Turizm İnstitutu 30 xarici ali məktəblə əlaqələr yaradıb

Azərbaycan Turizm İnstitutunun (ATİ) 5 illik yubileyi ilə bağlı tədbir keçirildi. Azərbaycanda turizm sənayesinin artıq dövlətin prioritet istiqamətlərindən birinə çevrildiyini deyən mədəniyyət və turizm naziri Əbülfəs Qarayev bildirdi ki, ölkəmizdə həyata keçirilən infrastruktur inkişaf layihələri genişlənir və həcmi artır ki, bu da turizm sahəsinin inkişafına təsir edir: “Azərbaycana turistlərin axını çoxalır. Ölkəmizə gələn turistlərin sayı ötən ilə nisbətən 6-7 faiz civarında çoxalıb. Biz Azərbaycana artıq 1 milyon 900 mindən çox turistin gəlişini rəsmən qeyd etmişik. Məqsədimiz odur ki, bu il ölkəmizə gələn turistlərin sayı 2 milyonu keçsin və yaxın 5 il müddətində turistlərin sayının 3-4 milyona çatdırılması bizim qarşımızda bir məqsəd olaraq durur, buna doğru da irəliləyirik”.

Bu gün yeni turizm sənayesi formalaşmaqdadır

Turizmin inkişafında kadr potensialının mühüm rolu olduğunu deyən nazir bildirdi ki, 5 il əvvəl ATİ ölkəmizin qocaman təhsil ocaqları sırasında yer alıb və bu müddətdə turizm təhsilinin formalaşmasında, yüksək ixtisaslı kadr hazırlığında öncül yer tutub: “Genişlənən mehmanxana şəbəkəsi və insanlar tərəfindən turizmə artıq tamamilə başqa bir münasibətin bəslənməsi ATİ-nin fəaliyyətinin bu gün cəmiyyətə lazım olduğunu göstərir. İlk dəfə olaraq Azərbaycanda beynəlxalq layihə üzrə tələbələrimiz diplom alır. ATİ-nin qabaqcıl tələbələri həm Azərbaycanın, həm də Avstriya institutunun diplomlarını alırlar. Artıq bu, qabaqcıl bir təcrübədir, yəni yeniliyə getmək bacarığı bu institutun üzərinə düşür. 2011-ci ilin ölkəmizdə “Turizm ili” elan olunması ATİ-nin qarşısında təhsil və tədqiqat istiqamətindəki fəaliyyətini bir daha inkişaf etdirmək tələbini qoyub”. ATİ-nin turizm təhsili sahəsindəki fəaliyyətinin geniş ictimaiyyətə çatdırılmasında məhz jurnalistlərin əhəmiyyətli rolu olduğunu deyən nazir bildirdi ki, ümumiyyətlə, turizm mövzusunu gündəmə gətirmək, düzgün izah və təbliğ etmək, insanların bu fəaliyyət növünə diqqətini artırmaq vacibdir. Ə.Qarayevin sözlərinə görə, son 5 ildə Mədəniyyət və Turizm Nazirliyi (MTN) ilə yanaşı ATİ-nin fəaliyyətini işıqlandırmaqla mətbuat işçiləri də turizmin inkişafına öz töhfələrini veriblər. Ölkədə turizmə dövlət qayğısından danışan nazir bildirdi ki, bu yaxınlarda Qusarda bir sıra iclaslar keçirilib: “Qusarda Azərbaycanda ilk dəfə olaraq süni qar əmələ gəlmə prosesini gördük. İtaliyanın, İsveçrənin, Avstriyanın mütəxəssisləri bu prosesi izlədi və Azərbaycanda ilk süni qar yağmasını alqışladılar. Bu böyük bir işdir. Əgər dövlətin bu işə marağı olmasaydı və bu istiqamətdə həyata keçirilən layihələr genişləndirilməsəydi, bu cür işlərin icrası çətin olardı. Ölkə başçısı bu ili “Turizm ili” elan etdi. Bu qərar ona əsaslanır ki, ötən il turizmlə bağlı Dövlət Proqramı təsdiq olundu, Azərbaycanın artıq geniş miqyasda təbliğ olunmaq mexanizmi formalaşıb, infrastruktur genişləndirilib və ölkəmizdə bu gün yeni bir mərhələyə çıxan turizm sənayesi formalaşmaqdadır. Bu il 5 ədəd beşulduzlu otel tikilməkdədir və “Şahdağ” kimi yay-qış turizm kompleksi yaradılmaqdadır. Bundan başqa ölkədə bütünlükdə nəqliyyat sistemi yenidən qurulub, bu da mübadilənin genişlənməsi üçün imkanlar yaradır, Azərbaycana beynəlxalq ictimaiyyət və Ümumdünya Turizm Təşkilatı (ÜTT) tərəfindən getdikcə marağın artmasına gətirib çıxarır. Onu da qeyd edim ki, bu il ÜTT-nin keçirəcəyi seminarda ATİ də iştirak edəcək. Prezidentin tapşırığı ilə ATİ-nin nəzdində 2 peşə məktəbinin yaradılması qərara alınıb ki, onlar həm peşə, həm də kolleclərin funksiyalarını öz üzərlərinə götürsünlər və Azərbaycanda orta kadrların hazırlıq səviyyəsini təmsil etsinlər. Bu da göstərir ki, ölkəmizdə davamlı, düşünülmüş və təyinatlı turizm siyasəti həyata keçirilir. Qusara səfər zamanı bu rayon üçün kadr və xüsusi marketinq planının hazırlanması, menecmentin qurulması haqqında xarici şirkətlərlə danışıqlarımızı demək olar ki, tamamlamışıq. Yaxın 2-3 ay müddətində müqavilənin imzalanmasını nəzərdə tuturuq. Bu səbəbdən də kadrların hazırlığı, marketinqin aparılması, menecmentə hansı qüvvələrin cəlb olunması ilə bağlı ATİ-yə konkret tapşırıqlar veriləcək”. Azərbaycanda hər il 30-50 civarında motellərin, yerləşdirmə yerlərinin açılmasının böyük rəqəm olduğunu deyən nazir onu da bildirdi ki, nəticədə artıq rəqabət artır və yerləşdirmə yerləri çoxaldıqca qiymətlər aşağı düşür: “Qəzet və jurnallarda verilən elanlara nəzər saldıqda görürük ki, 15-120 AZN həcmində xidmətlər təklif edən şirkətlər mövcuddur. Lakin bizim məqsədimiz odur ki, ən ucuz qiymətlərlə xidmət göstərilən yerlərdə də peşəkarlar işləsin. Ucuz qiymətlə də asudə vaxtını keçirən insanlar turizmin ləzzətini duymalıdır”. Nazir onu da vurğuladı ki, ATİ-nin binasının beşinci mərtəbəsi tamamlanıb istifadəyə verilsə də, bu hələ yetərli deyil: “ATİ-nin yeni binasının yaradılması haqqında düşünürük. Bu beş il müddətində institut artıq bakalavrdan magistratura pilləsinə qalxdı. Biz doktoranturanın açılmasını gözləyirik”.

Cari ilin martında ATİ-də doktoranturaya qəbul həyata keçiriləcək

Daha sonra çıxış edən ATİ-nin rektoru Cəfər Cəfərov rəhbəri olduğu ali təhsil ocağının bu beş il ərzində keçdiyi yola nəzər salaraq bildirdi ki, institut tədris fəaliyyətinə 2006-cı ilin sentyabrında bir fakültə - Turizm işinin təşkili və idarə edilməsi, üç ixtisas - menecment (turizmdə), marketinq (turizmdə) və turizm və sosial-mədəni sahədə servis, iki kafedra - Turizm ixtisası fənləri kafedrası, Ümumi fənlər kafedrası və 200 tələbə ilə başlayıb. Növbəti tədris ili (2007-2008) üçün ATİ-nin tələbə qəbulu planına 5 yeni ixtisas - sanatoriya və kurort müəssisələrində tibbi xidmətin təşkili, sağlamlıq və kurort, mədəniyyət və incəsənət turizmi, linqvistika (bələdçi-tərcüməçi), idman turizmi əlavə edilib. Tələbə qəbulunun sayı isə 310 nəfərə qədər artırılıb. Hazırda ATİ-də turizm sektoru üçün bakalavr proqramında 11 ixtisas üzrə 1311 tələbə təhsil alır. 2010/2011-ci tədris ilindən ATİ-də magistratura pilləsi də fəaliyyətə başlayıb və 3 ixtisas üzrə 19 tələbə təhsil alır. Tələbələrin ictimai həyatda aktiv fəaliyyətini dəstəkləmək üçün institutda Tələbə Gənclər Təşkilatı, Tələbə Həmkarlar Təşkilatı, Tələbə Elmi Cəmiyyəti və Turist Klubu kimi birliklər fəaliyyət göstərir. İnstitutun ilk gündən təhsil-tədris işini Avropa standartlarına uyğun, Bolonya sistemi əsasında qurduğunu deyən rektor bildirdi ki, ATİ öz fəaliyyətində beynəlxalq əlaqələrin qurulmasına xüsusi diqqət ayırır. Belə ki, ATİ Avropa Kredit Transfer Sistemi (AKTS) və çoxballı qiymətləndirmə sistemini tam tətbiq edən yeganə dövlət ali məktəbidir. AKTS çərçivəsində institutun 6 tələbəsi xaricdə təhsil alıb. ATİ-də Avstriyanın Krems İMC Tətbiqi Elmlər Universiteti ilə akademik anlaşmaya əsasən AATP (Azərbaycan-Avstriya Turizm Proqramı) adlı beynəlxalq qrup təşkil edilib. Tələbələr turizm sahəsində təcrübə qazanmaq üçün Azərbaycanla yanaşı Türkiyə, Yunanıstan, Şimali Kipr, ABŞ, Ukrayna, İsrail, Portuqaliya və s. ölkələrdə təcrübə mübadiləsində olublar. Avropa İttifaqının Erasmus-Mundus Xarici Əməkdaşlıq Proqramı çərçivəsində 2008-ci ildən Yunanıstan, Fransa, Bolqarıstan, İtaliya, Litva, Portuqaliya, Niderland və s. ölkələrin universitetləri ilə əməkdaşlıq imkanları əldə edilib. Keçən dövr ərzində 9 müəllim və 17 tələbə bu proqramdan istifadə edərək xaricdə təhsil və təcrübəsini artırıb. Həmçinin ATİ 2 müəllim və 4 xarici tələbəni qəbul edib. Ümumiyyətlə, ATİ yarandığı gündən bu yana 30 xarici ali məktəb və 34 beynəlxalq təşkilatla əlaqələr qurub. Rektor bildirdi ki, bugünlərdə ATİ BMT-nin “Akademik təsir” (Academic İmpact) proqramının üzvləri sırasına da qoşulub: “Akademik təsir” proqramı insan hüquqları, savadsızlıq, davamlı inkişaf və konfliktlərin həlli yollarına dair 10 qlobal prinsipin dəstəklənməsi yolunda ali təhsil müəssisələrini BMT ilə əlaqələndirən qurumdur. BMT baş katibinin kommunikasiya və ictimai informasiya məsələləri üzrə müavini cənab Kiyo Akasaka ATİ-nin üzvlüyünü təsdiq edən sertifikatı ATİ-yə göndərib”. O da vurğulandı ki, ATİ eyni zamanda bir sıra yerli və beynəlxalq konfransların təşkilatçısı və iştirakçısı da olub. Hazırda adıçəkilən təhsil ocağında turizm sahəsində müxtəlif kitabların toplandığı ATİ Kitabxana-İnformasiya Mərkəzi fəaliyyət göstərir ki, bu, ölkədə turizm sahəsində bu cür zəngin tərkibə malik yeganə mərkəzdir. Ali təhsil ocağının gələcək planlarının da çox olduğunu deyən C.Cəfərov qeyd etdi ki, institutda təhsil islahatları ilə əlaqədar Himayədarlar Şurasının Əsasnaməsi hazırlanıb və Təhsil Nazirliyinin müvafiq komissiyasına təqdim edilib. Yaxın vaxtlarda Himayədarlar Şurasının yaradılması nəzərdə tutulur. O da vurğulandı ki, cari ilin martında ATİ-də doktoranturaya qəbul həyata keçiriləcək. Nazirlər Kabinetinin qərarı ilə ATİ-nin nəzdində Turizm Peşə Liseyinin yaradılması gözlənilir. Gələcəkdə Mingəçevir Turizm Kolleci ilə əməkdaşlığın dərinləşdirilməsi də həyata keçiriləcək planlara daxildir. Ötən il ATİ-nin 2010-2014-cü illər üzrə Elmi-Tədqiqat Planı təsdiq edilib. Mədəniyyət İşçiləri Müstəqil Həmkarlar İttifaqı Respublika Komitəsinin sədri Cəmilə Səttarova belə bir konfransın keçirilməsindən məmnun qaldığını və təmsil etdiyi qurumun adından ATİ-nin bir qrup əməkdaşını yubiley münasibətilə mükafatlandırdı.Tədbirin sonunda ATİ-nin 5 illlik fəaliyyətinin dəqiq və peşəkarlıqla ictimaiyyətə çatdırılmasındakı xidmətlərinə görə qəzetimizin əməkdaşı da daxil olmaqla bir qrup KİV nümayəndələri mükafatlandırıldı.

Nigar

Palitra.- 2011.- 15 fevral.- S. 7.