“Proqramın təsdiqlənməsi Prezidentin gənclərə verdiyi dəyər və onlara güvənməsinin təzahürüdür”

Xəbər verildiyi kimi, Prezident İlham Əliyev Azərbaycan gənclərinin səbirsizliklə gözlədiyi “Azərbaycan gəncliyi 2011-2015-ci illərdə” Dövlət Proqramını təsdiqlədi. Proqram gənclərin ixtisas hazırlığı, təhsili, məşğulluq məsələlərindən tutmuş, sosial problemlərinin həllinə qədər çox geniş əhatə dairəsinə malikdir.

Aktiv və qabaqcıl Azərbaycan gəncləri bu proqramın hazırlanması ilə bağlı təkliflər və təşəbbüslərlə çıxış etdilər, Prezident bu məsələ ilə bağlı olaraq şəxsən gənclərlə görüşdü. İndi isə bu proqramın dövlət başçısı tərəfindən təsdiqlənməsindən gənclər məmnun və nikbindirlər. Prezidentlə gənclərin görüşündə iştirak etmiş qabaqcıl gənclərdən biri də Lomonosov adına Moskva Dövlət Universitetinin məzunu, kimya üzrə fəlsəfə doktoru, London Materiallar Akademiyasının profesional üzvü, Böyük Britaniya Elmi Şurası tərəfindən təsdiqlənmiş imtiyazlı alim, BP şirkətinin baş mühəndisi, Gənc Xəzər Mühəndisləri İctimai Birliyinin sədri (Caspian Engineers Society - İ.A.) Rüfət Əzizovdur. R.Əzizov bizimlə müsahibəsində qeyd etdi ki, sözügedən proqramın təsdiqlənməsi Azərbaycan Prezidentinin gənclərə verdiyi yüksək dəyərdir.

- Prezident “Azərbaycan gəncliyi 2011-2015-ci illərdə” Dövlət Proqramını təsdiq etdi. Siz bunu necə qiymətləndirirsiniz?

- İlk olaraq onu qeyd edim ki, bu proqram digər dövlət proqramlarından fərqli olaraq geniş ictimai müzakirədən keçdi. Gənclərin müxtəlif təbəqələri müzakirələrdə aktiv iştirak etdilər və konkret təkliflərini verdilər. Sıfırdan başlayaraq məhz gənclərin istəkləri üzərində formalaşan çoxşaxəli proqramın təsdiqlənməsi isə əlbəttə ki, bir daha Azərbaycan Prezidentinin gənclərimizə verdiyi dəyərdir, onlara olan güvəncinin təzahürüdür. Bu proqramda gənclərin inkişafı və problemləri ilə bağlı məsələlər kompleks şəkildə əksini tapıb.

- Gənclər bu proqramdan nələri gözləyə bilərlər?

- Dövlət proqramı qarşısında gənclərin inkişafı ilə bağlı çox mühüm məsələlər qoyulub. Proqramda elm, təhsil, ümumilikdə yeni nəsil peşəkar kadrların hazırlanması ilə bağlı kifayət qədər müddəalar var. Proqram dövlət qulluğunda və idarəetmədə peşəkar gənclərin sayının artırılması, gənc alim və tədqiqatçıların sosial təminatının gücləndirilməsi və məişət problemlərinin həll edilməsini də xüsusilə nəzərdə tutur. Gənclər arasında sahibkarlığın inkişaf etdirilməsi, gənclərin özünüidarə və iqtisadi baxımdan özünütəminetmə bacarıqlarının inkişaf etdirilməsi də proqramda olan əsas məqsədlərdən biridir. Gənclərin ictimai təşəbbüslərinin dəstəklənməsi üçün təşkilati, maddi və məlumatlandırma mexanizmlərinin inkişaf etdirilməsi və gənclər təşkilatlarının ictimai həyatda təşəbbüskarlığının stimullaşdırılması da hesab edirəm ki, vacib məsələlərdən biridir. Bu saydıqlarım mənim hesab etdiyim ən mühüm məqsədlərdir. Lakin proqram bununla bitmir, bu dövlət sənədi gənclərlə bağlı sosial, infrastruktur, beynəlxalq mübadilə, mədəniyyətlərarası dialoq, bələdiyyələrdə iştirak və başqa məsələlərlə də xarakterizə edilir ki, bunlar da olduqca önəmlidir. Gördüyünuz kimi, proqram geniş spektrli məsələləri əhatə edir, gənclər üçün yeni imkanlar açır və əgər gənclər özləri də aktiv olarlarsa, bu proqramla istədikləri bir çox problemlərin həllinə nail ola, inkişaf edə bilərlər. Gənclər ilk növbədə ciddi təşəbbüslər göstərsələr və proqramın icrasında öz töhfələrini versələr, ciddi uğurlar qazana bilərlər.

- Bu sahədə sizin gənclərə daha hansı təklifləriniz var?

- Təkliflər artıq kifayət qədər proqramın tərtibatı zamanı verilib. Hesab edirəm ki, indi artıq proqramdan irəli gələn məqsədlərə çatmaq üçün mexanizmlərin hazırlanmasında və icrasında dövlətimizə dəstək olmaq əsas məsələdir.

- Proqramın icrası ilə bağlı siz və təşkilatınız hansı töhfələr verə bilərsiniz?

- Gənc Xəzər Mühəndisləri İctimai Birliyi əsasən xaricdə təhsil almış, hazırda müxtəlif transmilli şirkətlərdə çalışan, müasir texnologiyalara yiyələnmiş gənc azərbaycanlı mühəndislər tərəfindən yaradılıb. Birliyin əsas məqsədi Azərbaycanda və reqionda mühəndisliyin, texnologiyaların və elmin inkişafına töhfə verməkdir. Təşkilatımız proqramın tərtibatında aktiv iştirak edib. Xüsusən elm-təhsil, peşəkar kadrların inkişafı və texnoloji inkişaf barədə çoxlu sayda təkliflər verib. Hər bir təklifi verməzdən qabaq onu dərindən analiz etmişik və ən əsası isə icra mexanizmlərini hazırlamışıq. Təşkilatımızın qısa müddətdə əldə etdiyi uğurlar, ictimaiyyət tərəfindən olan etimad, yüksək hazırlıqlı, müasir kadr potensialı və peşəkar iş sistemi cəsarətlə onu deməyə əsas verir ki, profilimiz üzrə proqramda nəzərdə tutulmuş hər bir işin öhdəsindən müvəffəqiyyətlə gələ bilərik.

İlkin AĞAYEV

Palitra.-2011.- 13 iyul.- S.5.