Azərbaycan Gənclərinin VI Forumu

Dünən Azərbaycan Gənclərinin VI Forumu başladı. Gənclər və İdman Nazirliyinin təşkilatçılığı ilə keçirilən forumun iştirakçıları öncə Fəxri xiyabanda Heydər Əliyev və akademik Zərifə Əliyevanın məzarlarını, sonra isə Şəhidlər xiyabanını ziyarət edərək, “Əbədi məşəl” abidəsi önümə əklil qoydular. Heydər Əliyev Sarayında keçirilən foruma 2000-ə yaxın gənc qatılıb.

Tədbirdən əvvəl gənclər və idman naziri Azad Rəhimov jurnalistlərə açıqlamasında Azərbaycan gəncliyinin dövrlə ayaqlaşaraq, zamanın nəbzini tutaraq, sürətlə inkişaf etdiyini bildirdi: “Hər dövrün öz tələbi var. Azərbaycan gənclərinin inkişafını və potensialını həm daxildə gedən proseslərdə, həm də beynəlxalq tədbirlərdə görmək mümkündür. Gənclərimiz müasir texnologiyanın tətbiqi sahəsində, həmçinin sosial şəbəkələrdə uğurlu fəaliyyət göstərirlər. Biz gənclərimizin potensialından istifadə edərək, Azərbaycanın dünyada tanınması istiqamətində layihələrdən bəhrələnmək istəyirik”. Xatırladaq ki, Azərbaycan Gənclərinin ilk Forumu Heydər Əliyevin təşəbbüsü ilə 1996-cı il fevral ayının 2-də keçirilib. 1997-ci il fevralın 1-də forumun ildönümü münasibətilə bir qrup gənci qəbul edən Heydər Əliyev ilk forumun keçirildiyi 2 fevral tarixinin Azərbaycan Gəncləri Günü kimi qeyd olunması haqqında fərman imzalayıb. Forum Azərbaycanın müasir ictimai siyasi tarixində özünə layiq yer tutaraq dövlətin gənc nəslinin hərtərəfli inkişafına yönəlmiş strategiyasına təkan verib. Bu günə qədər Azərbaycan gənclərinin 5 forumu keçirilib. Qeyd edək ki, dünənki forumda Prezident İlham Əliyevin forum iştirakçılarına müraciəti oxundu. Müraciəti Prezident Administrasiyası Siyasi təhlil və informasiya təminatı şöbəsinin müdiri Elnur Aslanov səsləndirdi. Müraciətdə deyilir: “Sizi - Azərbaycan Gənclərinin VI Forumunun iştirakçılarını və bütün gənclərimizi səmimi qəlbdən salamlayır, hər birinizə cansağlığı, xoşbəxtlik və ölkəmizin gələcəyi naminə fəaliyyətinizdə uğurlar arzulayıram”. Prezident qeyd edib ki, hamımız üçün əlamətdar olan 2011-ci ildə Azərbaycan öz dövlət müstəqilliyinin bərpasının iyirmi illik yubileyini qeyd edir. Azərbaycançılıq məfkurəsi ruhunda tərbiyə almış gənc nəsil dövlətimizin iqtisadi və mədəni inkişafında mühüm rol oynayaraq ildən-ilə potensialının gerçəkləşdirilməsi üçün daha geniş imkanlar əldə edir. Bu ilin iyul ayında “Azərbaycan gəncliyi 2011-2015-ci illərdə” Dövlət Proqramı təsdiq edilib. Belə bir proqramın mövcudluğu dövlətin gənclərlə bağlı siyasətinin parlaq təzahürüdür. Müraciətdən sonra, 5-ci forumdan keçən dövr ərzində görülən işləri əks etdirən, hesabat xarakterli film nümayiş etdirildi.Nazir A.Rəhimov forumda bildirdi ki, gənclərin altıncı forumu Azərbaycan tarixinin ən şanlı və əlamətdar bir hadisəsi ilə eyni vaxta təsadüf edir: “Bu il Azərbaycan Respublikasının dövlət müstəqilliyinin bərpasının 20-ci ildönümüdür. Əldə olunmuş nailiyyətlər sırasında gənclərlə iş və idman sahələrində dövlət siyasətini əlaqələndirən mərkəzi idarəetmə orqanı olan Gənclər və İdman Nazirliyinin yaradılmasını, müvafiq qanunvericilik bazasının formalaşdırılmasını, ictimai fəal gənclərin 200-dən artıq QHT-də birləşməsini, Azərbaycan gənclər təşkilatlarının 30-dan artıq beynəlxalq gənclər qurumlarında təmsil olunmasını və “Gənclər ili”nin elan edilməsini xüsusi qeyd etmək istərdim. Gənclər bu gün dövlət orqanlarında, parlamentdə, bələdiyyələrdə, biznes strukturlarında və sair sahələrdə təmsil olunur və cəmiyyətin inkişafına öz töhfələrini verirlər. Belə ki, dövlət orqanlarına 2008-2011-ci illərdə işə qəbul edilənlərin 60%-dən çoxunu gənclər təşkil edib. Bələdiyyə üzvlərinin 28 faizi - 4303 nəfəri gənclərdir. Onlardan 326 nəfəri bələdiyyə sədridir”. A.Rəhimov nazirliyin təşəbbüsü ilə keçirilən hərbi vətənpərvərlik oyunlarına 120 minə yaxın şagird qatılıb.Nazirin sözlərinə görə, dövlət gənclər siyasətinin istiqamətlərindən biri olan gənclər arasında sağlam həyat tərzinin təbliğ olunması, xüsusilə də onlar arasında cinayətkarlığın, narkomanlığın, QİÇS-in və digər neqativ halların profilaktikası sahəsində işin aparılması daim diqqət mərkəzində olub: “Beşinci forumdan ötən dövrdə gənclər təşkilatlarının 294 layihəsi dövlət büdcəsi hesabına dəstəklənib. Bununla yanaşı, Avropa Gənclər Fondu tərəfindən 42 layihə maliyyələşdirilib. 2009-2010-cu illərdə Azərbaycan Avropa Gənclər Fondundan ən çox qrant əldə edən ölkə olub. Ötən forumdan sonra 40 gənclər təşkilatı dövlət qeydiyyatına alınıb. 2008-2011-ci illərdə Azərbaycan gənclər təşkilatları 11 beynəlxalq təşkilata üzv qəbul edilib. Hesabat dövründə Bakıda müxtəlif ölkələrdən olan 2500-dən artıq gəncin iştirakı ilə 60-dan çox beynəlxalq tədbir keçirilib”. Nazir onu da deyib ki, 1200-ə yaxın Azərbaycan gəncinin müxtəlif beynəlxalq tədbirlərdə iştirakına dəstək verilib.

İlkin AĞAYEV

Palitra.-2011.-26 oktyabr.-S.10.