Həkim-alimin elmi tədqiqatlarının bəhrəsi

Naxçıvan Dövlət Universitetinin elmi kitabxanasında universitetin müəllimi, Naxçıvan MR-ın Əməkdar həkimi, tibb elmləri namizədi, dosent İsa Abdullayevin «Peritonitlər» kitabının təqdimat mərasimi keçirildi. Universitetin rektoru, akademik İsa Həbibbəyli giriş sözündə son illərdə kitabxana rəhbərliyinin yeni nəşrlərin təbliği istiqamətində gördüyü çoxsaylı tədbirləri yüksək qiymətləndirdi. İsa Abdullayevin şəxsi məziyyətlərindən, həkimlik və elmi-pedaqoji fəaliyyətindən ürəkdolusu danışan rektor yeni monoqrafiyanı ana dilində elmi tibbi ədəbiyyata olan tələbatın ödənilməsi istiqamətində mühüm addım kimi dəyərləndirdi.

Tibb fakültəsinin dekanı, pedaqoji elimlər namizədi Bəhruz Məmmədov həkim-alimin tərcümeyi-halından bəhs edərək onun 1978-ci ildən əmək fəaliyyətinə başladığını, 1987-1992-ci illərdə Ə.Nağıyev adına Naxçıvan şəhər Mərkəzi Xəstəxanasının Cərrahiyyə şöbəsinin müdiri, 2004-2007-ci illərdə Naxçıvan MR Səhiyyə Nazirliyinin Tibbi yardımın təşkili şöbəsində baş məsləhətçi cərrah, 2007-2009-cu illərdə Naxçıvan Diaqnostika Müalicə Mərkəzində baş həkimin müalicə işləri üzrə müavini, hazırda isə Cərrahiyyə şöbəsinin müdiri kimi məsul vəzifələrdə çalışdığını qeyd etdi. İsa həkim 1987-ci ildə Moskva Dövlət Tibb İnstitutunda namizədlik dissertasiyası müdafiə edərək tibb elmləri namizədi alimlik dərəcəsi alıb, 2006-cı ildən isə doktorluq dissertasiyası üzərində işləyir. 2003-cü ildən universitetin Tibb fakültəsində baş müəllim kimi çalışan alim 100-ə yaxın elmi, elmi-kütləvi məqalə, metodik vəsait və monoqrafiya, səmərələşdirici təklif müəllifidir. Naxçıvanda laporoskopik cərrahiyyənin yaradılması və inkişafı bilavasitə onun adı ilə bağlıdır. Muxtar respublikanın nüfuzlu həkimlərindən olan İsa Abdullayevin əməyi dövlət tərəfindən yüksək qiymətləndirilib, 2007-ci ildə "Naxçıvan MR-ın Əməkdar həkimi" fəxri adı, 2009-cu ildə isə "Tərəqqi" medalı ilə təltif olunub.

Universitetin Ümumi təbabət və gigiyena kafedrasının müdiri, tibb elmləri namizədi, dosent Malik Əjdər İbrahimov, həmin kafedranın müəllimləri həkim-kardioloq -Süleyman Cəforov və həkim-anestezioloq Bəxtiyar Hüseynov çıxışlarında monoqra-fıyanın qiymətli tədqiqat mənbəyi və tədris vəsaiti olduğunu vurğuladılar. Qeyd olundu ki, nəfis tərtibatlı, qiymətli nəzəri müddəalara, şəxsi təcrübəyə əsaslanan, çoxsaylı xarici və yerli elmi mənbələrə isnadən yazılan yeni nəşr ümumdünya səhiyyəsində qəbul olunası əsərdir. Monoqrafiya abdominal cərrahiyyənin aktual problemlərindən olan peritonit xəstəliyinin etiologiyası, patogenezi, eksperimental modelləşdirilməsi, klinikası, diaqnostikası və kompleks müalicəsindən, müəllifin bu sahədəki çoxsaylı səmərələşdirici təkliflərinin elmi əsaslarından və təcrübədə tətbiqinin effektliyindən bəhs edir.

Pediatriya kafedrasının müəllimi, tibb elmləri namizədi Elmar Rzayev, fakültənin VI kurs tələbəsi Anar Səfərov Naxçıvan MR Səhiyyə Nazirliyi Kollegiyasmın və Naxçıvan Dövlət Universitetinin Elmi Şurasının qərarı ilə nəşr olunan kitabın bütövlükdə bu mövzuya həsr olunmuş ilk elmi ədəbiyyat olduğunu vurğuladılar.

Tibb elmləri namizədi, cərrah Məhərrəm Tarverdiyev, Naxçıvan MR hərbi hospitalında cərrahi bölmənin rəisi, polkovnik-leytenant Səfər Qədimov da həmkarları haqqında xoş ürək sözlərini söylədilər.

Sonda müəllif tədbirin təşkilatçılarına səmimi minnətdarlığını bildirdi, regionda səhiyyənin və tibbi təhsilin inkişafına dövlət qayğısndan söz açdı.

Tədbirdə müəllifin elmi-pedaqoji irsini, həyat və fəaliyyətini əks etdirən sərgi və slayd da nümayiş olundu.

Mehriban Sultan

NDU-nun mətbuat

şöbəsinin müdiri

Palitra.- 2010.- 8 oktyabr.- S.10.