«Ağcabədi rayon Mədəniyyət Evi fəaliyyətini günün tələbləri səviyyəsində qurur»

Layihə çərçivəsində müsahibimiz Ağcabədi rayon Yaqub Məmmədov adına Mədəniyyət Evinin direktoru Məzahir Mehtiyevdir:

- Azərbaycanın qədim bölgələrindən biri olan Ağcabədi rayonu öz musiqi tarixi ilə, musiqiçiləri və burda yaşayıb-yaratmış peşəkar xanəndələri, sənətkarları ilə fərqlənib. 1961-ci ildə Ağcabədi rayon Mədəniyyət Evi tikilməyə başlayıb. Ancaq buna qədər rayonda yaşayan xanəndə və müğənnilər indiki Qarabağ Muğam Mərkəzinin ərazisində yerləşən Pionerlər Evində bir araya gəliblər. 1949-cu ildən etibarən böyük sənətkar, el xanəndəsi Mütəllim Mütəllimov həmin Pionerlər Evinin özfəaliyyət teatrının rəhbəri olub. Dahi bəstəkarımız Ü.Hacıbəylinin “Arşın mal alan”, “Əlli yaşlı cavan”, “Beş manatlıq gəlin” əsərlərini tamaşaya qoyub və “Arşın mal alan” tamaşasında özü Əsgər rolunda çıxış edib. Bundan başqa o, Ağcabədi gənclərindən Fərzalı Novruzovu (Ağcabədinski), Naringilə xanımı, Leyla xanımı və bir çox istedadlı gəncləri teatrın truppasına cəlb edib. Habelə görkəmli muğam ustası Yaqub Məmmədovu Pionerlər Evinin nəzdində fəaliyyət göstərən muğam dərnəyinə dəvət edib. 1956-cı ildə o, Yaqub Məmmədovu Bakıya - Seyid Şuşinskinin yanına aparıb. 1963-cü ildə isə rayon Mədəniyyət Evi fəaliyyətə başlayıb. Habelə Mədəniyyət Evinin üst mərtəbəsində tar və piano sinfi olub. Bu siniflərdə tar dərsini Ayaz Novruzov, piano dərsini isə Sovet Quliyev tədris ediblər. M.Mütəllimov bu illərdə rayon Mədəniyyət Evinin direktoru vəzifəsində işləyib. 1967-ci ilin iyul ayından etibarən Mədəniyyət Evinin nəzdində “Rast” xalq çalğı alətləri ansamblı yaradılıb və geniş fəaliyyət göstərib. Belə ki, ansambla rayonun ən istedadlı musiqiçiləri cəlb olunub. Onun üzvlərindən Zahid Novruzov, Elxan Niyazov, Knyaz Quliyev, Kamran Hüseynov, Yelmar Quliyev, Hüsən Bəşirov, Muxtar Əliyev, Rasim Əliyev və başqaları xalq mahnı və muğamlarını gözəl ifa ediblər.“Rast” ansamblı respublikada keçirilən bir çox müsabiqələrdə qızıl medala layiq görülüb. 1991-ci ildə Ağcabədi şəhərində keçirilən Beynəlxalq “Xarı Bülbül” Festivalında 1-ci yer tutub. Ansamblın bədii rəhbərləri E.Niyazov, Q.Qəhrəmanov, dirijoru isə S.İbrahimov olub.2002-cı ildə rayon Mədəniyyət Evinə Xalq artisti, «Şöhrət» ordenli, görkəmli muğam ustası Yaqub Məmmədovun adı verilib. Mədəniyyət ocağı 2008-ci ildə Azərbaycan Prezidentinin Ağcabədi rayonuna səfəri zamanı verdiyi tapşırıqlara müvafiq olaraq müasir tələblərə cavab verən, standartlara uyğun şəkildə əsaslı təmir edilib və 2009-cu ilin fevral ayında istifadəyə verilib. Hazırda həmin müəssisədə 10 nəfər işçi çalışır. Mədəniyyət Evinin nəzdində “Rast” xalq çalğı alətləri ansamblı, dram dərnəyi, 2 şeir məclisi - “Qaranquş” və “Dərk” ədəbi şeir dərnəkləri fəaliyyət göstərir.

- Mədəniyyət Evinin nəzdində hansı özfəaliyyət dərnəyi fəaliyyət göstərir?

- Ötən ilin avqust ayında Mədəniyyət Evində bədii özfəaliyyət dram dərnəyi yaradılıb. Bu dərnək Ağcabədi Rayon Mədəniyyət və turizm şöbəsinin kənd mədəniyyət evləri və kənd klublarının işçilərindən ibarətdir və 15 üzvü var.Bədii özfəaliyyət dram dərnəyi ilk olaraq görkəmli yazıçı, ədib və publisist Nəriman Nərimanovun “Nadanlıq” əsərini tamaşaya qoyub. Tamaşa Ağcabədi rayon Üzeyir Hacıbəyli adına Qarabağ Muğam Mərkəzində 4 dəfə uğurla oynanılıb. Dərnək 2011-ci ilin yanvar ayında 1990-cı ilin Qanlı Yanvar hadisələrinə həsr edilmiş “İlham və Fərizə”, 26 fevral Xocalı soyqırımına həsr edilmiş “Bu dağların qoynunda yaşıl bir kənd var idi” adlı faciə janrında əsərləri səhnələşdirib. Həmçinin gələcəkdə də bir neçə əsərin səhnələşdirilməsini planlaşdırır.

- Rayonda fəaliyyət göstərən Qarabağ Muğam Mərkəzi muğamın inkişafında nə kimi rol oynayır?

- Çox böyük rol oynayır. Üzeyir Hacıbəyli adına Qarabağ Muğam Mərkəzi millət vəkili, Heydər Əliyev Fondunun rəhbəri Mehriban xanım Əliyevanın təşəbbüsü ilə inşa edilib, 2008-ci ildə mədəniyyət və turizm naziri Əbülfəs Qarayev, rayon rəhbərliyi və digər qonaqların iştirakı ilə açılışı olub. Mərkəz təkcə bizim rayona xidmət etmir. Elə mərkəzin əhəmiyyəti bir də ona görə böyükdür ki, burada Ağcabədi ilə yanaşı Ağdam, Beyləqan, Laçın, Kəlbəcər, Oğuz, Bərdə rayonlarından muğam ifaçıları muğamın sirlərini öyrənirlər. Qarabağ Muğam Mərkəzində vokal sinfi fəaliyyət göstərir ki, həmin sinifdə 12 nəfər şagird təhsil alır. Mərkəzin yay zalı ilin isti aylarında açıq konsertlərin təşkilində böyük rol oynayır. Ümumiyyətlə, Qarabağ Muğam Mərkəzi və burada təşkil olunan tədbirlər ağcabədililərlə yanaşı rayona gələn qonaqların da böyük marağına səbəb olur. Rayonumuzda musiqiyə, muğama maraq çox böyükdür. Ona görə də mədəniyyət müəssisələrimiz aktiv şəkildə fəaliyyət göstərirlər. Həmin məktəblərdən Üzeyir Hacıbəyli adına Şəhər Uşaq İncəsənət Məktəbini də qeyd edə bilərəm. 1965-ci ildən fəaliyyət göstərən məktəb 1986-cı ildən incəsənət məktəbi statusu alıb. Məktəbin 1200 məzunu var, onlardan 18 nəfəri ali ixtisas, 400 nəfəri orta ixtisas, 58 nəfəri isə qeyri-ixtisas təhsillidir. Hazırda şəhər incəsənət məktəbində 125 nəfər müəllim 465 nəfər şagirdin təlim-tərbiyəsi ilə məşğul olur. Məktəbdə tar, fortepiano, qarmon, kamança, səs, nağara, rəqs və rəssamlıq ixtisasları üzrə dərslər keçirilir. Məktəbdə “Humayun” xalq çalğı alətləri ansamblı, “Xəyal” instrumental ansamblı, 40 nəfərdən ibarət uşaq xoru fəaliyyət göstərir. 2003-cü ildə məktəbin şagirdi Bayramov Ramiq Bərdə şəhərində keçirilən respublika folklor festivalının diplomuna layiq görülüb. 2004-cü ildə uşaq xor kollektivlərinin Yevlaxda keçirilən I Respublika müsabiqəsində məktəbin xor kollektivi Mədəniyyət və Turizm Nazirliyinin Fəxri fərmanına, 2005-ci ildə II Respublika müsabiqəsinin Fəxri fərmanına, 2006-cı ildə IV Respublika müsabiqəsinin III dərəcəli diplomuna layiq görülüb. Kənd musiqi məktəblərimiz də işlərini günün tələblərinə uyğun qurmağa çalışırlar. Məsələn, Hindarx qəsəbə Uşaq Musiqi Məktəbi 1979-cu ildə yaradılıb və artıq müstəqil məktəb kimi fəaliyyət göstərir. Məktəbdə 153 nəfər şagird təhsil alır və onların təlim-tərbiyəsi ilə 48 nəfər müəllim məşğul olur. Məktəbdə fortepiano, tar, qarmon, nağara, səs ixtisasları tədris olunur. Məktəbdə “Bənöşvə” xalq çalğı alətləri ansamblı və 20 nəfər şagirddən ibarət xor kollekivi fəaliyyət göstərir. Məktəb iki növbəlidir.

- Digər mədəniyyət müəssisələrinin fəaliyyəti haqqında nə deyə bilərsiniz?

- Digər mədəniyyət müəssisələrindən Ağcabədi Rayon Dövlət Rəsm Qalereyasını qeyd edə bilərəm. Dövlət Rəsm Qalereyası 2005-ci ilin yanvar ayından fəaliyyət göstərir. Qalereyada il ərzində müntəzəm olaraq sənət adamları ilə görüşlər keçirilir və tanınmış rəssamların sərgiləri nümayiş olunur. Tanınmış rəssamların sərgiləri ilə yanaşı şəhər İncəsənət Məktəbinin Rəssamlıq şöbəsinin şagirdlərinin sənət əsərləri, rəssamlığa marağı olanların əl işləri də burada nümayiş olunur. Qalereyada rəssamlığa marağı olan uşaqlardan ibarət həvəskər birlik fəaliyyət göstərir. Birliyin 20 nəfər üzvü var. Müntəzəm olaraq onların əl işlərindən ibarət sərgilər təşkil edilir. Qalereyada rayonumuzun tanınmış rəssamlarından Sərdar Muxtarovun fərdi yaradıcılıq sərgisi də nümayiş olunur. Hər il qalereyada və orta məktəblərdə müxtəlif uşaq yaradıcılıq sərgiləri təşkil edilir. Qalereyanın fondunda 46 ədəd rəsm əsəri nümayiş olunur ki, bunlar nəqqaşlıq, heykəltəraşlıq və tətbiqi incəsənətdir. Qalereyaya ekskursiyaya gələnlərin sayı 1000-1200 nəfərə yaxındır.

Anar Miriyev

Palitra.-2011.-23 noyabr.- S.6.