Ermənistanı dünyaya işğalçı kimi tanıtmalı: Azərbaycanın səsi haqqın səsidir

Ermənistan-Azərbaycan, Dağlıq Qarabağ münaqişəsinin həllində Azərbaycanın ədalətli mövqeyinin dünyaya tanıdılması, işğalçı dövlətin bütünlüklə ifşa edilməsi və nəhayət, torpaqlarımızın qaytarılması dövlətimizin xarici siyasətində aparıcı yeri tutur. Bu sahədə beynəlxalq təşkilatlar və ayrı-ayrı aparıcı ölkələrlə mühüm əlaqələr qurmaqda qarşıya qoyulan məqsəd Azərbaycan reallıqlarını həmin nüfuzlu qurum və ölkələrin siyasi dairələrinə təfərrüatı ilə çatdırmaqdır. Bununla bağlı olaraq dünyanın nüfuzlu və aparıcı qurumları, diplomatları, siyasi partiyaları ilə ciddi əməkdaşlıqlar edilir. Bu isə ilk növbədə Azərbaycanın sözügedən məsələdə mövqeyinin həmin təşkilatların, siyasi qurumların təmsilçiləri və siyasilər tərəfindən qəbul olunmasına, yəni münaqişənin həllində müsbət nəticə verməsinə yönəlib. Bu əzmkar siyasətin nəticəsidir ki, Qarabağ münaqişəsinin nizamlanmasında ...

... aparıcı beynəlxalq təşkilatlar haqlı mövqeyimizi dəstəkləyir

Məsələn, İslam Konfransı Təşkilatı (İKT) Ermənistanı təcavüzkar kimi tanıyan və pisləyən ilk beynəlxalq təşkilatdır. İKT-nın bu həyat əhəmiyyətli məsələyə dair aydın və ədalətli mövqeyi həmin təşkilatla münasibətlərimizin yüksələn xətlə inkişafına əlverişli zəmin yaradıb. Xüsusilə önəmlisi odur ki, 1993-cü ildə BMT-nin Təhlükəsizlik Şurası Dağlıq Qarabağ münaqişəsinə dair 822, 853, 874, 884 saylı qətnamələri qəbul edib. Bu qətnamələrdə Azərbaycanın Dağlıq Qarabağ və digər ərazilərinin Ermənistan silahlı qüvvələri tərəfindən işğalı faktı bir daha təsbit olunub. BMT Baş Assambleyası 1993-cü ildə - 85-ci plenar iclasında Azərbaycanda olan qaçqın və məcburi köçkünlərə fövqəladə beynəlxalq yardımın göstərilməsi haqqında" qətnamə qəbul edib. Ümumilikdə, 1992-1996-cı illərdə BMT Təhlükəsizlik Şurasının sədri və BMT Baş katibi Azərbaycanın ərazi bütövlüyünü və suverenliyini təsdiqləyən bir sıra bəyanatlar yayıblar. 2008-ci il martın 14-də BMT Baş Məclisinin geniş iclasında 62-ci sessiyanın gündəliyində 20-ci bənd kimi duran "Azərbaycanın işğal edilmiş ərazilərində vəziyyət" məsələsinin müzakirəsi də rəsmi Bakının mühüm diplomatik nailiyyəti sayıla bilər. Bu qətnamə layihəsi BMT Baş Məclisinin Ermənistan-Azərbaycan, Dağlıq Qarabağ münaqişəsinə dair mövqeyini aydın ifadə edir və Azərbaycanın beynəlxalq səviyyədə tanınan sərhədləri çərçivəsində ərazi bütövlüyünə dəstək verir, işğal olunmuş bütün ərazilərdən Ermənistan qüvvələrinin tam və qeyd-şərtsiz çıxarılmasını tələb edir. BMT-in Ermənistanı yenidən işğalçı dövlət kimi tanıması Azərbaycan üçün hər mənada strateji əhəmiyyətli qərardır. Bundan başqa, Ermənistan-Azərbaycan münaqişəsinin həll edilməsindəki roluna görə, ATƏT çərçivəsində əməkdaşlıq Azərbaycanın xarici siyasətində xüsusi yer tutur. AŞPA-nın 1416 saylı qətnaməsində isə birmənalı olaraq Ermənistandan hərbi qüvvələrini işğal etdiyi Azərbaycan ərazilərindən çıxarması, 1 milyon qaçqın və məcburi köçkünün doğma torpaqlarına dönməsinə imkan yaratması tələb olunur. AŞPA-da bu qətnamənin həyata keçirilməsinə nəzarət etmək üçün alt komitə yaradılıb. Xocalı soyqırımının ildönümü ilə bağlı AŞPA-nın yazılı bəyannaməsi də qəbul olunub, bəyannamədə “Xocalı soyqırımı” ifadəsi yazılıb. Ümumiyyətlə, son dövrlərdə ən yüksək ranqlı dünya diplomatları Azərbaycanın ədalətli mövqeyini müdafiə etdiklərini açıq ifadə edirlər ki, bu da diplomatiyamızın effektli fəaliyyətini və Azərbaycanın beynəlxalq imicinin olduqca gücləndiyini qabarıq göstərir. Məsələn, Avropa Komissiyasının sədri Xose Manuel Barrozu bu yaxınlarda bildirib: “Biz ərazi bütövlüyü prinsipini dəstəkləyəcəyik və istəyirik ki, Azərbaycan Respublikasının ərazi bütövlüyü təmin edilsin”. Qeyd edilənlərlə bərabər, Azərbaycan dövləti Ermənistanın dünyada işğalçı kimi tanınması və haqlı mövqeyimizin bütün dünya qurumları, ictimaiyyəti tərəfindən qəbul edilməsi üçün cəmiyyətimizin də ciddi səfərbər olunmasına çalışır. Bunun üçün...

vətəndaş cəmiyyəti strukturları...

...ciddi səfərbər edilib. Çünki Ermənistanın əsl simasını daha yaxşı tanıtmaq işini tamamlamaq üçün cəmiyyətin informasiya savaşında önə çıxması çox vacibdir. İnformasiya savaşı birinci növbədə cəmiyyət tərəfindən aparılmalıdır. Unutmayaq ki, Ermənistan işğala haqq qazandırmaq üçün bizə qarşı dezinformasiya hücumuna keçib. Bunu önləmək əvvəllər xeyli çətin olsa da, hazırda vəziyyət kökündən dəyişir. Çünki vətəndaş cəmiyyətini gücləndirmək, Azərbaycan həqiqətlərini beynəlxalq ictimaiyyətin diqqətinə çatdırmaqda onların təşəbbüslərini intensiv dəstəkləmək üçün dövlət vacib qurumlar formalaşdırıb. Buna görə də ermənilərlə informasiya savaşında xeyli aktivlik hiss olunur. Azərbaycan Prezidenti yanında Qeyri-Hökumət Təşkilatlarına Dövlət Dəstəyi Şurası və Azərbaycan Prezidenti yanında KİV-in İnkişafına Dövlət Dəstəyi Fondu fəaliyyətə başladıqdan sonra bu istiqamətdə vətəndaş cəmiyyəti institutlarının layihələri intensiv şəkildə maliyyələşdirilməyə və dəstəklənməyə başlayıb. Bu qurumların elan etdikləri müsabiqələrdə Azərbaycan həqiqətlərinin təbliğatı ilə bağlı olaraq ayrıca istiqamətlər var. Bununla belə, bu sahə çox aktual olduğu üçün bir sıra nüanslara diqqət yetirək.Məsələn, QHT-lərə Dövlət Dəstəyi Şurasının fəaliyyətə başlamasından sonra QHT-lər milli məsələlərə ciddi önəm verməyə başlayıblar ki, bu da üçüncü sektorda ciddi keyfiyyət dəyişikliyi mərhələsi kimi xarakterizə edilir. Əvvəllər xarici donorlardan maliyyələşən QHT-lər milli məsələlər, Qarabağ problemi ilə bağlı layihələr həyata keçirə bilmirdi. Şuranın maliyyələşdirdiyi əsas istiqamətlərdən birinin məhz Azərbaycan həqiqətləri ilə bağlı olması isə çox şeyi dəyişdi. Məsələn, təkcə ötən il 43 layihə məhz Ermənistan-Azərbaycan münaqişəsi ilə bağlı həqiqətlərin dünya ictimaiyyətinə çatdırılmasına aid olub. QHT-lər bu yöndə xarici dillərdə çoxlu saytlar yaradır, nəşrlər çap etdirir, filmlər çəkir, xaricdə ermənilərin ifşasına yönəlmiş ciddi faktlarla tədbirlər, aksiyalar keçirirlər. Bununla belə, sözügedən sahə çox aktual olduğu üçün gələcəkdə bu yöndə ixtisaslaşan QHT-lərə daha əhatəli dəstək göstərilməsinə ehtiyac var. QHT-lərə Dövlət Dəstəyi Şurası ilk müsabiqələrdə əsasən Azərbaycan həqiqətləri, Qarabağ məsələləri ilə əlaqədar ictimaiyyətimizi maarifləndirmə məsələləri ilə bağlı istiqaməti maliyyələşdirirdisə, sonradan bu istiqamət dəyişildi. Belə ki, şuranın son müsabiqələrində Azərbaycan həqiqətlərinin beynəlxalq ictimaiyyətin diqqətinə çatdırılması ilə bağlı istiqamət maliyyələşdirilir. Bu, informasiya savaşında daha çevik olmaq zərurətindən irəli gəlir. Bununla belə, müşahidələr göstərir ki, cəmiyyətimizi informasiya savaşı barədə intensiv maarifləndirmək hələ aktuallığını itirməyib. Bu, Azərbaycan həqiqətlərinin beynəlxalq ictimaiyyətin diqqətinə çatdırılması kampaniyası ilə paralel aparılmalıdır. Cəmiyyət bu məsələdə tam hazır olmalıdır. Elə təbəqələr var ki, onlar Qarabağ, Azərbaycan həqiqətləri ilə bağlı milli maraqlara biganə mövqe tuturlar. Məsələn, bəzi dini təhsil müəssisələri və mədrəsələrdə təhsil alan gənclərin Azərbaycan həqiqətləri, tarixi, mədəniyyəti və məlum münaqişə ilə bağlı ciddi informasiya qıtlığı var. Bu cür təbəqələr yaşadığı cəmiyyətin problemlərinə yad ünsürlər kimi formalaşa bilərlər ki, bu da məqsədəuyğun deyil. Yaxud Azərbaycan həqiqətləri ilə bağlı hər hansı resurs, mənbə formalaşdırmaq üçün erməni vəhşiliklərinin şahidi olmuş bir sıra sakinlərin dilindən faktları toplamaq, hekayələr şəklində çap və tərcümə etmək, sayta qoymaq müşkülə düşüb. Çünki bu insanlarımız bir çox hallarda həmin faktları əhatəli təsvir etməyə həvəs göstərmirlər. Elələri var ki, öz başına gələnləri deməyə çəkinir. Halbuki buna ictimai diqqət və həvəs olsa, xariciləri mütəəssir edən çoxlu faktlar və bunların əsasında real hekayətlər ortaya çıxa bilər. Bununla ümumi problemimizin fərdi faciələr fonunda qabardılması və xaricilərə onların öz dilində təqdim edilməsi daha çox effekt yarada bilər. Xarici dillərdə sayt yaratmaq istəyən insanlar cəmiyyətimizdə bu məsələyə ümumi biganəlik olmasından gileylənirlər. Bu sahədə keyfiyyətli internet resursları və digər təbliğat materiallarının yaradılması da ciddi zəhmət tələb edir. Çünki daha zəngin faktlar toplamaq üçün hadisələrin şahidlərini tapmaq, bir-bir qapı döymək lazımdır. Yoxsa bu məsələdə işlənmiş, tamamlanmış, keyfiyyətli mənbə problemi qalacaq. Cəmiyyətdən qazanc götürən yerli və xarici şirkətlərin Azərbaycan həqiqətləri ilə bağlı layihələri maliyyələşdirmələrini təmin etmək üçün nəhayət ki, hüquqi mexanizm yaradılmalıdır. Ölkəmizdəki xarici şirkətlərin də Azərbaycan həqiqətləri ilə bağlı layihələrə dəstək vermələri bu kontesktdə təmin oluna bilər. Hətta onlar bu məsələdə “bitərəflik” bəhanəsi gətirdikdə belə, onların dəstəyilə sırf Azərbaycan mədəniyyəti, dəyərlərini təbliğ edən layihələr həyata keçirməklə dolayı olaraq Azərbaycan həqiqətlərinin təbliğini aparmaq olar. Azərbaycan həqiqətləri ilə bağlı imicləri formalaşmış QHT-lərin, KİV-lərin üzünə beynəlxalq donorların qapıları da bağlanır. Çünki xarici donorlar bu cür vətənpərvər qurumlarla işləmirlər. Belə olduğu halda, həmin qurumları stimullaşdırmaq və onların layihələrini intensiv maliyyələşdirməyə özəl sektoru cəlb etmək optimal üsullardan biridir.Bu məsələdə QHT, KİV, diaspor və xaricdə təhsil alan tələbələrlə ciddi koordinasiyaya və bu sahədə xüsusi tədbirlər həyata keçirilməsinə ehtiyac var. Diasporla İş üzrə Dövlət Komitəsinin Təbliğat, informasiya və analitik təhlil şöbəsinin müdiri Elşad Miraləm deyir: “Bununla bağlı Dünya Azərbaycanlılarının Əlaqələndirmə Şurasının toplantısında sənəd qəbul olunub. Burada müxtəlif istiqamətlərdə qarşıya qoyulan sənədlər, eyni zamanda müxtəlif ölkələrdə müvafiq fəaliyyət növləri ilə bağlı müddəalar var. Bundan başqa Dünya Azərbaycanlılarının 2-ci Qurultayının qərarları var. O qərarlardan irəli gələn məsələlərin həllli ilə bağlı diaspor təşkilatlarımız fəal iş aparır. Azərbaycanda fəaliyyət göstərən QHT, KİV və təhsil müəssisələrilə diaspor qurumlarının əlaqələndirilməsi istiqamətində ayrıca iş aparırıq. Bizə bununla bağlı müraciət edən QHT-lərin layihələrinin xaricdə həyata keçirilməsinə çalışırıq. Onların effektli layihələrinə dəstək veririk. Məqsəd həm Azərbaycan həqiqətlərini təbliğ etmək, həm də diasporla QHT-lər arasında koordinasiyanın daha effektiv və sistemli olmasına nail olmaqdır”. İnformasiya savaşı ilə bağlı bildirək ki, sırf bu sahədə beyin mərkəzinin aktuallığı da tez-tez gündəmə gətirilir.Qeyd edilənlər göstərir ki, haqq səsimizi dünyaya çatdırmaq, Ermənistanı işğalçı kimi tanıtmaq üçün sistemli iş aparılır, bu sahədə ortaya çıxan problemlər müzakirə edilir və yeni ideyalar reallaşdırılır. Prezident İlham Əliyevin bildirdiyi kimi, məqsəd birdir: Nüfuzlu beynəlxalq təşkilatları, sülhsevər qüdrətli ölkələri beynəlxalq hüquqa və bəşəri dəyərlərə məhəl qoymayan təcavüzkar Ermənistanı ədalət prinsipləri ilə yaşamağa, qonşu dövlətlərlə sivil münasibət qurmağa, işğaldan əl çəkməyə məcbur etmək.

İlkin AĞAYEV

Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun keçirdiyi müsabiqəyə təqdim etmək üçün

Palitra.- 2011.- 4 mart.- S. 7.