Qadınlar bütün sferalarda fəaldırlar

Bu gün bütün qadınların bayramıdır. Təbii ki, ildə bir dəfə xanımların da bayram keçirməyə haqqı var. Vaxtilə Mirzə Cəlilin əsərlərində göstərilən Azərbaycan xanımları indi çox fərqlidirlər. Böyük ədibin əsərlərində olduğu kimi, Azərbaycan xanımları təkcə evdə oturub anasından bozbaş bişirməyi öyrənməklə kifayətlənmirlər. Azərbaycan xanımları idman, incəsənət, mədəniyyət, elm sahələrində öz sözünü deyir, səslərini ucaldırlar.

Azərbaycan xanımları günü-gündən qloballaşan dünyamıza inteqrasiya edirlər. Cəmiyyətin bütün sahələrində qadınlarımız aktivdirlər. Təbii ki bu sevindirici haldır. Qadınlarımız istənilən halda cəmiyyətdə öz hüquqlarını necə qoruyacaqlarını, cəmiyyətə uyğunlaşmaq və s. kimi problemlərin öhdəsindən gəlməyi demək olar ki mənimsəyiblər. Bəlkə də elə buna görədir ki, bir çox ölkələrdə aktual olan gender mövzusu Azərbaycan üçün öz xarakterliliyini itirib. 2011-ci ilin mart ayının əvvəlinə ölkə əhalisinin ümumi sayının 50,4 faizini və ya 4 milyon 602 min nəfərini qadınlar təşkil edir. Ölkənin ictimai-siyasi, iqtisadi, mədəni həyatında fəal iştirak edən Azərbaycan qadınlarının məşğul əhalinin ümumi sayında xüsusi çəkisi 48,6 faizdir. Ümumtəhsil və orta ixtisas təhsili müəssisələrində müəllimlərin 74 faizi, ali təhsil müəssisələrində 46 faizi, həkimlərin 63 faizi qadındır. Ümumtəhsil məktəblərində şagirdlərin 46 faizi, orta ixtisas təhsil müəssisələrində oxuyanların 66 faizi, ali təhsil müəssisələri tələbələrinin 46 faizi qızdır. Yuxarıda qeyd etdiyimiz kimi, qadınlar bütün sferalarda fəaldırlar. Elə təhsil sahəsində də qadınlarımızın kişilərə nisbətən say çoxluğu diqqəti cəlb edir. Buna baxmayaraq ali təhsil alanlar arasında qızlar oğlanlardan çox olsa da, bu üstünlük sonradan görünmür. Əksinə, iş yerlərində yüksək vəzifə tutanlar arasında kişilər üstünlük təşkil edir. Bunun səbəbləri təbii ki, çoxdur deyib müəyyən səbəblərdən danışa bilərik. Ancaq eyni hal inkişaf etmiş ölkələrdə də baş verir.Britaniyada 100 əsas şirkətin rəhbərliyində qadınların 12,2 faizi təmsil olunur. ABŞ-da isə yüksək vəzifəli qadınların sayı 15,2 faizdir. Böyük Britaniyada hesabatda göstərilir ki, orta məktəbdə qızlar oğlanlardan daha yaxşı oxuyurlar, ali məktəblərə qızlar daha çox qəbul olunur və burda da daha yaxşı nəticə göstərirlər. 44 yaşına qədər bütün yaş qruplarında hazırda ali təhsilli qadınlar ali təhsilli kişilərdən çoxdur. Amerikada isə 45 yaşından aşağı ali məktəb məzunlarının çoxu qadınlardır. Azərbaycanda təhsil sahəsində xanımların sayı kişilərə nisbətən daha çoxdur. Ali məktəblərə qəbul imtahanları zamanı açıqlanan rəqəmlərdən hiss olunur ki, xanımlar təhsil almağa meyillidirlər. Və müəllimlik peşəsində çalışanların əksəriyyəti xanımlardır. Necə deyərlər, kəmiyyət və keyfiyyət eyni nisbəti təşkil etməlidir. Ancaq bir çox hallarda biz bunu görə bilmirik. Yaxşı olardi ki, biz bu barədə də fikirləşərdik.

Nüşabə

Palitra.- 2011.- 8 mart.- S. 13.