 m, çəkisi 160 ton). Əfsuslar olsun ki, onlar
əvvəllər bütün okean və açıq dənizlərdə
yaşadığı halda hazırda yalnız Antarktida
sularında məskunlaşmışlar və get-gedə
sayları ildən-ilə sürətlə azalmağa
başlayıb. Bu isə dünyanın bioloji müxtəlifliyi
üçün olduqca acınacaqlı və arzuolunmaz
haldır. Alimlər son zamanlar müəyyən etmişlər
ki, Antarktidada indiyədək heç bir ekoloji təsnifata və
elmə məlum olmayan 70-ə qədər yeni bioloji növ
yaşayır. Əlbəttə, təbiətin bu cür qiymətli,
nadir incilərini parnik effekti törədən qazlara qurban vermək
olmaz və bu yolverilməz haldır. Yer kürəsinin həmin
təbii planetar və bəşəri əhəmiyyətli
soyuducusunun əriməsinin, çoxlu sayda buz
dağlarının (aysberqlərin) qopub ayrılmasının
qarşısının alınmasının ən ümdə
yolu birinci növbədə qlobal istiləşmənin və
iqlim dəyişkənliyinin, xüsusilə parnik effekti
yaranmasının əsas səbəbi olan yanar yanacaqların
istifadəsi zamanı atmosferə atılan qazların
konsentrasiyasının minimal səviyyəyə
çatdırılması üçün müvafiq
mübarizə tədbirlərinin görülməsidir. Əks
təqdirdə parnik effekti yaradan qazların təsirindən
planetimizin təbii soyuducusu sayılan Antarktidanın və digər
buzlaqların əriməsi geniş vüsət alacaq və bəşəriyyətin
mövcudluğu sual altına düşəcəkdir. Buna
görə də bu prosesin qarşısının
alınması bütün dünya ölkələri rəhbərlərini,
alimləri, ictimaiyyəti, nüfuzlu beynəlxalq təşkilatları
ciddi narahat etməli və hamı bəşəriyyət və
onun gələcəyi üçün ən təhlükəli
ekoloji böhranlar, onların ağır fəsadlar törədən
qlobal istiləşmə, iqlim dəyişmələri ilə
mübarizəyə qoşulmalıdır. Bu,
günün ən planetar əhəmiyyətli, vacib və
prioritet tələbidir.
Buzlaqların, xüsusilə Antarktidanın ekoloji durumunun zəifləməsi və pozulması bəşəri əhəmiyyət kəsb edir. Çünki buzlaqlarda insan üçün çox vacib olan bioloji amillər və böyük mineral xammal ehtiyatları vardır. Antarktida materikində bəşəriyyətin gələcəyi üçün çox vacib zəngin mineral xammal ehtiyatı - daş kömür, qurğuşun, molibden, mis, sink, dəmir filizi, qrafit, şelf (sahilyanı) zonalarının təbii çökmə süxurlarında isə qaz və neft yataqları mövcuddur. Yer kürəsinin buzlaqları, xüsusilə Antarktida qitəsi ozon təbəqəsində baş verən pozulmaların, iqlim dəyişmələrinin və onun tənzimlənməsi üçün elmi-tədqiqat işləri və eksperimentlərin aparılması, ümumilikdə isə planetimizin hazırkı və gələcək iqlim xəritəsinin öyrənilməsində olduqca böyük əhəmiyyətə malikdir. Hazırda Ay, Mars və başqa planetlərdə gedən prosesləri öyrənmək üçün Antarktidada quraşdırılan kosmik cihazlar və texnologiyalar elmi sınaqdan keçirilir və bu sahəyə xüsusi önəmli yer verilir. Bu baxımdan respublikamızın tarixində ilk dəfə olaraq Azərbaycan-Antarktida ekspedisiyasının 2008-ci il dekabrın 24-də və 2009-cu il yanvarın 11-də Cənub Qütbünə tarixi səyahəti bütün dünya alimləri üçün nümunə və örnək olmalı, bütün xalqımız isə bununla fəxr etməlidir. Ekspedisiya 2009-cu il yanvarın 11-də ekologiya və təbii sərvətlər naziri Hüseynqulu Bağırovun rəhbərliyi ilə Antarktidanın 5140 metr hündürlüyə malik olan Elsuort buz dağının Vinson massivinin (dağ silsiləsinin) pik nöqtəsinə qalxaraq respublikamızın milli bayrağını, ulu öndər Heydər Əliyevin və Azərbaycan Respublikasının Prezidenti İlham Əliyevin barelyeflərini əvvəlcə orada, sonra isə 2009-cu il yanvarın 25-də Cənub Qütbündə ucaltdılar. Onlar olduqca əlverişsiz və ekstremal mühitdə və hava şəraitində (-550C temperaturda) 500-dən çox meteoroloji müşahidələr aparmaqla xeyli miqdarda süxur və mineral nümunələri toplayaraq kameral və digər müasir analizlər vasitəsilə Cənub Qütbünün geoloji quruluşu, tektonikası, maqmatizmi barədə yeni müfəssəl məlumatlar əldə etmişlər. Bu aksiya bütün İslam və türk ölkələrindən Cənub Qütbünə olan ilk səyahət və yürüş idi. Bütün dünya ölkələrinin alimləri Azərbaycan ekspedisiya qrupunun bu tarixi, planetar əhəmiyyətli təşəbbüsünə qoşulmalı və öz elmi-praktiki töhfəsini verməlidir.
Eldar Hüseynov.
Palitra. -2010. – 18 may. – S.11.