“Berti Foqts Almaniya mətbuatına Azərbaycanla bağlı həmişə müsbət fikirlər söyləyir”

Layihə çərçivəsində növbəti müsahibimiz Almaniya Azərbaycan Mədəniyyət Mərkəzinin sədri Elçin-Elmar Səttarovdur:

- Bizim təşkilatın bünövrəsi Almaniyanın Hamburq şəhərində fəaliyyət göstərən universitetdə təhsil alan tələbələr tərəfindən qoyulub. O vaxt həmin şəhərdə 10 nəfər azərbaycanlı tələbə vardı və biz toplaşaraq tədbirlər təşkil etməyə başladıq. Əsasən Xocalı, 20 Yanvar faciələri ilə bağlı anım tədbirləri, eləcə də Azərbaycan mədəniyyət gecələri keçirirdik. Biz maraqlanırdıq ki, orada hansı şəhərə hansı azərbaycanlı müğənnilər gəlib. Məsələn, biləndə ki, Berlinə Bakıdan müğənnilər gəlib, biz oradakı cəmiyyətlərlə əlaqə qururduq və onları Hamburqa dəvət edirdik. Sonra Almaniyaya gələn yeni səfir, Pərviz Şahbazov çox aktiv fəaliyyət göstərir. Belə ki, həm türk cəmiyyətləri ilə əlaqələr qurdu, həm də bir-bir araşdırarıq azərbaycanlı tələbələri tapırdı. O, Hamburqa da gəldi və tələbələrlə də görüşdü, bildirdi ki, nə kömək lazımdısa şərait yaradarıq. Məsələn, səfirliyimiz tərəfindən Xocalı, 20 Yanvar, Azərbaycanın müstəqilliyi barəsində kitablar, broşürlər göndərilir. Bunlar həm alman, həm Azərbaycan, bəzən də ingilis dilində olur. Bu barədə biz çox razıyıq. Bizim Almaniyadakı cəmiyyətin rəqs qrupu da fəaliyyət göstərir. Qrupun üzvləri əsasən uşaqlardır. Bayram tədbirləri keçirildikdə səfirlik tərəfindən köməklik edilir. Bəzən hansısa təşkilatlar narazılıq etsələr də bu onların zəif fəaliyyəti ilə bağlıdır. Çünki səfirliyə gec müraciət edilir, vaxtında müraciət etsələr problem olmaz. Almaniyada erməni diasporu Azərbaycana qarşı antitəbliğat aparır. Hər vasitə ilə gözdən salmağa, Dağlıq Qarabağı öz əraziləri kimi təqdim etməyə çalışırlar. Biz mədəniyyətimizlə öz Vətənimizi təqdim edirik. Novruz bayramı ilə bağlı tədbirlərimiz Bakıdan sənətkarlar dəvət etdikdə çox yüksək səviyyədə keçir. Müxtəlif xalqların nümayəndələrini dəvət edirik. Son tədbirimizə tanınmış sənətkarlarımız Bilal Əliyev, Mələkxanım Əyyubova gəlmişdi. Muğam konsertlərini nəinki azərbaycanlılar, almanlar da çox sevirlər. Almanlar eşitdikdə ki, bizim məşhur sənətkarımız Alim Qasımov gəlir, ona başqa dünyadan gələn adam kimi baxırlar. Mən işimlə əlaqədar gündəlik olaraq alman qəzetlərini araşdırıram və 500-dən çox qəzeti oxumalı oluram. Görürəm ki, A.Qasımov barədə nə qədər xoş sözlər yazılıb. Əgər 10-15 min nəfərlik əhalisi olan bir şəhərdə konsert keçirilirsə 4-5 min adam gəlir. O şəhərdən olmasa da başqa şəhərdən də almanlar gəlirlər. Azərbaycan mədəniyyətini orada tanıyırlar. Xüsusilə də “Eurovizion -2011” mahnı müsabiqəsində Azərbaycan qalib gəldikdən sonra ölkəmizə qarşı daha çox maraq artıb. Eyni zamanda iqtisadi inkişafına görə tanıyırlar. Regionun ən inkişaf etmiş ölkəsidir və bu barədə alman qəzetlərində yazılır. Problemlər hər bir dövlətdə var, amma inkişaf hər dövlətdə yoxdur. Azərbaycandakı inkişafla bağlı hər yerdə yazılır və bu bizi sevindirir. Xaricdəki azərbaycanlılar da bununla fəxr edirlər.

- Digər diaspor təşkilatları ilə əlaqələriniz necə qurulub və diasporumuz tərəfindən fəaliyyətinizə dəstək varmı?

- Əlaqə qurduğumuz təşkilatlara gəldikdə, S.İsmayılovanın rəhbərlik etdiyi Azərbaycanlıların Diasporlarını Koordinasiya Mərkəzi var və bu, diasporun birgə fəaliyyətinə böyük dəstək olur. Bu mərkəzin qəzeti hər ay çap olunur və biz bunun vasitəsilə bilirik ki, harada hansı tədbirlər olacaq. Azərbaycandan hansı sənətkarların, ifaçıların gələcəyi haqqında məlumatımız olur. Almaniyada keçirilən konfranslara gələn dövlət məmurları haqda məlumatımız olur. Bu yaxınlarda təhsil naziri Misir Mərdanov gəlmişdi. Bu mərkəzdən dəvətnamələr də alırıq və vaxtında özümüz də tədbirlərə hazırlaşa bilirik. Mərkəzin köməkliyi ilə Berlinə gələn qonağı icazə aldıqdan sonra Hamburqa dəvət edirik və öz tədbirlərimizi keçiririk. Köməkliyə gəldikdə, Hamburqda 4004 bəzi problemlər var. Hazırda orada 400-dən çox azərbaycanlı ailə yaşayır. Qaçqın kimi Almaniyaya gəldikdə onlara işləməyə, şəhəri tərk etməyə icazə yoxdur. Dövlətin qərarını gözləməlidirlər ki, bu qərar da bir-iki il çəkə bilər. Bəzi ailələr 10 il gözləyir. Biz bir təşkilat olaraq həmin ailədən hansısa maddi kömək gözləyə bilmərik. Müxtəlif millətlərin diasporları var və onların əksəriyyəti bu cəmiyyətlərə üzvdür və ayda 10-20 avro vəsait ödəyirlər ki, bu da kassaya toplanır. Nəticədə həmin vəsaitlə hansısa tədbirlər reallaşdırırlar. Kiçik köməkliklə də 5 min nəfərlik konsert zalını da tədbir üçün kirayə götürə bilmərik. Bunu tələbələr özləri təşkil edə bilər, amma bu da riskdir, birdən çox az sayda tamaşaçı ola bilər. Mən Hamburqda rəqs qrupuna dərs öyrədirəm. Uşaqları sadəcə gəlirlər yəni, onlara cəmiyyətə üzv olmağı təklif etdikdə başqa xalqların cəmiyyətlərini seçirlər. Digər problemə gəldikdə isə azərbaycanlı ailələrin bir qismi oğlan uşaqlarının rəqqas olmasını istəmirlər, qızlara heç icazə vermirlər. Orada 5 nəfərdən ibarət ansambl var və onlar azərbaycanlıların toylarında iştirak edirlər. Həmin toy sahibləri burada bizim ansamblın iştirakının istəsə də də özləri uşaqlarının bu ansamblda iştirakına razı olmur. Hamburqun mərkəzində azərbaycanlı uşaqlar üçün idman zalı açmışıq ki, onlar burada həm idmanla məşğul olsun, həm də bir yerə toplaşsınlar. Amma gələnlərin sayı çox azdır.

-Tədbirlər zamanı milli geyimlərin əldə edilməsində problemlər varmı?

- Qars azərbaycanlıları geyimləri gedib Qarsdan gətirirlər. Bizim səfirliyin fondunda geyimlər var, ancaq o qədər də çoxsaylı deyil. Tədbirlər zamanı həmin geyimləri sonra yenidən geri qaytarmaq şərti ilə müxtəlif şəhərlərə göndərirlər. Mən ötən dəfə Bakıya gəldikdə özüm geyimləri tikdirib apardım. Bu problemin həlli üçün Mədəniyyət və Turizm Nazirliyinin məlumat alması, onu həll etməsi uzun zaman ala bilər. Ona görə də çox zaman özümüz bunu həll etməyə çalışırıq.

-Almanlar Azərbaycan haqda hansı fikirdədirlər?

-Cəmiyyətimizdə iştirak edən almanlar da olur, tədbirlərdə iştirak edirlər. Almanlar Azərbaycanı çox maraqla izləyirlər. Əvvəllər almanlar Azərbaycanı Orta Asiya dövləti kimi qarşılayırdılar və bu da sovet dövründə ölkəmizin fərqli təqdimatı ilə bağlı idi. Amma son vaxtlar bu istiqamətdə böyük dəyişiklik var. Bu sahədə “Eurovizion-2011” qələbəsinin çox böyük xeyri oldu. Eyni zamanda Azərbaycan Milli komandasının baş məşqçisi B.Foqtsla bağlı da ölkəmiz haqda məlumatlıdırlar. Belə ki, Almaniyada hər idman qəzetində B.Foqts haqqında informasiya verilir və onun hər zaman Azərbaycan haqqında fikirləri verilir. O, qeyd edir ki, “Azərbaycan çox qonaqpərvər ölkədir və məsləhət görürəm ki, almanlar bu ölkəyə gəlsinlər”. Almanlar bir turist kimi də gəlsələr, Azərbaycanı sevərlər. Çünki almanlar elə ölkəyə getməyi sevirlər ki, orada turist az olsun, nəyisə özləri kəşf etsinlər.

-Qarşıda hansı planlarınız var?

-Bugünlərdə Bakıda olarkən Diasporla İş üzrə Dövlət Komitəsinin nümayəndəsi Teymur Əliyevlə görüşlərimiz oldu, layihələr əsasında maddi dəstək göstəriləcəyi bildirildi. Bundan başqa orada turlar keçirməyi istərdik. Yəni, Bakıdan gələn sənətkarlar ardıcıl şəkildə müxtəlif şəhərlərdə olsunlar və nəticədə digər diaspor təşkilatları daha sıx əlaqədə olarlar. Eyni zamanda daha çox tərəfdar toplamalıyıq. Biz digər türk cəmiyyətlərilə daha sıx, birgə fəaliyyət qurmalıyıq. Avropa Şurasında Azərbaycanı müdafiə edən türk millət vəkili Kəskin bəy var və o, Dünya Azərbaycanlılarının III Qurultayında da iştirak edirdi. Onunla görüşdük və istəyirik ki, Hamburqda Azərbaycan- Türk Dostluq Cəmiyyəti yaransın. Buraya türk gənclərinin cəmiyyətlərini dəvət edək, bizim gənclərlə daha sıx əlaqədə olsunlar. Bundan başqa planlarımızda digər mədəniyyət tədbirləri də reallaşdırmağı nəzərdə tutmuşuq.

Nigar Abdullayeva

Palitra.- 2011.- 6 sentyabr.- S. 7.