Hər bir bölgə üçün fərqli “turist təkliflər paketi” hazırlanmalıdır

Ölkədə turizmin inkişafı prioritet istiqamətlərdəndir. Məhz bunun nəticəsidir ki, son illər ölkədə turizmin inkişafı ilə bağlı davamlı tədbirlər həyata keçirilir. Ölkə başçısı bildirib ki, 2011-ci ildə turizmin inkişafına böyük təkan verilməlidir: “Hesab edirəm ki, bu məqsədlə 2011-ci ilin “Turizm ili” elan olunması ədalətlidir. Elə etməliyik ki, bu sahədə böyük və gözəl nəticələr görək”. Hazırda bu istiqamətdə dövlət qurumları ilə yanaşı QHT-lərin də müxtəlif layihələr irəli sürməsi turizm sektorunun inkişafına təkan verər. Müsahibimiz Azərbaycanda Regional İnkişaf Mərkəzinin sədri, professor Çingiz İsmayılovdur:

- 2011-ci ilin ölkə başçısı tərəfindən “Turizm ili” elan edilməsi, bu sektorun daha da genişləndirilməsi, inkişafı ölkə iqtisadiyyatına, regionların sosial-iqtisadi inkişafına hansı töhfələr verə bilər?

- Məlum olduğu kimi, hələ keçən il respublikamızda “2010-2014-cü illərdə turizmin inkişafına dair Dövlət Proqramı” təsdiq edilib. Bu baxımdan 2011-ci ilin “Turizm ili” elan edilməsi yeridilən iqtisadi siyasətin məntiqi davamı kimi qəbul olunmalıdır. Təbii ki, ”Turizm ili”nin xüsusi olaraq qeyd olunması respublikamızda turizm industriyasının inkişafında təkanverici rol oynaya bilər. Lakin bunun əldə edilməsi üçün mövcud çatışmazlıqların aradan qaldırılması tələb olunur. Məhz bunun nəticəsində turizm sektoru regionların sosial-iqtisadi inkişafında öz töhfələrini verə bilər. Bu, ilkin mərhələdə mövsümi də olsa yeni iş yerlərinin açılmasına, xidmət sahələrinin inkişafına, infrastruktur şəbəkəsinin təkmilləşdirilməsinə, yerli sakinlərin əlavə gəlir əldə etməsinə köməklik edəcək.

- Son illər ölkəmizə gələn turistlərin sayı tədricən artır. Sizcə, bu gün bir sıra turizm ölkələrində baş verən hadisələr ölkəmizə turist axınının artmasına imkan yarada bilərmi?

- Ümumdünya Turizm Təşkilatının məlumatına əsasən, 2010-cu ildə dünyada turist səyahətinə çıxanların sayı 1 mlrd. nəfərə yaxın olub və 2020-ci ilə bu göstərici 1,5 mlrd. nəfərə çatacaq. Dünya üzrə turizm sektorunda əldə olunan gəlirlərin həcmi 2 trilyon dollar təşkil edir. Bununla əlaqədar turist axını təbii ki, respublikamızda artmaqdadır. Rəsmi məlumata əsasən, 2010-ci ildə Azərbaycana gələn xarici turistlərin sayı 1,85 mln. nəfər olub. Lakin turizm sektorunda əldə olunan gəlirlərin artmasına gəldikdə isə yay mövsümündə respublikanın bəzi turizm mərkəzlərində apardığımız müşahidələr göstərdi ki, onların bir çoxunda yüksək qiymətlərin olması turist axınında əsas maneə olur. Dünyada davam edən maliyyə-iqtisadi böhranı aydındır ki, turizm sahəsinə də öz təsirini göstərir. Belə şəraitdə turizm mərkəzləri arasında rəqabət artır və nəticədə xidmət səviyyəsi və daha əlverişli qiymətlər təklifi ilə çıxış edən mərkəzlər qalib olaraq inkişaf edirlər. Bunun əksinə olaraq rəqabətə davam gətirməyən turizm mərkəzləri tənəzzülə uğrayırlar. Eyni zamanda dünyanın bəzi yerlərində baş verən siyasi münaqişələr (Tunis, Misir, Yəmən və s.) potensial turistləri yeni istirahət yerləri arasında seçim etmə məcburiyyətində qoyur. Əlbəttə ki, belə şəraitdən düşünülmüş halda istifadə edilməsi məqsədəuyğun olar.

- Bir sıra turizm ölkələri turistlərin cəlbi üçün onlarda maraq doğuracaq üsullardan istifadə edirlər. Sizcə, Azərbaycanın turizm ölkəsinə çevrilməsi, çoxsaylı turist cəlbi üçün hansı yeni üsulların tətbiqi mümkündür?

- Xarici turistlərin ölkəmizə cəlb edilməsində ən vacib məsələlərdən biri müvafiq marketinq sisteminin qurulmasıdır. Əfsuslar ki, bu sahədə kifayət qədər boşluqlar mövcuddur. Məlumdur ki, istirahət üçün dünyada yer seçimində potensial xarici turist məlumatı əsasən internet resurs bazasından əldə edir. Turist kimi belə bir axtarış aparsaq, Azərbaycanın turizm sektoru haqqında çox səthi məlumat olduğunu görərik. Bu sahə haqqında məlumat əsasən respublikanın Mədəniyyət və Turizm Nazirliyinin saytında verilir. Lakin buradakı kartoqrafik məlumat yalnız Azərbaycan dilində verilib və bu da heç oxunmur, hər hansı turist marşrutlarının uzunluğu göstərilmir, turist mərkəzlərində təklif olunan xidmət növləri demək olar ki yoxdur, Bakının beynəlxalq hava limanından regionların turist mərkəzlərinə necə və hansı nəqliyyat növlərindən istifadə edilərək gedilməsi barədə məlumat yoxdur.

- Qabaqcıl turizm ölkələrindən biri olan Türkiyədə yerlərdə, kəndlərdə belə turistləri cəlb etmək üçün müxtəlif variantlar tətbiq edirlər. Bu gün bizdə yerlərdə sadəcə mehmanxana xidməti ilə kifayətlənirlər. Sizin buna münasibətiniz necədir?

- Bu haqda mən bir çox müsahibələrimdə və çıxışlarımda qeyd etmişəm ki, hələki ölkəmizə gələn turistlərə gözəl təbiətimiz və tarixi abidələrimizdən başqa digər maraqlı və cəlbedici təkliflər vermirik. Dolğun “turist paketi təklifləri” hazırlanmasa, bu sahənin gələcək inkişafı ilə bağlı bizim ümidlərimiz doğrulmayacaq. Respublikanın hər bir bölgəsinin unikal olduğunu nəzərə alaraq onların hər biri üçün fərqli “turist təkliflər paketi” hazırlanmalıdır. Məhz belə təkliflərin olmaması və eyni zamanda xidmət sahələrinin aşağı səviyyəsi və yüksək qiymətlərin olması problemlər yaradır, nəinki xarici turistlərin, hətta öz vətəndaşlarımızın da istirahət üçün qonşu Türkiyəyə, Gürcüstana, Misirə və Dubaya getməsinə səbəb olur.

- Regional İnkişaf Mərkəzi aqroturizmlə bağlı layihə ilə çıxış etmişdi. Bu istiqamətdə hansı tədbirləri həyata keçirmək olar?

- 2009- cu ildə bizim mərkəzimiz Prezident yanında QHT-lərə Dövlət Dəstəyi Şurası tərəfindən ayrılan maliyyə əsasında “Dağlıq Şirvan rayonunda aqroturizmin inkişafı” adlı lahiyə realizə etmişdi. Layihə rayonun yalnız 6 kəndini əhatə etmişdi. Əlbəttə ki, maliyyə dəstəyinin həcmi ilə bağlı bu layihə məhdud ərazini əhatə etdi. Hesab edirəm ki, bu kimi layihələrin respublikanın hər bir regionunda keçirilməsi vacibdir. Məhz buna görə QHT Şurası tərəfindən keçirilən növbəti müsabiqəyə Lənkəran və Lerik rayonlarında ev turizminin inkişafına həsr olunmuş yeni layihəmizi təqdim etmişik. Ümud edirik ki, müsabiqə komissiyası layihəmizi layiqincə qiymətləndirəcək və bu istiqamətdə işlərimizi davam etdirəcəyik.

- “Turizm ili” çərçivəsində müvafiq dövlət qurumları ilə yanaşı QHT-lərin də bu istiqamətdə fəaliyyətini artırması, yeni təkliflərlə çıxış etməsi vacibdir. Sizin mərkəz cari ildə bu istiqamətdə yeni layihələrlə çıxış etməyi nəzərdə tuturmu?

- Yuxarıda qeyd etdiyim kimi, respublikamızın turizm industriyası haqqında məlumat kifayət qədər deyil. Mərkəzimizdə hazırlanan yeni lahiyə məhz bu boşluqların doldurulmasına yönəlib. Bu baxımdan lahiyənin əsas ideyası ARCİS proqramından istifadə edərək respublikamızda turizm sahəsinə aid geoinformasiya məlumat bazasının yaradılmasıdır. Belə məlumat bazasının internet şəbəkəsində verilməsi həm ayrılıqda turizm mərkəzləri üçün, həm də müvafiq dövlət qurumlarının bu istiqamətdə apardığı işlərə yardım edilməsi baxımdan vacib hesab oluna bilər.

Nigar

Palitra.- 2011.- 22 fevral.- S. 6.