«Mədəniyyət müəssisələrimiz gənc nəslin vətənpərvərlik ruhunda tərbiyə olunmasına çalışır»

 

Layihə çərçivəsində müsahibimiz Ağcabədi Rayon Mədəniyyət və Turizm Şöbəsinin müdiri Rza Quliyevdir. O, müsahibəyə rəhbərlik etdiyi şöbə haqqında məlumat verməklə başladı: 

- Öncə onu qeyd edim ki, Ağcabədi Rayon Mədəniyyət və Turizm Şöbəsinin tabeçiliyində 1 Mərkəzi Kitabxana, 1 Uşaq Kitabxanası, 71 filial kitabxana, 1 rayon Mədəniyyət Evi, 41 klub müəssisəsi, Şəhər İncəsənət, Şəhər Musiqi, Qəsəbə Uşaq Musiqi Məktəbi, 6 kənd uşaq musiqi məktəbi, Heydər Əliyev Mərkəzi, Rayon Tarix-Diyarşünaslıq Muzeyi və bu muzeyin filialı olan Həmidə xanım Məmmədquluzadənin ev muzeyi, Rayon Dövlət Rəsm Qalareyası, Ü.Hacıbəyov adına Qarabağ Muğam Mərkəzi fəaliyyət göstərir. İl ərzində şöbəmiz çoxlu sayda mədəni tədbirlər həyata keçirir. Tədbirlərimiz əvvəlcədən müəyyənləşmiş proqram əsasında keçirilir. İlin əvvəlindən Rayon Mədəniyyət Evində, Qarabağ Muğam Mərkəzində, Rayon Hərbi Komissarlığında və rayon ərazisində yerləşən «N» saylı hərbi hissədə maraqlı rəngarəng konsert proqramlarından ibarət tədbirlər baş tutub. 1961-ci ildə yaradılan Ağcabədi Rayon Mədəniyyət Evinin nəzdində xalq kollektivi və “Rast” xalq ansamblı fəaliyyət göstərir.   “Rast” ansamblı 1977-ci ildə zəhmətkeşlərin ümumxalq festifalında, 1987-ci ildə isə folklor kollektivlərinin respublika baxış müsabiqəsində laureat olub. Ansambl dəfələrlə Bakı şəhərində keçirilən müsabiqələrdə çıxış edib və müvəffəqiyyət qazanıb. Mədəniyyət Evində mütəmadi olaraq tarixi və əlamətdar günlər, bayram günləri ilə əlaqədar konsert proqramları, ədəbi-bədii gecələr, oxucu konfransları, söhbət-diskussiyalar təşkil olunur. Həvəskar teatr kollektivinin iştirakı ilə tamaşalar hazırlanır. Qarabağ Muğam Mərkəzində keçirilən tədbirlərdə şöbənin tabeçiliyində olan uşaq musiqi və incəsənət məktəbləri şənliklər keçirirlər. Gənc çağırışçıların həqiqi hərbi xidmətə yola salınma mərasimlərində rayon ziyalıları və ictimaiyyəti, çağırışçıların valideynləri ilə birgə Rayon Hərbi Komissarlığında mədəni-kütləvi tədbirlər keçirilir. İlin ötən 9 ayı ərzində Heydər Əliyev Mərkəzində illik iş planına əsasən görüləcək işlər həyata keçirilib. 20 Yanvar faciəsinin növbəti ildönümü, Azərbaycan Respublikasının Milli Qəhrəmanı Mübariz İbrahimovun doğum günü, Xocalı soyqrımının 19-cu ildönümü ilə əlaqədar tədbirlər keçirmişik. Ümummilli lider Heydər Əliyevin anadan olmasının 88-ci illiyi də Heydər Əliyev Mərkəzində geniş qeyd olunub. Bundan əlavə keçirdiyimiz maraqlı tədbirlər arasında “Heydər Əliyevin şah əsəri olan Azərbaycan uşaqların rəngli dünyasında” adlı rəsm müsabiqəsini qeyd edə bilərəm. Ulu öndərin anadan olmasının 88 illiyinə həsr olunmuş uşaq və yeniyetmələr arasında açıq birincilik, məktəblilər arasında “Heydər Əliyev irsi və Azərbaycan gəncliyi” mövzusunda inşa yazı müsabiqəsi, “Heydər Əliyev Azərbaycan xalqının birliyinin və müstəqilliyinin rəmzidir” mövzusunda intellektual oyun rayon müsabiqəsi keçirilib. Dövlət müstəqilliyimizin 20 illiyi ilə əlaqədar olaraq silsilə tədbirlər həyata keçirilir. Heydər Əliyev Mərkəzində yeniyetmə və gənclərin asudə vaxtının səmərəli və maraqlı keçirilməsi üçün kompyuter kursu, xalçaçılıq kursu, tikiş dərnəyi, “Gənc rəssamlar” dərnəyi və bədii qiraət və nitq mədəniyyəti dərnəyi yaradılıb.İlin ötən 9 ayı ərzində mərkəzə yeni daxil olmuş kitabların sərgisi, həmçinin ulu öndərimizin fəaliyyəti ilə bağlı, əlamətdar günlərlə bağlı vaxtlı-vaxtında sərgilər təşkil olunub. Cari ilin 9 ayı ərzində muzeyə gələnlərin sayı 1500 nəfərdən çox olub. Mərkəzdə eksponatların sayı 394 ədəddir. Qeyd edim ki, 20 Yanvar faciəsi, 26 fevral Xocalı soyqırımı günü və 31 Mart Azərbaycanlıların Soyqırımı Günü ilə əlaqədar stend və sərgilər, fotosərgilər və anım mərasimləri təşkil etmişik. Ümumrayon tədbiri isə Qarabağ Muğam Mərkəzində olub. Bu tədbirlərdə hərbi hissələrin nümayəndələri də yaxından iştirak ediblər. Hər il olduğu kimi, bu il də rayonumuzda Novruz bayramı ilə əlaqədar mədəniyyət müəssisələrində tədbirlər keçirilib, ümumrayon tədbiri şəhər ərazisindəki stadionda hərbi hissələrin nümayəndələri, rayon əhalisi və rayonda yerləşən qaçqın və məcburi köçkün soydaşlarımızın yaxından iştirakı ilə yüksək əhval-ruhiyyə ilə keçirilib. Tədbirlərin sonunda qabaqcıl mədəniyyət işçilərinə və şagirdlərə Rayon İcra Hakimiyyətinin başçısı tərəfindən fəxri fərman və qiymətli hədiyyələr təqdim olunub. Həmin günlərdə rayon ərazisində yerləşən hərbi hissələrdə xidmət edən əsgərlərə bayram sovqatları və rəngarəng musiqi proqramları təqdim edilib.

- Rayon mədəniyyət müəssisələrinin fəaliyyəti necə təşkil edilib?

- Mədəniyyət müəssisələrinin fəaliyyətini günün tələbləri səviyyəsində qurmağa çalışırıq. Bu məqsədlə ölkə miqyaslı tədbirlərdə iştiraka diqqətlə yanaşırıq. Məsələn, bu il Uşaq Xor Kollektivlərinin VII Respublika Müsabiqəsində şöbənin tabeçiliyində olan uşaq musiqi və incəsənət məktəblərinin iştirakını təmin etmişik. Şəhər İncəsənət Məktəbinin xor kollektivi müsabiqədə müvəffəqiyyətlə çıxış edərək III yeri tutub və laureat adını alıb. Şəhər Uşaq Musiqi Məktəbi, Hacıbədəlli Kənd Uşaq Musiqi Məktəbi isə müsabiqədə uğurla çıxış edərək diploma layiq görülüblər. Əlamətdar günlərdə demək olar ki, bütün mədəniyyət müəssisələrində mədəni-kütləvi tədbirlər keçiririk. Bu il bizim üçün çox böyük sevincli hadisə o oldu ki, dövlət başçımız rayonumuza səfər etdi. Bu səfərlə əlaqədar rayon Mədəniyyət Evində və Qarabağ Muğam Mərkəzində rəngarəng konsert proqramları təşkil edilib. Maraqlı tədbirlərimizdən Qarabağ Muğam Mərkəzində Bərdə və Tərtər rayonlarından olan uşaq musiqi və incəsənət məktəblərinin müəllim və şagird kollektivlərinin bizim şöbənin tabeçiliyində olan uşaq musiqi və incəsənət məktəblərinin kollektivləri ilə birgə hesabat konsertlərinin təşkil olunmasını qeyd edə bilərəm. Bu tədbir şəhər sakinləri tərəfindən maraqla qarşılandı. Bundan savayı incəsənət məktəbimizin uşaq və müəllim kollektivi Bakı şəhərində yerləşən Şaroyev adına Bakı Uşaq Musiqi Məktəbi ilə birgə təcrübə mübadiləsi və yoldaşlıq hesabat konserti keçiriblər. Rayon Mərkəzləşdirilmiş Kitabxana Sistemində keçirdiyimiz «Kitab bayramı» əhali tərəfindən böyük maraqla qarşılanır və kitabsevərlərimiz təqdim olunan kitablara böyük maraq göstərirlər. Uşaqların Beynəlxalq Müdafiəsi Günü və Milli Qurtuluş Günü ilə əlaqədar mədəniyyət müəssisələrində sərgi və stendlər təşkil olunur. Mədəniyyət müəssisələrimiz gənc nəslin vətənpərvərlik ruhunda tərbiyə olunmasına çalışır. Bunun üçün keçirdiyimiz hər bir tədbirdən vasitə kimi istifadə edirik. Xüsusilə 26 İyun Silahlı Qüvvələr Günü ilə bağlı keçirdiyimiz tədbirlərdə bu məsələni daha geniş şəkildə təbliğ edirik. Rayon ərazisində yerləşən hərbi hissələrdə xidmət edən gənc əsgərlər qarşısında mədəni-kütləvi tədbirlər keçiririk. Rayon əhalisinin asudə vaxtının səmərəli keçirilməsi üçün müntəzəm olaraq hər həftənin şənbə və bazar günlərində musiqi kollektivlərinin iştirakı ilə yüksək səviyyədə mədəni-kütləvi tədbirlər təşkil edirik. Qeyd etdiyim kimi, dövlət müstəqilliyimizin bərpasının 20 illiyi ilə əlaqədar mədəni-kütləvi tədbirlər silsilə şəklində keçirilir. Oktyabrın 18-də bu tədbirlərin ən böyüyü ümumrayon tədbiri oldu və rayon əhalisi tərəfindən böyük ruh yüksəkliyi ilə qeyd edildi. Rayonumuzda keçirilən mədəni tədbirlər bunlarla məhdudlaşmır. Bu yaxınlarda Qarabağ Muğam Mərkəzində quruluşçu rejissoru Əməkdar incəsənət xadimi Hafiz Quliyev, dirijoru Əməkdar incəsənət xadimi Sevil Hacıyeva, truppa müdiri Əməkdar mədəniyyət işçisi Tamara Eyvazova olan Dövlət Akademik Opera və Balet Teatrı ağcabədililərə dahi Üzeyir Hacıbəylinin “Əsli və Kərəm” operasını təqdim etdi. Bu tamaşa yerli publikanın böyük marağına səbəb olmuşdu. Bir sözlə, rayonumuzun mədəni həyatı çox zəngindir.

 

 

Anar Miriyev

 

Palitra.-2011.-2 noyabr.-S.6.