Azərbaycan gəncliyi və beynəlxalq aləm
Azərbaycan müstəqillik
əldə etdikdən sonra əhalinin bütün təbəqələri,
sosial qrupları arasında müşahidə olunan milli
oyanış, sosial-siyasi fəallıq gənclərdən də
yan keçmədi. Azərbaycan
gəncliyində yeni prinsiplər, mənəvi dəyərlər,
həyata yeni baxışlar sistemi formalaşmağa
başladı. Məqsəd və vəzifələrinə, fəaliyyət
istiqamətlərinə, sosial tərkibinə görə
bir-birindən dəyərli, yeni, müstəqil gənclər
təşkilatları yaranmağa başladı. İlk gənclər
təşkilatları əsasən kortəbii şəkildə
respublikanın ərazi bütövlüyü və suverenliyi
uğrunda xalq hərəkatının təsiri altında təşəkkul
tapmağa başlamışdılar. Lakin 1991-1993-cü illərdə
respublikada hökm sürən hərc-mərclik şəraitində
təşəkkül tapmış gənclər təşkilatlarının
çoxunda siyasiləşmə, populizm meyilləri
özünü büruzə verdi. Bu təşkilatların
bir çoxu o dövrdə fəaliyyət göstərən
müxtəlifyönlü siyasi partiya və qurumların təsiri
altına düşdü. Azərbaycanın müstəqilliyi,
suverenliyi və ərazi bütövlüyünün
qorunması, ölkədə hüquqi-demokratik dövlət
quruculuğu prosesinin həyata keçirilməsi vəzifələri
gənclərin ayrı-ayrı siyasi partiya və qurumların
deyil, ümummilli dövlət mənafeləri əsasında
səfərbər olunması, vahid gənclər siyasətinin
həyata keçirilməsi zərurətini ortaya atdı.
Hakimiyyətə ikinci dəfə
qayıdışından sonra Heydər Əliyevin
çoxşaxəli fəaliyyətinin əsas istiqamətlərindən
biri də gənc nəslə diqqət və
qayğının artırılması, yeniyetmə və gənclərlə
bağlı dövlət siyasətinin əsas prinsiplərinin
müəyyənləşdirilməsi, ölkənin sosial-iqtisadi,
ictimai-siyasi həyatında gənclərin fəal
iştirakının təmin edilməsi, gənclərin
sosial-mənəvi ehtiyaclarının ödənilməsi,
onların gələcəyin layiqli vətəndaşları
kimi formalaşması üçün münbit şəraitin
yaradılması olub. Bu da təbiidir. Çünki gənclər
xalqın ümidi, onun inkişafının və yüksəlişinin
əsas meyarı və barometridir. Hər bir cəmiyyətin
maddi-mənəvi tərəqqisi gənclər siyasətinin
düzgün qurulmasından, gənclərin sosial, psixoloji vəziyyətindən,
fəaliyyət şəraitindən asılıdır. Gənclər
siyasəti - gənclərin hərtərəfli
inkişafını, cəmiyyətin həyatında
onların fəal iştirakını təmin etmək məqsədilə
dövlət tərəfindən həyata keçirilən tədbirlər
sistemidir. Bu gün Azərbaycanda həyata keçirilən gənclər
siyasəti çox geniş bir spektri - gənclərin təhsili,
tərbiyəsi, sağlamlığı, intellektual və mənəvi
inkişafı, asudə vaxtının təşkili, problemlərinin
həlli, hüquqlarının müdafiəsi, respublikanın
ictimai-siyasi, mədəni həyatında iştirakı ilə
bağlı məsələləri və s. əhatə edir.
Gənclərlə iş sahəsində
beynəlxalq əlaqələrin qurulması da əsas fəaliyyət
istiqamətlərindən biridir. Bu məqsədlə
BMT, Avropa Şurası, Avropa Birliyi və s. beynəlxalq təşkilatların
gənclər proqramlarına qoşularaq əməkdaşlıq
əlaqələri yaratmaq üçün Azərbaycanda
akreditə olunmuş səfirlik və nümayəndəliklərlə,
müxtəlif ölkələrin gənclər qurumları ilə
mütəmadi görüşlər və
danışıqlar aparılır. Bir sıra MDB ölkələri
ilə, ÇXR, Türkiyə ilə qarşılıqlı
əməkdaşlıq müqavilələri imzalanıb.
1999-cu ilin oktyabrında ABŞ-ın Horopulu şəhərində
keçirilən Dünya Gənclərinin Minillik Konqresində
Azərbaycan 30 nəfərlik nümayəndə heyəti ilə
təmsil olunmuşdu.
Bu gün Azərbaycan gənclərinin
fəal hissəsi həmin təşkilatlarda birləşib. Əgər
1997-ci ilin əvvəllərində gənclər təşkilatlarının
sayı 60-a yaxın idisə, 2000-ci ildə onların sayı
artıq 120-dən artıq idi. Bu təşkilatların əksəriyyəti
konfederativ qurum olan Azərbaycan Respublikası Gənclər Təşkilatları
Milli Şurasının (ARGTMŞ) üzvüdür. 1995-ci il
noyabrın 21-də təsis olunmuş və 1996-cı il
yanvarın 31-də Ədliyyə Nazirliyində qeydiyyata
alınmış ARGTMŞ ilk vaxtlar öz ətrafında 30-a
yaxın təşkilatı birləşdirirdi. 1997-ci il
oktyabrın 27-də Naxçıvan MR-də GTMŞ
yaradılmış və oraya 7 gənclər təşkilatının
nümayəndəsi daxil olmuşdu. Şuranın əsas məqsədi
respublikada mövcud olan gənclər təşkilatlarının
fəaliyyətini əlaqələndirmək, Azərbaycan gəncliyini
beynəlxalq aləmdə tanıtmaq, dövlət
quruculuğuna gənclərin yaxından cəlb edilməsi,
onların hərbi-vətənpərvərlik tərbiyəsi,
çoxsaylı problemlərin həlli istiqamətində birgə
iş aparmaqdan ibarətdir. Qısa müddətdə Milli
Şura bu istiqamətlərdə real addımlar atıb, bir
sıra beynəlxalq gənclər qurumları ilə sıx əlaqələr
yarada bilib. Bunlardan Avropa Gənclər Mərkəzinin, Avropa Gənclər
Forumunun, Avropa Milli Gənclər Komitələri
Şurasının, Dünya Türk Gəncləri Birliyinin
adını çəkmək olar.
Avropa Gənclər Forumunun (AKF) nümayəndələri 1996-cı ilin fevralında Bakıda səfərdə olub, Azərbaycan gənclər təşkilatları ilə tanış olub. Bundan sonra GTMŞ AKF tərəfindən hazırlanmış bir sıra beynəlxalq tədbirlərə dəvət ediliblər. Milli Şura həmçinin BMT sistemindəki Ümumdünya Gənclər Forumu ilə də əlaqələr yaradıb, təşkilatın 1996-cı ilin mayında İstanbulda keçirilmiş tədbirlərində fəal iştirak edib. Milli Şura öz fəaliyyətində regional əməkdaşlığa da xüsusi yer verir. 1996-cı ilin martından başlayaraq MŞ Avropa İttifaqı tərəfindən dəstəklənən «Qafqaz gəncləri dialoqunun» fəal iştirakçısıdır. Dialoqun əsas məqsədi Qafqazda sülhün bərqərar edilməsində gənclərin iştirakını təmin etməkdir. Azərbaycan gənclər təşkilatları İslam Konfransı Təşkilatı (İKT) və Qara Dəniz İqtisadi Əməkdaşlıq Təşkilatı (QDİƏT) çərçivəsində gənclər əməkdaşlığına qoşulub. Ötən müddət ərzində bir sıra beynəlxalq gənclər, o cümlədən «Gənclər Avropada Təhlükəsizlik Uğrunda», «Əlillərin Beynəlxalq Əməkdaşlığı Uğrunda», Dünya Skaut Assosiasiyası, Beynəlxalq Gənclik Klubu və s. təşkilatların Azərbaycanda özəyi yaradılıb. Nəhayət, 2000-ci ilin aprelində Milli Şura Avropada ən nüfuzlu beynəlxalq qeyri-hökumət təşkilatı olan Avropa Gənclər Forumuna tamhüquqlu, 2002-ci ilin yanvarında isə BMT-nin İqtisadi və Sosial Şurasına müşahidəçi üzv seçilib.Azərbaycanın Avropa Şurasına qəbulunda gənclər təşkilatlarının Milli Şurasının böyük xidmətləri olub. Avropa Şurası Gənclər və İdman Direktorluğunun ölkəmizdə olan gənclər hərəkatı barədə hesabatları yüksək qiymətləndirilib və
Azərbaycanın
Avropa Şurasına qəbulunda öz müsbət təsirini
göstərib. Həyata keçirilən işlərin nəticəsi
olaraq bir neçə uşaq və gənclər təşkilatı
beynəlxalq təşkilatlarda təmsil olunmaq hüququ əldə
edib. Məsələn, Azərbaycan Skautlar Assosiasiyası
Ümumdünya Skaut Hərəkatı Təşkilatına, Gənc
Hüquqşünaslar Birliyi Gənc
Hüquqşünasların Beynəlxalq Assosiasiyasına, Azərbaycan
Demokratik Tələbə Gənclər Hərəkatı
Avropa Demokratik Tələbə İttifaqına, Dünya Gənc
Türk Yazarlar Birliyi Dünya Türk Gəncləri Birliyinə
və s. üzv daxil edilib.Gənclər təşkilatlarının
respublikanın ictimai-siyasi həyatında fəal iştirak
etmələri, onların beynəlxalq əməkdaşlığa
və təcrübə mübadilələrinə cəlb
edilmələri üçün müxtəlif layihələr
həyata keçirilib və keçirilməkdədir. Bu
istiqamətdə AGSDT-nin “Gənc
lider», Əlillərin Beynəlxalq Əməkdaşlığı
Uğrunda Cəmiyyəti (ƏBƏUC) sağlamlıq layihələri,
Maarifçi Gənclər Təşkilatının «Gənclərin
maarifləndirilməsi», «Uşaq-gənclərlə
bağlı qanunvericiliyin formalaşması» proqramları qəbul
edilib. 1999-cu ildə AGTMŞ-nin III konfransının
keçirilməsi mühüm hadisə oldu. Konfrans göstərdi
ki, gənclərimiz öz problemlərini konstruktiv şəkildə
müzakirə etmək bacarığı nümayiş
etdirirlər. Diqqətəlayiq haldır ki, Milli Şura
müşahidəçi statusu olmadan Avropa Gənclər
Forumuna tamhüquqlu üzv qəbul edilib.
Son dövrlərdə Azərbaycan
gənclərinin beynəlxalq əlaqələri daha da
genişlənib. Azərbaycan gəncləri həm
ölkə daxilində, həm də xaricdə bir sıra beynəlxalq
tədbirlərdə iştirak edərək gənclərin
problemləri ilə yanaşı respublikamızın həqiqətləri
barədə öz həmyaşıdlarını məlumatlandırıblar.
2005-ci ilin aprelində Azərbaycanın bir sıra gənclər
təşkilatı (Sərhədsiz Gənclər Təşkilatı,
Azərbaycan Könüllülər İctimai Birliyi, Azərbaycan
Gənclərinin İnformasiya Mərkəzi) Avropa
Şurasının Gənclər və İdman Direktorluğu
və ARGİTN Bakıda birgə Beynəlxalq Forum
keçirib. 25 ölkənin təmsil olunduğu bu forumun məqsədi
gənclərdə Avrasiya Gənclər Forumu ideyasını
reallaşdırmaqdır. 2006-cı ilin avqustunda Beynəlxalq Gənclər
Günü münasibətilə ARGTMŞ-nin dəvəti ilə
müxtəlif ölkələrin gənclər təşkilatlarının
nümayəndələri Bakıda Milli Məclisdə, Nazirlər
Kabinetində, ARGİN-də, eləcə də müxtəlif
gənclər təşkilatlarında olub, Azərbaycanda həyata
keçirilən gənclər siyasəti ilə yaxından
tanış olublar.
2006-cı ilin noyabrında
Bakıda GUAM ölkələri Gənclər Forumunun I
Konqresini xüsusi qeyd etmək lazımdır. Bu forumun
yaradılması ideyasını Azərbaycan gəncləri irəli
sürüblər. Qurumun əsas məqsədi nəzərdə
tutulmuş planları həyata keçirmək
üçün GUAM ölkələri gənclərinin səylərini
birləşdirən regional təhlükəsizlik, gənclər
təşkilatlarının inkişafı naminə əməkdaşlığı
möhkəmləndirməkdən ibarətdir. Həmin
konqresdə bir sıra mühüm sənədlər qəbul
edilib ki, onlar arasında münaqişə zonaları
haqqında bəyannaməni xüsusi qeyd etmək
lazımdır. Forumda nizamnamə, fəaliyyət proqramı qəbul
edilib, Mərkəzi Şura seçilib. Azərbaycan gənclərinin
beynəlxalq əlaqələrində İslam ölkələri
gəncləri ilə əməkdaşlıq xüsusi yer
tutur. Məhz Azərbaycan gənclərinin təşəbbüsü
və Azərbaycan hökumətinin dəstəyi ilə
2004-cü ilin dekabrında Bakı şəhərində
İslam Konfransı Təşkilatı (İKT) Dialoq və Əməkdaşlıq
Uğrunda Gənclər Forumu təsis edilib, foruma İKT-yə
üzv olan 35 ölkədə fəaliyyət göstərən
40-dək gənclər təşkilatı daxil olub. Xarici
İşlər Nazirlərinin 33-cü konfransının qərarı
ilə İKT-nin 20 illik tarixində ilk dəfə olaraq bu
foruma təşkilatın üzv qurumu statusu verilib. Forumun fəaliyyətinin
əsas istiqamətlərindən biri də İKT üzv
ölkələrinin üzləşdiyi işğal, təcavüz
haqqında həqiqətlərin dünyada geniş
yayılmasına nail olmaqdır. Bu məqsədlə
2006-cı ilin iyununda forum İKT ölkələrində
yaymaq məqsədilə Ermənistanın Azərbaycana
qarşı işğalçılıq siyasəti
haqqında ilk dəfə olaraq ərəb dilində «Qarabağ:
faktlar və gənclər» adlı kitab çap etdirib. İKT
DƏUGF-nin 2006-cı ilin sentyabr ayında İstanbulda daimi qərargahı
açılıb və bu mərasimdə Azərbaycan
Respublikasının Prezidenti İlham Əliyev nitq söyləyib.
Forumun prezidenti türkiyəli Əli Sarıkaya, baş katibi
isə azərbaycanlı Elşad İsgəndərovdur.
Forumun təşkilatlanma prosesini gücləndirmək məqsədilə
Azərbaycan dövləti təşkilatın büdcəsinə
100 min ABŞ dolları köçürmək haqqında qərar
qəbul edib.
Cəfərov Həmzə
Palitra. -2010. – 29 yanvar. – S.7.