“Məqsədimiz Bakı sakinlərinin “Eurovision” günlərinə hazırlanmasına töhfə verməkdir”

“Ortaq Dəyərlər” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Eurovision” paytaxtının sakini” devizi altında maarifləndirmə layihəsinə başlayıb. Layihədə nəzərdə tutulan işlər və hazırda layihənin gedişi ilə bağlı suallarımızı “Ortaq Dəyərlər” İctimai Birliyinin sədri, “Türküstan” qəzetinin baş redaktoru Aqil Camal cavablandırır.

- İctimai birlik olaraq “Eurovision” mözvusuna müraciət etməyiniz nə ilə bağlıdır?

- Təbii ki, bu seçimin başlıca səbəbi gələn il ölkəmizdə keçiriləcək nüfuzlu “Eurovision” mahnı müsabiqəsidir. Bunun da Azərbaycan üçün ictimai, siyasi, mədəni cəhətdən böyük əhəmiyyəti var. Azərbaycan Respublikası müstəqilliyini bərpa edən vaxtdan elan etdiyi Avropa məkanına inteqrasiya kursu yolunda önəmli məsafə qət edib. Avropanın nüfuzlu qurumlarına üzvlük, Avropa Şurası qarşısında götürülmüş öhdəliklərin yerinə yetirilməsi, ölkədə vətəndaş cəmiyyəti quruculuğu, insan haqları və fikir plüralizminin təmini sahəsində aparılan siyasət Azərbaycanı Avropa məkanının ayrılmaz hissəsinə çevirib. Bu ilin may ayında Almaniyada keçirilən “Eurovision” mahnı müsabiqəsində Azərbaycan təmsilçilərinin birincilik qazanması ilə ölkəmizin Avropa ailəsində önəmi və nüfuzu bir qədər də artmış oldu. “Eurovision-2012” yarışması paytaxtımız Bakı şəhərində keçiriləcək. Demək, paytaxtımız 2012-ci ilin mayına - növbəti yarışmanın keçirilib başa çatmasına qədər “Eurovision” paytaxtı olacaq. Bakı şəhərinin sakinləri isə bir il ərzində “Evrovision” paytaxtının sakinləri hesab olunacaq. Ancaq gəlin görək, Bakı şəhəri bütövlükdə, yəni özünün gözəl görkəmi və ictimai mühiti ilə bu böyük musiqi təntənəsinə hazırdırmı?

- Hazırda paytaxtda böyük yenidənqurma və bərpa işləri gedir. Sizcə, bu, “Eurovision” günlərinin layiqincə keçirilməsi üçün yetərli deyilmi?

- Azərbaycan Prezidentinin sərəncamı ilə millət vəkili Mehriban xanım Əliyevanın rəhbərliyi altında yaradılmış Təşkilat Komitəsi tərəfindən “Eurovision-2012”-nin yüksək səviyyədə keçirilməsi üçün kompleks işlər aparılır. Eyni zamanda Bakı şəhərində aparılan genişmiqyaslı təmir və yenidənqurma işləri Azərbaycan paytaxtının bu mühüm müsabiqəyə layiqli şəkildə ev sahibliyi edəcəyinə böyük inam yaradır. Bütün bunlar “Eurovision” yarışmasını izləmək üçün ölkəmizə gələcək minlərlə turistin, o cümlədən dünya mediası təmsilçilərinin təsəvvüründə Azərbaycanın tarixi və müasir gözəlliyini, möhtəşəmliyini əks etdirəcək. Bununla belə Bakı şəhərinin ictimai həyatında bəzən mənfi xüsusiyyətlər də özünü göstəririr ki, bu da hazırda “Eurovision” paytaxtı sayılan bir şəhər üçün arzuolunmaz hal sayılmalıdır.

- Konkret hansı halları nəzərdə tutursunuz?

- Bizi narahat edən məsələ paytaxtın müasirləşdirilməsi və gözəlləşdirilməsi ilə baglı görülən işlərə müəyyən dərəcədə xələl gətirən ictimai davranış qaydaları ilə bağlıdır. İlk növbədə paytaxt sakinləri tərəfindən küçə və parkların zibilləndirilməsi, siqaret kötüklərinin, məişət tullantılarının yerə atılması, divarlara elan və bildirişlərin yapışdırılması, müxtəlif sayt ünvanlarının yazılması, sərnişin nəqliyyatı idarəedicilərinin onlar üçün qoyulan geyim və təmizlik, həmçinin sərnişinlərlə davranış qaydalarına əməl etməmələri, küçələrdə çoxsaylı dilənçilərin olması müasirləşən və gözəlləşən Bakı üçün mənfi çalarlar təşkil edir. Nəzərə alınmalıdır ki, bu vəziyyətin qarşıda gözlənilən “Eurovision” günlərində də özünü göstərməsi Bakıya gələcək minlərlə turistin, o cümlədən dünya media təmsilçilərinin paytaxtımızla bağlı təsəvvürlərində mənfi izlər buraxa bilər. Bu isə Azərbaycan paytaxtının imicinə, dövlət tərəfindən görülən abadlıq işlərinə xələl gətirəcək haldır.

- O da nəzərə alınmalıdır ki, bu müsabiqəni izləmək üçün Bakıya gələnlərin heç də hamısı xoşməramlı olmayacaq...

- Təbii ki. Xüsusən Azəbaycanın bu böyük uğurunu həzm edən bilməyən Ermənistan və onunla əlaqəli bəzi dairələr müsabiqənin gedişi zamanı Azərbaycan paytaxtı ilə bağlı daha çox mənfi məqamların işıqlandırılmasına çalışacaqlar. Yuxarıda sadaladığımız mənfi tendensiyalar isə Azərbaycan paytaxtını mənfi planda dünyaya təqdim etmək istəyənlər üçün istifadə obyekti ola bilər. Azərbaycanın uğuruna kölgə salmaq istəyəcək ermənipərəst dairələrin bu bəhanələrini əllərindən almaq üçün bu problemə diqqət yetirmək zəruridir.

- Həyata keçirdiyiniz layihənin məqsədi nədir?

- Dekabrın sonunadək davam edəcək layihənin əsas məqsədi Bakı sakinlərinin paytaxtımızda gözlənilən böyük hadisəyə - “Evrovision” günlərinə hazırlanmasına töhfə verməkdir. Bu layihənin həyata keçirilməsi ilə paytaxt əhalisi arasında “Eurovision” paytaxtının sakininə yaraşan şəkildə yüksək mədəni davranış və təmizlik qaydalarına əməl olunması xüsusiyyətləri aşılanacaq. Bununla da dövlət tərəfindən Bakının gözəlləşdirilməsi və müasirləşdirilməsi işi əhalinin mədəni səviyyəsi ilə müəyyən qədər ahəngdarlıq təşkil edəcək. Layihə çərçivəsində problemlə bağlı publisistik və araşdırma yazıları, mütəxəssislərlə müsahibələr hazırlanacaq və Azərbaycan mediasında dərc etdiriləcək. “Eurovision” müsabiqəsinin keçiriləcəyi Bakı şəhərində əhalinin gündəlik ictimai həyatda təmizliyə və mədəni davranış qaydalarına riayət etməsinin hazırkı vəziyyəti publisistik yazılarda, köşə yazılarında, araşdırmalarda təhlil olunacaq.Azərbaycan cəmiyyətində nüfuzu olan ictimai-siyasi xadimlərdən, millət vəkillərindən, ziyalılardan layihədə qoyulan problemlə bağlı müsahibələr alınacaq. Bu müsahibələrdə müsahiblər paytaxt həyatında özünü göstərən mənfi xüsusiyyətlər barədə fikirlərini bildirəcək, çatışmazlıqların aradan qaldırılması üçün öz tövsiyə və məsləhətlərini verəcək, ictimaiyyətə müraciətlər edəcəklər. Bu materiallarda Bakı şəhərinin mənəvi mühitinin, onun maddi simasına adekvat olması üçün maarifləndirici tezislər irəli sürüləcək, təbliğedici çağırışlar ediləcək. Paytaxt əhalisinə paylanması üçün hazırlayacağımız bukletdə “Eurovision” paytaxtının sakini necə olmalıdır” sualı qoyulacaq, ictimai həyatda təmizliyə və mədəni davranışa riayət olunması kimi çağırışlar ediləcək. Ümid edirik ki, layihə çərçivəsində hazırlanan məqalələr və müsahibələr, bukletlər geniş oxucu kütləsinin diqqətinə çatdırılacaq. Bu materiallarda qoyulmuş tezislər cəmiyyətdə təhlil ediləcək. Sonda isə layihənin icrasının yekunları ilə bağlı təqdimat mərasimi keçirilərək mövzu ictimai müzakirəyə çıxarılacaq. Bu müzakirələr nəticəsində “Eurovision-2012”yə ictimai dəstək kampaniyasına başlamağı da planlaşdırırıq.

- Bu kampaniya layihənin davamı olacaq?

- Bu yerdə mən Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasına layihəmizə dəyər verdikləri üçün təşəkkürümüzü çatdırmaq istəyirəm. Biz bu layihəni növbəti ilin əvvəlində - “Eurovision” müsabiqəsi keçirilənədək davam etdirmək niyyətindəyik və ümid edirik ki, təşəbbüsümüz yenə də dəstəklənəcək. Və biz “Eurovision-2012”yə ictimai dəstək üçün bu məsələyə önəm verən QHT və media qurumları ilə ciddi əməkdaşlıq edəcəyik. Ümumiyyətlə, “Ortaq Dəyərlər” İctimai Birliyi bu layihədə nəzərdə tutulan işləri bir qədər geniş və əlavələrlə layihə olaraq, yaxud da öz imkanları hesabına bu kampaniyanı davam etdirəcək.

- Sizcə, bu tədbirləri görməklə paytaxtımızın ictimai mühitində özünü göstərən mənfi tendensiyaları nə dərəcədə aradan qaldırmaq mümkün olacaq?

- Sözsüz, biz o iddiada deyilik ki, bir layihə ilə Bakı şəhərində bəzi hallarda şəhərin ümumi mənzərəsinə xələl gətirən hallar aradan qaldırılacaq. Biz bir təşəbbüs göstəririk. Və ümid edirik ki, layihə çərçivəsində yayınlanmış məqalələr və müsahibələr, həmçinin paylanacaq bukletlər nəticəsində Bakı şəhəri sakinlərinin müəyyən qismi “Eurovision” paytaxtının sakini olmaq qürurunu yaşamaqla yanaşı onun doğurduğu məsuliyyəti də dərk edəcək. Bununla da layihə çərçivəsində görüləcək işlər nəticəsində maariflənəcək insanlar mühüm beynəlxalq yarışa hazırlanan paytaxtımızın təmiz saxlanılması, həmçinin mədəni mühitinin yüksəlməsinə əməl edəcəklər. Eyni zamanda öz ətraflarında olan sakinləri də buna sövq edəcəklər. Bundan əlavə paytaxtın təmizlik və abadlıq işlərinə məsul olan dövlət qurumları layihə ilə bağlı görülən işlərlə media vasitəsilə tanış olacaq, problemlərin konkret ünvanını görərək onların aradan qaldırılmasına çalışacaqlar. Bütün bunlar isə paytaxtımızın qarşıdakı “Eurovision” günlərinə hazırlanmasına önəmli töhfə olacaq.

İlkin AĞAYEV

Palitra.-2011.-14 oktyabr.- S.6.