Ekoloji problemlərin ictimaiyyətə
çatdırılmasında KİV mühüm rol oynayır
Prezident yanında KİV-in
İnkişafına Dövlət Dəstəyi Fondunun maliyyə
dəstəyi ilə “Mövqe” qəzeti redaksiyası tərəfindən
həyata keçirilən “Ətraf mühitin mühafizəsi
ilə bağlı ekoloji maarifləndirmədə KİV-lərin
rolunun artırılması” layihəsi çərçivəsində
dəyirmi masa keçirildi.
Tədbiri giriş
sözü ilə “Mövqe” qəzetinin redaktoru İlham Ələsgərov
açaraq ölkədəki ekoloji vəziyyət və bu
istiqamətdə həyata keçirilən tədbirlərlə
bağlı fikirlərini bildirdi. Sonra ekologiya və təbii
sərvətlər naziri H.Bağırov çıxış
edərək hazırkı ekoloji vəziyyət və
mövcud problemlərlə əlaqədar məlumat verdi. Bu
gün aktual məsələlərdən olan ağacəkmənin
ölkə başçısı tərəfindən “xalq hərəkatı”
kimi qiymətləndirildiyini deyən nazir bildirdi ki, bu mövzu
həqiqətən də insanları düşündürməyə
başlayıb: “2001-2002-ci ilə qədər meşələrin
qırılması ilə bağlı mətbuatda yazılara
rast gəlinmirdi. Hazırda artıq bu mövzu geniş
işıqlandırılır. Əgər 8 il bundan öncə
xaricdən 4 milyon manatlıq ağac materialı gətirilirdisə,
indi bu, 85 milyon manat həcmindədir. Yəni Azərbaycan
öz tələbatını yerli yox, xarici material hesabına
ödəyir”. Ümumiyyətlə, son illər nazirlik tərəfindən
daha fəal ağac əkilməyə
başlanıldığını deyən nazir qeyd etdi ki,
dekabr ayında ölkə başçısı da ağacəkmə
mərasimində iştirak edib və bundan sonra Abşeron
yarımadası və ətrafında 1,5 milyon ağac əkilib.
Onun 899 mini məhz ETSN, qalanları isə icra hakimiyyətləri
tərəfindən əkilib. Bütövlükdə ölkədə
8 milyona yaxın ağac əkilib ki, onun 6 milyonu ETSN, 2 milyonu
isə icra hakimiyyətləri, təşkilatlar və məktəblər
tərəfindən əkilib. H.Bağırovun sözlərinə
görə, nazirlik yarananda ağac ehtiyatı 1,5 milyon idi, indi
isə 30 milyondan çoxdur: “Problem isə odur ki, əkilən
ağacların 87 faizi bitir. Biz mövsümün sonunu
gözləyirik və düşünürük ki, bu rəqəmi
95 faizə çatdıracağıq. Çünki suvarma
sistemi olmadan ağac əkdiyimiz yer yoxdur. Harada
çatdırılmayıbsa, indi orada suvarma sistemləri
qurulur. Məsələn, Şamaxı, Salyan, Quba yolunda bu tədbirlər
həyata keçirilir. Heç bir ağac özünə
uyğun olmayan torpaqda bitmir. Ona uzun müddət qayğı
göstərmək lazımdır. Bu da bir faktdır ki,
ayrı-ayrı təşkilatların əkdiyi ağaclarda
problem var”.
Cərimələrə gəldikdə
isə hazırda bu mövzuda problemin hələ də qalmaqda
olduğunu deyən nazir onu da vurğuladı ki, bu gün
Estoniya ətraf mühitlə bağlı cərimələrdən
öz fonduna 11 milyon cərimə toplayır: “Biz 6-7 il ərzində
200 min manatdan 1 milyona indi çatdırmışıq. İnsanlar
yaşıllığa vurduqları ziyanla bağlı cəriməni
ödəməyə cəhd etmir. Bu sahədə ictimai
şüuru dəyişməyə ehtiyac var”.
KİV-in
İnkişafına Dövlət Dəstəyi Fondunun rəhbəri
V.Səfərli bildirdi ki, fond yaranandan 19 istiqamət üzrə
layihə həyata keçirilib ki, onlardan biri də ekologiya
sahəsidir: “Mütəmadi olaraq sahələr üzrə
müsabiqələr elan edilir. Ötən il 5 layihə
olub. Cari ildə isə ekologiya üzrə 4-5 aylıq layihələrin
həyata keçirilməsi nəzərdə tutulub və bu
layihələr fond tərəfindən maliyyələşdirilir.
Bu layihələrdən biri də “Mövqe” qəzetinin layihəsidir
ki, ötən həftə bu layihə çərçivəsində
KİV nümayəndələri Şirvan Milli Parkında
olublar”. Bu tədbirlərin mütəmadi olaraq həyata
keçiriləcəyini deyən fond sədrinin sözlərinə
görə, növbəti tədbir “Altıağac”
qoruğunda olacaq. Yayda isə “Şahdağ”a səfər həzərdə
tutulur. Hazırda ETSN ilə fond əməkdaşlıq şəraitində
çalışır. Məhz bu əməkdaşlıq
çərçivəsində ekologiya sahəsində
müsabiqə elan edilib.
Tədbirin sonunda ekoloji problemlərin araşdırılması, onların ictimaiyyətə çatdırılmasında KİV-in rolunun mühüm önəm daşıdığını deyən nazir bu istiqamətdə fəallığı artırmaqla yanaşı daha dolgun və dəqiq yazılara ehtiyac olduğunu bildirdi. Məhz bu istiqamətdə jurnalistlərin peşəkarlıq səviyyəsini artırmaq üçün nazir KİV-in İnkişafına Dövlət Dəstəyi Fondunun dəstəyilə ETSN-in nəzdində Ekoloji Məktəbin yaradılmasının vacibliyini bildirdi. Qeyd edildi ki, bu məktəbdə sırf ekologiya mövzusunda yazan jurnalistlər hazırlanmalıdır.
Nigar
Palitra. -2010. – 28 may. – S.7.