“Lənkəranın mədəniyyət və turizm imkanlarını əks etdirən bələdçi kitabı, turizm marşrutu xəritələri və videoçarx hazırlanacaq”

Lənkəran rayonunda həyata keçirilən mədəniyyət siyasəti, rayonun mədəniyyət ocaqları və tarixi abidələri haqqında suallarımızı Lənkəran Rayon İcra Hakimiyyətinin Mədəniyyət və turizm şöbəsi müdirinin müavini İlqar Əzimov cavablandırır.

- Son dövrlərdə rayonda həyata keçirilən mədəniyyət siyasəti barədə fikirlərinizi bilmək istərdik.

- Ulu öndərin layiqli davamçısı olan Azərbaycan Respublikasının Prezidenti İlham Əliyevin rəhbərliyi ilə respublikamız, inkişafını uğurla davam etdirərək bütün sahələrdə olduğu kimi mədəniyyət sahəsində də inanılmaz nailiyyətlərə imza atıb. Son illər respublikada həyata keçirilən uğurlu mədəniyyət siyasəti öz çoxşaxəli olması və uzun müddət ərzində səmərə verməsi ilə diqqət çəkməkdədir. Heç də təsadüfi deyil ki, 2011-ci il cənab Prezident tərəfindən “Turizm ili” kimi qəbul olunub. Rayonumuzda da bu sahəyə olan diqqət və qayğı gündən-günə artmaqdadır. İctimaiyyətimizə məlum olduğu kimi, Lənkəran rayonu özünün təbiəti, zəngin təbii-coğrafi ehtiyatlarının, əlverişli iqliminin və digər potensial üstünlüklərinin mövcudluğu ilə geniş turizm imkanlarına malikdir. Bir tərəfdən dağlarla, digər tərəfdən isə dənizlə əhatə olunan Lənkəranda turizmin inkişafı üçün əlverişli şərait mövcuddur. Rayonumuzda turizmin inkişafı ilə bağlı genişmiqyaslı kompleks tədbirlər görülüb və hazırda da görülməkdədir. Belə ki, şəhər demək olar ki, inanılmaz dərəcədə dəyişilib, şəhərin mərkəzində respublikada analoqu olmayan, ulu öndər Heydər Əliyevin adını daşıyan xatirə istirahət parkı və muzey əhalinin və şəhərimizin qonaqlarının istifadəsinə verilib. Rayonun bir sıra yerlərində yeni park və istirahət guşələri yaradılıb. Rayonda turizmin inkişafı məqsədi ilə şəhərin girəcəyində, Göyşaban ərazi vahidliyində Xalq sənətkərlıq şəhərciyi salınıb, onun açılışında iştirak edən Azərbaycan Respublikasının Prezidenti İlham Əliyev bu şəhərciyin salınmasını yüksək qiymətləndirib. Mədəniyyət və turizm naziri Əbülfəs Qarayevin iştirakı ilə açılmış Lənkəran Turizm İnformasiya Mərkəzinın turizmin inkişafında mühüm rol oynayacağı hamıya aydındlr.

- Rayonunuzda el sənətkarlığının inkişaf etdirilməsi ilə bağlı hansı tədbirlər həyata keçirilir?

- Turizm sahəsi və qədim mədəniyyətimiz ilə əlaqəli olan el sənətkarlığının inkişafı və təbliği məqsədi ilə artıq bizdə dulusçuluq, həsirtoxuma və xalçaçılıq ilə məşğul olanların siyahısı hazırlanıb. Bu siyahı əsasında el sənətkarlarının adları, fəaliyyəti və sənətkarlıq məhsulları ilə əhatəli tanış olmaq mümkündür. Bildiyiniz kimi, el sənətkarlarının fəaliyyəti və orijinal sənətkarlıq nümunələri baxımından rayonumuz xüsusi statusa malikdir. Bununla bağlı keçirilən tədbirlər və düzənlənən sərgilər də dediklərimizə əyani misaldır. Bundan başqa rayonda turizmin xidmət səviyyəsinin və ümumiyyətlə, turizm mədəniyyətinin xeyli yüksəldilməsinə də çox ciddi fikir verilir. Gələn qonaqlara müasir tələblərə cavab verə biləcək xidmətin göstərilməsi ilə bağlı mehmanxana və mehmanxana tipli obyektlərin rəhbərlərinə xəbərdarlıq məktubları verilib, nəticədə rayonda fəaliyyət göstərən mehmanxana tipli obyektlərin əksəriyyəti lisenziya alıb. Mehmanxanalarda yerli ənənələr və mədəniyyət əsasında, milli koloriti ehtiva edən, eyni zamanda yüksək standartlara əsaslanan xidmətin formalaşdırılması uğurla davam etdirilir. Heç də təsadüfi deyil ki, Mədəniyyət və turizm şöbəsi Mədəniyyət və Turizm Nazirliyi tərəfindən “Azərbaycan regionlarının turizm resurslarının aktiv təbliğinə görə” diplomu ilə təltif olunub. 2010-cu il ərzində Mədəniyyət və Turizm Nazirliyi tərəfindən mehmanxana və mehmanxana tipli obyektlərin əməkdaşları üçün Türkiyədən dəvət olunmuş mütəxəssislərin iştirakı ilə xüsusi hazırlıq kursları keçirilib və sertifikatlar verilib. 2011-ci ilin may ayında da nazirlik tərəfindən mehmanxana menecerləri və aşpazlar üçün təlim kursları təşkil olunacaq. Sevindirici haldır ki, bu təlim kursları ilk dəfə olaraq Lənkəranda təşkil olunacaq və burada təlim Azərbaycan Turizm İnstitutu və Milli Kulinariya Mərkəzinin əməkdaşları tərəfindən aparılacaq.

- Lənkəran rayonu mədəniyyət və turizm sərgilərində necə təmsil olunur?

- Rayonumuz 2010-cu ildə Bakı şəhərində təşkil olunmuş turizm sərgisində uğurla iştirak edib. Mədəniyyət və Turizm Nazirliyi tərəfindən 27-30 aprel 2011-ci il tarixlərində Bakı şəhərində İİ Ümumrespublika Daxili Turizm sərgisi təşkil olunub. Burada Lənkəran rayonu layiqincə təmsil olunub. Belə ki, bu ümumrespublika tədbirində “Nənələr” folklor mahnı və rəqs kollektivinin çıxışları olub, el sənətkarlarının, tətbiqi sənət ustalarının əl işləri, dulusçuluq nümünələri nümayiş olunub. Tədbirdə ayrıca stenddə rayonun mehmanxana və mehmanxana tipli obyektləri haqqında geniş məlumatlar verilib. Məlum olduğu kimi, tədbirdə Azərbaycan Respublikasının Prezidenti İlham Əliyev iştirak edib.

- Mədəni irsin qorunması və təbliği istiqamətində hansı işlər görülür?

- Turizm sahəsinin bir qolu olan mədəni irsin qorunması və mühafizəsi dövlətimizin daim nəzarətindədir. Bildiyimiz kimi, turizm sektorunun inkişafında abidələrin lazımi səviyyədə təbliği və təqdim olunması xüsusi rol oynayır. Rayon rəhbərliyi tərəfindən bu sahəyə daim diqqət və qayğı göstərilir. Hal-hazırda Nazirlər Kabinetinin 132 saylı qərarı ilə rayonda 87 tarix və mədəniyyət abidəsi qeydiyyata alınıb və dövlət mühafizəsinə götürülüb. Hazırda bu abidələrin turizm üçün müəyyən edilmiş marşrutlar üzrə istifadə edilməsi məqsədi ilə hazırlıq işləri tamamlanmaq üzrədir. Eyni zamanda rayonun ərazisində yerləşən tarix və mədəniyyət abidələrinin mühafizəsi ilə bağlı kompleks tədbirlər həyata keçirilir. Belə ki, abidələr haqda üç dildə (ingilis, rus, azərbaycan) məlumatlar hazırlanıb. Lənkəran Tarix-Diyarşünaslıq Muzeyində rayonun turizm potensialını əks etdirən yeni ekspozisiya qurulub. Bu sahədə tədbirlər davam etdirilir.

- Lənkəran şəhərində Azərbaycan Respublikası Regionlarının Sosial-İqdisadi İnkişafı Dövlət Proqramında nəzərdə tutulduğu kimi, “Dairəvi Qala” abidəsinin bərpası 2010-cu ildə başa çatdırılıb və bu abidənin turizm nümayiş obyekti kimi istifadəsi nəzərdə tutulub. İki dəfə Sovet İttifaqı Qəhrəmanı, general Həzi Aslanovun ev muzeyində Şəhər İcra Hakimiyyəti tərəfindən tam bərpa-rekonstruksiya işləri aparılıb, orada Mədəniyyət və Turizm Nazirliyi tərəfindən yeni ekspozisiya qurulub. Tarix-diyarşünaslıq muzeyində təmir-bərpa işlərinin aparılması 2011-2012-ci illərdə Dövlət Proqramında nəzərdə tutulub. Bununla əlaqədar olaraq artıq Mədəniyyət və Turizm Nazirliyi tərəfindən layihə-smeta sənədləri hazırlanıb və yaxında abidənin bərpasına başlanacaq. Turizm sahəsində kiçik və orta sahibkarlığın inkişafına lazımi şərait yaradılır. Rayonumuzda ekoturizmin inkişafı ilə bağlı kəndlərdə müvafiq məişət şəraitinə malik evlərin aşkarlanması və sahiblərinin razılığı əsasında tələb olunan şərait və xidmət reallaşdıqdan sonra turistlərin qəbulu tələb olunan səviyyədə gerçəkləşdiriləcək. Lənkəran hava limanının, dəmir yolu və avtomobil vağzalının, dəniz limanının, Hirkan Milli Parkının turizmin inkişafında səmərəli istifadə edilməsi, balıqçılıq və ovçuluqla məşqul olmaq istəyən turistlər üçün razılaşdırılmış ərazilərdə ov mövsümlərinin təşkil edilməsi imkanları araşdırılır. Hirkan Milli Parkında xüsusi ekoturizm marşrutları əsasında gəzintilər təşkil olunur. Dövlətimizin turizm sahəsinə olan diqqət və qayğısı nəticəsində rayona gələn turistlərin sayı da ildən ilə artmaqdadır. Heç də təsadüfi deyil ki, 2010-cu ildə rayonumuza gələn turistlərin sayı 8 mindən artıq olub, onlardan 34%-ni əcnəbi turistlər təşkil edib ki, bu da 2006-cı illə müqayisədə 50% çoxdur. 2011-ci ildə görülmüş işlər nəticəsində bu rəqəm daha da çox olacaq. Bunu rayonda yeni tikilən turizm obyektləri də sübut edir. Belə ki, 2011-ci ilin birinci rübündə rayonumuzda iki yeni turizm obyekti istifadəyə verilib. Mədəniyyət və Turizm Nazirliyi tərəfindən “Lənkəran şəhərinin 2011-ci il Azərbaycanın Folklor Paytaxtı” seçilməsi royonumuza gələn turistlərin sayına da müsbət təsir göstərəcək. Yaxın günlərdə Lənkəran Şəhər İcra Hakimiyyəti tərəfindən Lənkəranın turizm və mədəniyyət imkanlarını əks etdirən bələdçi kitabının, turizm marşrutu xəritələrinin və videoçarxın hazırlanması gerçəkləşəcək. Onlar da gələn turistlərə təqdim olunacaq. Yaxın gələcəkdə dağ turizminin inkişafı məqsədilə kanat yollarının çəkilməsi imkanları araşdırılır. Rayonun mədəniyyət mərkəzləri və ocaqlarının, turizm potensialının təbliği məqsədi ilə Lənkəran Şəhər İcra Hakimiyyətinin azərbaycan, rus və ingilis dillərində internet saytı fəaliyyət göstərir, burada yeniliklər haqqında mütəmadi məlumatlar verilir. Eyni zamanda “www.lankaranmks.jimdo.com” adı altında fəaliyyət göstərən Mədəniyyət və turizm şöbəsinin rəsmi saytında rayonun turizm potensialı və bu sahədə görülən işlər davamlı olaraq təbliğ olunur. Bu sahədə görülən işlər yaxın gələcəkdə rayonumuzu turizm mərkəzinə çevirəcək.

İlkin AĞAYEV

Palitra.-2011.-19 oktyabr.-S.6.