Yeni dərs ili başladı

Dünən ölkəmizdə yeni dərs ili başlayıb. Təhsil Nazirliyinin (TN) Mətbuat xidmətindən verilən xəbərə görə, 2011-2012-ci tədris ilində ümumtəhsil məktəblərinin I sinfinə 124 274 şagird qəbul olunub.

2010-2011-ci dərs ilində I sinif şagirdlərinin sayı 120420, 2009-2010-cu tədris ilində isə 118947 nəfər təşkil edib. Yeni dərs ilində 47 yeni orta məktəb şagirdlərin istifadəsinə verilib. Bunlarla yanaşı ayrı-ayrı bölgələrdəki məktəblərə 2 milyon manat dəyərində 12957 parta, 1080 yazı lövhəsi, 2095 müəllim stolu, 3750 müəllim stulu verilib. Yeni məktəblərinin tikintisi, əlavə korpusların inşası, onların əsaslı təmiri, müasir avadanlıqlarla təminatı, infrastrukturunun yeniləşdirilməsi nəticəsində ümumilikdə ölkə üzrə 1 milyondan çox şagirdin təlim şəraiti yaxşılaşdırılıb. Son 10 ildə məktəb tikintisi sahəsində həyata keçirilən proqramlar sayəsində ikinövbəli məktəblərin faizi 73-dən 44-ə, ikinci növbədə təhsil alan şagirdlərin faizi isə 34,5-dən 21-ə enib.

İlk dərs günü Səbaildə

Yeni tədris mövsümünün başlaması Səbail rayonunun bütün orta təhsil müəssisələrində təntənəli şəkildə qeyd olunub. Yeni dərs ili ərəfəsində məktəblərdə böyük hazırlıq işləri aparılıb, ilk dərs günü 16 orta məktəbdə dərslərə başlanıb. Səbail rayonu Bayıl yaşayış sahəsindəki 1937-ci ildə tikilən 91 saylı orta məktəb rayonun ən qocaman məktəblərindən biridir. Məktəb kollektivi son illərdə bir sıra uğurlar qazanıb, təhsildə və şagirdlərin bilik səviyyəsinin yüksəlməsində bir sıra nailiyyətlər əldə edib. Hazırda məktəbdə 1100 nəfər şagird təhsil alır. Yeni təhsil ilində 4 sinifdə 100 nəfər uşaq birinci sinifə gedəcək. Məktəbdəki tədbiri açan 91 saylı orta məktəbin direktoru Svetlana Zülfüqarova bildirib ki, bu il kollektivinin təhsildə qazandıqları uğurlara və 2010/2011-ci tədris ilinin yekunlarına görə məktəb «Ən yaxşı ümumtəhsil müəssisəsi» müsabiqəsinin qaliblərindən olub. Keçən tədris ilinin yekunlarına görə, məktəbin məzunlarından 40 nəfəri müxtəlif ali məktəblərə, o cümlədən 5 məzun xarici ölkə ali məktəblərinə daxil olub, 11-i qəbul imtahanlarında 500-dən, 4-ü isə 600-dən çox bal toplayıb. Məzun Saleh Rzayev Prezident təqaüdünə layiq görülüb. O, qəbul imtahanları zamanı 685 bal toplayaraq «Qafqaz» Universitetinin tələbəsi adını qazanıb.Ölkə başçısı tərəfindən imzalanmış «2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı»nda Səbail rayonunun bir sıra təhsil müəssisələri kimi 91 saylı orta məktəbdə əsaslı təmir aparılaraq bütün qapı və pəncərələr dəyişdirilib, sinif otaqları, idman və akt zalları, koridorlar təmir olunub, döşəmələrə plitə döşənib. Məktəbin elektrik, su və kanalizasiya xətləri yenilənib, yeni istilik sistemi quraşdırılıb, sanitariya qovşaqlarında təmir işləri aparılıb, dam örtüyü yenilənib. Səbail rayonun mərkəzində yerləşən 189 saylı orta məktəb 1937-ci ildən fəaliyyət göstərir. Məktəbin yerləşdiyi bina isə həmin vaxta kimi başqa təyinatlı tikili olub. Məktəbdə hazırda 1100 şagird təhsil alır, 150 müəllim onlara dərs deyir. Bu tədris ilində məktəbi 124 nəfər şagird bitirib, yeni tədris ilində 3 birinci sinifdə 70 şagird təhsil alacaq. Bilik Günü münasibəti ilə əsaslı təmirdən sonra yenicə istifadəyə verilmiş məktəb binası qarşısına toplaşan şagirdlər, pedaqoji kollektiv, valideynlər və çoxsaylı qonaqları qarşısında çıxış edən 189 saylı orta məktəbin direktoru Ceyran Quliyeva keçən tədris ilində məktəb kollektivinin qazandığı uğurlar barədə məlumat verib. Yeni dərs ilinin başlanmasına həsr olunan tədbirlərdə iştirak edən Səbail rayon İcra Hakimiyyətinin başçısı Asif Əsgərov əsaslı təmir olunaraq istifadəyə verilmiş məktəblərin kollektivini təbrik edib, onlara yeni məktəbdə alacaqları təhsildə uğurlar arzulayıb. A.Əsgərov qeyd etdi ki, bu il Səbail rayonunun təhsil tarixində görünməmiş bir hadisə baş verib. Ölkə başçısı tərəfindən imzalanmış Dövlət Proqramına uyğun olaraq rayonun ümumtəhsil müəssisələrində geniş miqyaslı təmir-yenidənqurma işləri aparılıb. 6 saylı məktəb-lisey sökülərək yenidən tikilib, 2 saylı Texniki-Humanitar Elmlər Liseyi, 51, 91 və 189 saylı orta məktəblər, 160 saylı Klassik Gimnaziya ilə yanaşı 6 saylı Bakı Peşə Məktəbi, 20 saylı Uşaq yaradıcılıq mərkəzi və 35 saylı Texniki Yaradıcılıq Mərkəzində əsaslı təmir-yenidənqurma işləri aparılıb. Hazırda 7 saylı orta məktəb üçün idman və akt zalı olan əlavə, 49 saylı orta məktəb üçün yeni 660 şagird yerlik əlavə korpusların, həmçinin 3 saylı Uşaq Musiqi məktəbinin sökülərək yenidən tikintisi, daha 2 uşaq bağçasının əsaslı təmiri aparılır.Qeyd edək ki, aprel ayının 20-də Prezident İlham Əliyev Səbail rayonu Badamdar qəsəbəsində yeni 120 yerlik uşaq bağçası və 880 şagird yerlik ümumtəhsil məktəbinin tikintisinə başlamaq üçün sərəncam imzalayıb, sərəncamın icrasını təmin etməkdən ötrü RİH tərəfindən tikinti üçün torpaq sahəsi müəyyənləşdirilib, gözəl və müasir layihə işlənib. Hazırda tikinti işlərinə başlanması üçün müvafiq sənədləşdirmə-razılaşdırma işləri başa çatmaq üzrədir. Rayon məktəblərində aparılan təmir işləri ölkə rəhbərliyi tərəfindən nəzarətdə saxlanılıb və Prezident avqustun 16-da 189 saylı orta ümumtəhsil məktəbinin, sentyabrın 1-də isə 160 saylı Klassik Gimnaziyanın binalarında aparılan əsaslı təmir və yenidənqurma işlərinin gedişatı ilə tanış olaraq aparılan işlərin keyfiyyətindən razı qaldığını bildirib.

Kürdəmirdə şəhər 3 nömrəli tam orta məktəbin üçmərtəbəli yeni binası istifadəyə verilib

Kürdəmir şəhər 3 nömrəli tam orta məktəb üçün inşa edilən 640 yerlik üçmərtəbəli yeni bina dünən qapılarını şagirdlərin üzünə açıb. Məktəb rayonun ən qocaman təhsil müəssisəsidir. Məktəb 1902-ci ildə Şamaxı zəlzələsindən sonra Kürdəmirə gələn maarifpərvər şair Məhəmməd Hadinin yaxın dəstəyi və təşkilatçılığı ilə 1903-cü ildə tikilib və iki sinifli təhsil ocağı kimi fəaliyyətə başlayıb. İllər keçdikcə bina genişləndirilib, əlavə otaqlar inşa olunub. Artıq istismara yararsız vəziyyətə düşən bina müasir arxitekturada yenidən tikilib. Dövlət vəsaiti hesabına məktəb binasınının inşası tenderdə qalib gəlmiş “Taleh” təmir-tikinti MMC tərəfindən 9 aya başa çatdırılıb. İstilik sistemi qurulan binada idman zalı, həkim otağı, kitabxana, fənn kabinetləri, sinif otaqları bütün zəruri avadanlıqla təchiz edilib. Müəllim və şagirdlərin, valideynlərin, rayon rəhbərlərinin iştirakı ilə keçirilən açılış mərasimində çıxış edənlər təhsilin yüksək səviyyədə təşkilinə imkan verəcək binanın istifadəyə verilməsinə görə Prezidentə minnətdarlıqlarını bildiriblər. Şəhər 3 saylı tam orta məktəbin uğurlarından danışan natiqlər vurğulayıblar ki, bu il orta məktəbi bitirən 39 nəfər məzundan 19 nəfəri ali, 6 nəfəri isə orta ixtisas məktəblərinə qəbul olunub. Mərasimdə Rayon İcra Hakimiyyətinin başçısı Fəxrəddin Məlikov yeni tədris mövsümü və yeni binanın istifadəyə verilməsi münasibətilə məktəbliləri təbrik edib, dövlətin bu sahəyə göstərdiyi diqqət və qayğıdan danışıb. Natiq bildirib ki, Kürdəmir rayonunda son yeddi ildə inşa olunan məktəb binalarının 5-i Heydər Əliyev Fondunun təşəbbüsü ilə tikilib. Mərasimin sonunda qonaqlar binanı gəzib, yaradılmış şəraitlə tanış olublar.

Nigar

Palitra.- 2011.- 16 sentyabr.- S.11.