Turizm sahəsi üçün kadr potensialı yaradılır

İnkişaf etmiş ölkələrin durumunu müəyyən edən amillərdən biri də insan kapitalıdır. Bu ölkələrin təbii resursların hesabına və yaxud da coğrafi vəziyyətinə görə deyil, məhz intellektual potensialına görə, yeni texnologiyaların icad olunmasına, tətbiqinə görə tərəqqi etməkdə davam etdiyini deyən ölkə başçısının sözlərinə görə, biz də bu yolu keçməliyik və bunu etmək üçün bütün şərait var: “İnsanlarımızın intellektual səviyyəsi çox yüksəkdir”. İnsan kapitalı əsasən təhsilin inkişafı ilə bağlıdır və ölkədə təhsilin inkişafının göstəricisidr ki, hər il ali məktəbə qəbul imtahanlarında yüksək nəticə göstərən abituriyentlərin sayı ildən-ilə artır. Cari ildə abituriyentlərin ən yüksək balla daxil olduğu ali məktəblər sırasında Azərbaycan Turizm İnstitutu (ATİ) da var. Ölkənin ali məktəbləri sırasına 2006-cı ildə qoşulsa da, fəaliyyət göstərdiyi qısa müddət ərzində özünə layiqli nüfuz və reytinq qazanan ATİ-nin əsas məqsədi turizm sektoru üçün ixtisaslı kadr hazırlamaqdır. Dünyanın bir sıra ali təhsil ocaqları ilə əlaqələri olan ATİ təhsilini layiqincə davam etdirən tələbələrini Türkiyə, İsrail, Yunanıstan, İsveçrə, Portuqaliya və Almaniyada təcrübə keçməyə göndərir. Bu il isə sözügedən təhsil müəssisəsinin tələbələrinin təcrübə keçmək üçün Kanada və ABŞ-a da göndərilməsi nəzərdə tutulub. Onu da qeyd edək ki, yeni tədris ilində ATİ-yə qəbul olunaraq tələbə adını qazanan 320 nəfərdən 16-sı qəbul imtahanlarında 600-dən yüksək bal toplayıb. Budəfəki müsahiblərimiz də ATİ-yə yüksək bal toplayaraq daxil olan həmin tələbələrdən bir neçəsidir.

İsrail Buttayev: “Ən böyük arzularımdan biri təhsilimi xarici ölkələrdən birində davam etdirməkdir”

İlk müsahibimiz, 645 balla ATİ-nin tələbəsi adını qazanan İsrail Buttayev orta təhsilini Balakən rayonunda alıb: “Hələ orta məktəbdə oxuyanda sinif yoldaşlarımla hansı ali məktəbdə oxuyacağımızla bağlı müzakirələr aparırdıq. Mən həmişə birinci Azərbaycan Turizm İnstitutunun adını çəkirdim. Çünki burada yüksək səviyyədə təhsil verildiyi barədə eşitmişdim. Bir də onu bilirdim ki, ATİ-nin xarici ölkələrin ali təhsil müəssisələri ilə əlaqələri var. Mənimsə ən böyük arzularımdan biri təhsilimi xarici ölkələrdən birində davam etdirməkdir”. Eyni zamanda turizm sahəsinə marağını son illərdə ölkəmizdə bu sektorun inkişafına diqqət və qayğının artması ilə əlaqələndirən İ.Buttayev qeyd etdi ki, bu istiqamətdə həyata keçirilən tədbirlər özünü bölgələrdə də göstərməkdədir: “Biri-birindən möhtəşəm otellər tikilir, eyni zamanda tez-tez ölkəmizdə turizmlə bağlı beynəlxalq konfranslar keçirilir, turizm sərgiləri təşkil olunur. Mən də istəyirəm ki, turizm sahəsi üzrə daha mükəmməl təhsil alım, xarici ölkələrdə olum və bu sahədə təcrübəni mənimsəyim. Və arzum odur ki, Azərbaycanda turizm mərkəzlərindən birində fəaliyyətimi davam etdirim və xaricdə qazandığım təcrübəni ölkəmizdə də tətbiq edim”.

Baba Babayev: “Turizm sahəsi üzrə yaxsı mütəxəssis kimi yetişmək istəyirəm” Digər müsahibimiz, 650 balla İqtisadiyyatın təşkili və idarə edilməsi fakültəsinə daxil olan Baba Babayev isə bildirdi ki, Bakının Xətai rayonunda təhsil alıb və Azərbaycan Turizm İnstitutunda təhsilini davam etdirmək onun arzusu olub: “Ölkəmizdə turizm sahəsinin perspektivli olması və bu sahədə mövcud kadr çatışmazlığı problemindən xəbərdaram. Düşünürəm ki, səhv seçim etməmişəm. Əsas məqsədim yaxşı bir mütəxəssis kimi yetişmək və bu sahədə ölkəmə hər hansı bir töhfə verə bilməkdir”. B.Babayev üçün turizm sektorunda hansı istiqamət üzrə çalışmağın bir fərqi yoxdur: “Əsas odur ki, seçdiyim sahə üzrə əsl mütəxəssis olum, bu sahədə biliklərimi, bacarığımı daha da təkmilləşdirim və Azərbaycana layiqincə xidmət edim”. Dediyinə görə, onun üçün imtahanın elə bir qorxusu da olmayıb: “İmtahan cavabları çıxanda bildim ki, bir neçə sualın cavabını səhv yazmışam. Bununla belə topladığım 650 bal mənə istədiyim ixtisası seçməyə imkan verirdi”.

Samir Şahbazlı: “Hədəfim gələcəkdə turizm şirkəti yaratmaq və Azərbaycana turist axınını təşkil etməkdir”

Hazırda ATİ-də təhsil alan tələbələrdən biri də Samir Şahbazlıdır ki, o, orta məktəbi Sumqayıt şəhərində bitirib və builki qəbul imtahanında 619 bal toplayıb. Onun dediyinə görə, ixtisas seçimi edəndə də birinci məhz ATİ-nin adını yazıb: “Son vaxtlar ölkəmizdə turizm şirkətlərinin və otellərin sayı artır. Bu sahənin perspektivli və maraqlı bir sahə olduğunu düşünürəm. Ona görə də qarşıdakı dörd illik bakalavr, iki illik də magistratura təhsilində yaxşı bir mütəxəssis kimi yetişməyi və turizm şirkətlərindən birində çalışmağı məqsəd olaraq qarşıma qoymuşam”. Samirin digər həmkarlarından fərqli olaraq bu sektorda başqa bir məqsədi də var. “Bu gün turizmin inkişaf etdiyi dünya ölkələrində həmin sektorun fəaliyyətinin daha da genişlənməsində turizm şirkətlərinin böyük rolu var. Hətta elə adı ilə tanınan, məşhur olan turizm şirkətləri də mövcuddur. Artıq ölkəmizdə də inkişaf dövrünü yaşayan turizm sahəsində nailiyyətlərin günü-gündən artması bizi sevindirir və həm də həvəsləndirir. Mənim də arzum odur ki, yaxşı bir mütəxəssis kimi formalaşım və gələcəkdə hər hansı bir turizm şirkətinin əsasını qoyum. Azərbaycana çoxlu sayda turist axınını təşkil edim. Bu istiqamətdə fəal iş qurmaqla hər bir şirkət öz ölkəsinin tanınmasına xidmət edir”.

Taleh Vahabzadə: “Turizm obyektlərində ixtisaslı kadrlar çalışmslıdır”

Növbəti həmsöhbətimiz Taleh Vahabzadə ATİ-yə 615 balla daxil olub. Turizm sahəsinin Azərbaycanda yeni inkişaf etməyə başladığını deyən T.Vahabzadənin fikrincə, bu baxımdan da indi ölkəmizdə adıçəkilən sahədə kadr çatışmazlığı mövcuddur: “Ölkəmizdə yeni otellərin tikilməsi ilə yanaşı burada çalışacaq kadrlara da ehtiyac var. Bu gün xaricdə turizm obyektlərində məhz bu sahədə ixtisaslı kadrlar çalışır ki, bu da mənim fikrimcə, turizmin inkişafında vacib amillərdən biridir. Son zamanlar ATİ-nin fəaliyyəti ölkəmizdə bu sahədə problemin aradan qaldırılmasına imkan verir. Buna görə də mənim də məhz bu təhsil ocağını seçməyim təsadüfi deyil”. Onun sözlərinə görə, ali məktəbi bitirəndən sonra onun üçün iş tapmaq çətin olmayacaq. Azərbaycanın Dağlıq Qarabağ bölgəsinin turizm imkanlarının çox geniş olduğunu deyən Talehin ən böyük arzusu da torpaqlarımız işğaldan azad olunandan sonra orada turizm mütəxəssisi kimi çalışmaqdır.

Rəşad Ramazanlı: “Bölgələrdə turizm sahəsində kadrlara ehtiyac var”

Qəbul imtahanlarında 610 bal toplayan Rəşad Ramazanlı Qəbələ rayonunda anadan olub, orta təhsilini də elə orada alıb. Bu gün Qəbələ rayonunun Azərbaycan turizm sektorunda xüsusi yer tutduğunu deyən R.Ramazanlı turizm sahəsinə olan marağının bir səbəbinin də buradan qaynaqlandığını qeyd edir. Hazırda Qəbələnin Azərbaycanın turizm baxımından ən çox inkişaf etmiş rayonlarından biri olduğunu bildirən tələbənin yaxşı mütəxəssis olmaq da böyük arzusudur: “Bu gün bölgələrdə də turizm sahəsində kadrlara ehtiyac var. Ölkəyə gələn turistlər bölgələrə səfər edir ki, bu baxımdan da yerlərdə onlara yüksək turizm xidməti təklif edə biləcək kadrlar olmalıdır. Yüksək xidmət turist cəlbi deməkdir ki, bu da turistlərin həmin əraziyə bir daha gəlməsinə imkan verir. Ümumiyyətlə, mən fikirləşirəm ki, yaxşı mütəxəssis olmadan heç bir sahədə irəli getmək, nailiyyət əldə etmək mümkün deyil. Ona görə də ali təhsil almaq üçün Azərbaycan Turizm İnstitutunu seçdim. Burada dərslərin Avropa təhsil sisteminə uyğun keçildiyini bilirəm. Ümid edirəm ki, bu ali təhsil ocağında sözün həqiqi mənasında savadlı müəllim heyəti, yüksək təhsil sayəsində seçdiyim sahədə layiqli, savadlı kadr kimi formalaşacağam”. Seymur Xanəhmədlinin isə ATİ-ni seçməsinin səbəbi burada mövcud olan yüksək təhsil və xarici ölkələrin universitetləri ilə əlaqələrinin olmasıdır. Həmçinin bu ali təhsil müəssisəsinin digər üstünlüyü də Avstriyanın Krems Universiteti ilə əməkdaşlığı və institutun məzunlarının eyni zamanda iki diplom ala bilməsidir. ATİ-də tələbələrin praktikaya göndərilməsi baxımından şəbəkə vasitəsilə əlavə imkanlar da yaradılıb. 605 balla ATİ-nin tələbəsi adını qazanan Seymur deyir ki, buranı həm də valideynlərinin məsləhəti ilə seçib. O da digər yoldaşları kimi, turizm üzrə mütəxəssis olub ölkəmizdə çalışmaq niyyətində olduğunu vurğuladı: “Mənim üçün önəmli olan öncə bu ali təhsil ocağında layiqincə təhsilimi başa vurmaqdır. Bu gün turizmin inkişaf etdiyi ölkəmizdə kadrlara ehtiyac var ki, mən də turizm sahəsində kadr kimi fəaliyyət göstərməyi çox istərdim. Artıq ATİ-nin nəzdində orta kadrların və peşəkar xidmət personalının hazırlanması üçün kollecin və peşə məktəbinin yaradılması üzərində də iş aparılır. Eyni zamanda həmin kollec və peşə məktəblərinin regionlar üzrə şöbələrinin yaradılması nəzərdə tutulur. Orada da çalışacaq kadrlara ehtiyac olacaq. Bundan başqa tələbələrin institutda qalıb işləməsi üçün də imkanlar yaradılır. Bu bir faktdır ki, ölkədə birbaşa turizm təhsilli insanlar azdır. Hazırda ATİ məzunlarının bir hissəsi sənayedə, 10 nəfəri isə institutda fəaliyyyət göstərir. Bu imkanlar olduğu üçün mən məhz ATİ-ni seçmişəm”.

Nigar

Palitra.- 2010.- 22 oktyabr.- S. 7.