Bakıda uşaqların yalnız 25 faizi məktəbəqədər hazırlıq qruplarından məktəbə gedir

Bakı Şəhəri üzrə Təhsil İdarəsinin təşkilatçılığı ilə Bakı təhsil işçilərinin ənənəvi sentyabr konfransı keçirilib. Konfransda idarə rəhbəri Nailə Rzaquliyeva məruzəsində bildirib ki, bu il Bakı şəhərində məktəbəqədər təhsil müəssisələrindən 9 176 uşaq məktəbə yola salınacaq.

Onun sözlərinə görə, hazırda rəhbərlik etdiyi təhsil idarəsinin tabeliyində 301 tam orta, 3 ümumi orta, 5 yardımçı, 1 evdə təhsil, 5 cəzaçəkmə müəssisəsində axşam məktəbi fəaliyyət göstərir. Həmin təhsil ocaqlarında 316 594 nəfər şagirdin təlim-tərbiyəsi ilə 31 843 müəllim məşğul olur. N.Rzaquliyeva qeyd edib ki, ümumtəhsil məktəblərinin XI siniflərində dərs ilinin sonunda 23 019 şagird olub, onlardan 20 304 nəfəri (82,2%-i) attestat alaraq tam orta təhsili başa vurub: “Bu il 14 məzuna qızıl, 4 məzuna gümüş medal verilib. Onların qəbul imtahanlarında orta balı 628 olub, ölkə üzrə 700 bal toplamış 4 abituriyent də Bakı məzunları olub”. N.Rzaquliyeva əlavə edib ki, yay tətili dövründə dövlət hesabına 57 uşaq bağçasında, 54 məktəbdə və 2 məktəbdənkənar təhsil müəssisəsində təmir-tikinti işləri başlayıb: “Onların əksəriyyətində iş başa çatdırılıb”. Nailə Rzaquliyeva bildirib ki, indi Bakı şəhərində uşaqların yalnız 25 faizi məktəbəqədər hazırlıq qruplarından məktəbə gedir. Aparılan təhlillər göstərir ki, Bakı şəhərindəki mövcud uşaq bağçalarının bazası bu işin öhdəsindən gələcək səviyyədə deyil. O bildirib ki, 309 uşaq bağçasında olan qrup otağının 1009-dan təyinatı üzrə istifadə olunmur. Bunun səbəbi onlardan 38-nin təmirsiz olması, 700-də məcburi köçkünlərin məskunlaşması, 271 otağın təyinatı üzrə istifadə edilməməsi, bəzi hallarda isə qrup otaqlarında təhsilə aid olmayan təşkilatların yerləşməsidir: “Uşaq bağçaları tam gücü ilə işləsə belə biz Bakıda yalnız 52 min uşağı məktəbəqədər təhsilə cəlb edə bilərik. Bu da bütün bağça yaşlı uşaqların təxminən 50 faizi deməkdir”. N.Rzaquliyevanın sözlərinə görə, paytaxtdakı 113 uşaq bağçası özəlləşməyə açıq elan olunub, onlardan 44-ü özəlləşdirilib, 69 müəssisə isə hələ də Bakı Şəhər Təhsil İdarəsinin tabeçiliyində fəaliyyət göstərir.

Paytaxtdakı orta məktəblərdə 65 yaşı tamam olmuş təxminən 2 min təhsil işçisi var

Bakı Şəhəri üzrə Təhsil İdarəsinin tabeliyindəki orta məktəblərdə 65 yaşı tamam olmuş təxminən 2 min təhsil işçisi var. Bu barədə idarənin Strateji təhlil, planlaşdırma və kadrların idarə olunması sektorunun müdiri Bəhman Nəbiyev məlumat verib. Onun sözlərinə görə, artıq həmin işçilərin siyahıları hazırdır və onlarla əmək müqaviləsinin ləğvinə başlanılıb. Bəhman Nəbiyev deyib ki, 65 yaşlı işçilərin işdən çıxarılması nəticəsində kadr problemi yaranacağı gözlənilmir: "Problem yaranarsa, qanunvericiliyə uyğun olaraq bir sıra müəllimləri yenidən işlə təmin edəcəyik". Bəhman Nəbiyev bildirib ki, 65 yaşı tamam olmuş işçilərin 31-i məktəb direktorudur və onların siyahısı artıq Təhsil Nazirliyinə göndərilib. İdarə rəsmisinin sözlərinə görə, direktorların işdən azad olunması ilə bağlı Təhsil Nazirliyi müvafiq qərar verəcək. Çünki məktəb direktorlarının işə qəbulu və işdən azad edilməsi nazirliyin sərəncamındadır.

Növbəti tədris ilində 47 yeni orta məktəb istifadəyə veriləcək

Yeri gəlmişkən qeyd edək ki, 2011-2012-ci tədris ilində 47 yeni orta məktəb şagirdlərin istifadəsinə veriləcək. Təhsil Nazirliyindən “Azadinform”a verilən məlumata görə, bunlarla yanaşı 6 məktəb əsaslı təmir edilib, ayrı-ayrı bölgələrdəki məktəblərə 2 milyon manat dəyərində 12957 parta, 1080 yazı lövhəsi, 2095 müəllim stolu, 3750 müəllim stulu verilib.Müqayisə üçün qeyd edək ki, 2010-2011-ci dərs ili ərəfəsində ölkədə 9380 yerlik 26 məktəb inşa olunub. Yeni məktəblərinin tikintisi, əlavə korpusların inşası, onların əsaslı təmiri, müasir avadanlıqlarla təminatı, infrastrukturun yeniləşdirilməsi nəticəsində ümumilikdə ölkə üzrə 1 milyondan çox şagirdin təlim şəraiti yaxşılaşdırılıb. Son 10 ildə məktəb tikintisi sahəsində həyata keçirilən proqramlar sayəsində ikinövbəli məktəblərin faizi 73-dən 44-ə, ikinci növbədə təhsil alan şagirdlərin faizi isə 34,5-dən 21-ə enib. “2011-2013-cü illərdə Bakı şəhəri və onun qəsəbələrinin sosial-iqtisadi inkişafına dair Dövlət Proqramı”nda tədris ocaqlarının əsaslı təmiri və yenidənqurulması ilə bağlı bu il üçün nəzərdə tutulan tədbirlər planına uyğun olaraq paytaxtda 111 təhsil müəssisəsinin əsaslı şəkildə təmirinə başlanılıb. Bunlardan 54-ü məktəb, 57-si isə uşaq bağçasıdır. Əsaslı təmir və yenidənqurma işləri ilə yanaşı Dövlət Proqramına əsasən ehtiyacı olan mövcud məktəblər üçün əlavə sinif otaqları, yeni tədris korpusları, idman və akt zalları, yeməkxana binalarının inşası və lazımi avadanlıqla təchiz edilməsi də nəzərdə tutulub.Məlumat üçün onu da qeyd edək ki, 2004-cü ildən Təhsil Nazirliyi tərəfindən 353 yeni məktəb binası, 184 məktəbin həyətində əlavə sinif otaqları və tədris korpusu inşa olunub. 176 məktəb əsaslı təmir edilib, 11 yeni məktəbəqədər təhsil müəssisəsi tikilib istifadəyə verilib. 50 məktəbəqədər təhsil müəssisəsində, 9 peşə məktəbində əsaslı təmir işləri aparılıb, 1 yeni peşə məktəbi üçün bina tikilib.

Cavidan

Palitra.- 2011.- 7 sentyabr.- S.12.