Davamlı olaraq özünü yeniləyən və modernləşən universitet

Dünyanın öndə gedən universitetlərindən biri də Şimali Kipr Türk Cümhuriyyətinin Yaxın Doğu Universitetidir. Universitet 1988-ci ildə Şimali Kipr Türk Cümhuriyyəti Milli Təhsil Nazirliyinin 17/1986 sayılı Milli Təhsil qərarı ilə paytaxt Lefkoşada yaradılıb. Bu gün 55-dən artıq ölkədən gələn öncül tələbələri ilə beynəlxalq bir statusda olan, Şimali Kiprin paytaxtında yüksək səviyyəli təhsil standartları və mükəmməl kadrları ilə fərqlənən ali təhsil müəssisəsidir.

Yaxın Doğu Universiteti Avropa Universitetlər Birliyi, Beynəlxalq Mühəndislik Təhsili Cəmiyyəti, YUNESKO nəzdindəki Dünya Universitetlər Birliyi, Beynəlxalq Tibbi Akkreditasiya Sistemi və İslam Dünyası Universitetlər Federasiyasına tam hüquqlu üzvdür. Müasir bir düşərgə sahəsi içərisində qurulmuş olan universitet, bütün fakültələri, yüksək okulları, institutları, laboratoriyaları, atelyeləri, bilgisayar mərkəzləri, mədəniyyət mərkəzləri, kitabxanası, qapalı üzmə hovuzu, digər sosial və idman müəssisələri ilə Özəl Yaxın Doğu Məktəbəqədər, Özəl Yaxın Doğu İbtidai Məktəb, Özəl Yaxın Doğu Kollecini bir araya gətirməklə bir sistem formalaşdırır. Yaxın Doğu Universiteti düşərgəsində olan YDU - İBM İrəli Araşdırmalar Mərkəzində bir sıra dünyaçaplı məsələlər araşdırılır. Bütün akademik və idarəçilik elmləri ilə Yaxın Doğu Universitetinin tək məqsədi 16 fakültə və 4 yüksək okuldakı seçilmiş tələbələrinə ən yaxşı təhsil və tədris şəraiti yaratmaqla, onları özünə güvənən, məsuliyyətini hər şeydən üstün tutan, dərrakəli, yaradıcı, araşdırmaçı və müstəqil düşüncəyə sahib olaraq yetişdirməkdir. Yaxın Doğu Universiteti quruluşundan bu yana keçən və bir qurumun tarixi baxımından son dərəcə qısa sayılan bir zaman içərisində çox sürətlə inkişaf edib və Kiprin bir təhsil və mədəniyyət mərkəzinə çevrilib.Universitetdən aldığımız son məlumata görə, orada 16 fakültə, 75 ixtisas var. Universitetin həftənin 7 günü və 24 saatı açıq olan kitabxanası, ən yüksək dərəcədə sağlıq xidməti verən və yaxın coğrafiyada ən böyük sayılan xəstəxanası və dünyanın sadəcə 28 universitetində olan super kompyuteri var. Qeyd edək ki, Yaxın Doğu Universiteti “Forbest” jurnalında yer alan dünyanın tək universitetidir. Universitetin qurucu rektoru dr.Suat Günsel Azərbaycan Prezidenti İlham Əliyev tərəfindən Azərbaycan Respublikasının xarici vətəndaşlara verilən ən yüksək ordeni olan “Dostluq” Ordeni ilə təltif olunub. Bütün azərbaycanlı tələbələr universitetdə 50% endirimli təqaüdlə oxuyurlar. Bacarıqlı tələbələrə məhdud miqdarda iş imkanı da təmin edilir. Yaxın Doğu Universitetindən məzun olan azərbaycanlı tələbələr Azərbaycan Xarici İşlər Nazirliyi, Nəqliyyat Nazirliyi, SOCAR, Milli Elmlər Akademiyası, banklar və bir çox özəl şirkətlərdə işləyirlər. Onu da qeyd edək ki, YDU-nun prorektoru və Mühəndislik fakültəsinin dekanı azərbaycanlı professor Fəxrəddin Məmmədovdur. Həmçinin Yaxın Doğu Universiteti Orta Şərgin ən böyük və Azərbaycana münasibəti ən isti olan universitetidir. Onu da qeyd edək ki, YDU bütün dünya ölkələri tərəfindən tanınan diplom verir. YDU davamlı olaraq özünü yeniləyən və modernləşən bir universitetdir. Universitetdə ingiliscə və türkcə 75 ixtisasın olması da əlavə üstün göstəricidir. Azərbaycan TQDK imtahanlarından minimum 550 bal toplayanlar üçün tam ödənişsiz təhsil və yataqxana (Hüquqşünaslıq, Stomatologiya, Əczaçılıq və Müalicə işi ixtisasları istisna edilməklə) təmin edilir. Dünyanın 55 ölkəsindən gəlmiş 18.000 tələbəsi ilə beynəlxalq standartlara uyğun sosial və idman təsisləri, beynəlxalq akreditasiyalı diş poliklinikası və xəstəxanası var. Universitetdə hər il Azərbaycanla bağlı xüsusi günlər təntənəli şəkildə qeyd edilir. Dünya Azərbaycanlılarının Həmrəylik Günü, Novruz bayramı və Müstəqillik Günü qeyd edilən günlərin sırasında ən öndə gələnləridir. Bu bayram günlərində hər kəsin diqqəti Azərbaycan rəqsləriylə, tələbələrimizin gözəl səsləri və ölkəmizdən dəvət edilən məşhur sənətçilərlə cəlb edilir. Bayramlarla yanaşı hüznlü günlərimiz də unudulmur. 20 Yanvar faciəsi, Xocalı soyqırımı, Azərbaycanlıların soyqırımı gününün təbliğatı və bu günlərlə bağlı digər ölkələrdən olan tələbələr arasında ictimai rəyin formalaşması üçün geniş fəaliyyət göstərilir. Bütün bu tədbirlərin hazırlanması, tələbələrin təşkilatlanması üçün universitetdə Yakın Doğu Universiteti Azərbaycanlı Öyrəncilər Birliyi bir tələbə təşkilatı olaraq təsis edilib. Bu təşkilatın fəaliyyətini hər il universitetdə artan azərbaycanlı tələbələr təşkil edir və inanırıq ki bundan sonra da universitetə yeni-yeni azərbaycanlı tələbələr gəldikcə onlar bu qurumun fəaliyyətini daha da gücləndirəcəklər.Bu gün universitetdə 100 nəfərdən çox azərbaycanlı tələbə tam ödənişsiz təhsil və yataqxana ilə təmin olunub. Bunlardan 20-si Gürcüstanda yaşayan azərbaycanlılardır. Dövlətimizin bir sıra elm və təhsil müəssisələri ilə YDU arasında qarşılıqlı əməkdaşlıq haqqında protokollar imzalanıb. Azərbaycan Respublikası Diasporla İş üzrə Dövlət Komitəsi, Azərbaycan Milli Elmlər Akademiyası, Bakı Dövlət Universiteti, Azərbaycan Dövlət Neft Akademiyası, Azərbaycan Tibb Universiteti Azərbaycan Dövlət İqtisad Universiteti, Azərbaycan Dövlət Rəssamlıq Akademiyası, Azərbaycan Universiteti, Qafqaz Universiteti, Xəzər Universiteti və baaşqa qurumlar buna aid edilə bilər.Universitetdə türk dünyasının fəxri olan Məhəmməd Füzuliyə həsr olunmuş “Füzulinin Türk Mədəniyyət və Sənət Dünyasında Yeri” (28-31 May 2009) və 2010 - cu ildə “Dədə Qorqud və keçmişdən gələcəyə türk dastanları “ adlı beynəlxalq konfranslar keçirilib. Elm və texnika sahəsinə həsr olunmuş beynəlxalq konfranslarda da alim və ziyalılarımız iştirak ediblər. Azərbaycan Dövlət Rəssamlıq Akademiyası ilə bağlanmış müqaviləyə əsasən ildə 20 azərbaycanlı tələbə YDU sponsorluğunda Kiprə gəlib, bir ay adada “Kipr mənzərələri” adlı layihə çərçivəsində rəsm əsərləri çəkir. Azərbaycan Respublikasının milli-tarixi günlərində (31 Dekabr Dünya Azərbaycanlılarının Həmrəyliyi Günü, 26 Fevral Xocalı soyqırımı, 21 Mart Novruz bayramı, 28 May Respublika Günü və s.) universitet Şimali Kipr miqyasında keçirilən bütün tədbirlərə ev sahibliyi edir. Universitetdə biri prorektor, ikisi dekan və ikisi kafedra müdiri olmaqla 15 azərbaycanlı müəllim və professor elmi-pedaqoji fəaliyyətlə məşğuldurlar. Sonda universitetlə bağlı son iki xəbəri də oxucuların diqqətinə çatdırmaq istəyirik. Burada hər il olduğu kimi, bu il də universitetlərarsı şeir yarışması keçiriləcək. Müsabiqədə iştirak etmək istəyənlər dekabrın 2-ə qədər şeirlərini göndərə bilərlər. İkinci xəbər isə Yaxın Doğu Universitetinin dünyanın aparıcı elmi mərkəzləri ilə intensiv və uğurlu əlaqələri ilə bağlıdır. Belə ki, universitetin Tibb fakültəsinin cərrahı, professor dr. Hasan Besim bir aylıq müddətə Amerikanın Pitsburq Universitetinin Tibb Mərkəzinə ezam olunub. Oradakı çalışmasında professor döş cərrahiyyəsindəki yeniliklər, onkoplastik cərrahiyyə, döş xərçəngi və sair sahələrdə aparılan tədqiqatlarda iştirak edəcək.

İlkin AĞAYEV

Palitra.-2011.-29 noyabr.- S.11.