Mirnasim Zeynalov: “Azərbaycan mədəniyyətinin tutduğu yüksək zirvəyə müvafiq daha çox işlər görülməlidir”

Azərbaycan mədəniyyətinin təbliğində xaricdəki diaspor təşkilatlarının mühüm rolu var. Bu gün dünyanın müxtəlif ölkələrində fəaliyyət göstərən diaspor təşkilatlarımız tərəfindən bu istiqamətdə bir sıra tədbirlər həyata keçirilir. Layihə çərçivəsində növbəti müsahibimiz Azərbaycan-Yeni Zelandiya Dostluq Cəmiyyətinin rəhbəri Mirnasim Zeynalovdur:

- Bir sıra ölkələrdə mədəniyyətimizin təbliği ilə bağlı müxtəlif tədbirlər reallaşdırılır. Xüsusilə Avropada və Amerikada azərbaycanlıların diaspor təşkilatlarının milli mədəniyyətimizin təbliğində qazandığı nailiyyətlərdən xəbərimiz var. Yeni Zelandiyada da bu istiqamətdə addımlar atırıq. Lakin bütün bunlar hələ azdır və Azərbaycan mədəniyyətinin tutduğu yüksək zirvəyə müvafiq daha çox işlər görülməlidir.

- Sizin cəmiyyət tərəfindən mədəniyyətimizin təbliği istiqamətində hansı addımlar atılır?

- Yeni Zelandiyadakı azərbaycanlıların əsas qayğıları buradakı pərakəndəliklərə son qoymaqla bağlıdır. İş burasındadır ki, burada cəmi 300 nəfərə yaxın həmyerlimiz yaşayır və onlar ərazisi Azərbaycandan üç dəfə böyük olan Yeni Zelandiyada kiçik qruplar şəklində və hətta bəzən tək-tək məskunlaşıblar. Əsasən soydaşlarımız Oklend, Vellinqton və Kraystçerç kimi üç ən böyük şəhərdə toplaşıblar. Bununla belə onların bəziləri Hamilton, Danedin, Kuinstoun və Nyu-Plimut kimi əyalət şəhərlərində də yaşayır. Həddən ziyada pərakəndəlik əlbəttə, hansısa bir tədbir keçirməyimizə mane olur. Buna baxmayaraq biz əlamətdar günlərdə - Yeni il şənliklərində, milli bayramlarımızda, ailə şənliklərində, yerli və gəlmə dostlarımızla görüşlərimizdə imkan dairəsində toplaşır və milli musiqimizlə, rəqslərimizlə bizə qatılan yerli dostlarımızı və qonaqlarımızı heyran qoyuruq. Bu görüşlərimizdə, bizə ünvanlanan suallara cavablarımızda, ya da yeri gələndə yerli sakinlərə Azərbaycan mədəniyyəti barədə məlumatlar veririk. Məsələn, mən Xocalı soyqırımının ildönümü ilə bağlı ənənəvi olaraq yerli universitetlərin tələbələrilə keçirdiyim tədbirlərdə milli mədəniyyətimizə aid verilən müxtəlif sualları da cavablandırmışam. Belə tədbirlər iki dəfə Oklend Universitetində, üç dəfə isə Vaykato Universitetində (Waikato University) keçirilib. Adətən mənim çıxışım fotoşəkillər, eləcə də 30 dəqiqəlik videomaterialla müşayiət olunur. Çıxışın sonunda tələbələrə onları maraqlandıran sualları vermək üçün imkan yaradılır və mən Yeni Zelandiyanın bir çox tələbələrinin Azərbaycanda, həmçinin Dağlıq Qarabağ münaqişəsi ətrafında baş verən hadisələrlə bağlı məlumatlı olduqlarına çox yaxşı mənada təəccüblənirəm. Bu, xüsusilə 5 il əvvəl Yeni Zelandiyada Azərbaycan haqqında ümumiyyətlə az insanın məlumatlılıq səviyyəsi ilə müqayisədə çox yaxşı faktdır.

- Bu istiqamətdə həyata keçirilməsi vacib olan amillər hansılardır?

- Azərbaycan Prezidentinin 21 fevral 2003-cü il tarixli fərmanı ilə “Xaricdə yaşayan azərbaycanlılarla bağlı dövlət siyasəti haqqında” qanun qüvvəyə minib. Qanunun maddələrindən birinin (7.4.1) tələbi bundan ibarətdir ki, Azərbaycanın müvafiq dövlət orqanları xaricdə yaşayan azərbaycanlıların mədəniyyət mərkəzlərinə, mədəni-maarif təşkilatlarına yardım göstərməlidirlər. Lakin görünür, məsafə uzaqlığı bu yardımı göstərməyə bir qədər mane olur. Azərbaycandan gələn rəsmi tədbir kimi burada mən yalnız S.Bağırzadənin Yeni Zelandiyada keçirilən “Gül festivalı”nda iştirakını qeyd edə bilərəm. Suğra xanım həmin festivalda özünün təbii və süni gül kompozisiyalarını nümayiş etdirmişdi. Amma güman edirəm ki, uzaq ölkələrdə yaşayan azərbaycanlılarla da yaxın əlaqələr yaradılmalıdır.

- Ümumiyyətlə, bu gün xaricdə mədəniyyətimizin təbliği istiqamətində yetərincə addımlar atılırmı?

- Əslində yetərincə addımlar xaricdə yaşayan azərbaycanlılar deyil, ölkəmizin özü tərəfindən atılır. Milli mədəniyyətimizin müxtəlif sahələrinə aid tədbirlər, musiqimiz, xüsusilə muğamatımız, təsviri incəsənətimiz, xalçaçılıq sənətimiz, bir sözlə, mədəniyyətimizin bütün sahələrinə aid tədbirlər əksər hallarda ölkəmizin rəsmi dairələri tərəfindən həyara keçirilir. Lakin hesab edirəm ki, biz də çox iş görə bilərik. Diasporlarımızın bu istiqamətdəki fəaliyyətlərində müəyyən canlanma var, amma səylər bir qədər də artırılmalıdır.

- Xaricilər tərəfindən Azərbaycan mədəniyyəti necə qarşılanır?

- Azəbaycan mədəniyyətinın xaricdə yüksək ab-hava ilə qarşılanmasına bir növ, necə deyərlər, öyrəşmişik. Əsas odur ki, bu tədbiri təşkil edən, icra edən olsun. Mən əminəm ki, Yeni Zelandiyada Azərbaycan mədəniyyəti eyni ab-hava ilə qarşılanar. Məndə bu əminlik bizim burada təşkil etdiyimiz nümayişlərə olan yüksək marağı gördüyümdən yaranıb.Yeni Zelandiyanın başlıca və diqqətəlayiq xüsusiyyətlərindən biri də ondan ibarətdir ki, burada yerli əhali ölkəyə gələnlərə mehriban və mülayim münasibət göstərir, bu da ölkə sakinlərini Avropa ölkələri əhalisindən köklü şəkildə fərqləndirən xüsusiyyətdir. Yoldan keçən birindən yardım istəsən, nəsə soruşsan, məmnuniyyətlə sənə kömək edərlər. Yeri gəlmişkən, məhz bu amil mənim bu dostsevər ölkəyə köçüb burada məskunlaşmağıma səbəb olub. Yerli əhali digər millətdən və dindən olanlara qarşı dözümlülük nümayiş etdirir. Sakinlərin milli azlıqlara olan tolerant münasibətini nəzərə alaraq əminliklə deyə bilərəm ki, Azərbaycan barədə, ölkəmizdə baş verən proseslər haqqında danışmaq üçün əla imkanlar var. Düşünürəm ki, biz artıq ciddi nəticələrə nail ola bilmişik. Yeni Zelandiya kənd təsərrüfatı və turizm sektoru yüksək səviyyədə inkişaf edən bir ölkədir. Yeni Zelandiyanın məsafə baxımından Azərbaycandan uzaqlığını nəzərə alsaq, ölkələrimiz arasında sıx iqtisadi əməkdaşlıq mövcud deyil, lakin yuxarıda da qeyd etdiyim kimi, kənd təsərrüfatı bu ölkədə çox yaxşı inkişaf edib.Düşünürəm ki, nümayəndələrimiz bu ölkədə lazımi bilik və məlumatlara yiyələnə bilərlər. Buna görə də mən Azərbaycanın biznes sektorunun nümayəndələrini daha sıx əməkdaşlıq etmək və bu uzaq, lakin mehriban, qonaqpərvər ölkə ilə dostlaşmaq üçün buraya dəvət etmək istərdim.

- Azərbaycandakı mədəniyyət ocaqları ilə əlaqələriniz necə qurulub?

- Bu sualın qısa cavabı “zəif”dir. Amma bu zəifliyin səbəbini təkcə “xarici” azərbaycanlılarda axtarmaq məncə, bir qədər düzgün deyil. Müxtəlif səbəblər var, bir tərəfdən ölkənin çox uzaqlığı, buradakı soydaşlarımızın azlığı, pərakəndəliyimiz, digər tərəfdən gözdən uzaq, könüldən iraqlığımız və s. Sağlıq olsun, hər şey düzələr.

- Qarşıda hansı planlarınız var?

- Mən və həmvətənlərim bu istiqamətdə nə etmək lazım gəldiyini yaxşı bilirik. Lakin pərakəndə yaşamağımız, bəzilərimizin həyat-məişət qayğıları, köməyin çətinliyi hələlik bizə mane olur. Fikrimcə, bu, müvəqqəti haldır. Əvvəla, getdikcə bizim burada sayımız artır. Təkcə vətəndən gələnlər hesabına deyil, həm də burada doğulan uşaqlar var. İkincisi, burada sayı bizlərdən qat-qat artıq olan cənublu soydaşlarımızla və türkiyəli qardaşlarımızla əlaqələrimiz getdikcə genişlənir və bu, hesab edirəm ki, hər üç tərəfin xeyrinə işləyir. Üçuncüsü, gözə çarpacaq dərəcədə təşkilatlanırıq.

Nigar

Palitra.-2011.-16 noyabr.-S.7.