“XXI əsrin humanitar çağırışları” kitabının təqdimatı olub

Bakıda keçirilən Beynəlxalq Humanitar Forum çərçivəsində dünən M.F.Axundzadə adına Azərbaycan Milli Kitabxanasında “XXI əsrin humanitar çağırışları” kitabının təqdimat mərasimi olub.

Prezident Administrasiyasının rəhbəri akademik Ramiz Mehdiyev və Rusiya Federasiyası Prezidenti Administrasiyasının rəhbəri Sergey Narışkin mərasimdə iştirak ediblər. Tədbiri açan mədəniyyət və turizm naziri Əbülfəs Qarayev Beynəlxalq Humanitar Forum ərəfəsində işıq üzü görmüş kitab haqqında qonaqlara məlumat verib. Akademik Ramiz Mehdiyev və Sergey Narışkin təqdimat mərasimində çıxış edərək Azərbaycan, rus və ingilis dillərində nəşr olunmuş kitabın əhəmiyyəti, eləcə də ölkələrimiz arasındakı dostluq münasibətləri haqqında danışıblar. Bildirilib ki, bu dəyərli nəşr AzərTAc-ın və İTAR-TASS-ın sıx əməkdaşlığı sayəsində ərsəyə gəlib. Kitabda Azərbaycan Prezidenti İlham Əliyevin və Rusiya Prezidenti Dmitri Medvedevin humanitar məsələlərlə bağlı nitqləri, çıxışları, məqalələri, müsahibələri əksini tapıb. Prezident İlham Əliyevin Bakı Beynəlxalq Humanitar Forumunun iştirakçılarına təbriki ilə açılan nəşrdə, həmçinin Azərbaycanın və Rusiyanın dövlət başçılarının şəkilləri də yer alıb. Təqdimat mərasimində dövlət və hökumət rəsmiləri, Milli Məclisin deputatları, xarici ölkələrin Azərbaycanda akkreditə olunmuş səfirləri, ictimaiyyətin nümayəndələri iştirak ediblər.

Palitra.-2011.-11 oktyabr.-S.3.