Naxçıvan Dövlət Universiteti Mərənd Azadi Universiteti ilə müqavilə imzalayıb

Naxçıvan Dövlət Universitetinin rektoru akademik İsa Həbibbəyli, prorektorlar, müvafiq fakültə dekanları və kafedra müdirlərinin iştirakı ilə bələdiyyə və biologiya ixtisasının tələbələri İran İslam Respublikasının Mərənd şəhərində səfərdə olublar. Mərənd şəhər İcra Hakimiyyətində keçirilən qarşılanma mərasimində icra başçısı Behram Rizvani və icra hakimiyyəti nümayəndələrinin Naxçıvandan gedən nümayəndə heyəti ilə görüşü keçirilib. Görüşdə çıxış edən Behram Rizvani Mərənd şəhərinin tarixi, iqtisadi-sosial vəziyyəti, elm və təhsil sahəsindəki yeniliklərindən bəhs edib. Məlumat verilib ki, 250 min əhalisi olan Mərənddə 5 universitet 150 ixtisas üzrə 14 min tələbəyə təhsil verir.

Akademik İsa Həbibbəyli isə öz çıxışında Azərbaycan və İran arasındakı dövlət səviyyəli münasibətlər, bu münasibətlərin davamı kimi Naxçıvan MR Ali Məclisi Sədrinin Şərqi Azərbaycanla qurduğu qarşılıqlı əməkdaşlıqdan söz açıb. Naxçıvan nümayəndə heyəti adından icra başçısına hədiyyə təqdim olunub, xatirə şəkli çəkilib. Sonra nümayəndə heyəti Pəyame-Nur Universitetində olub. Universitetin böyük akt zalında keçirilən görüşdə hər iki ölkənin dövlət himnləri səsləndirilib. Sonra Pəyame Nur Universitetinin rektoru rəhbərlik etdiyi universitet haqqında məlumat verib, 1987-ci ildən fəaliyyət göstərən universitetin açıq universitet kimi məsafəli təhsil sahəsindəki nailiyyətlərindən bəhs edib. «Təhsil hamı üçün, hər yerdə və hər vaxt» şüarını əsas götürən universitetin mərkəz və filiallar da daxil olmaqla 1 milyondan çox tələbəsi və 13000-dən çox elmi heyəti olduğunu qeyd edən rektor, qarşılıqlı əlaqələrin gələcək perspektivlərindən də bəhs edib. Akademik İsa Həbbibəyli görüşdə çıxış edərək Naxçıvan Dövlət Universitetinin dünya universitetləri ilə qurduğu əlaqələrdən, universitetin tədris və təhsil sahəsindəki yeniliklərindən bəhs edib. Naxçıvanda müasir elmi mühitin formalaşması istiqamətində görülən genişmiqyaslı dövlət tədbirlərindən bəhs edən rektor, qonşu dövlətlərlə bu sahədəki əməkdaşlığın əhəmiyyətini də vurğulayıb. Sonra Pəyame Nur Universitetindən nümayəndə heyətinə xatirə hədiyyələri təqdim olunub. Görüşdən sonra universitetlə tanışlıq olub. Dərs prosesi, universitetin maddi-texniki bazası, korpusları ilə tanış olan heyətə universitet haqqında geniş məlumat verilib. Sonra heyətin Mərənd Bələdiyyəsinin inzibati binasında bələdiyyə sədri ilə görüşü keçirilib. Bələdiyyə ixtisası üzrə təhsil alan tələbələrə bu sahədə qonşu dövlətin təcrübəsi haqda geniş məlumat verilib, bələdiyyənin iş fəaliyyəti ilə tanışlıq olub. Elə həmin gün Mərənd şəhərində fəaliyyət göstərən və müstəqillik illərində Naxçıvan Dövlət Universiteti ilə ilk əməkdaşlıq müqaviləsi bağlayan xarici universitet kimi Mərənd Azadi İslam Universiteti ilə tanışlıq olub. 1982-ci ildən fəaliyyət göstərən universitetin bu günədək 1 milyon 800 minədək tələbə məzunu olub. Mərənd filialı ilə tanışlıq üçün böyük akt zalında 34 min işçi heyəti və 1 milyon 500 minədək tələbəsi olan universitetin tarixi və müasir inkişaf səviyyəsini əks etdirən film nümayiş olunub. Sonra söz alan Mərənd Azadi İslam Universitetinin rektoru doktor Əli Salmanpur rəhbərlik etdiyi universitetin beynəlxalq əlaqələri, maddi-texnki bazası haqda geniş məlumat verib. Azərbaycan, xüsusi ilə İranla sərhəddə yerləşən Naxçıvan ali təhsil müəssisələri ilə əməkdaşlığa üstünlük verən rektor gələcək əməkdaşlığın perspektivlərindən də bəhs edib. Sonra söz alan Naxçıvan Dövlət Universitetinin rektoru, akademik İsa Həbibbəyli səmimi qarşılanma və qonaqpərvərliyə görə təşəkkürünü bildirib, Mərənd Azadi Universiteti ilə əməkdaşlıqdan məmnunluğunu ifadə edib. Daha sonra hər iki universitet arasında idman, mədəniyyət, təhsil və elmi əməkdaşlığa dair müqavilə imzalanıb. İmza mərasimindən sonra Naxçıvan Dövlət Universitetinin rektoru Azadi İslam Universitetin fəxri qonaqları kimi xüsusi simvolik hədiyyələrlə mükafatlandırılıblar. Rəhbərliklə birgə gələn tələbə heyətə də hədiyyələr təqdim edildikdən sonra mərasim sona çatıb.Mərənd səfəri balıq yetişdirilən vətəgələrə baxışla davam etdirilib. Mərənd və Təbriz şəhərləri arasında yerləşən bu yer ən çox balıq istehsal olunan mərkəz kimi xarakterizə olunur. Müəllim və tələbələrlə birgə vətəgələrə baxış keçirilib, su hövzələrində balıq ehtiyatlarının süni yolla artırılması və bərpası, müxtəlif balıq növlərinin yetişdirilməsi, habelə balıq yetişdirmə texnologiyasının bioloji əsaslarının öyrənilməsi sahəsində təcrübə mübadiləsi aparılıb, balıqçılığın inkişafı üçün gələcək əməkdaşlığın zəruriliyi vurğulanıb. Naxçıvan Dövlət Universitetinin Mərənd səfəri xoş təəssüratlarla yekunlaşıb.

Palitra.-2011.-28 oktyabr.- S.11.