YUNESKO-nun dəstəyi ilə İçərişəhərə həsr olunan beynəlxalq seminar keçiriləcək

17-21 oktyabr tarixində "İçərişəhər" Dövlət Tarix-Memarlıq Qoruq İdarəsi YUNESKO-nun təşkilati dəstəyi ilə "İçərişəhər irsinin konservasiyası inkişafında "Tarixi Şəhər Landşaftı" yanaşması tətbiqi" mövzusunda beynəlxalq seminar keçirəcək.

İdarənin mətbuat xidmətindən verilən xəbərə görə, seminarın keçirilməsində əsas məqsəd YUNESKO tərəfindən Dünya İrsi Siyahısına daxil edilən tarixi şəhərlərin bir çoxunda konservasiya ilə inkişafının uyğunlaşdırılmasında yaranan problemləri aradan qaldırmaq üçün "Tarixi Şəhər Landşaftı" konsepsiyasının hazırlanması və bu yanaşmanın İçərişəhərə tətbiq edilməsi üçün ekspertlər arasında müzakirələrin keçirilməsidir.

Qeyd edək ki, seminarda iştirak etmək üçün YUNESKO-nun əməkdaşları və müvafiq sahələr üzrə ixtisaslaşan ABŞ, Finlandiya, Niderland, İtaliya, İspaniya, Britaniya, Fransa, Polşa, Avstriya və Avstraliya kimi ölkələri təmsil edən nüfuzlu beynəlxalq ekspertlər Bakıya səfər edəcəklər. Seminarda İçərişəhərin konservasiyası üzrə Baş Planın müəllifləri olan italiyalı mütəxəssislərin, həmçinin bir neçə yerli və xarici memarların iştirakı da gözlənilir. Seminarın nəticəsi olaraq İçərişəhərdə konservasiya və inkişaf layihələrinin uyğunluğu üzrə YUNESKO tərəfindən müvafiq hesabat dərc olunacaq, habelə Şəhər İnkişaf Strategiyası hazırlanacaq. Qeyd olunan seminar İçərişəhərin qorunması, təbliği və inkişafına yönəlmiş tədbirlər sırasına daxildir.

Palitra.- 2010.- 12 oktyabr.- S. 12.