Muğam müsabiqəsinə qoşulan xaricilərin sayı artır

Bəstəkarlar İttifaqında martın 14-dən 21-ə qədər Bakıda keçiriləcək “Muğam fəzası” II Beynəlxalq Muğam Festivalına həsr olunmuş mətbuat konfransı keçirilib. Konfransda Bəstəkarlar İttifaqının sədri Firəngiz Əlizadə bildirib ki, ikinci dəfə baş tutacaq festival Azərbaycanın müstəqilliyinin 20-ci ildönümünə həsr olunub.

Festivalın proqramını açıqlayan ittifaq sədri qeyd edib ki, təntənəli açılış mərasimi martın 14-də Beynəlxalq Muğam Mərkəzində baş tutacaq və 7 gün ərzində Bakıda müxtəlif silsilə tədbirlər həyata keçiriləcək. Belə ki, martın 16, 17 və 18-də YUNESKO səviyyəsində beynəlxalq elmi simpozium olacaq. Müxtəlif ölkələrin ən görkəmli musiqişünaslarının, alimlərinin qatılacağı simpoziumun materialları kitab şəklində Azərbaycan, rus, ingilis və ərəb dillərində işıq üzü görəcək. Festival çərçivəsində hər gün saat 17:00-da Beynəlxalq Muğam Mərkəzində muğam konserti keçiriləcək. Bu 7 gün müddətində hər konsertin birinci bölməsində Azərbaycan xanəndələrinin ifasında yeddi muğam təqdim olunacaq. Konsertin ikinci hissəsində isə digər ölkələrin muğam ifaçıları çıxış edəcək. Bununla bərabər hər gün saat 22:00-da Caz Mərkəzində tanınmış caz ifaçılarımızın da konsertləri keçiriləcək. Firəngiz Əlizadə proqramın bunlarla yekunlaşmadığını da deyib. Onun sözlərinə görə, festival çərçivəsində simfonik konsertlər, görüşlər də təşkil ediləcək. Opera və Balet Teatrında isə silsilə tamaşalar nümayiş olunacaq. Beynəlxalq Muğam Festivalı martın 21-də Heydər Əliyev Sarayında möhtəşəm qala konsertlə öz işinə yekun vuracaq. Konfransda çıxış edən Mədəniyyət və Turizm Nazirliyinin incəsənət şöbəsinin müdiri Fərəh Əliyeva festivala hazırlıq işlərinin hələ keçən ildən başlandığını vurğulayıb. Onun sözlərinə görə, beynəlxalq tədbirə bütün konsert və teatr salonları cəlb olunub: “İnanırıq ki, ikinci festival da dünyada bu istiqamətdə keçirilən ən gözəl tədbirlərdən biri kimi böyük əks-səda doğuracaq”.Milli Konservatoriyanın rektoru, xalq artisti Siyavuş Kərimi isə bildirib ki, Muğam Festivalı çərçivəsində gənc muğam ifaçılarının müsabiqəsi təşkil olunacaq. Müsabiqədə Azərbaycanı təmsil edəcək ifaçılar fevralın sonunda keçiriləcək Respublika muğam müsabiqəsinin üç qalibi olacaq. Müsabiqə barədə məlumat verən bəstəkar bildirib ki, müsabiqənin püşkatma mərasimi martın 17-də olacaq. Martın 18, 19 və 20-də isə müsabiqə keçiriləcək. Müsabiqəyə qatılmaq istəyən digər ölkələrin ifaçıları namizədliklərini verməkdə davam edirlər. Ona görə də, yarışmada iştirak edəcək ölkələrin tam siyahısı hələ məlum deyil. Siyavuş Kərimi qalibləri müəyyən edəcək münsiflər heyətinin yeddi nəfərdən ibarət olacağını söyləyib. Onun sözlərinə görə, birinci dəfə olduğu kimi, bu dəfə də münsif kürsüsündə Avropanın dörd, Azərbaycanın üç təmsilçisi əyləşəcək: “Azərbaycan tərəfdən münsiflərdə mən, Ramiz Zöhrabov və adını hələ dəqiqləşdirmədiyimiz bir nəfər də olacaq. Müsabiqənin mükafat fondunun həcmi də dəyişməyib. Birinci müsabiqədə necə idisə , bu dəfə də qaliblərə eyni məbləğdə mükafat təqdim ediləcək. Bu, dünyada keçirilən müsabiqələr içində qaliblərə verilən ən yüksək məbləğdir”. Xatırladaq ki, 2009-cu ildə keçirilən ilk müsabiqənin əsas mükafatı olan Qran-prini Təyyar Bayramov qazanıb. 1-ci yerə Özbəkistandan Yulduz Turbiyev, 2-ci yerə İrandan Məhəmməd Motamidi, 3-cü yerə isə misirli Mustafa Səid layiq görülüb. Qran-pri sahibinə 20 min, birinci yerə 15 min, ikinci yerə 10 min, üçüncü yerə isə 5 min avro mükafat verilib.

Nigar

Palitra.- 2011.- 28 yanvar.- S. 7.