Gürcüstanda Azərbaycanın müstəqilliyinin 20 illiyinə həsr olunmuş konfrans keçirilib

Gürcüstanın Batumi şəhərində Azərbaycanın müstəqilliyinin bərpa olunmasının XX ildönümünə həsr olunmuş tədbirlər çərçivəsində “Azərbaycan dövlət müstəqilliyinin bərpasının iyirminci ilində” adlı konfrans keçirilib. Konfransı giriş sözü ilə Diasporla İş üzrə Dövlət Komitəsinin sədri Nazim İbrahimov açaraq konfransın məqsədinin müstəqilliyimizin iyirmi ilinə nəzər yetirmək, əldə olunmuş nailiyyətlərə qiymət vermək olduğunu vurğulayıb. Azərbaycan və Gürcüstan xalqlarının dostluğunun dərin tarixi köklərə əsaslandığını qeyd edən N.İbrahimov bu baxımdan belə bir tədbirin Gürcüstanda keçirilməsinin təsadüfi olmadığını qeyd edib.

Sovet İttifaqının süqutu ərəfəsində Azərbaycan və gürcü xalqlarının eyni tarixi taleyi yaşadıqlarını söyləyən Diaspor Komitəsinin sədri Azərbaycanda 20 Yanvar, Gürcüstanda 9 aprel faciəsinin xalqlarımızın şərəfli tarixinin qəhrəmanlıq salnaməsi kimi hər zaman böyük ehtiramla xatırlanacağını vurğulayıb. Ötən əsrin 90-cı illərində hər iki ölkədə baş qaldıran etnik separatizmin çox ağır itkilərlə nəticələndiyini söyləyən N.İbrahimov bu münaqişə nəticəsində Azərbaycan və Gürcüstanın ərazi bütövlüyünün pozulduğunu, minlərlə insanın öz həyatını itirdiyini bildirib. Dövlət komitəsinin sədri, buna baxmayaraq, xalqlarımızın öz müstəqilliyini qoruyub saxlayaraq müasir dünyaya sürətlə inteqrasiya etməkdə olduqlarını qeyd edib: “Bizi birləşdirən yalnız tarixi dostluq ənənələri deyil. Biz həm də regionda həyata keçirilən qlobal əhəmiyyətli layihələrdə etibarlı tərəfdaş kimi çıxış edirik. Azərbaycan və Gürcüstanın iştirakı olmadan, bu gün uğurla həyata keçirilən transregional layihələrin reallaşdırılması mümkün deyil. Bizim ölkələrimizi yalnız irimiqyaslı iqtisadi layihələr deyil, həm də xalqlarımızın milli maraqları birləşdirir.Azərbaycan və Gürcüstan demokratik dəyərlərin uğurla tətbiqi, müasir milli dövlət quruculuğu yolunda inamla addımlamaqdadır. Ölkələrimizin birliyi seçdiyimiz strateji inkişaf xəttini müvəffəqiyyətlə həyata keçirməyə imkan verən əsas amillərdəndir”. Bu toplantının Azərbaycanın dövlət müstəqilliyinin bərpasından sonrakı iyirmi il ərzində görülmüş işlərə, əldə olunmuş nailiyyətlərə, o cümlədən Azərbaycan-Gürcüstan münasibətlərinin müxtəlif aspektlərinə dair məruzələri dinləmək, Gürcüstan azərbaycanlılarının cəmiyyətə inteqrasiyası sahəsində görülmüş işlərə nəzər salmaq imkanı verəcəyini qeyd edən komitə sədri daha sonra bu müzakirələrin ölkələrimiz arasındakı strateji tərəfdaşlığın möhkəm təməllərə əsaslandığını bir daha təsdiq edəcəyinə inamını ifadə edib.

Mirza Davitaya: “Azərbaycan və Gürcüstanın dostluğu dünyaya nümunə ola biləcək dostluq əlaqələridir”

Tədbirdə “Müstəqilliyimiz əbədidir” adlı sənədli filmin nümayişindən sonra söz Gürcüstanın diaspor məsələləri üzrə dövlət naziri Mirza (Papuna) Davitayaya verilib. Gürcüstan hər zaman Azərbaycanın inkişafını fəxr hissi ilə müşahidə etdiyini söyləyən nazirin sözlərinə görə, Azərbaycanla Gürcüstanın tarixləri hər zaman bir-birilərinə bağlı olub və bir-birilərinin davamıdır: “XX əsrin əvvəllərində sovet qoşunları Azərbaycanı işğal etdikdən və ölkə müstəqilliyini itirdikdən sonra Gürcüstan da müstəqilliyini itirmişdi. Bundan başqa SSRİ dağıldıqdan sonra Bakıda baş verən hadisələr sonradan Gürcüstanda da baş vermişdi. Bu və bunun kimi digər hadisələr göstərir ki, hər iki ölkə bir-birinə nə dərəcədə bağlıdır. Bizim tarixlərimiz demək olar ki, bir-birinə hopub”. Azərbaycan və Gürcüstanın dostluğunu dünyaya nümunə ola biləcək dostluq əlaqələri kimi səciyyələndirən Mirza Davitaya bildirib ki, Azərbaycan xalqının ümummilli lideri Heydər Əliyev iki ölkənin dostluq münasibətlərinin perspektivlərini görürdü və bu istiqamətdə addımlar atırdı: “Hazırda Azərbaycan Prezidenti İlham Əliyev və Gürcüstan prezidenti Mixail Saakaşvili bu siyasəti uğurla davam etdirirlər. Bu dostluq sayəsində biz inkişafımızın ən yüksək mərhələsinə nail olacağıq”. Kvemo-Kartli bölgəsinin qubernatoru David Kirkitadze öz çıxışına Dünya Azərbaycanlılarının III Qurultayının əhəmiyyətini xatırlamaqla başlayıb. Onun fikrincə, həmin qurultay Azərbaycanın nə dərəcədə inkişaf etdiyini nümayiş etdirib və hazırkı konfrans sanki həmin qurultayın davamıdır. Gürcüstan azərbaycanlılarının Gürcüstan dövlətinin inkişafına əhəmiyyətli töhfə verdiklərini qeyd edən David Kirkitadze onlara öz təşəkkürünü bildirib. Gürcüstanın Acarıstan Muxtar Respublikasının iqtisadiyyat və maliyyə naziri Vaya Bolkvadze Acarıstanın inkişaf etməsində Azərbaycandan yönələn investisiyaların da rolu olduğunu bildirib. Azərbaycanın Batumi şəhərində baş konsulu Hüseyn Nəcəfov Baş konsulluğun fəaliyyəti müddətində gördüyü işlərdən danışıb, Batumi ilə Lənkəran arasında əməkdaşlıq üçün yaxşı zəmin yarandığını bildirib.

“Azərbaycan Gürcüstanda yaşayan azərbaycanlıların, ümumilikdə Gürcüstan vətəndaşlarının firavan həyatının təmin olunmasında maraqlıdır”

Konfransda ilk məruzə ilə çıxış edən Azərbaycan Prezidenti Administrasiyasının İctimai-siyasi məsələlər şöbəsinin müdiri Əli Həsənov bildirib ki, Azərbaycan dövləti ölkəsinin inkişafı ilə yanaşı Gürcüstanın inkişaf etməsinə də səy göstərir: “Azərbaycanın dövlət rəsmiləri, vətəndaşları öz xalqının inkişafı barədə düşündüyü kimi, Gürcüstanın inkişafı haqqında da düşünür. Azərbaycan Gürcüstanda yaşayan azərbaycanlıların, ümumilikdə Gürcüstan vətəndaşlarının firavan həyatının təmin olunmasında maraqlıdır”. Ə.Həsənovun sözlərinə görə, hər bir xalq, hər bir dövlət ilk növbədə özünün müstəqilliyi, inkişafı haqqında düşünərkən, öz dövlətinin, millətinin maraqlarını düşünür və dövlətin prinsiplərini müəyyən edir, inkişafla bağlı məqsəd və məramları müəyyən edir və onu həyata keçirir: “İlk növbədə öz xalqının, öz vətəndaşlarının maddi-mənəvi tələblərinin təminatı, iqtisadi, siyasi və sosial təhlükəsizliyi məsələləri, dövlətin təhlükəsizlik maraqları və onların təmin olunması yollarını düşünür. Eyni zamanda, hər bir dövlət özünün geosiyasi əhatəsini, malik olduğu resursların istifadəsi taktikasını müəyyən etmədən, yaşadığı coğrafiyanın reallıqlarını nəzərə almadan, heç zaman fərdi qaydada izolyasiya edilmiş formada inkişaf edə bilməz. Bu anlamda Cənubi Qafqazın coğrafi və geosiyasi reallıqları elədir ki, burada yaşayan xalqlar, hansı əqidəyə, hansı mənəviyyata xidmət etməsindən asılı olmayaraq, bir yerdə, sülh şəraitində yaşamağa, bir-birinə dəstək verməyə məhkumdurlar. Cənubi Qafqazın tarixində hər zaman belə olub, bu gün də belədir və gələcəkdə də belə olacaq. Keçmiş zamanlarda burada yaşayan bütün xalqlar yadelli işğalçılara qarşı birgə mübarizə tədbirləri görüblər. Cənubi Qafqazın hər üç dövləti demək olar ki, eyni vaxtda müstəqillik qazanıb və bir-biri ilə əlaqələndirilmiş siyasət yürüdüblər. 1918-1920-ci illərdə Cənubi Qafqazda milli dövlətlərin yaranması da bir-biri ilə əlaqəli şəkildə həyata keçirilib”. Konfransın sonunda Azərbaycan Respublikasının Prezidenti İlham Əliyevə və Gürcüstan prezidenti Mixail Saakaşviliyə müraciət qəbul olunub.

Batumidə dəyirmi masa

Batumi şəhərində Azərbaycanın müstəqilliyinin 20 illiyinə həsr olunmuş tədbirlər çərçivəsində keçirilən "Gürcüstan azərbaycanlılarının cəmiyyətə inteqrasiyası Azərbaycan-Gürcüstan strateji tərəfdaşlığı kontekstində" mövzusunda dəyirmi masa keçirilib. Dəyirmi masada çıxış edən Diasporla İş üzrə Dövlət Komitəsinin sədri Nazim İbrahimov bildirib ki, bu dəyirmi masada məqsəd Gürcüstanda yaşayan azərbaycanlıların Azərbaycan-Gürcüstan münasibətlərinin inkişafındakı roluna dair müzakirələrin təşkilinə nail olmaqdır. Gürcüstan azərbaycanlılarının yerli cəmiyyətə inteqrasiyası məsələsinin həm Azərbaycan, həm də Gürcüstan dövlətinin daim diqqət mərkəzində olduğunu qeyd edən komitə sədri bu istiqamətdə ötən müddət ərzində bir sıra tədbirlərin həyata keçirildiyini bildirib. Dəyirmi masada məruzə ilə çıxış edən Gürcüstanın reinteqrasiya məsələləri üzrə dövlət naziri Yekaterina Txeşeloşvili ölkə hakimiyyətinin etnik azlıqların hüquqlarının aktiv şəkildə qorunmasında maraqlı olduğunu bildirib. Onun sözlərinə görə, etnik mənsubiyyətindən asılı olmayaraq bütün Gürcüstan vətəndaşları cəmiyyətə inteqrasiya olunmalıdırlar. 2009-cu ildə "Tolerantlıq və vətəndaşların inteqrasiyası" konsepsiyasının qəbul olunduğunu qeyd edən nazir, həmin konsepsiyanın etnik azlıqların da cəmiyyətə inteqrasiyasını özündə ehtiva etdiyini bildirib. O, Gürcüstanda etnik azlıqların özünəməxsusluqlarını qoruyub saxlaya bilmələri üçün də işlərin görüldüyünü qeyd edib: “Gürcüstanda təhsil sferası müxtəlifliklərin qorunmasını özündə ehtiva edir. Azərbaycanlılara gürcü dilinin öyrədilməsi sahəsində də işlər görülür. Dövlət dilini bilmədiklərinə görə, onlar cəmiyyət həyatından təcrid olunmamalıdırlar. Azərbaycanlılar üçün ali məktəblərdə kvotalar var. Ali təhsilə qədər azərbaycanlılar gürcü dilindən hazırlıq keçirlər. Həmin hazırlıq dövlət tərəfindən həyata keçirilir. Statistika göstərir ki, bu təşəbbüsümüz uğurlu alınıb və Gürcüstanın ali təhsil müəssisələrində təhsil alan azərbaycanlıların sayı artır”. Y. Txeşeloşvili Gürcüstan dövlətinin azərbaycanlıların ənənələrinin qorunmasında da maraqlı olduğunu vurğulayıb. Tədbirin sonunda dəyirmi masa iştirakçıları tərəfindən bəyanat qəbul olunub.

Nigar

Palitra.- 2011.- 2 sentyabr.- S.4.