«Kafedrada dözülməz vəziyyət yaranmışdı»

Azərbaycan Dövlət Neft Akademiyasının istehsalat proseslərinin avtomatlaşdırılması fakültəsinin dekanı Ramiz Allahverdiyev “Media forum” saytına müsahibə verib:

- Professor Rafiq Əliyev Azərbaycan Dövlət Neft Akademiyasının avtomatlaşdırılmış idarəetmə sistemləri kafedrasının müdiri vəzifəsindən sizin təqdimatınızla çıxarılıb. Belə bir təqdimat verməyinizin səbəbi nədir?

- Kafedrada dözülməz vəziyyət yaranmışdı. Bu isə istehsalat proseslərinin avtomatlaşdırılması fakültəsinin inkişafında böyük problemə çevrilmişdi. Rafiq Əliyev fakültə elmi şurasının iclaslarında, fakültənin keçirdiyi tədbirlərin heç birində iştirak etmirdi. Mən dekan kimi onun qəbuluna gedib məsələləri, yaranmış problemləri çatdıra bilmirdim. Bir sözlə, kafedra idarə olunmurdu. Ona görə də Rafiq Əliyevin kafedra müdiri vəzifəsindən çıxarılması üçün təqdimat yazmağa və rektorluq qarşısında məsələ qaldırmağa məcbur oldum. Mənim yazdığım təqdimat əsasında Rafiq Əliyev kafedra müdiri vəzifəsindən azad olundu.

- Problemlər nə vaxtdan yaranmışdı?

- Mən təzəlikcə dekan vəzifəsinə seçilmişəm, bunun bir müddəti yay sessiyasına düşüb, real işə sentyabr ayında başlamışam. Amma fakültə elmi şurasının bütün iclaslarının protokollarını qaldırıram və məlum olur ki, Rafiq Əliyev kafedra müdiri və şura üzvü olmasına baxmayaraq heç bir tədbirdə iştirak etməyib. Eyni zamanda Rafiq Əliyev Azərbaycan Dövlət Neft Akademiyasının keçirdiyi ictimai-siyasi tədbirlərin heç birinə qatılmayıb, akademiyanın elmi şurasına seçilmək təklif olunsa da, buna razılıq verməyib. Bu da onun işinin həddən artıq çox olması ilə əlaqədardır. Biz hamımız Rafiq Əliyevə bir ziyalı, alim kimi hörmət edirik. Sadəcə olaraq Rafiq müəllimin bu işləri görməyə vaxtı, bəlkə də heç həvəsi də yox idi.Ona görə də təqdimat yazmağa məcbur oldum. Bir neçə aydır dekanam, amma Rafiq müəllimlə işləməkdə çox ciddi çətinlik yaranmışdı. Yay sessiyası olduğuna görə kafedralarla əlaqələrimiz o qədər də dinamik deyildi. Amma sentyabrın 15-dən başlayaraq istehsalat proseslərinin avtomatlaşdırılması fakültəsi ilə bağlı olan kafedralarla əlaqələrimiz normal səviyyədə quruldu. Məlum oldu ki, Rafiq Əliyevin rəhbərlik etdiyi kafedrada ciddi problemlər var. Nə vaxt həmin kafedra ilə bağlı bir məsələ olub, problemlə qarşılaşmışıq. Hər dəfə də problemləri Rafiq müəllimin nəzərinə çatdırmışıq, demişik ki, kafedranı belə idarə etmək olmaz. Amma bir nəticəsi olmayıb.

- Təqdimat yazmamışdan əvvəl Rafiq Əliyevlə söhbətiniz olubmu?

- Bu məsələ bir qədər problem idi. Dövlət Neft Akademiyasında, fakültədə, kafedrada olan problemlərlə əlaqədar Rafiq Əliyevlə görüşmək mümkün olmurdu, bu, problem idi. Mən daxili telefonu götürüb ona zəng edə bilmirdim. Gərək Rafiq müəllimin qəbuluna gələydik, oturub gözləyəydik... Ya da gərək onun tabeçiliyində olan müəllimlərlə söhbət edəydik, məsələni deyəydik ki, müəllimlərə də onu Rafiq Əliyevə çatdırsınlar. Hətta bu intizamsızlığa görə avtomatlaşdırılmış idarəetmə sistemləri kafedrasının dosentlərindən birinə töhmət vermişik. Ona görə ki, biz dediyimiz məsələləri Rafiq müəllimə çatdırmalı olduğu halda bunu etməyib. Nəyə görə kimsə Rafiq Əliyevə görə töhmət almalıdır? Rafiq Əliyevlə görüş də problem idi. Mən də bir dekan olaraq bu işlərin öhdəsindən gələ bilmirdim, yəni kafedrada ab-hava yaxşı deyildi.Kafedradan böyük kadr axını vardı, dərs yükünü yerinə yetirəcək müəllim qalmayıb, müəllimlər gəlib dərs demək istəmirlər, şərait onları bezdirib. Rafiq müəllim yaxşı bilirdi ki, kafedrada, fakültədə problemlər yaranıb. Amma deyirdi ki, xəbərim yoxdur, mənə xəbər verməyiblər.Bütün çətinliklərə baxmayaraq təqdimat yazmamışdan iki gün əvvəl Rafiq müəllimlə söhbətimiz oldu. Onun nəzərinə çatdırdım ki, fakültədə problem yaradırsız, kafedranın işi günün, dövrün tələbləri səviyyəsində deyil...

- Bəs Rafiq Əliyevin reaksiyası necə oldu? Tanıyanlar, o cümlədən görkəmli alim Lütfü Zadə onu intizamlı insan kimi xarakterizə edir.

- Rafiq müəllim yaxşı bilirdi ki, fakültə ilə kafedra arasında böyük bir uçurum yaranıb.

- Fəaliyyətində problemlər olan digər kafedra müdirləri də varmı? Onlar haqda da təqdimat vermisinizmi?

- Rəhbərlik etdiyim fakültədə səkkiz kafedra var. Bütün kafedra müdirləri ilə təmasımız yüksək səviyyədədir. Onlar istənilən vaxt elmi şuranın iclaslarında iştirak edirlər, kafedra müdirlərinə istənilən vaxt zəng edib dərdimiz deyə, onları yanımıza çağıra bilirik. Yalnız Rafiq Əliyevlə bağlı problem vardı.

- Rafiq Əliyevin kafedra müdiri vəzifəsindən azad olunması böyük rezonansa səbəb olub. Əksəriyyət belə hesab edir ki, bu, siyasi qərardır və Rafiq Əliyev ictimai fəallığına görə cəzalandırılıb...

- Qətiyyən belə deyil. Tam səmimiyyət və məsuliyyətlə deyirəm ki, Rafiq Əliyevin ictimai cəhətdən fəal olmasının bu məsələdə heç bir rolu olmayıb. Bunun heç bir formada siyasi məsələlərlə əlaqəsi yoxdur. Sadəcə, müxalifət və onların nəzarətində olan mətbuat məsələni siyasiləşdirir. Bunu niyə etdiklərini başa düşə bilmirəm. Məsələ ondadır ki, Rafiq Əliyev yenə də bizim akademiyanın professorudur, tədrislə məşğuldur, bizim hörmətli elm adamımızdır.

- Rafiq Əliyevlə bağlı qərarın dəyişməsi, onun yenidən kafedra müdiri vəzifəsinə qaytarılması mümkündürmü?

- Mümkün deyil. Çünki dekanın təqdimatı qəbul olunub və o, vəzifəsindən çıxarılıb.

- Təqdimat yazmamışdan əvvəl ADNA rektoru Siyavuş Qarayevlə bu məsələni müzakirə etmişdinizmi? Rektorun təqdimata münasibəti necə oldu?

- Rektor mənə iradlarını bildirdi. Dedi ki, niyə məsələni vaxtında həll etməmisiz. Bu bir növ Rafiq müəllimə hörmətin təzahürü idi ki, biz məsələni bir qədər gecikdirirdik. Mən məsələni rektora izah etdim, o da mənim təqdimatımı qəbul etdi.

- Verdiyiniz təqdimata görə istər ADNA daxilindən, istərsə də kənardan sizə irad bildirən olubmu?

- Qətiyyən belə bir irad eşitməmişəm, heç kim bu barədə mənə irad bildirməyib. Çünki mən öz təqdimatımda haqlı idim. Elə bir qəbahət iş görməmişəm ki, kimsə mənə irad bildirsin. Həm də kafedra müdiri vəzifəsindən azad olunması Rafiq müəllim üçün faciə deyil. Dosta göndər

Palitra.-2011.-16 noyabr.- S.5.