“Valideynlər öz övladının təliminə isti münasibətlə yanaşı onun yaş xüsusiyyətlərini
də nəzərə almalıdır”
Humay Axundzadə: “Valideynlər
düşünür ki, uşaq 5 yaşına
çatdısa, o, oyuncaqlarını bir kənara atıb
gününü dəftər-kitabla keçirməlidir. Bu isə
əks effekt verir”
Uşaq
və yeniyetməlik dövründə hər birimizin
psixologiyasında böhranlı dövrlər olur. Məktəbdə
yaşıdlarınız, müəllimlər, evdə isə
valideynlərlə münasibət qurmaqda çətinlik
çəkirsinizsə, onda sizə məktəb psixoloqunuz
kömək edə bilər. Yəni məktəblərdə
fəaliyyət göstərən psixoloji xidmət sizə
problemlərin həllində çıxış yolu göstərəcək.
Bu dəfə həmsöhbətimiz olan gənc psixoloq Humay
Axundzadə ilk öncə bu sahənin fəaliyyət
dövründən danışdı: “Psixoloji xidmət təhsil
sisteminin tərkib hissələrindən biridir. Azərbaycanda
ötən əsrin 90-cı illərinin əvvəllərindən,
daha doğrusu, 80-ci illərin sonlarından başlayaraq təhsil
sistemində, ilk növbədə məktəblərdə
psixoloji xidmət təşkil olunmağa başlayıb. Məktəbəqədər
təhsil, yəni bağçada, hazırlıq bölməsindən
tutmuş ali məktəbə qədər təhsilin hər
bir pilləsində psixoloqa ehtiyac var. Təhsil sistemində,
xüsusilə məktəbdə psixoloji xidmətdən
danışdıqda biz psixoloqun bir sıra istiqamətlərdə
fəaliyyət göstərməli olduğunun şahidi ola
bilərik. Bu ilk növbədə təlim prosesinin
müşayiətidir. Məsələn, ibtidai təhsil və
digər dövrlərdə çox zaman uşaqlarda təlimlə
bağlı müəyyən problemlər olduqda, onların
idrak prosesləri materialın mənimsənilməsi
üçün yetərincə inkişaf etməmiş
olduqda burda təbii ki, ilk növbədə psixoloqun
yardımına ehtiyac duyulur. Bundan əlavə müxtəlif
risk qrupuna daxil olan şagirdlər də var ki, onlarla da iş
psixoloqun səlahiyyətlərinə daxildir. Məsələn,
hiperaktiv və ya əksinə, həddindən artıq ləng,
narahat uşaqların problemlərinin həll edilməsi
üçün psixoloji xidmət lazımdır. Yeniyetməlik
dövrünə gəldikdə isə artıq mövcud
çətinliklər bir qədər fərdi xarakter
daşıyır. Burada biz ilk növbədə yeniyetmələrdə
baş verən şəxsiyyətin inkişafı ilə
bağlı müəyyən problemləri qeyd edə bilərik.
Lakin daha sonralar, yuxarı siniflərdə meydana çıxan
spesifik məsələlərdən biri olan psixoloqun
şagirdlərin peşə seçimində müstəsna
rolundan da danışa bilərik. Məktəbdə psixoloji
xidmət həm qrup şəklində, həm də fərdi qaydada həyata keçirilə
bilər. Eyni zamanda ən ümumi şəkildə biz
psixoloji xidmətin fəaliyyətini dörd yerə bölə
bilərik: psixoprofilaktika, psixodiaqnostika, psixokorreksiya və
maarifləndirmə. O cümlədən psixoloqun pedaqoji kollektiv və valideynlərlə də
işini qeyd etmək lazımdır. Son illər Azərbaycanda
təhsil sistemində, xüsusilə də məktəbdə
psixoloji xidmət tədricən inkişaf etməkdədir. Təbii
ki, müəyyən problem və çətinliklər də
mövcuddur. Lakin bunlarla
yanaşı biz irəliləyişlərin olduğunu da dana
bilmərik”.
- Bu yaxınlarda siz bununla bağlı
konfrans da keçirdiniz...
- Bəli. Ötən həftəsonu Bakıdakı
qabaqcıl təhsil müəssisələrindən biri sayılan “XXI əsr” Beynəlxalq Təhsil və İnnovasiya Mərkəzində
“Müasir məktəbdə
psixoloji xidmətin aktual problemləri” mövzusunda elmi-praktik konfrans keçirdik. Konfransın keçirilməsində təşəbbüskar
tərəf elə bizim mərkəzimiz idi. Azərbaycanda müxtəlif sahələr
üzrə analoji konfranslar keçirilir.
Lakin məktəb səviyyəsində
belə bir konfransın keçirilməsi
ilk addım idi. Konfrans həm də bizim təhsil mərkəzinin 10 illiyinə
həsr olunmuşdu.
Konfransda məktəb
psixoloqları, orta məktəb, internat məktəblərinin psixoloqları,
ali məktəblərin
psixoloq mütəxəssisləri
və Bakı şəhərində fəaliyyət
göstərən bəzi
psixoloji mərkəzlərin
nümayəndələri iştirak
etdi. Konfransın keçirilməsində məqsəd
psixoloji xidmət sahəsində, xüsusilə
məktəbdə psixoloji
xidmət sahəsində
fəaliyyət göstərən
praktik psixoloqları bir araya gətirmək,
onların əməkdaşlığı
üçün imkan
yaratmaq, onların təcrübə mübadiləsinə
təkan verməkdən
ibarət idi. Konfransda həm praktik, həm də nəzəri aspektlərin vəhdəti
təmin olundu. Yəni bunun özü maraqlı bir nüans idi. Ümumiyyətlə, onu da qeyd
etmək istərdim ki, konfransda psixoloji xidmətin mühüm problemləri irəli sürülməklə
yanaşı həmçinin
bu məsələlərin
müəyyən həll
yolları, təklif və nəticələr də meydana çıxdı. Ümumiyyətlə,
konfransda emosional ab-hava müşahidə olunurdu. Psixoloqlarımız
bu sahənin inkişafından razıdırlar.
- Konfransda hansı məsələlərin
müzakirəsinə geniş
yer ayrılmışdı?
- Əsasən psixoloji xidmətin müxtəlif istiqamətləri müzakirə
obyekti olsa da, iki məsələyə
daha çox diqqət yetirilirdi. Bunlardan biri peşə seçimi prosesində psixoloqun fəaliyyəti və bu prosesin daha
da yaxşılaşdırılmasına
dair idi. Digər məsələ isə xüsusi qayğıya ehtiyacı olan uşaqların ümumtəhsil məktəblərində
inklüziv təhsilinin
təmin olunmasının
psixoloji aspektləri idi.
- Bu sahədə
daha çox hansı problemlər mövcuddur?
- Təbii ki, istənilən sahə nə qədər inkişaf etsə də, yenə də onun müəyyən
kiçik də olsa problemləri olur. Həmçinin Azərbaycanda təhsil sahəsində psixoloji xidmətin daha da yaxşılaşdırılması
üçün bir sıra yollar var. Mən məsələn, konfransda çıxışımı
bu məsələ ilə bağlı hazırlamışdım. Mən
şagirdlər arasında
sorğu keçirdim.
Psixoloq kimdir və nə işlə məşgul olur? Uşaqların bu suala verdikləri
cavabları təhlil etmişdim. Stereotip cavablara rast gəlsək də, uşaqların əksəriyyəti
psixoloqun kim olduğunun fərqindədirlər.
Ancaq onu da deyim ki,
hər bir məktəbdə bu belə deyil. Bunu da qeyd
etmək lazımdır
ki, məktəb psixoloqunun hansı işlə məşğul
olması, onun bir peşəkar olaraq hansı məsələlərin həllində
səlahiyyətli olması
barədə cəmiyyətimizdə
hələ də müəyyən stereotiplər
və fikir ayrılıqları var. Bu stereotiplərin
aradan qaldırılması
üçün zənnimcə,
psixoloqların peşəkarlıq
səviyyəsinin və
təcrübəli psixoloqlarla
fəaliyyətə yeni
başlayan gənc psixoloqlar arasında nəsillərarası əlaqənin
təmin olunması vacibdir. Əgər məktəbdə psixoloji
xidmət peşəkar
səviyyədə düzgün
qurularsa, ən azından onda müəyyən vaxtdan sonra həmin məktəbin pedaqoji kollektivi və şagirdləri , həmçinin
valideynlər psixoloq və psixoloji xidmət haqqında daha dürüst məlumata malik olarlar. Ona görə
mən hesab edirəm ki, hazırda psixoloqa münasibətlə bağlı
problemlərin həll
olunmasında ən vacib aspektlərdən biri psixoloqların peşəkarlıq səviyyəsinin
yüksəldilməsidir.
- Yetkin insanla uşağa göstərilən psixoloji
xidmət arasında nə kimi fərqlər
var?
- Adətən kiçik yaşlı uşaqların
psixoloqa gətirilməsi
valideynləri tərəfindən
olur.Yəni bu vaxt uşağın psixoloqa özü tərəfindən müraciəti
çox nadir hallarda baş verə bilər. Yalnız yeniyetməlik dövründən
başlayaraq müraciətlər
həmin şəxs tərəfindən baş
verir. Yeniyetmə özü psixoloqun yanına gəlir və problemin həllində ondan kömək istəyir. Yəni praktikada belə hallar baş verir. Uşaq və böyüklərlə psixoloqun
işi bir-birindən öz metodlarına görə fərqlənir.
Əlbəttə, müəyyən
universal metodlar var ki, onlar istənilən
yaş dövründə
işləkdir. Spesifik
problemlərə gəldikdə
isə yaş dövründən asılı
olaraq həm diaqnostika metodları, həm korreksiya metodları, həm də lazım olarsa, psixoterapiya metodları artıq müəyyən fərdi
cəhətlər kəsb
etməyə başlayır.
- Orta məktəbdə təhsil
alan uşaqlar arasında hansı psixoloji probler yaşanır?
- Problemlər müxtəlifdir.
Mən şəxsən
praktik təcrübəmdən
onu qeyd edə bilərəm ki, hazırda uşaqların bir çox psixoloji problemləri, çətinlikləri
valideynlərin onlardan
yüksək nəticələr
gözləmələri ilə
əlaqədar olur. Hətta yetərincə qabiliyyətli uşaqlardan
belə valideynlər çox böyük uğurları birdən-birə,
daha yaxın zaman ərzində gözlədiklərindən bu,
onların təhsildəki
uğurlarına pis təsir edir. Bir psixoloq kimi
onu qeyd etmək istərdim ki, valideynlər öz övladının təliminə isti münasibətlə yanaşı
onun yaş xüsusiyyətlərini də
nəzərə almalıdır.
Tutalım 1 və ya 2-ci sinifdə təhsil alan şagirdin boş vaxtında oyun oynamaq istəyi təbii bir haldır. Onun qarşısını almaq
olmaz. Ancaq valideynlər buna neqativ münasibət göstərir. Valideynlər
düşünür ki,
uşaq 5 yaşına
çatdısa, o, oyuncaqlarını
bir kənara atıb gününü dəftər-kitabla keçirməlidir.
Bu isə əks effekt verir. Qabiliyyətli
uşaqda belə təlimə qarşı ikrah hissi yaranır.
Yəni əsas problemlərdən biri budur.
- Bu sahə ilə bağlı hansı elmi-metodiki vəsaitlər mövcuddur?
- Sevindirici haldır ki, Bakı Pedaqoji
Kadrların Yenidən
Hazırlanması İxtisasartırması
İnstitutunda mən
son illər ərzində
məktəbdə psixoloji
xidmətin fəaliyyəti
ilə bağlı yeni nəşrlər görmüşəm. Bu çox
gözəl addımdır.
Hətta keçirdiyimiz
konfrans zamanı biz həmin metodik vəsaitlərin sərgisini
də təşkil etdik. Bəzi kitabların adını çəkmək istərdim.
“Təhsildə psixoloji
xidmət”, ”Psixoloji xidmətin triadası” və s. Daha sonra Bakı Dövlət Universitetinin psixoloq mütəxəssisləri
tərəfindən bir
neçə növdə
pedaqoji psixologiya kitabları nəşr olunub. Azərbaycan Müəllimlər İnstitutunun
Psixologiya kafedrasının
əməkdaşları tərəfindən
“Uşaq psixologiyası”
adlı kitab nəşr olunub. Biz sərgi zamanı bu yeni nəşrlərlə
psixoloqlarımızı tanış
etdik. Bu onların marağına səbəb
oldu. Eyni zamanda mən özüm bir psixoloq olaraq sərhəd baxımından
bizə yaxın olan ölkələrin bu sahədəki nəşrlərini izləyirəm.
Nüşabə
Palitra.-2012.-11 aprel.-S.13.