Azay Quliyev: “Məsuliyyət Xartiyası QHT-lərin ictimaiyyət arasında nüfuzunun daha da artmasına və onların hesabatlarının şəffaflığına xidmət edəcək”

Dünən Qeyri-Hökumət Təşkilatlarına Dövlət Dəstəyi Şurası Beynəlxalq Mətbuat Mərkəzində “Azərbaycanın qeyri-hökumət təşkilatlarının Məsuliyyət Xartiyası” adlı sənədin müzakirəsinə həsr olunmuş toplantı keçirdi.

Öncə qeyd edək ki, sözügedən xartiya 2010-cu ildə Azərbaycan Respublikası yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə Sahibkarlığın və Bazar İqtisadiyyatının İnkişafına Yardım Fondu tərəfindən hazırlanıb. Xartiya QHT-lərin fəaliyyətinin beynəlxalq standartlara uyğun təşkili, ictimai effektivliyi, hesabat şəffaflığı kimi əsas prinsipləri müəyyənləşdirir. Xartiyada deyilir ki, bu sənədi imzalamış Azərbaycan qeyri-hökumət təşkilatları (AZQHT) Azərbaycan Respublikası Konstitusiyasında əks etdirilmiş insan hüquqlarının müdafiəsi və möhkəmləndirilməsi, ölkənin dayanıqlı inkişafı, ətraf mühitin mühafizəsi, humanitar yardım, eləcə də Azərbaycanda digər ictimai maraqların müdafiəsi sahələrində fəaliyyət göstərən 21 QHT-dir. Sənəddə bildirilir: “Bizim təşkilatlar ölkənin maraqları naminə müxtəlif sosial və etnik qrupların nümayəndələri ilə çalışmaqla fəxr edir və bunu özünə şərəf bilir. Bizim bu və ya digər fəaliyyəti gerçəkləşdirmək hüququmuzun əsasında məlum azadlıqlar: söz azadlığı, yığıncaqlar və birliklər azadlığı və bizim tərəfdar olduğumuz ümumbəşəri dəyərlər durur. Fəaliyyətimiz ölkə Konstitusiyası və Azərbaycanın digər hüquqi aktlarına əsaslanır. Təşkilatlarımız öz fəaliyyətində vacib beynəlxalq sənədlərə və o cümlədən İnsan Hüquqları haqqında Ümumi Bəyannaməyə də əsaslanır. Fəaliyyətimizi gerçəkləşdirərkən biz hüquq bərabərliyinə riayət edirik və bütün insanların şəxsiyyətinə hörmətlə yanaşırıq. Biz həm də çalışdığımız və naminə fəaliyyət göstərdiyimiz ölkə vətəndaşlarının etibarı və dəstəyinə arxalanırıq. Fəaliyyətimiz maliyyə və texniki yardımsız, dövlət və ictimai dəstəksiz mümkün olmazdı”. Tədbirdə QHT-lərə Dövlət Dəstəyi Şurasının sədri Azay Quliyev bildirib ki, bu xartiya QHT-lərin özünütənzimləməsini nəzərdə tutur: “Bu, QHT-lərin ictimaiyyət arasında nüfuzunun daha da artmasına və onların hesabatlarının şəffaflığına xidmət edəcək”. Azay Quliyev onu da bildirib ki, xartiyadakı müddəaların həyata keçirilməsinə hər hansı nəzarət olmayacaq. Onun sözlərinə görə, bu sənəd yalnız özünütənzimləməni nəzərdə tutur.

İlkin AĞAYEV

Palitra.- 2011.- 18 fevral.- S. 4.