“20 il ərzində muğam sənətinin inkişafında, təbliğində çox davamlı dinamika müşahidə edilib”

Beynəlxalq Muğam Mərkəzində “Muğam aləmi” II Beynəlxalq Muğam Festivalının təntənəli açılış mərasimi olub. Tədbirdə Heydər Əliyev Fondunun prezidenti, YUNESKO və İSESKO-nun xoşməramlı səfiri, Milli Məclisin deputatı Mehriban Əliyeva və Heydər Əliyev Fondunun vitse-prezidenti Leyla Əliyeva iştirak ediblər.

Beynəlxalq festivalın prezidenti, Azərbaycanın birinci xanımı M.Əliyeva tədbiri açaraq bildirib ki, iki il əvvəl Heydər Əliyev Fondunun təşəbbüsü ilə Bakıda I Beynəlxalq Muğam Festivalı keçirilib. Uğurla keçirilmiş həmin festival çox geniş əks-səda yaradıb. Eyni zamanda, Beynəlxalq Muğam Mərkəzinin açılışı olub: “Bu gün tam əminliklə deyə bilərik ki, Muğam Mərkəzi bütün dünya muğamsevərləri üçün əsl muğam evinə çevrilib və bu gündən etibarən burada çox gözəl ölməz musiqi - muğam səslənəcək”.M.Əliyeva Heydər Əliyev Fondunun il ərzində bir neçə musiqi festivalı təşkil etdiyini də vurğulayıb: “Bu, Üzeyir Hacıbəyli, Qara Qarayev adına musiqi festivallarıdır. Bu, qədim Qəbələ şəhərində keçirilən Beynəlxalq Musiqi Festivalıdır. Bu, görkəmli həmyerlimiz Mstislav Rostropoviçin adını daşıyan musiqi festivalıdır. Hər bir belə hadisə, hər bir belə musiqi festivalı böyük bayrama çevrilir. Dünyanın məşhur musiqiçiləri, sənətkarları ölkəmizə gəlirlər. Mən ümidvaram ki, “Muğam aləmi” festivalı bu sırada layiqli yerini tutub və geniş auditoriyasını formalaşdırıb. Builki festivalın başqa bir özəlliyi də var. Bu festival Azərbaycanın müstəqilliyinin bərpa olunmasının 20-ci ildönümü ərəfəsində keçirilir. Biz fərəh hissi ilə qeyd edə bilərik ki, bu 20 il ərzində muğam sənətinin inkişafında, təbliğində çox davamlı dinamika müşahidə edilib. Son illər ölkəmizdə mədəniyyət sahəsində dövlət tərəfindən irimiqyaslı layihələr həyata keçirilir. Dövlət Proqramına əsasən Azərbaycanın teatrları, muzeyləri, konsert salonları bərpa olunur, yeni mədəniyyət ocaqları, regionlarda yeni musiqi məktəbləri tikilir, muğam və mədəniyyət mərkəzləri açılır. Bizim ən böyük sərvətimiz bizim mədəni irsimizdir. Bizim ədəbiyyatımız, poeziyamız, musiqimiz, təkrarsız, nadir xalçaçılıq məktəbimiz, təsviri sənətimiz, memarlıq abidələrimizdir. Bu mədəni irs bizi millət kimi qoruyub saxlayır. Bu gün bu mədəniyyəti qorumaq, saxlamaq, təbliğ etmək hər birimizin mənəvi borcudur. Bu gün mən üzümü məşhur ustadlarımıza tutub onlara dərin hörmət və ehtiramımı çatdırıram. Siz muğam sənətimizin korifeylərisiniz. Eyni zamanda, siz gənc istedadların müəllim və məsləhətçilərisiniz, onların bilik mənbəyisiniz. Mən sizə uzun ömür və cansağlığı arzulayıram. Bu festivalın hazırlanmasında əməyi olan hər bir insana öz təşəkkürümü bildirirəm. Ümidvaram ki, festival uğurla keçəcək”.Daha sonra festival açıq elan edilib. Hökumət rəsmilərinin, Milli Məclisin deputatlarının, Azərbaycanda akkreditə olunmuş diplomatik korpusun nümayəndələrinin, tanınmış mədəniyyət və incəsənət xadimlərinin iştirak etdikləri tədbir geniş konsert proqramı ilə davam etdirilib.Festivalın açılış mərasiminə ABŞ, Türkiyə, Çin, İran, Özbəkistan, İraq, İordaniya, Küveyt, Mərakeş və digər ölkələrdən gəlmiş qonaqlar da qatılıblar.

II Beynəlxalq Elmi Simpoziumun açılışı olub

Beynəlxalq Muğam Mərkəzində açılan “Muğam aləmi” II Beynəlxalq Muğam Festivalı çərçivəsində II Beynəlxalq Elmi Simpoziumun açılışı olub.Tədbirdə çıxış edən mədəniyyət və turizm naziri Əbülfəs Qarayev beynəlxalq simpoziumun martın 17-ə qədər davam edəcəyini bildirib. Beynəlxalq Muğam Festivalının əhəmiyyətindən danışan nazir, bu münasibətlə ölkəmizə təşrif buyurmuş çoxsaylı qonaqları bir daha salamlayıb. Ə.Qarayev muğam sənətinin inkişaf dövründən söz açıb: “XIX əsrin əvvəllərində muğam sənətinin təşəkkülündə qızıl dövr hesab edilir. XIX əsrin sonlarında XX əsrin əvvəllərində isə Azərbaycan xanəndə və saz ustalarının sorağı artıq Avropadan gəlməyə başladı. Milli bəstəkarlıq məktəbinin yaranmasında muğam təməl rolunu oynadı. XX əsrdə isə muğam dünya musiqi sisteminə daxil oldu”. Nazir bu gün Azərbaycanda muğam sənətinə xalq məhəbbətinin, eləcə də dövlət qayğısının olduğunu da qeyd edib. Təhsil naziri Misir Mərdanov da çıxışında Azərbaycan muğam sənətinin böyüklüyündən söz açıb və festival çərçivəsində bir çox maraqlı tədbirlərin təşkilini vurğulayıb. Azərbaycan Milli Elmlər Akademiyasının prezidenti Mahmud Kərimov, YUNESKO nümayəndəsi, fransalı Jan Dürinq, Azərbaycan Bəstəkarlar İttifaqının sədri Firəngiz Əlizadə II dəfə keçirilən beynəxlaq festival çərçivəsində çoxsaylı uğurların əldə olunduğunu qeyd ediblər.II Beynəlxalq Elmi Simpoziumda ABŞ, Almaniya, Azərbaycan, Çinin Uyğur muxtar regionu, Finlandiya, Fransa, İran, Kanada, Özbəkistan, Rusiya, Tunis və Türkiyə iştirak edir.Beynəlxalq simpozium Bəstəkarlar İttifaqında müxtəlif məruzələrin çıxışı ilə davam edib.

Kanadalı musiqişünas: “Muğamdakı ahəng, qulağa gələn gözəl sədanı canlı eşitmək bir şansdır”

“Azərbaycan muğamına heyran oldum. Muğamdakı ahəng, qulağa gələn gözəl sədanı canlı eşitmək bir şansdır”. Bu sözləri Bakıda keçirilən “Muğam aləmi” II Beynəlxalq Muğam Festivalında iştirak edən kanadalı musiqişünas Robert Simms deyib. Beynəlxalq Muğam Festivalında iştirakdan məmnunluğunu dilə gətirən kanadalı qonaq, səfər müddətində Azərbaycan mədəniyyəti ilə yaxından tanış olacağını söyləyib: “Baxmayaraq ki, ikinci gündür Bakıdayam, bura mənim üçün artıq çox doğmadır. Festivala isə söz ola bilməz. Muğam festivalı çox yüksək səviyyədə təşkil olunub. Biz burada mədəni istirahət edirik. Bu festival fantastikadır”.

İlkin

Palitra.- 2011.- 16 mart.- S. 2.