Vəzifələrini yüksək səviyyədə həyata keçirən 28 nəzarətçi fəxri fərmanla təltif edildi

Dünən 2011-ci ildə ali və orta ixtisas təhsili müəssisələrinə keçirilmiş qəbul imtahanlarında öz vəzifələrini yüksək səviyyədə həyata keçirən nəzarətçi müəllimlərin təltif olunması ilə əlaqədar tədbir keçirildi. Tədbirdə Tələbə Qəbulu üzrə Dövlət Komissiyasının (TQDK) sədri Məleykə Abbaszadə bildirdi ki, bu il qəbul imtahanlarında bütövlükdə 5042 nəfər nəzarətçi iştirak edib: “Bu prosesdə iştirak etmiş nəzarətçilərin fəaliyyəti ciddi şəkildə araşdırılıb. Bu zaman çoxsaylı meyarlar nəzərə alınıb. TQDK-nın nəzarətçilər bazasında 44 bölgədən 7500-dən artıq nəzarətçi müəllimin adı var. Bu müəllimlərin hamısı müvafiq treninqlərdən keçiblər. Onlar imtahanda ictimaiyyəti təmsil edirlər. Belə demək mümkünsə, imtahanları TQDK əməkdaşları yox, ictimaiyyətin nümayəndələri idarə edirlər”. TQDK sədri nümunəvi fəaliyyətinə görə, 636 nəzarətçiyə təşəkkül elan etdi, 28 müəllimi fəxri fərmanlarla təltif etdi: “İndiyə qədər TQDK tərəfindən qəbul imtahanlarında nümunəvi fəaliyyət göstərən 170 nəfər təltif edilib. Həmin müəllimlərin pedaqoji fəaliyyətlərinin qiymətləndirilməsində bu amilin nəzərə alınması xahişi ilə Təhsil Nazirliyinə, müvafiq təhsil şöbələrinə və orta məktəblərə məktublar ünvanlanıb”.

Qəbul imtahanlarında 1476 nəfər 600-dən yuxarı bal toplayıb

M.Abbaszadə dedi ki, bu il ali məktəblərə keçirilən qəbul imtahanlarında 103 min 185 abituriyent iştirak edib: “Onların 1476 nəfəri yüksək nəticə göstərərək, 600-dən yuxarı bal toplayıb”.O qeyd etdi ki, 600-dən yuxarı bal toplayan gənclərdən 957 nəfəri şəhər, 519 nəfəri rayon və kənd məktəblərinin məzunlarıdır: “600-dən yuxarı bal toplayanlar arasında mülki ali məktəblərlə yanaşı, xüsusi təyinatlı ali təhsil müəssisələrinə daxil olanlar da var. Onların sayı 15 nəfərdir. Yüksək nəticə göstərənlər I qrupda 331, II qrupda 364, III qrupda 323, IV qrupda isə 458 nəfər təşkil edib. Qəbul imtahanlarında 4 nəfər maksimal nəticə - 700 bal toplayıb. Onların hamısı 1-ci qrupun abituriyentləridir. Bu qəbul imtahanlarında ən yüksək nəticə göstərən 102 gəncə ölkə Prezidentinin sərəncamı ilə təqaüd təyin edilib”.

“Özəl ali məktəblərdə kifayət qədər boş plan yerləri var”

TQDK sədri bildirdi ki, bu il də, bundan sonrakı illərdə də ali məktəblərə keçirilən qəbul imtahanlarında əsas müsabiqə dövlət sifarişli yerlər üzrə olacaq: “Azərbaycanda bu il boş qalan kifayət qədər ödənişli yerlər var. Gələn il də həmin yerlərin boş qalacağı gözlənilir. Özəl ali məktəblərdə kifayət qədər plan yerləri var ki, öz tələbələrini tapmırlar. İnsanlar o ali məktəbdə oxumaq istəmirlər. İnsanlar ali məktəbin dövlət sifarişli yerlərinə qəbul olunmayıblarsa, orta ixtisas məktəblərində oxumağa daha çox üstünlük verirlər”.TQDK sədri onu da bildirdi ki, orta məktəblərdə 455 nəfərin saxta diplomla işə götürülməsi çox təəccüblüdür: “Çünki diplomları verən və təsdiqləyən, bir sözlə buna cavabdeh olan təşkilat elə Təhsil Nazirliyidir”. M.Abbaszadə qeyd etdi ki, TQDK yalnız ali məktəblərə qəbul aparır: “TQDK-nın nəzdindəki tələbə-məzun bazası 2 ildir ki, müxtəlif təşkilatlar üçün açıqdır. Ali məktəblərə qəbul olan və bitirən şəxslərlə bağlı məlumatları buradan əldə etmək olar”.O dedi ki, qəbul imtahanlarında iştirak edən nəzarətçi müəllimlər arasında saxta diplomlular yoxdur: “Nəzarət bazasına hər bir müəllim haqqında məlumat daxil olanda, onun sənədləri ciddi yoxlanılır. Qəbul imtahanlarında 1990-cı illərə qədər ali məktəbi bitirən şəxslər iştirak edirlər. Çox gənc müəllimləri nəzarətçi kimi qəbul etmirik. Belə olan halda onlar demək olar ki, yaşıdlarının arasına düşürlər. Bu isə pedaqoji nöqteyi-nəzərdən düzgün deyil”.

“Orta məktəblərdə keçirilən mərkəzləşmiş imtahanlar ümidləri doğrultmadı”

M.Abbaszadə orta məktəblərdə mərkəzləşdirilmiş imtahanlar barəsində də fikirlərini bildirdi: “Orta məktəblərdə keçirilən mərkəzləşmiş imtahanlarla əlaqədar ümidlərim puç olub”. TQDK sədri bildirdi ki, attestat qiymətlərinə uyğun olaraq qəbul qaydalarını dəyişmək hələlik mümkün deyil: “Biz bunu çox istərdik. Çox təəssüf ki, mərkəzləşmiş imtahanlarla əlaqədar ümidlər özünü doğrultmayıb”.M. Abbaszadə dedi ki, bu il keçirilən qəbul imtahanlarında məzunların imtahan göstəriciləri ilə attestat ballarının bir-birinə uyğunluğunu əks etdirən “Abituriyent” jurnalının 12-ci buraxılışı yaxın vaxtlarda hazır olacaq: “Bu il keçirilən qəbul imtahanlarının bütün statistik göstəriciləri orada əks olunacaq. TQDK bununla əlaqədar xüsusi konfrans keçirməyi də nəzərdə tutur”.

TQDK ali məktəblərə yeni qəbul modeli ilə bağlı təkliflər hazırlayır “Azərbaycanda 2014-cü ildən ali məktəblərə qəbul yeni model əsasında keçiriləcək. Lakin hələlik bu modelin ilkin detalları açıqlanmır”. Bunu da M.Abbaszadə dedi. O bildirdi ki, hazırda yeni modellə bağlı TQDK təkliflərini hazırlayır: ““2011-2021 illərdə Azərbaycan təhsilinin inkişafı üzrə milli strategiya” hələlik Prezident yanında Təhsil Komissiyası tərəfindən müzakirə edilməyib. Biz istəyirik ki, bu strategiya müzakirə edilərək qəbul edilsin. Yeni qəbul modelində nəzərdə tutulanlar Strategiyadakı müddəalarla uzlaşmalıdır”. TQDK sədri dedi ki, strategiya Təhsil Komissiyası tərəfindən müzakirə ediləndə TQDK da yeni qəbul modelini açıqlayacaq və bundan sonra ictimaiyyətə açıqlama veriləcək.M.Abbaszadə onu da bildirdi ki, gələn il magistraturanın qabiliyyət tələb edən ixitisaslarına qəbul aparılmaması Tələbə Qəbulu üzrə Dövlət Komissiyasından (TQDK) asılı olan məsələ deyil: “Nazirlər Kabineti yaxın 4 il üçün dövlət sifarişli yerlərin planını TQDK-ya tədim edib. Bu siyahıda qabiliyyət tələb edən ixtisaslar üzrə magistratura yerləri yoxdur. Magistratura yalnız elmlə məşğul olan insanlar hazırlamaq üçün nəzərdə tutulub”. TQDK sədri dedi ki, hazırda bu qərarla əlaqədar müvafiq işlər aparılır. Gələn ilin əvvəlində magistraturaya keçiriləcək qəbul imtahanları ilə əlaqədar gözlənilən dəyişikliklər elan olunacaq və bununla bağlı məlumat kitabçaları dərc ediləcək: ”Biz ali məktəbi bitirən insanların bu sahə üzrə kifayət qədər bilik topladığına əmin olsaydıq və onların diplomda olan qiymətlərini əsas götürə bilsəydik, magistraturaya imtrahanlar bir mərhələ ilə keçirilə bilərdi. Biz onların informatika, məntiqi təfəkkür, xarici dili üzrə diplomlarının qiymətlərini əsas götürüb seçim apara bilərdik. Təəssüflər olsun ki, magistraturaya II mərhələnin imtahanlarını keçirməyi daha çox ali məktəblər tələb edirlər. Onlar tələb edirlər ki, biz II mərhələdə uşaqların bilavasitə o ixtisasa aid olan biliklərinin olub-olmamasını hansısa yolla yoxlayaq”

İlkin

Palitra.-2011.-7 dekabr.-S.11.