«Məşqçi-müəllimlərə böyük ehtiyacımız var»

Layihə çərçivəsində müsahibimiz Azərbaycan Dövlət Pedaqoji Universitetinin idman klubunun sədri, Əməkdar məşqçi və Əməkdar bədən tərbiyəsi və idman xadimi Gülbaba Quliyevdir. Əməkdar məşqçi ali təhsil müəssisəsində idman dərslərinin hansı səviyyədə keçilməsi, tələbələrin bu dərslərə münasibəti ilə bağlı məsələlərə aydınlıq gətirdi. Müsahibimiz ilk olaraq çalışdığı ali təhsil müəssisəsində idmana olan münasibət haqqında məlumat verdi:

- Öncə onu qeyd edim ki, universitetimiz 1921-ci ildən fəaliyyət göstərir. ADPU-nun 10 fakültəsində 7 minədək tələbə təhsil alır. Yarandığı dövrdən bu günə kimi ölkəmizin istər təhsil sahəsində, istərsə də idman sahəsində aparıcı təhsil ocaqlarından biri sayılır. ADPU tələbə kontingentlərinə görə də aparıcı universitetlərdəndir. Bu gün Azərbaycan idmanı yüksələn templə inkişaf edir. İdmançılarımızın Avropa və dünya birinciliklərində, olimpiya oyunlarında əldə etdiyi uğurlu nəticələr ölkə idmanının inkişaf səviyyəsindən xəbər verir. Bundan savayı, ölkəmizdə keçirilən idman yarışlarının sayı və dərəcəsi Azərbaycanın idman sahəsində hansı inkişafa nail olmasından xəbər verir. Bu gün xarici idman ekspertlərinin əksəriyyəti vurğulayırlar ki, Bakı Avropanın idman mərkəzlərindən birinə çevrilib. Beynəlxalq idman qurumları dünya və Avropa birinciliklərinin ev sahibliyi hüququnu rahatlıqla Bakıya verirlər. Seçim edərkən Bakının şansı həmişə bir addım irəlidə olur. Bu isə dövlətimizin idman sahəsinə göstərdiyi diqqətlə bağlıdır. Ölkə başçısı daim bu sahəni diqqətdə saxlayır, ölkəmizdə yeni-yeni idman arenaları, olimpiya idman kompleksləri inşa edilir. Beynəlxalq standartlara cavab verən bu idman arenalarının regionlarda inşa edilməsi bölgələrimizdə də idmanın inkişafının, kütləviliyinin təmin edilməsinə böyük təkan verib. Bu həm idmanın inkişafını, həm də gənc nəslin sağlam böyüməsini təmin edir. Ölkəmizdə idmanın inkişafında müşahidə olunan bu inkişaf bizim universitetimizdən də yan keçməyib. Belə ki, universitetimizdə fəaliyyət göstərən hər bir idman növünə ayrı-ayrı diqqət və qayğı ilə yanaşılır. Bu qayğı ADPU-nun rektoru, AMEA-nın müxbir üzvü, professor Yusif Məmmədovun rəhbərliyə gəlməsindən sonra daha da canlanıb. Universitetimizin idman bazaları və zalları Avropa standartlarına cavab verən səviyyədə təmir olunaraq tələbələrimizin istifadəsinə verilib. Bizim idman oyunları zalımız da müasir tipli zallardan sayılır. Yaradılan bu cür gözəl şərait bizə imkan verir ki, ölkə daxilində təşkil olunan universiada və kütləvi idman tədbirlərində universitetimizi yüksək səviyyədə təmsil edək. Keçirilən bu tədbirlərdə iştirakımız və mükafata layiq yer tutmağımız universitet rəhbərliyi tərəfindən çox yüksək qiymətləndirilir.

- Universitetinizin tələbələri arasında hansı idman növlərinə maraq daha çoxdur?

-ADPU- nun nəzdində idmanın müxtəlif bölmələri var. Cüdo, sərbəst və yunan-Roma güləşi, dama, basketbol, voleybol, atletika və futbol tələbələrimizin daha çox maraq göstərdikləri idman növləridir. Amma ümumi götürdükdə, öz populyarlığına görə voleybol və basketbol bölmələri fərqlənir. Bu növlərə maraq göstərən əsasən qız tələbələrimizdir. Adlarını qeyd etdiyim idman növlərində qazanılın uğurlar ürəkaçandır. Tələbələrimiz voleybol və basketbol idman növləri üzrə keçirilən yarışlarda universitetimizin idman şərəfini layiqincə qoruyub və mükafata layiq yerlər tutublar. Digər tərəfdən universitetimizdə idmanın müxtəlif növlərinin fəaliyyət göstərməsi burada təhsil alan gənclərin sağlam ruhda, dövlətə və dövlətçiliyimizə sədaqətli vətəndaş kimi formalaşmasında böyük rolu var. Universitetlərimiz təkcə yaxşı mütəxəssis hazırlamamalıdır. Eyni zamanda onların Vətənə, dövlətə sadiq vətəndaş kimi yetişdirməlidir. Müasir universitet işini bilən, savadlı mütəxəssis və Vətənini sevən vətəndaş hazırlamalıdır. Hesab edirəm ki, bunda idmanın da çox böyük rolu var. Məsələn, universitetdə təhsil alan tələbənin idmanla məşğul olması, müxtəlif yarışlara qatılması həm onların sağlam böyüməsini təmin edir, həm də qazanılan qələbələr onlarda dövlətə, bayrağa olan məhəbbəti daha da artırır. Eyni zamanda gənc mütəxəssislərimizin sağlam böyüməsi, boş vaxtlarının səmərəli təşkil edilməsi baxımından da idmanın xüsusi rolu var.

- Tələbə idmançılarınız hansı yarışlarda fərqləniblər?

- Yola saldığımız tədris ilində universitetimizin tələbə idimançıları ümummilli lider Heydər Əliyevin ildönümünə həsr olunmuş ali məktəb tələbələri arasında yüksək liqada keçirilən futbol yarışlarında iştirak ediblər. Həmçinin tələbələrimiz Gənclik Tələbə İdman Cəmiyyətinin Respublika Şurası, Təhsil Nazirliyi və Gənclər və İdman Nazirliyinin təsdiq etdiyi kütləvi idman tədbirlərində təmsil olunublar. Belə ki, tələbələrimiz ötən il aprelin 1-dən 6-a kimi Aviasiya Akademiyasının idman bazasında təşkil olunan cüdo, sərbəst və yunan-Roma güləşi yarışlarında universitetimizin idman şərəfini layiqincə qoruyublar. Belə ki, həmin yarışda tələbələrimiz komanda hesabında cüdo və sərbəst güləş üzrə qızıl, yunan-Roma güləşi üzrə isə bürünc medal əldə ediblər. 15-20 aprel tarixində keçirilən dama yarışlarında qızlarımız komanda hesabında gümüş medal qazanıblar. Universitetin qızlardan ibarət basketbol komandası may ayında Azərbaycan Tibb Universitetinin idman zalında təşkil olunan yarışlarda gümüş medala sahib çıxıblar. Həmin ay yenə də Tibb Universitetində təşkil olunan voleybol yarışında voleybolçu qızlarımız bürünc mükafata yiyələniblər. Növbəti yarışımız isə T.Bəhramov adına Respublika stadionunda qızlar və oğlanlar arasında keçirilən atletika yarışları olub. Burada da təmsilçilərimiz uğurla çıxış edərək yarışları gümüş medalla başa vurublar. Tələbələrimiz 15 iyun Milli Qurtuluş Gününə həsr olunmuş mini-futbol turnirində də 3-cü yerlə kifayətləniblər. Cari ildə universiadada basketbol və atıcı komandamız üçüncü yeri tutublar. Müntəzəm olaraq universitet birincilikləri keçiririk və qalib olan tələbələrimiz mükafatlandırılır. Bütün bunların təşkil edilməsində dosent Vaqif Əliyevin rəhbərlik etdiyi universitetin Həmkarlar İttifaqı və Vurğun Məmmədovun rəhbəri olduğu Tələbə Həmkarlar İttifaqının böyük köməyi var. Doğrusunu desəm, əvvəllər bizim universitet yarışlara qatılanda, bu, bəzilərində təəccüb doğururdu. Lakin Yusif müəllim rektor təyin edildikdən sonra bu fikirlər dəyişdi. Onu da qeyd edim ki, artıq iştirak etdiyimiz yarışların püşkatmaları zamanı bizimlə mübarizə aparacaq komandalar açıq şəkildə təəssüflərini bildirirlər. Yəni, rəqiblər bizdən çəkindikləri üçün universitetimizin komandaları ilə qarşılaşmaq istəmirlər. Bütün bunlar universitet daxilində idmana yaradılan şəraitə bariz nümunədir. Azərbaycan Dövlət Pedaqoji Universiteti respublika universitetləri arasında ümumi göstəricilərinə görə ilk beşlikdə qərarlaşıb. Amma ayrı-ayrı idman növlərində tələbə idmançılarımız, qeyd etdiyim kimi, yüksək nəticələr göstəriblər. Bu il çıxış etdiyimiz 12 idman növünün 8-də mükafata layiq yer tutmağımız bir daha onu sübut edir ki, ADPU-da idman sürətlə inkişaf edir.

- İdmanın belə inkişaf səviyyəsi ilə müəllimlər ayaqlaşa bilirmi? Yəni müəllimlərin hazırlığı hansı səviyyədədir?

- Çox maraqlı və vacib məsələyə toxundunuz. Getdikcə inkişaf daha da artır və rəqabət mühiti daha da kəskinləşir. Bunlarla ayaqlaşmaq üçün mütəxəssislərə ehtiyac yaranır. Bizimlə rəqabətdə olan komandalar inkişaf edir, yeni mütəxəssislər cəlb edərək hazırlıqlarını artırırlar. Bu rəqəbətə davam gətirmək üçün tələbə idmançılarımızı lazımi səviyyədə hazırlayacaq yüksək səviyyəli məşqçi-müəllimlərə ehtiyac yaranır. Tələbələri hazırlayan müəllimlərin səviyyəsi də artmalıdır. Səmimi deyim ki, bəzi müəllimlərimizin müəyyən növlər üzrə çatışmazlığı var və bu da bəzi problemlər yaradır. Məşqçi-müəllimlərə böyük eytiyacımız var. Basketbol üzrə qızlardan ibarət komandamıza kənardan məşqçi dəvət etmişik. Yəqin ki, gələcəkdə bu kimi ehtiyaclarımız tam təmin olunacaq. Qeyd edim ki, nəticələrə diqqət edəndə ötən ili bizim universitet üçün düşərli il kimi qiymətləndirmək olar. Əgər iştirak etdiyimiz yarışların 80 faizində yüksək naliyyətlər əldə etmişiksə, bu artıq universitet üçün çox müsbət nəticədir. 2010-cu ildə qarşıya qoyulmuş məqsədlərə çatdıq. 2011-ci il bizim üçün daha əlamətdardır. Çünki bu il universitetimizin 90 illik yubileyini qeyd edirik. Çalışacağıq ki, qazandığımız uğurlu nəticələrlə universitetin idman şərəfini layiqincə qoruyaq.

Anar Miriyev

Palitra.- 2011.- 29 mart.- S. 7.