Bakıda YUNESKO-nun Bioetika Komitəsinin sessiyası başlayıb

Bakı Biznes Mərkəzində YUNESKO-nun Beynəlxalq Bioetika Komitəsinin 18-ci sessiyası başlayıb. “Azadinform” xəbər verir ki, dövlət və hökumət nümayəndələri, bir sıra beynəlxalq təşkilatların əməkdaşları, ölkəmizdə fəaliyyət göstərən diplomatik korpuslar və digər müvafiq qurumların təmsilçilərinin iştirak etdiyi sessiya YUNESKO üzrə Azərbaycan Milli Komissiyası və Azərbaycan Milli Elmlər Akademiyası ilə birgə təşkil edilib.

Sessiyanın açılışında çıxış edən AMEA prezidenti, akademik Mahmud Kərimov xatırladıb ki, Azərbaycanla YUNESKO arasında çox sıx əməkdaşlıq mövcuddur və son illər elm, mədəniyyət və təhsil sahələrində icra olunan birgə layihələr bunun bariz nümunəsidir. M.Kərimov qeyd edib ki, bioetika elmi 20-ci əsrin 70-ci illərindən bəri dünyada çox yüksək sürətlə inkişaf edən müasir elm sahələrindən biridir. Onun sözlərinə görə, planetimizdə bioetikanın bərqərar olması yüksək biotibbi texnologiyalar sahəsindəki inqilabi nailiyyətlərlə, yeni texnologiyaların insan sağlamlığına və bəşəriyyətin gələcəyinə gətirən potensial risklərin qiymətləndirilməsi ilə şərtlənmişdir. Bioetika elminin inkişafı, bu sahədə tədrisin və maarifləndirmənin gücləndirilməsi istiqamətində Azərbaycanda da müvafiq işlərin görüldüyünü diqqətə çatdıran M.Kərimov qeyd edib ki, ölkəmizdə yeni ixtisas kimi qəbul edilən “Bioetika və tibbi hüquq” üzrə mütəxəssis və alimlərin hazırlanması üçün AMEA-da doktorantura və dissertantura yerləri açılıb, bu sahə ilə bağlı YUNESKO-nun bir sıra kitabları Azərbaycan dilinə tərcümə edilib. O, əmin olduğunu bildirib ki, toplantı bioetikanın inkişafına, burada müzakirə ediləcək problemlərin həllinə öz töhfəsini verəcək və sessiyanın yekunları əsasında konkret tədbirlər həyata keçiriləcək.

Sonra YUNESKO-nun xoşməramlı səfiri, Heydər Əliyev Fondunun prezidenti Mehriban Əliyeva və bu qurumun baş direktoru İrina Bokovanın müraciətləri təqdim edilib. Mehriban Əliyevanın təbrik məktubunda qeyd edilib ki, bioetikanın öyrənilməsi baxımından müxtəlif konfrans, forum və dəyirmi masaların keçirilməsi dəstəklənməlidir: “Hər birimiz yaxşı dərk etməliyik ki, biz öz ölkəmizin vətəndaşı olmaqla yanaşı, bəşəriyyət adlı bir ailənin üzvüyük. Qloballaşma prosesi hər birimizi böyük və ümumi məkanın sahibinə çevirib. Bu məkanda insanlar, dövlətlər və xalqlar arasında münasibətlər ədalət prinsipləri əsasında qurulmalıdır. Sabahı düşünürüksə, gələcək nəsillər qarşısında məsuliyyətimizi dərk ediriksə, bütün münasibətləri məhz etika və ədalət platformasında qurmağa çalışmalıyıq. Şübhəsiz ki, bu, uzunmüddətli prosesdir. Əminəm ki, humanizm və ədalət əsasında konstruktiv əməkdaşlığın qurulması məhz bu halda mümkün olacaq. Ümidvaram ki, bugünkü sessiyanın yekunları bioetikanın həm dünyada, həm bölgədə, həm də ölkəmizdə inkişafına xidmət edən önəmli bir addım olacaq. Tədbirin təşkilində əməyi olan hər bir kəsə, xüsusilə onun Bakıda keçirilməsini dəstəkləyən YUNESKO-nun baş direktoru xanım İrina Bokovaya dərin minnətdarlığımı bildirir, sessiyanın işinə uğurlar arzulayıram”. YUNESKO Baş direktorunun sosial və humanitar elmlər üzrə müavini Pilar Alvarez-Laso, Beynəlxalq Bioetika Komitəsinin sədri Donald Evans və digərləri mövzu ilə bağlı fikirlərini ifadə ediblər.

Qeyd edək Bioetika ilə bağlı çoxsaylı məruzələrin dinləniləcəyi sessiya iyunun 2-də başa çatacaq.

Cavidan

Palitra. – 2011. -1 iyun. –S. 4.