ARDNŞ-in Təhlükəsizlik İdarəsinin yeni inzibati binasının açılışı olub

Dünən Nobel prospektində ARDNŞ-in Təhlükəsizlik İdarəsinin yeni inşa edilmiş inzibati binasının açılışı olub. Şirkətdən qəzetimizə verilən məlumatda bildirilir ki, tədbirdə iştirak edən qurum prezidenti Rövnəq Abdullayev idarənin müasir standartlara uyğun inşa edilmiş binasının otaqlarını gəzib. Ona Təhlükəsizlik İdarəsinin Dövlət Gəmi və Liman Nəzarəti Müfəttişliyi, Xüsusi Texnika Hissəsi, müxtəlif departament və şöbələrin yerləşdiyi binada ümumilikdə 200 nəfərdən artıq işçi heyəti çalışacağı haqqında məlumat verilib.

Üçmərtəbəli bina müasir və yeni ofis mebeli və texnikası ilə təchiz olunub. Binanın birinci mərtəbəsində isə müasir avadanlıqlarla təchiz olunmuş yeməkxana yaradılıb. Görülmüş işlərdən razı qaldığını bildirən Rövnəq Abdullayev son illər ARDNŞ-in bütün idarə və müəssisələrində köklü dəyişikliklərin aparıldığını, həyata keçirilən yeni infrastruktur layihələrinin geniş vüsət aldığını qeyd edib. O, neft-qaz sənayesinin uğurlarında, şirkətin obyektlərinin mühafizəsinin təminatında Təhlükəsizlik İdarəsinin rolunu xüsusi vurğulayaraq şirkətin tabeçiliyində olan struktur vahidlərinin müasir avadanlıqlarla təchiz olunması istiqamətində görülən işlərin bundan sonra da davam etdiriləcəyini qeyd edib: “Bu mənada bu yeni, müasir inzibati bina idarənin əməkçilərinin rahat iş şəraiti ilə təmin olunmasında mühüm rol oynayacaq”.

Hər gün Bakıda minə yaxın «smart kart» tipli sayğac quraşdırılır

ARDNŞ prezidenti jurnalistlərə açıqlamasında bildirib ki, 2013-cü ilədək ölkə ərazisinin 95%-ni qazlaşdırmaq planlaşdırır. Onun sözlərinə görə, dövlət başçısının bununla bağlı tapşırığına uyğun olaraq, ölkənin bütün rayonlarında qazlaşdırma işləri gedir: «Artıq bununla bağlı investisiya proqramlarımız və layihələrimiz hazırdır».Şirkət rəhbərinin sözlərinə görə, Bakıətrafı kəndlərdə də problemi olan hissələrin qazlaşdırılması məsələsi həll olunur: «İndi hər gün Bakı şəhərində minə yaxın «smart kart» tipli sayğac quraşdırılır. Bakıda 600 minə yaxın abunəçi olduğu üçün gələn ilə artıq «smart kart» tipli sayğacların quraşdırılmasını başa çatdıracağıq». R.Abdullayev bununla yanaşı bildirib ki, paytaxta gələn bütün magistral xətlərin bərpası üzrə işlər aparılır: «Ötən il qaz sistemində təzyiq problemi olmadı, bu il də bütün işləri görürük ki, belə problem yaranmasın. Qaz təminatı yüksək səviyyədə həyata keçiriləcək».O qeyd edib ki, ARDNŞ Türkiyənin «Turcas Petrol/Injaz Projects» şirkətinin səhmlərinin 24,85%-ni alıb: «Biz Türkiyədə investisiya layihələrində payımızın çoxalmasını istədik və buna nail olduq». Qeyd edək ki, ARDNŞ-in «Turcas Petrol/Injaz Projects» şirkəti ilə yaratdığı «SOCAR- Turcas» konsorsiumu «Petkim» neft-kimya şirkətinin sahibidir. Bu alqı-satqı nəticəsində ARDNŞ-in konsorsiumda payı 70%-ə çatıb. Türkiyədən fərqli olaraq ARDNŞ-in Qırğızıstanda hər hansı işlər həyata keçirmək barədə planları yoxdur. R.Abdullayevin sözlərinə görə, ARDNŞ qüvvələrini həmişə maksimal effekt almaq üçün səfərbər edir: «Qırğızıstanın ehtiyatları azdır».

«Şahdəniz» qazının nəqli ilə bağlı növbəti görüş avqustun sonunda keçiriləcək

Şirkət rəhbəri açıqlamasında bildirib ki, avqustun sonunda Xəzərin Azərbaycan sektorunda yerləşən «Şahdəniz» perspektiv strukturunun işlənməsi layihəsinin tərəfdaşları arasında hasil olunan qazın nəqli ilə bağlı danışıqların növbəti mərhələsi keçiriləcək. Onun sözlərinə görə, Türkiyənin baş naziri Rəcəb Tayyib Ərdoğanın Bakıya səfərindən dərhal sonra Azərbaycanla Türkiyə arasında qazın nəqli ilə bağlı danışıqlar bərpa olunub: «Həmin həftə ARDNŞ, Türkiyənin «BOTAŞ» şirkəti və «Şahdəniz» layihəsinin tərəfdaşları arasında görüş keçirilib ki, 3 gün davam edən görüş zamanı «Şahdəniz» qazı ilə bağlı məsələlər müzakirə olunub». Birinci görüşün məhsuldar keçdiyini bildirən R.Abdullayev qeyd edib ki, hələ də həllini tapacaq bir çox məsələ açıq qalıb: «Danışıqların növbəti mühüm mərhələsi avqustun 26-da başlayacaq ki, bununla da danışıqların ikinci turuna start veriləcək. Fikrimcə, həmin görüşdə bu məsələ ilə bağlı böyük sənədlər paketi müzakirə edə biləcəyik».

Cavidan

Palitra.- 2011.- 9 avqust.- S.2.