«Klub və mədəniyyət evlərinin maddi-texniki bazasının möhkəmləndirilməsi lazımdır»

Cahangir Abdullayev: «Şəhər və kənd mədəniyyət evlərində fəaliyyət göstərən bədii özfəaliyyət dərnəkləri, musiqi kollektivləri keçirilən mədəni-kütləvi tədbirlərdə, tarixi əlamətdar günlərdə, yubiley gecələrində, bayram konsertlərində fəal iştirak edirlər»

Layihə çərçivəsində müsahibimiz Neftçala Rayon Mədəniyyət və Turizm Şöbəsinin müdiri vəzifəsini icra edən Cahingir Abdullayevdir:

Rayonun mədəniyyət müəssisələrində bədii özfəaliyyət kollektivlərinin fəaliyyəti necə qurulub?

- Rayonun mədəniyyət müəssisələrində müxtəlif bədii özfəaliyyət kollektivləri, dərnəklər, həvəskar birlik və maraq klubları fəaliyyət göstərir. Belə ki, klub tipli mədəniyyət müəssisələrində rayon üzrə 103 bədii özfəaliyyət kollektivləri, dərnək və birliklər fəaliyyət göstərir. Burada iştirak edənlərin sayı 980 nəfərdir. O cümlədən uşaq və yeniyetmələr üçün 73 özfəaliyyət kollektivi var və orada iştirak edənlərin sayı 736 nəfərdən ibarətdir. Rayon Mədəniyyət Evində 5 bədii özfəaliyyət kollektivi, dərnək və birlik fəaliyyət göstərir və iştirakçıların sayı 45 nəfərdən ibarətdir. Rayonumuzda bir xalq kollektivi fəaliyyət göstərir ki, onun da üzvlərinin sayı 12 nəfərdən ibarətdir. Milli qəhrəman X.Məmmədov adına Mədəniyyət və İncəsənət Sarayında da 5 bədii özfəaliyyət kollektivi, maraq klubları, həvəskar birliklər fəaliyyət göstərir ki, burada iştirakçıların sayı 48 nəfərdən ibarətdir. Mədəniyyət müəssisələrimizdə fəaliyyət göstərən müxtəlif bədii özfəaliyyət kollektivləri öz işlərini günün tələbləri səviyyəsində qurmağa çalışırlar. Rayon Mədəniyyət Evində fəaliyyət göstərən xalq kollektivi rayonda keçirilən mədəni-kütləvi tədbirlərdə fəal iştirak edən kollektivlərdəndir. Şəhər və kənd mədəniyyət evlərində fəaliyyət göstərən bədii özfəaliyyət dərnəkləri, musiqi kollektivləri keçirilən mədəni-kütləvi tədbirlərdə,t arixi əlamətdar günlərdə, yubiley gecələrində, bayram konsertlərində fəal iştirak edirlər. Hərbi vətənpərlik və hərbi hamilik işi ilə əlaqədar Neftçala Rayon Mədəniyyət və Turizm Şöbəsinin bir sıra müəssisələrinin özfəaliyyət kollektivləri və rayon Mədəniyyət Evinin xalq kollektivi tez-tez rayonun ərazisində yerləşən hərbi hissədə olur və maraqlı konsert proqramı ilə çıxış edir. Neftçala Rayon Mədəniyyət Evinin xalq kollektivi hərbi komissarlığın çağırış məntəqəsində yolasalma mərasimlərində, hərbi hissədə andiçmə mərasimlərində və bayram günlərində əsgər və zabitlər qarşısında konsert proqramı ilə çıxış edirlər. Ərazidə yerləşən hərbi hissənin əsgər və zabitləri mədəniyyət müəssisələrinin keçirdikləri əksər tədbirlərə dəvət olunurlar. Bir sıra klub müəssisələrində hərbi vətənpərvərlik tərbiyəsinin yüksəldilməsi üçün şəhid ailələri, müharibə veteranları ilə görüşlər keçirilir və görüş zamanı foto və sənədlər sərgilənir. İşğal olunmuş rayonlarımızla bağlı bir sıra müəssisələrdə ədəbi-bədii kompozisiyalar, “Vətən mənə oğul deyir” mövzusunda hərbi hissədə gənclərin əsgər və zabitlərlə maraqlı görüşləri keçirilir. İl ərzində bir sıra mədəniyyət müəssisələri ərazisində yerləşən məktəblərdə “Hərbi vətənpərvərlik nə deməkdir?” mövzusunda inşa müsabiqəsi, disputlar və dəyirmi masalar təşkil edirik. Bunlardan savayı qeyd edim ki, rayonda yaşayan rusdilli xalqların nümayəndələri dövlət bayramlarına və digər mədəni-kütləvi tədbirlərə dəvət olunurlar. Rusların dini bayramlarında onlara baş çəkilir, yaşlılar üçün yubileylər keçirilir. Adət-ənənələrini davam etdirmələrində onlara köməklik göstərilir. Habelə onların bayramlarının şən və səmərəli keçməsi üçün özfəaliyyət kollektivlərimiz maraqlı konsertlər təşkil edirlər. Mədəniyyət müəssisələrinin inkişafı ilə bağlı yerli özünüidarəetmə orqanları olan bələdiyyələrlə müəyyən işlər aparılır.

- Tarixi abidələrin təbliği və qorunması necə təşkil edlir?

- Abidələrimizin qorunması və etibarlı mühafizəsi ilə əlaqədar geniş tədbirlər planı hazırlanıb. Tədbirlər planına uyğun olaraq rayon üzrə bütün tarixi abidələrin siyahısı hazırlanıb, fotoşəkilləri çəkilib və bu şəkillərdən ibarət albom və daimi stend düzəldilib. Eyni zamanda bütün tarixi abidələr videolentin yaddaşına çəkilib və hər bir abidənin tarixi haqqında şərh verilib. Abidələrimizin mühafizəsini, qorunub saxlanmasını, təmizliyini, ətrafının yaşıllaşdırılmasını yaxınlıqda olan məktəblərin və mədəni-maarif müəssisələrinin rəhbərləri öz öhdələrinə götürüblər. Tarixi abidələrimiz haqqında uşaqların daha erkən yaşdan məlumat alması üçün mədəniyyət müəssisələri məktəblərlə birlikdə gecələr təşkil edir, məruzələr, söhbətlər aparılır, tarixi abidələrə ekskursiyalar təşkil edilir. Bəzi məktəblərdə “Tarixi abidələrimiz bizim tariximizdir” mövzusunda inşa yazı müsabiqəsi keçirilir və qaliblər şöbə tərəfindən mükafatlandırılır. Ümumiyyətlə, tarixi abidələr haqqında bütün məlumatlar Neftçala Rayon Mədəniyyət və Turizm Şöbəsi tərəfindən toplanaraq məlumat kitabçası şəklində çap etdirilir. “Neftçalanın tarix və mədəniyyət abidələri” adlı kitabça, “Neftçala Rayon Mədəniyyət və Turizm Şöbəsi” haqqında broşür çap edilib. Neftçala Rayon Dövlət Rəsm Qalereyasının fondunda olan əsərlərin sayı 100 ədəddir. Bunlardan 54 ədədi Mədəniyyət və Turizm Nazirliyi tərəfindən, 46 ədədi isə şəxsi adamlar tərəfindən hədiyyə olaraq verilib. Mədəniyyət və Turizm Nazirliyi tərəfindən 33 ədəd rəngkarlıq əsəri, 10 ədəd qrafika əsəri, 3 ədəd monumental heykəl əsəri verilib. Ötən il ərzində qalereyada 21 sərgi keçirilib və 1055 əsər nümayiş etdirilib.

- Şöbənin qarşılaşdığı əsas problemlər hansılardır?

- Neftçala Rayon Mədəniyyət və Turizm Şöbəsinin həlli vacib olan bəzi problemləri var. Milli Qəhrəman X.Məmmədov adına Neftçala Şəhər Mədəniyyət və İncəsənət Sarayının istilik sisteminin, kanalizasiya xəttinin bərpası və 650 yerlik iclas zalının soyudulmasına ehtiyac var. Rayon Mədəniyyət Evinin, Boyat, Yuxarı Qaramanlı, Aşağı Surra, Aşağı Qaramanlı, Şirvanqaraqaşlı, Qaçaqkənd, Xolqaraqaşlı və Xolqarabucaq kənd mədəniyyət evlərinin, Uşaq İncəsənət Məktəbinin əsaslı təmiri və istilik sisteminin bərpası vacib məsələlərdəndir. Rayon Uşaq İncəsənət Məktəbinin 2-ci mərtəbəsi qəza vəziyyətindədir. Şəxsi evlərdə yerləşən mədəniyyət müəssisəsi yoxdur. 21 mədəniyyət müəssisəsi uyğunlaşdırılmış binalarda yerləşir. Tarix-Diyarşünaslıq Muzeyi ilə Mərkəzləşdirilmiş Kitabxana Sisteminə istilik xəttinin çəkilməsi işin daha keyfiyyətli qurulmasına imkan yaradar. Xıllı qəsəbə 1 saylı mərkəzi kitabxananın da əsaslı təmirinə ehtiyac yaranıb. Özfəaliyyət dərnəklərinin, həvəskar birlik və maraq klublarının daha aktiv fəaliyyət göstərməsi üçün klub və mədəniyyət evlərində əlavə otaqların tikilməsi və onların maddi-texniki bazasının möhkəmləndirilməsi lazımdır. H.Cavid adına parkın inzibati binasının arxasında yerləşən yay səhnəsinin yarasız halda olması və səhnə qarşısında olan meydanda oturacaqların olmaması orada mədəni tədbirlərin həyata keçirilməsinə imkan vermir. Hesab edirik ki, Mədəniyyət və Turizm Nazirliyindən daha çox metodik tövsiyələrin və nümunəvi iş planlarının göndərilməsi, nazirliyin aidiyyatı şöbələri ilə zonalararası nümunəvi elmi parktiki konfransların keçirilməsi, əyani təbliğat işini gücləndirmək üçün hazır plakatların və əyani vəsaitləri rayonlara göndərilməsi, mədəni-maarif işçilərinə metodiki köməkliyin göstərilməsi üçün metodiki jurnalın təsis edilməsi, mədəni-maarif müəssisələrinin texniki vasitələrlə təminatınının gücləndirməsi və dərnəklərin həvəskar birlik və maraq klublarının nümunəvi iş planlarının və proqramlarının şöbələrə göndərilməsi işin keyfiyyətinə müsbət mənada təsir edə bilər.

Anar Miriyev

Palitra.- 2012.- 4 aprel.- S. 11.