“Ozan” Azərbaycan Mədəniyyət Mərkəzi Çelyabinskdə mədəniyyətimizi təbliğ edir

Xaricdə fəaliyyət göstərən diaspor təşkilatlarımızın fəaliyyət istiqamətlərindən biri də Azərbaycan mədəniyyətinin təbliğidir. Belə ki, onlar həmin ölkələrdə bir çox tədbirlər təşkil edərək Azərbaycanın qədim mədəniyyətə malik olduğunu çatdırırlar. Bu gün diasporumuzun ən sıx məskunlaşdığı ölkələrdən biri də Rusiyadır. Çelyabinsk şəhərində diasporumuzun üzvlərinin yaratdığı “Ozan” Azərbaycan Mədəniyyət Mərkəzi isə (OAMM) öz fəaliyyəti ilə seçilir. Ümumrusiya Azərbaycan Konqresi Çelyabinsk vilayəti regional bölməsinin və OAMM-ın sədri Rafael Quliyev 12 il əvvəl kiçik bir qrupun yaratdığı “Ozan”ın artıq inteqrasiya proseslərinin fəal iştirakçısına, Çelyabinskdəki milli-mədəni ictimai təşkilatlar arasında ən təşəbbüskar quruma, eləcə də Rusiyadakı azərbaycanlıların tanınmış təşkilatlarından birinə çevrildiyini deyir:

- İndiyədək bir sıra istiqamətlərdə layihələr həyata keçirmişik. Bunların bir qismi soydaşlarımızın problemləri, onların hüquqlarının qorunması ilə bağlı layihələrdir, eləcə də dövlət orqanları ilə iş birliyimiz var. Belə ki, Çelyabinsk vilayətində Qubernator yanında Milli Şuralar üzrə qurumda bizim təşkilat da təmsil olunur. Qanunvericilik orqanlarının nəzdində də milli məsələlər üzrə qurumda, eləcə də Miqrasiya Xidmətinin tərkibində xüsusi şöbə var ki, orada da biz xalqımızı təmsil edirik. Bundan başqa orada yaşayan xalqların nümayəndələrinin təmsil olunduğu Xalqlar Assambleyası var ki, cəmiyyətimiz yarandığı vaxtdan bu assambleyanın fəal üzvüdür. Ümumiyyətlə, hansı bir qurumun tərkibində fəaliyyət göstərməmizə baxmayaraq xalqımızı layiqincə təmsil etməyə çalışırıq. Xalqımızın tarixini, mədəniyyətini çatdırırıq ki, bu da böyük rəğbətlə qarşılanır. “Ozan” təşkilatı da öz fəaliyyəti ilə fərqlənir. Bunun nəticəsidir ki, Moskvada nəşr edilən “Rusiyanın ən yaxşı insanları” adlı kitaba Rusiyanın tanınmış dövlət xadimləri ilə yanaşı bizim təşkilatın nümayəndəsi kimi mən də daxil edilmişəm. Görülən işlər, mənəvi dəyərlərin təbliği istiqamətində həyata keçirdiyimiz tədbirlər bu müddət ərzində təşkilatımızın nümunəvi bir cəmiyyət kimi tanınmasına imkan yaradıb. Biz Azərbaycanı orada layiqincə təmsil edirik və bundan sonra da həmin zirvəni heç kəsə vermək fikrimiz yoxdur. Elə bir qurum yoxdur ki, bizim orada fəaliyyətimiz hiss edilməsin. Hər bir yerdə iştirak edirik, sözümüzü deyirik və adımız var.

- “Ozan” mədəniyyətimizin təbliği istiqamətində hansı tədbirlər həyata keçirir?

- “Ozan”nın əsas məqsədi xalqımızın zəngin mədəniyyətini, adət-ənənələrini qoruyub yaşatmaq və təbliğ etmək, soydaşlarımızın müdafiə hüquqlarının təminatına yardımçı olmaq, Rusiyada yaşayan azərbaycanlı ailələrdə böyüməkdə olan yeni nəslin ana dilimizı, tariximizi, mədəniyyətimizi mənimsəməsi və Rusiya demokratik dəyərlərinə uyğunlaşmasına kömək göstərməkdir. Mədəniyyət Mərkəzi şəhərin və vilayətin mədəni həyatında yaxından iştirak edir. “Ozan” Azərbaycan diasporunu birləşdirir və möhkəmləndirir, onun vətəndaş hüquqlarının, milli-mədəni və sosial mənafelərinin gerçəkləşdirilməsinə, dilimizin və ənənələrimizin qorunub saxlanmasına kömək göstərir. Azərbaycanın dahi oğlu Heydər Əliyevin davamçıları kimi biz Azərbaycanla Rusiya arasında dostluq əlaqələrinin möhkəmlənməsi üçün daim çalışırıq. Mərkəz Çelyabinsk Vilayəti Xalqları Assambleyası ilə birlikdə məktəblərdə beynəlmiləlçilik tərbiyəsi sahəsində iş aparılmasına da yardım edir. Mədəniyyət Mərkəzinin fəaliyyətinin öncül istiqamətlərindən biri də xeyriyyəçilikdir. Uşaq müəssisələrinə, xeyriyyə fondlarına, Böyük Vətən müharibəsi veteranlarına müntəzəm maddi yardım göstərilir. Eyni zamanda bələdiyyə müəssisələrinə, ictimai qurumlara sponsor yardımı, azərbaycanlı idmançıların iştirakı ilə yarışların təşkili, şəhər rəhbərliyi ilə birlikdə məktəblilər arasında rüblük “Kim? Harada? Necə?” bilik yarışmasının keçirilməsi və s. işlər bu qəbildəndir. Qeyd edək ki, cəmiyyətin internet saytı (“www.ozan.ru”) və eyniadlı qəzeti var. “Ozan” qəzetində diasporun həyatında baş verən ən mühüm hadisələr işıqlandırılır. Bu qəzet Çelyabinskdə KİV-in VIII festivalında “Ən yaxşı korporativ qəzet” nominasiyasında 1-ci yerin sahibi olub. Fəaliyyətə başladıqdan sonra hiss etdik ki, yeni vasitədən istifadə etməliyik. Bu məqsədlə də “Ozan” qəzetini təsis etdik. İndi də hiss edirik ki, qəzetdən də artıq bir iş görməliyik. Başladıq kitablar, jurnallar çap etdirməyə. Bu gün Rusiyada elə bir ali məclis yoxdur ki, bizim səsimiz eşidilməsin. Biz çalışırıq ki, azərbaycanlı biznesmenlər Çelyabinskə, onların biznesmenləri isə Azərbaycana sərmayə qoysunlar. Bu gün azərbaycanlı müəllim-professorlarımız, həkimlərimiz, biznesmenlərimiz Çelyabinskdə ilk onluğa düşürlər. Çelyabinsk vilayətində 130-dan çox xalqın nümayəndəsi var. Hazırda orada 10 min azərbaycanlı yaşayır. Onların ümumi məqsədi xalqlar arasında sülhün və əmin-amanlığın möhkəmləndirilməsidir. Ölkəmizlə bağlı nə qədər çox informasiya əldə etsək, bu, bizim üçün çox önəmlidir. Orada fəaliyyət göstərən Xalqlar Assambleyasının üzvü olan digər diaspor təşkilatları - rus, alman, gürcü, qazax, tacik, özbəklərlə sıx əməkdaşlıq edirik. Bir-birimizə dəstək oluruq, köməklik edirik. Bizim işlər nümunəvi olduğu üçün onlar bizə müraciət edir və keçirdiyimiz tədbirlərə onları dəvət edirik.

- Ölkəmizdə mədəniyyət sahəsində fəaliyyət göstərən qurumlarla əməkdaşlıq necə qurulub?

- Mərkəz xalqımızın ən yaxşı ənənələrinin qorunub saxlanılması istiqamətində böyük işlər görür. Yeri gəlmişkən, Azərbaycan Mədəniyyət və Turizm Nazirliyi ilə Çelyabinsk Mədəniyyət Nazirliyi arasında 2011-2012-ci illərdə ticarət-iqtisadi, elmi-texniki və mədəni sahələrdə əməkdaşlıq haqqında memorandum imzalanıb. “Ozan” mərkəzinin 10 illik yubileyi münasibətilə Çelyabinsk vilayətində “Xalqlar dostluğu” ongünlüyü keçirilib. Ongünlük çərçivəsində təşkil olunan “Cənubi Ural-Azərbaycan” elmi-praktik konfransında iştirak etmək üçün Bakı Mədəniyyət və Turizm İdarəsinin rəisi Əlikram Əliyevin rəhbərliyi ilə nümayəndə heyəti vilayətə gəlmişdi. Azərbaycan muğamı, rəqsləri, müasir mahnılar Çelyabinsk sakinlərinin böyük marağına səbəb olur. Axı incəsənət dili üçün sərhəd yoxdur. Bu dil insanları birləşdirir, onların yaradıcı dünyasını zənginləşdirir. “Ozan” mərkəzinin nəşr etdirdiyi “Dostluq İpək Yolu. Çelyabinsk-Bakı: Mədəniyyətlərin dialoqu” kitabında bu əlaqələr və diasporumuzun fəaliyyəti ətraflı əksini tapıb.“Ozan” AMM-nin üzvləri gələcəkdə də mədəniyyətlər dialoqunun xeyirxah qonşular və əsl dostlar arasında dialoqa çevrilməsi üçün əllərindən gələni edəcək. 2006-cı ildə Azərbaycanda keçirilən “Rusiya ili” çərçivəsində Çelyabinsk vilayətinin nümayəndələri Bakıya gəlmişdi. Bakıda təşkil olunan həmin görüş zamanı Çelyabinsk vilayəti ilə Azərbaycan arasında siyasi, iqtisadi, mədəni əlaqələrlə bağlı müqavilələr imzalanıb. Bu müqavilələrə əsasən tələbələrin Bakıya gəlməsi, kitabxanalar arasında mübadilə, Bakı Dövlət Universiteti və rəssamlarla bağlı qurulan əlaqələr davam edir. Mədəniyyət və Turizm Nazirliyi ilə RF Çelyabinsk vilayəti arasında müqaviləyə əsasən, bu ilin may ayında Çelyabinsk şəhərindən olan 12 uşaq 5 gün Bakının qonağı olublar. Onlar Bakının ən populyar musiqi məktəblərində və digər görməli yerlərdə olublar və buradan böyük təəssüratla ayrılıblar.

Nigar

Palitra.-2011.-17 avqust.- S.11.