Təbriz səfəri

Əvvəlcədən əldə edilmiş razılığa əsasən, Naxçıvan Dövlət Universitetinin müəllim və tələbələrindən ibarət heyəti Təbriz Dövlət Universitetində olub. Qonaqlar əvvəlcə universiteti ziyarət ediblər. İkitərəfli əməkdaşlıq haqqında bir il əvvəl bağlanmış müqavilənin yerinə yetirilmə vəziyyəti müzakirə olunub.

Naxçıvan Dövlət Universitetinin rektoru, akademik İsa Həbibbəyli ilə Təbriz Universitetinin rektoru, professor Məhəmməd Ələvi həyata keçirilmiş tədbirlər barədə fikir mübadiləsi aparıb və qarşıda duran vəzifələri müəyyən ediblər. Təbriz Universitetinin rektoru Naxçıvan Dövlət Universitetinə dəvət olunub. Təbriz Dövlət Universitetinə xatirə hədiyyəsi təqdim edilib. Professor-müəllim heyətinin nümayəndələri Təbriz Dövlət Universitetinin kimya, biologiya və fiziologiya yönlü laboratoriyalarında olublar. Naxçıvan Dövlət Universitetinin nümayəndə heyətinin İranın İmam Rza və Şəms xəstəxanaları ilə tanışlığı da maraqlı keçib. Müəllim və tələbələr həmin xəstəxanaların uşaq xəstəlikləri şöbəsinin fəaliyyəti ilə tanış olmaq imkanı qazanıblar. Naxçıvanlı tələbələr ümumi terapiya və infeksion xəstəliklər şöbələrində, habelə hemodializ şöbəsində olublar. Pediatriya kafedrasının müdiri Adil Mirişli, Naxçıvan MR-in Əməkdar həkimi, universitetin Ümumi təbabət kafedrasının müdiri, tibb elmləri namizədi, dosent Malikəjdər İbrahimov xəstəxanalarla tələbələrin tanışlığından razı qaldıqlarını bildiriblər. Eyni zamanda Naxçıvan Dövlət Universitetinin heyəti Təbriz şəhərindəki Tibb Elmi-Tədqiqat Mərkəzində də olub. Onlara elmi-tədqiqat mərkəzinin ayrı-ayrı laboratoriyaları və buradakı nanotexnologiya mərkəzlərinin işləri barədə məlumatlar verilib. Naxçıvan Dövlət Universitetinin elmi işlər üzrə prorektoru, fizika-riyaziyyat elmləri namizədi, dosent Anar Kazımov Naxçıvan Dövlət Universitetinin anatomiya, fiziologiya və tibb ixtisasları üzrə alimlərinin Təbriz Tibb Mərkəzi ilə əlaqələrinin yaradılmasının əhəmiyyətindən söz açıb. Təbriz Tibb Elmi-Tədqiqat Mərkəzinin rəhbərliyi Naxçıvan Dövlət Universitetinin ixtisaslı mütəxəssislərini bu ilin payızında həmin mərkəzdə keçirilməsi nəzərdə tutulan Farmakologiya konfransına dəvət edib.

Heyət Təbriz şəhərinin tarixi yerlərini ziyarət edib. İran İslam Respublikasının Naxçıvandakı Baş konsulluğunun əməkdaşları müəllim və tələbələri Təbriz şəhərinin tarixi-memarlıq abidələri və müasir inkişaf səviyyəsi ilə tanış ediblər. Bu cür qarşılıqlı səfərlərin vaxtaşırı keçirilməsi barədə razılıq əldə edilib.

Qeyd edək ki, bundan əvvəl Naxçıvan Dövlət Universitetinin müəllim və tələbələri Təbriz şəhərindəki maşın və traktor zavodlarında təcrübə keçib, şəhərdəki Memarlıq və Bərpa İşləri İdarəsinin iş təcrübəsini öyrənib, Şairlər məqbərəsini və Azərbaycan Tarixi Muzeyini ziyarət ediblər.

Mehriban Sultan

Palitra. -2010. – 25 may. –S.11.