Turizm sahəsində kadrlara artan ehtiyac ATİ məzunlarının iş problemini aradan qaldırıb

Dünən Azərbaycan Turizm İnstitutunda (ATİ) yeni dərs ilinin başlanması münasibətilə tədbir keçirildi. Tədbiri giriş sözü ilə açan ATİ-nin rektoru Cəfər Cəfərov bildirdi ki, artıq 6 ildir fəaliyyət göstərən institutun Azərbaycanın ali təhsil müəssisələri içərisində öz yeri var.

Bu yerin qazanılmasında institutun müəllim və tələbə heyətinin və Mədəniyyət və Turizm Nazirliyinin xüsusi rolu olduğunu qeyd edən rektorun dediyinə görə, ölkə rəhbərliyinin dəstəyi olmasaydı, bu uğurların heç birini qazanmaq mümkün olmazdı. Rektor qeyd etdi ki, ATİ qısa müddət ərzində çox böyük inkişaf yolu keçib. 200 tələbə, 3 ixtisasla 2006-cı ildə fəaliyyətə başlayan bu ali məktəbin hazırda 1400-dən artıq tələbəsi var: “ İki məzun buraxılışımız olub. Azərbaycanda ilk dəfə ATİ ikili təhsil verən proqrama imza atıb. Bundan əlavə institutumuz digər beynəlxalq proqramlarda iştirak edir ki, onlar da tələbələrimiz üçün böyük imkanlar açır. Turizm İnstitutu 10 illərlə tarixi olan ali məktəblər sırasında özünün şərəfli yerini tutub. Tələbə Qəbulu üzrə Dövlət Komissiyasının tərtib etdiyi reytinq sıralarında 50-dən artıq ali məktəb arasında son illər 3-5-ci sıralarda təmsil olunmuşuq. Bu bizim üçün həm fəxr məqamıdır, həm də məsuliyyətimizi daha da artıran bir faktordur. Bizim məzunlarımız artıq ölkəmizin turizm sənayesində önəmli yerdə olan müəssisələrdə çalışırlar. Bakıda fəaliyyət göstərən 5 ulduzlu hotellərin işçi heyəti bizim məzunlarımızla formalaşır. Onların bəziləri isə xarici ölkələrdə işləyirlər. Turizm sənayesinin ixtisaslı kadrlara ehtiyacı o qədərdir ki, məzunlarımızın işə düzəlməklə bağlı problemləri olmayacaq. Amma həmin işin içərisində daha yaxşı mövqelərə sahib olmaq üçün hamımızın səylə çalışmağımıza ehtiyac var”. Mədəniyyət və turizm nazirinin birinci müavini Vaqif Əliyev nazirlik adından bu il tələbə adını qazanan gəncləri təbrik edərək bildirdi ki, 15 sentyabr Azərbaycanın hər yerində Bilik Günü kimi qeyd edilir: “Hər bir dövlət öz təhsilinə böyük diqqət və qayğı ilə yanaşır. Ölkəmizdə bilik gününün əsası ulu öndər Heydər Əliyev tərəfindən qoyulub. Azərbaycan öz müstəqilliyini əldə etdikdən sonra onun müstəqil düşünən gəncləri, müstəqil təfəkkürə malik insanları formalaşmağa başladı. Buna isə ancaq güclü təhsillə nail olmaq mümkündür. Bu baxımdan ölkəmizdə təhsilə olan diqqət daim artır. Ölkə başçısı İlham Əliyev respublikanın təhsil sistemini, onun maddi-texniki bazasının gücləndirilməsini, bu sahədə beynəlxalq əlaqələrin formalaşmasını, yeni təhsil ocaqlarının yaranmasını şəxsən diqqətində saxlayır”. Nazir müavininin sözlərinə görə, müstəqillik dövründə bütün sahələr, xüsusilə ölkə iqtisadiyyatı sürətlə inkişaf edib: “İqtisadiyyatın ən gəlirli sahələrindən biri də turizmdir. Azərbaycanın coğrafi mövqeyini, iqlimini, təbiətini, ləziz mətbəxini nəzərə aldıqda bu sahənin ölkəmizdə nə qədər potensiallı bir sahə olduğunu görürük. Bunları nəzərə alaraq dövlət turizm sahəsinin inkişafına da çox böyük diqqət və qayğı göstərir. Bu diqqətin ən bariz nümunəsi isə Azərbaycanda yeni, müasir tələbələrə cavab verən Turizm İnstitutunun yaradılmasıdır. Hər sahədə olduğu kimi, turizmin inkişafı da orada çalışan insanlardan asılıdır. Turizm ölkəmizdə yeni bir sahə olduğundan burada ixtisaslı mütəxəssislər yetişdirən ali təhsil ocağına böyük ehtiyac var. ATİ-nin 6 illik fəaliyyəti sübut edir ki, burada turizm üzrə bilikli və savadlı mütəxəssislər hazırlanır. İnstitut qısa bir zamanda qarşısına qoyulan vəzifələrin öhdəsindən layiqincə gəlib. Burada ən mütərəqqi təhsil formalarından istifadə olunur. İnanıram ki, yaxın gələcəkdə ATİ bütün dünyada tanınan bir ali təhsil ocağına çevriləcək”. Bu il həm də Azərbaycan vətəndaşlarının dövlət müstəqilliyimizin 20 illiyini qeyd etdiyini deyən V. Əliyev bildirdi ki, bu illər ərzində ölkəmiz bir çox uğurlu layihələrə imza atıb, daha da möhkəmlənib, nüfuzlu beynəlxalq təşkilatların üzvü olub: “Artıq regionda bir çox layihələr Azərbaycanın iştirakı olmadan həyata keçirilmir. Bütün bunlarla bərabər müstəqil turizm siyasətinin həyata keçirilməsi də bizim üçün vacibdir. Bu yolda sizin hamınıza uğurlar arzulayıram».Sonda V.Əliyev bu il ATİ-yə yüksək balla qəbul edilmiş tələbələrə tələbə biletini təqdim etdi və onlara təhsildə uğurlar arzuladı.

Nigar

Palitra.- 2011.- 16 sentyabr.- S. 10.