Flora Kəngərli: «Biz müasir təhsil standartlarını nəzərə alırıq və uşaqlar kompyuter biliklərinə də bizim bağçada yiyələnir»

Ölkəmizdə məktəbəqədər təhsilin müasir tələblərə uyğun qurulması sahəsində müəyyən işlər görülür. Yeni uşaq bağçaları istifadəyə verilir, uşaqlar üçün daha yaxşı təhsil verilməsi məsələsi isə gündəmdə saxlanılır. Qeyd edək ki, hələ də bir sıra rayonlarda şəraiti yaxşı olmayan bağçalar var və uşaqlar həmin bağçalarda təhsil alırlar. Bəzən valideynlər haqlı olaraq öz uşaqlarını soyuq otaqlardan qorumaq, işini bilməyən tərbiyəçi və müəllimlərə həvalə etməmək üçün evdə saxlayırlar.

Ancaq təbii ki, bu zaman gələcəyin şagirdi bir çox imkanlardan məhrum olur. Çünki, məktəbəqədər təhsil həm uşaqlar həm də valideynlər üçün olduqca vacibdir. Dövlət tabeliyində olan bağçalarla yanaşı ölkəmizdə özəl bağçalar da fəaliyyət göstərir. Bunlardan biri ötən ilin sentyabr ayından Bakı şəhərində fəaliyyətə başlayan “BabyPlaza”dır. Bəs görəsən özəl bağçalarda vəziyyət necədir? Gələcəyimiz olan uşaqlarımız burda nəyi və necə öyrənirlər? Öncə onu qeyd edim ki, ilk baxışda “BabyPlaza” mənə Hollivud filmlərində görməyə adət etdiyim uşaq bağçalarını xatırlatdı. Öz işini bilən peşəkar tərbiyəçilər, uşaqlar və valideynlərlə işləyən psixoloqlar, səliqə-səhmanlı otaqlar, gigiyenik qaydalara həssaslıqla yanaşma, maraqlı oyun otaqları və s. Bunlar hamısı əslində körpələr üçün , onların rahat təhsil alması üçün yaradılan şəraitin müəyyən hissəsi idi. Qeyd edək ki, “BabyPlaza”nın direktoru Flora Kəngərli bizi uşaq bağçası ilə yaxından tanış etdi və ətraflı məlumat verdi. Flora xanım ixtisasca qadın həkimidir və uşaqları çox sevir. O, balaca fidanların istedadlı və bilikli yetişməsi üçün əlindən gələni etdiyini bildirir. Elə söhbətimizin əvvəlində də müsahibimiz bu haqda danışdı: “Burda işləməyim təsadüfi olmadı. Mənim uşaqlalara olan sevgim və qayğım bu gün bu bağçanı idarə etməyimə səbəb olub. Bildiyiniz kimi ixtisasca qadın həkimiyəm. Yəni, peşəmlə bağlı olaraq, uşaqların ana bətnində böyüməsindən tutmuş onların dünyaya gəlməsinə və ondan sonrakı dövrdə mən ana və övladını nəzarətdə saxlayıram. Bir həkim olaraq uşaq psixologiyasına yaxşı bələdəm. Mən bu vəzifəyə təyin ediləndə bütün bunlar nəzərə alındı.”

- Uşaqlarla işləmək yəqin ki, maraqlıdır?

- Uşaqlarla işləmək çox maraqlıdır. Burada uşaqlarla işlədikcə onlardan çox gözəl aura, müsbət enerji alıram. Bəzən iş vaxtının necə qurtardığının fərqinə belə varmırıq.

- Bu gün valideynlər bağçalardan öz uşaqları üçün nə tələb edirlər? Və sizin bağça bu tələbləri hansı səviyyədə ödəyir?

- Ümumiyyətlə, valideynlər təkcə özəl bağça deyil elə dövlət tabeliyində olan bağçalara aparanda da böyük bir inamla aparırlar. Hər bir valideyn tədris müəssisələrinə uşaqları aparanda o təhsil müəssəsindən uşağına həm savad verilməli, həm o uşaqlara tərbiyə verilməlidir. Yəni valideyn bütün bunları istəyir. Bura özəl bağça olduğu üçün biz bunu daha yüksək və keyfiyyətli şəkildə həyata keçiririk ki, valideynlər bizdən narazı olmasınlar. Mən özümdə ixtisasca həkim olduğum üçün burada gigiyenik qaydalara riayət olunmasına ciddi yanaşıram. Uşaqların geyimləri, dırnaqları, saçlarının təmizliyinə diqqət yetirilir. Mətbəximizin də təmizliyinə diqqət yetirilir. Bundan başqa bizdə dərslər 3 dildə aparılır. Uşaqlar burada rus,ingilis, rus dillərində təhsil alırlar. Biz yeni açılmışıq və bu müddət ərzində bacardığımızı onlara öyrədirik. Yəni uşaq hər gün evə qayıdanda valideynlər görür ki, uşaqlar burda nə isə öyrəniblər. Burada gördüyünüz kimi rəsm müsabiqələri, şahmat müsabiqələri keçirilir. Biz müasir təhsil standartlarını da nəzərə alırıq və uşaqlar kompüter biliklərinədə bizim bağçada yiyələnir. Sonra uşaqlar üçün rəqs kursları arterapiya vəs keçirilir. Bir sözlə biz balacaların bütün maraqlarını nəzərə alırıq. Onların hər hansı bir sahədə istedadlarının üzə çıxmasına şərait yaradırıq. Bütün bunları valideynlər görürlər və hələki onların bizdən heç bir narazılığı yoxdur. Bilirsiniz ki, biz ötən ilin sentyabr ayından fəaliyyətə başlamışıq. Və bizdə uşaqların 90 faizi bağçaya ilk dəfə gəlir. Yəni, onlar evdə valideyinləri və dayələri tərəfindən tərəfindən tərbiyə olunub, baxılıb və ilk dəfədir ki, bağça mühiti görürlər. Elə uşaqlar var ki, bağçada olublar və orda nəyisə öyrəniblər. Ancaq yenə də deyirəm uşaqların çoxuna hər şeyi sıfırdan başa salırıq, öyrədirik.

- “BabyPlaza”ya müəllimlər necə seçilir?

- Əməkdaşlarımızı, müəllimlərimizi biz ötən il yayda ümumi test üsulu ilə sınaqdan keçirib işə götürmüşük. İmtahan yolu ilə işə götürülən hər bir əməkdaşmızın minimum 3 il iş stajı var. Onların psixoloji hazırlığı da yoxlanılıb. Hər birinin uşaqlarla işləmək və uşaq psixologiyası ilə bağlı bilikləri təhlil edilib. Yəni burada uşaqlarla təsadüfi adamlar işləmir. Biz uşaqları sevən, onları başa düşən yüksək savada malik bacarıqlı kadrları işə götürmüşük.

- Xüsusi qayğıya ehtiyacı olan uşaqların təhsilə cəlb olunması da ciddi bir məsələdir. Bununla bağlı sizə müraciət edənlər olurmu?

- Bizə hələki, fiziki qüsurlara malik uşaqlarla müraciət edən valideyinlər yoxdur. Bizdə bir uşaq var ki, onun nitqində müəyyən qüsurlar var. Onunla da bizim özümüsün yüksək ixtisaslı loqopedimiz individual olaraq məşğul olur. Yadıma hələ də bəzi bağçalarımızda sovet dövründən qalma gündəlik rejimdə uşaqların təhsil alması düşür. Yəni, uşaqlara bir iki bayram üçün tədbir hazırlanır və uşaqlar hər gün bir neçə dəfə yemək yeyir və yatırlar. Bu da uşaq bağçalarında körpələrin gündəlik rejimi. Ən yaxşı halda uşaqlara rəsm dərsi keçirilir və ya bir neçə şeirin misrası əzbərlədilir. Vəssalam, bu da monoton bağça həyatı. Flora xanım bu barədə də danışdı:“ Mən deməzdim dövlət bağçalarında vəziyyət pisdir. Təhsil Nazirliyinin özünün proqramı var. Bizə verilən bu proqram əsasında öz nizamnaməmizi qurmuşuq və ona da öz əlavələrimizi etmişik. Bu əlavələr arasında, qeyd etdiyimiz kimi, şahmat, rəqs, üzgüçülük və sair məşğələlər əlavə olunub. Uşaqları maraqlandırmaq lazımdır. Elə eləmək lazımdır ki, uşaqların hər bir bir günü bağçada maraqlı keçsin. Bundan başqa uşaqları gəzməyə də aparırırq. Yəni, uşaq evə gedəndə ağlamasın ki, mən sabah bağçaya getmək istəmirəm. Çalışırıq ki, burada uşaqların günləri monoton olmasın. Gördüyünüz kimi, bizdə dərs otaqlarımız və oyun otaqlarımız olduqca maraqlı bir dizayna malikdir. Burada keçirilən dərslər hamısı uşaqlar üçün məntiq üzərində qurulmuş oyunu xatırladır. Hazırda bağçada 4 qrup var. Qruplarda uşaqlar yaşlarına görə qruplaşdırılır. Onlar 2-3 yaş arası, 3-4 yaş arası, 4-5 yaş arası və 5-6 yaş arası olaraq qruplaşdırılır. Burada qeyd etdiyim kimi uşaqlar 3 dildə təhsil alırlar. Həm uşaqların, həm də müasir dövrün tələbləri nəzərə alınır.”

- Valideynlərlə iş necə qurulur? Elə uşaqlar var ki bağçaya gəlmək istəmir.

- Valideyinlərin bizə bu sahədə köməyi olmalıdır. Bizim uşaq psixoloqumuz valideynlərlə müəyyən söhbətlər aparır. Biz valideynlərimizdən xahiş etmişik ki, uşaqlar üçün qurduğumuz rejimə şənbə və bazar günlərində evdə onlarda ciddi riayət etsinlər. Yəni, bu rejim pozulmasın. Bundan başqa valideynlər evdə uşağa təlqin etməlidir ki, bağça ikinci ailədir, oradakı müəllimlər onlar üçün ikinci valideyndir. Yəni, bağça uşaq üçün önəmlidir. Bəzən ailədə övladın tək olması onu ərköyünləşdirir o, nəyisə yaşıdları ilə paylaşmağı bacarmır, kiminləsə dost olmağı istəmir. Ancaq biz bütün bunları bağçada uşağa öyrədirik. Və ya valideynin evdə uşaqla hər hansı bir məşğələni aparmasına imkanı və vaxtı olmadığı halda bağçada bizim müəllimlər bunun öhdəsindən çox uğurla gəlirlər. Bizdə də uşaqlar olub ki, bağçaya gələndə 2-3 gün ev üçün darıxıb, ağlayıblar. Ancaq müəyyən vaxtdan sonra bağça onların doğma evinə çevrilib.

- Müasir dövrün uşaqları... Onları necə xarakterizə edərdiniz?

- İndiki uşaqlar çox sərbəstdirlər, bilikli, gözüaçıqdırlar. Bizim dövrümüzdə bu qədər televiziya kanalı, televizor, kompyuter, mobil telefon yox idi. Ancaq müasir dövrün uşaqları bütün bu yenilikləri çox tez mənimsəyir və bilirlər. Onların sıralarında istedadları olanlar çoxdur. Biz uşaqlarla işləyəndə onların istedadlarını nəzərə alıb onları üzə çıxarırıq. Çalışırıq ki, onlar bu bacarıqlarını daha da inkişaf etdirsinlər.

Nüşabə

Palitra.- 2011.- 16 fevral.- S. 11.