Bəşəriyyətin sülh arzusu

Dünən Azərbaycanın insan hüquqları üzrə müvəkkili (Ombudsman) və Azərbaycan Sülh və İnkişaf Alyansının təşkilatçılığı ilə 21 sentyabr - Beynəlxalq Sülh Gününə həsr olunmuş dəyirmi masa keçirildi. Tədbirin açılışında ombudsman Elmira Süleymanova, BMT-nin Uşaq Fondunun Azərbaycan nümayəndəliyinin rəhbəri Mark Herevard, BMT-nin İctimai İnformasiya Departamentinin ölkəmizdəki nümayəndəsi Envera Selimoviç Beynəlxalq Sülh Gününün əhəmiyyətindən, tarixindən danışaraq dünyada, o cümlədən regionumuzda sülhün bərqərar olunmasının vacibliyini diqqətə çatdırdılar.

Sülhün bütün dünyada vacib amil olduğunu deyən ombudsman bildirdi ki, 1948-ci ildə BMT-nin İnsan Hüquqları Bəyannaməsi, 1966-cı ildə isə 2 pakt qəbul olunub ki, bunların əsasında da sülh ideyası durur. Qeyd edildi ki, dünyada sülhün bərqərar olması istiqamətində çox böyük fəaliyyətlər həyata keçirilsə də hələdə insanların, o cümlədən uşaqların hərbi təcavüzə, genosidə məruz qalması faktları var. Bugünlərdə 10 illiyi qeyd edilən 11 sentyabr terror aktının bunun bariz nümunəsi olduğunu deyən ombudsman bildirdi ki, belə əməllərin qarşısının alınması vacib şərtdir. Sülh olmadan insanlar öz hüquq və azadlıqlarını reallaşdıra bilməzlər. Davamlı inkişafa yönəlmiş Azərbaycanda isə bütün millətlərin azad və bərabər şəkildə yaşadığını bildirən E.Süleymanova qeyd etdi ki, ölkəmizdə yaşayan millətlər bir-birlərinin mədəniyyətindən, dəyərlərindən bəhrələnərək daha da inkişaf edirlər. Bu həm də Azərbaycanda tolerantlıq mühitinin mövcudluğunu bir daha sübut edir. Tarixən insanlar əbədi sülh sorağında olub, daim müharibəsiz, münaqişəsiz, dinc və sakit həyat arzulayıblar. Lakin müxtəlif maraqlar, sinfi, dini, milli və irqi mənafelər müharibələri doğurub. Ombudsmanın sözlərinə görə, torpaqlarının 20 faizi işğal olunmuş, bir milyondan artıq qaçqın və məcburi köçkünü olan ölkəmizdə sülh mövzusu xüsusi əhəmiyyət kəsb edir. Qeyd edildi ki, Ermənistanın Azərbaycana qarşı 20 ildən çoxdur davam edən təcavüzu nəticəsində 10 minlərlə insan ermənilər tərəfindən törədilən soyqırım qırğınlarının və etnik təmizləmənin qurbanı olub. Onun sözlərinə görə, atəşkəs rejiminin elan olunmasına baxmayaraq, ermənilr tərəfindən hər dəfə atəşkəs pozulur. Bununla yanaşı, bir faktı bildirmək lazımdır ki, bu il martın 8-də ermənilər tərəfindən açılmış atəş zamanı 9 yaşlı Fariz Bədəlovun dünyasını dəyişməsi, Tovuzda 13 yaşlı Aygün Şahmaliyevanın faciəli ölümü bir daha ermənilərin qəddarlığının sübutudur. E.Süleymanova vurğuladı ki, Ermənistanın isğalçılıq siyasəti regionda sülhün bərqərar olmasına imkan vermir. O, beynəlxalq təşkilatların bu istiqamətdə zəruru tədbir görülməsi və Ermənistanın işğalçılıq siyasətindən əl çəkməsi barədə təsir göstərməsini vacibliyini bildirdi.BMT-nin Uşaq Fondunu Azərbaycandakı nümayəndəsi Mark Herevard bildirdi ki, 1981-ci ildən BMT-nin qərarına əsasən 21 sentyabr tarixi bütün dünya ölkələrində Beynəlxalq Sülh Günü kimi qeyd olunur. BMT-nin baş katibi tərəfindən sülh günü münasibətilə hökumətlər, icmalar və fərdlər tərəfindən konkret tədbirlərin görülməsi ilə bağlı dünya xalqlarına müraciət edilir. Onun sözlərinə görə, sülh dialoqu, sülh mədəniyyəti, mədəniyyətlərarası, dinlərarası dialoq hazırda sülh və təhlükəsizliyə təhlükə yaradan amilləri aradan qaldırmağa və ən əsası, münaqişələrin həll edilməsinə, sülh prosesinə dəstək verilməsinə yardımçı olacaq. BMT-nin İctimai İnformasiya Departamentinin Azərbaycandakı nümayəndəsi Envera Selimovic isə çıxışında bildirdi ki, bütün dünyada, xüsusuilə də müharibə şəraitində yaşayan insanların ən böyük arzusu sülh əldə etməsidir. Qeyd edildi ki, BMT sülhün bərqərar olması üçün əlindən gələni etsə də hələ ki, buna tam nail ola bilməyib. Bunun üçün bütün ölkələr əlindən gələni etməlidirlər. Tədbirdə Beynəlxalq Sülh Günü ilə bağlı BMT baş katibinin müraciəti səsləndirildi. Burada qeyd edilir ki, hər il Beynəlxalq Sülh Günündə bütün dünyada insanlar zorakılıq, eləcə də xalqlar və millətlər arasında harmoniyanın əldə olunması üçün mübarizə aparırlar: “Sülh bizim missiyamızdır, gündəlik axtarışlarımızın mövzusudur. Builki mövzu isə diqqəti sülh və demokratiya məsələsinə cəlb edir. Demokratiya BMT-nin ən əsas dəyəridir. Sülh axtarışında olanlar, bu gün sizin gününüzdür! Biz sizinləyik”. Bir sıra hökumət qurumlarının nümayəndələri, Milli Məclisin deputatları, QHT-lərin təmsilçiləri mövzu ilə bağlı çıxışlar etdi, təklif və tövsiyələrini irəli sürdülər.

Nigar

Palitra.- 2011.- 13 sentyabr.-S.8.