Hazırda ölkə üzrə 43 otel tikilir

Builki yay turizm mövsümünün açılışı Bakıda yerləşən “Ramada” otelində gerçəkləşdirildi. Azərbaycanın turizm sektoru təmsilçilərinin və ölkəmizdə fəaliyyət göstərən xarici ölkə səfirliklərinin nümayəndələrinin iştirakı ilə baş tutan tədbiri mədəniyyət və turizm naziri Əbülfəs Qarayev açaraq bildirdi ki, ölkəmizdə turizm mövsümü ənənəvi olaraq iyunun ortalarından başlayır.

Regionlardakı turizm müəssisələri qiymətlərdə 8-10 faiz civarında endirim ediblər

Nazirin sözlərinə görə, ötən ilin rəqəmləri göstərir ki, 200 mindən artıq Azərbaycan vətəndaşı yay mövsümü müddətində ölkəmizin bölgələrində istirahət edib: “Biz çalışıb ölkə vətəndaşlarımıza öz imkanları daxilində dincəlmək üçün şərait yaratmalıyıq. Bu gün Azərbaycanda müxtəlif kateqoriyalı otellər, motellər, istirahət zonaları mövcuddur. Statistika da göstərir ki, bu obyektlər mövsüm ərzində boş qalmır. Bu il bizi sevindirən faktlardan biri də odur ki, regionlarda fəaliyyət göstərən əsas turizm müəssisələri öz qiymətlərində 8-10 faiz civarında endirim ediblər. İqtisadi vəziyyətin yaxşılaşdırılması və istirahət mərkəzlərinə daha çox insanın cəlb edilməsi üçün biz ilk növbədə qiymətlərin tənzimlənməsini həyata keçirməliyik”. Cari ilin olduqca önəmli bir il olduğunu deyən nazirin sözlərinə görə, birincisi, ona görə ki, bu il Azərbaycanda qəbul olunmuş “Turizmin inkişafına dair” Dövlət Proqramının icrasının birinci ilidir. Digər tərəfdən isə ölkə başçısı tərəfindən bu il ölkəmizdə “Turizm ili” elan olunub. Bununla bağlı müvafiq tədbirlər görüldüyünü deyən Ə.Qarayev bildirdi ki, təbliğat kampaniyası keçirilir: ““Turizm ili” çərçivəsində Bakı şəhərində 6 beşulduzlu otelin açılışı gözlənilir. Hazırda ölkə üzrə 43 otel tikilməkdədir. İldən-ilə yerləşdirmə yerlərinin artması bir daha sübut edir ki, Azərbaycanda turizm sənayesi cəlbedicidir və sahibkarlar bu istiqamətdə sərmayə qoymaqda maraqlıdır”.

Nazir onu da vurğuladı ki, həmçinin Azərbaycanda keçirilən müxtəlif səpgili beynəlxalq tədbirlər, çempionatlar müxtəlif kateqoriyalı insanları ölkəmizə cəlb edir: “Bizim əsas məqsədimiz ölkəmizdə yüksək səviyyəli xidmətin tətbiq olunmasına nail olmaqdır. Bunun üçün ölkə Prezidentinin göstərişi ilə sentyabrdan Azərbaycan Turizm İnstitutunun nəzdində yeni üç təhsil mərkəzi yaradılacaq. Bu mərkəzlər gənclərə müxtəlif kateqoriya üzrə servis hazırlığını öyrədəcək”.

İlk 5 ay ərzində ölkəmizə gələn turistlərin sayı artıb

Gələn il Azərbaycanın “Eurovision” mahnı müsabiqəsinə ev sahibliyi edəcəyini deyən nazir bildirdi ki, tədbirdə iştirak etmək üçün bir çox Avropa ölkələrinin nümayəndələri Bakıya gələcək: “Biz bu insanların normal qarşılanmasını və yerləşdirilməsini təmin etməyə hazır olmalıyıq. Ötən ilin müvafiq dövrü ilə müqayisədə demək olar ki, bu ilin ilk 5 ayı ərzində ölkəmizə gələn turistlərin sayı artıb. Bunun bir səbəbi də odur ki, Azərbaycana gəlmək üçün viza qaydaları sadələşdirilib. Artıq turizm şirkətlərinin internet vasitəsilə kənar yazışmalar olmadan 2 həftə müddətində viza əldə etmək imkanı var. Bu, sözsüz ki, ölkəmizə gələn insanların sayının artmasına müsbət təsir göstərəcək. Bu il Azərbaycana gələn turistlərin sayının artması üçün çoxlu əsas var. AİTF beynəlxalq turizm sərgisi günlərində Körfəz ölkələrində Mədəniyyət və Turizm Nazirliyinin turizm üzrə rəsmi təmsilçiliyinin açılmasına nail olduq. Turizm Assosiasiyası bu işlə fəal məşğuldur. Bu il ilk dəfə Las-Veqasda keçirilən Ümumdünya Turizm Sammitinə qoşulmuşuq. Sentyabrda Bakıda Dünya Turizm Təşkilatının seminarları keçiriləcək. Noyabrda isə Ümumdünya Turizm Sammitinin rəhbərliyi Azərbaycana gələcək və burada yüksək səviyyəli görüşlər keçirəcək, həmçinin “Turizm ili”nin gedişatı ilə tanış olacaqlar”.

Payızdan Azərbaycandakı bütün mehmanxanaların nömrələrinin onlayn-bronlaşdırılması xidmətlərinin göstərilməsinə başlanacağını deyən Ə.Qarayevin sözlərinə görə, sentyabr-oktyabr aylarından bütün otellər internet vasitəsilə sifarişlər qəbul edə biləcəklər. Nazir bildirdi ki, Azərbaycandakı mehmanxanalarda nömrə bronlaşdırmaq asanlaşıb. “www.bakutourism.az” saytı vasitəsilə Azərbaycan, rus və ingilis dillərində nömrələrin onlayn-bronlaşdırılması sistemi yaranıb: “Azərbaycandakı bəzi otellər “booking.com” da daxil olmaqla onlayn-bronlaşdırılma üçün dünyanın aparıcı internet portallarında da qeydiyyatdan keçib. Bu gün Azərbaycanda dünyanın “Holiday İnn”, “Hilton”, “Park İnn”, “Radisson SAS”, “Ritz-Carlton”, “Hyatt” kimi mehmanxana operatorları təmsil olunur. Otellərin əksəriyyəti Bakıda və ölkənin iri şəhərlərində yerləşir. 2010-cu il ərzində mehmanxana xidmətlərinin göstərilməsi üçün 21 hüquqi və fiziki şəxsə lisenziya verilib. Hazırda ölkədə nazirliyin lisenziyası əsasında 295 mehmanxana və mehmanxana tipli obyekt fəaliyyət göstərir. Ötən il dövlət qeydiyyatından 16 mehmanxana və mehmanxana tipli obyekt keçib”.Qarşıda görüləcək işlərin çox olduğunu vurğulayan Ə.Qarayev qeyd etdi ki, turizm şirkətləri çox məsuliyyətli vəzifənin daşıyıcılarıdır: “Onlar Azərbaycan vətəndaşlarının və ölkəmizə gələn xarici turistlərin yüksək səviyyəli xidmətlə təmin olunmasına, onların buradan yüksək təəssüratla qayıtmalarına cavabdehdirlər. Turizmlə maraqlanan bütün insanları gəzməli-görməli, səfalı yerlərimizə, tarixi abidələrlə zəngin olan bölgələrimizə, təbii müalicəvi mənbələrdə fəaliyyət göstərən sanatoriyalara dəvət edirəm”.

Bu il həm turizm şirkətləri, həm də mehmanxanalar yüksək gəlir əldə edə biləcəklər

Tədbirdə iştirak edən “Millennium” turizm şirkətinin rəhbəri Ruslan Quliyev bildirdi ki, hər il yay turizm mövsümündən əvvəl turizm şirkətləri öz məhsullarının rəqabətqabiliyyətli olmasını təmin etmək üçün bir sıra işlər görürlər: “Bunun üçün ilk olaraq bazarda keyfiyyətli, çevik və eyni zamanda bəlli qiymətlər toplusu hazırlanır ki, bu da rəqabətəqabiliyyətliliyi təmin etmək baxımından çox vacibdir. Həmçinin bu il ölkəmizdə “Turizm ili” olduğundan Mədəniyyət və Turizm Nazirliyinin və Azərbaycan Turizm Assosiasiyasının tapşırığı var ki, turizm şirkətləri qiymətləri münasib və sabit saxlasınlar. Bu məqsədlə müxtəlif otel və mehmanxanalarla bir sıra aksiyaların həyata keçirilməsini razılaşdırmışıq. Bunlardan biri “4 gün qal, 3 gün ödə”, “8 gün qal, 6 gün ödə” kampaniyasıdır. Artıq 10 gündür bu kampaniyaya start verilib. Konkret olaraq bu aksiya Nabranda yerləşən “Palma” istirahət mərkəzində gerçəkləşdirilib. Onu da bildirim ki, artıq kampaniya öz effektini verib. Belə ki, istirahət mərkəzi rəhbərliyindən aldığımız məlumata görə, həftəsonu üçün yerlər bir neçə həftəlik tamamilə tutulub. Sifarişlərin 40 faizi turizm şirkətləri tərəfindən verilib. Güman edirəm ki, bu qiymət enmələri turizmin kütləviliyini təmin edəcək və müəyyən bir dövriyyənin formalaşmasına şərait yaradacaq. Ən azından biz nikbin baxırıq ki, bu il həm turizm şirkətləri, həm də mehmanxanalar yüksək gəlir əldə edə biləcəklər”.

Şirkət rəhbəri onu da vurğuladı ki, dövrü mətbuatda, internet saytlarında, televiziyalarda intensiv olaraq reklamlar yerləşdirilir: “Düşünürəm ki, bunun da effekti böyükdür. Son vaxtlar media ilə turizm şirkətləri arasında yaranmış qarşılıqlı anlaşma və sıx əməkdaşlıq da bizim təbliğatımızı düzgün qurmağımıza kömək edir. Bütün bunlar onu göstərir ki, Azərbaycanın turizm sektoru yay mövsümünə hazırdır”.“Avropa” oteli də mövsümə hazırdır. Otelin baş meneceri Tolqa Akkaş bildirdi ki, bu məqsədlə “Avropa” otelində bir sıra yeniliklər tətbiq edilib: “Hovuzun ətrafını xüsusi olaraq yay mövsümü üçün hazırlamışıq. Bunu yalnız otelimizin qonaqları üçün deyil, həm də Bakı sakinləri üçün nəzərdə tutmuşuq. Bu ilin ölkə ərazisində “Turizm ili” elan olunması münasibətilə Azərbaycanın turizm potensialının xaricdə təbliğini həyata keçirmək üçün əməkdaşlıq etdiyimiz xarici turizm şirkətlərinin internet saytlarında müxtəlif reklam məlumatları yerləşdirmişik. Eyni zamanda “Avropa” oteli olaraq qiymətlərimizdə müəyyən endirimlər etmişik. Bunu həm əməkdaşlıq etdiyimiz xarici şirkətlər, həm də yerli turizm şirkətləri üçün etmişik. Bu səbəbdən də bizim 2011-ci ildən gözləntilərimiz böyükdür”.Tədbirin sonunda incəsənət ustaları maraqlı konsert proqramı ilə çıxış etdilər.

Nigar

Palitra.- 2011.- 21 iyun.- S.7.