“Eurovision 2012” müsabiqəsi dövründə hotellərdə süni qiymət artımına yol verilməyəcək

Dünən Bakıda Böyük Britaniyanın «ITE Group» şirkətinin Qafqazdakı eksklüziv tərəfdaşı olan “İteca Caspian” şirkətinin təşkilatçılığı ilə XI Azərbaycan Beynəlxalq Turizm və Səyahətlər (“AITF-2012”) sərgisi başladı. Tədbirin açılış mərasimində çıxış edən Azərbaycanın mədəniyyət və turizm naziri Əbülfəs Qarayev sərginin xüsusi əhəmiyyətindən danışaraq qeyd etdi ki, əgər 2002-ci ildə bu sərgidə 7 ölkədən 23 şirkət iştirak edirdisə, bu gün sərgidə 32 ölkədən 201 şirkət iştirak edir. Nazirin sözlərinə görə, ötən il Azərbaycanda “ Turizm ili” olduğundan, Azərbaycana gələn əcnəbilərin sayında rekord göstərici, 2,134 mln. nəfər qeydə alınıb və turizm sahəsi 2010-cu ilə nisbətən 14% artıb: “Bu sərgi regionun, o cümlədən Azərbaycanın sənaye inkişafına təkan verəcək”.

Qeyd edək ki, 3 gün davam edəcək sərgidə dünyanın müxtəlif yerlərinə turizm səfərlərinin təşkil olunmasından başlayaraq hava daşımaları, hoteldə yerləşdirmə və otaqların bron edilməsinə qədər turizm xidmətlərinin bütün srektri nümayiş etdirilir. Sərgi 62 turizm istiqamətini, 15 milli ekspozisiyanı və 32 iştirakçı ölkəni təqdim edir. Azərbaycan, Gürcüstan, Sloveniya, Çexiya, Dubay (BƏƏ), Türkiyə, Bolqarıstan, Dağıstan, Stavropol diyarı, Hindistan, Kipr, Krım, Litva, Malayziya və Xorvatiya öz milli ekspozisiyalarını nümayiş etdirir. Bolqarıstan, Sloveniya, Çexiya, Rusiya və Ukrayna öz məşhur müalicəvi kurortlarını təqdim edir. Stavropol diyarının stendi sanatoriya müalicəsi üzrə öz metodikaları ilə məşhur olan Yessentuki, Yeleznovodsk, Kislovodsk, Mineralnıye Vodı və Pyatiqorsk kimi kurort-şəhərlərin ekspozisiyalarını birləşdirir. Ekzotik turizm təşkil edən şirkətlər Tailand, Mavriki və Seyşel kimi istiqamətlər təqdim edir. Sərgi çərçivəsində Slovakiya, Macarıstan, Polşa və Çexiyaya turlar üzrə seminar, təqdimatlar və ustad dərsləri keçiriləcək. “AİTF-2012”də Ümumdünya Turizm Təşkilatı (ÜTT) da öz stendi ilə iştirak edir. Eyni zamanda Azərbaycanın turizm potensialını fəal şəkildə təqdim edən Azərbaycan Mədəniyyət və Turizm Nazirliyi xüsusi stendlə çıxış edir. Azərbaycanda fəal istirahət və əyləncə sahəsində yeni layihə və istiqamətlər ölkənin aparıcı turizm şirkətləri, istirahət zonaları və sanatoriyaları tərəfindən təqdim olunur. Abşeron zonasının hotellər şəbəkəsinin də təqdim edildiyi sərgiyə Azərbaycanda fəaliyyət göstərən dünyaca tanınmış hotellər də qatılıb.

Tədbirdə “Azərbaycan Hava Yolları”, “Air Astana”, “AirBaltic”, “Qatar Airways”, “Flydubai”, “Çex Hava Yolları” və “Türk Hava Yolları” kimi aviaşirkətlər Azərbaycan bazarı üçün xüsusi təkliflər təqdim edir. «AİTF-2012» sərgisi Azərbaycan Mədəniyyət və Turizm Nazirliyinin rəsmi dəstəyi ilə keçirilir və ÜTT, Azərbaycanda İxracın və İnvestisiyaların Təşviqi Fondu (Azrromo), Azərbaycan Sahibkarlar Konfederasiyası və Beynəlxalq Turizm Sərgiləri Assosiasiyası tərəfindən dəstəklənir. Bu sərgiyə paralel olaraq 6-cı Qafqaz beynəlxalq mehmanxana, restoran və supermarketlər üçün avadanlıq və ləvazimatlar sərgisi də keçiriləcək.

Azərbaycan və San Marino arasında turizm əlaqələrinin inkişafına dair saziş imzalandı

«AİTF-2012» beynəlxalq turizm və səyahətlər sərgisi çərçivəsində Azərbaycanla San-Marino arasında turizm sahəsində əməkdaşlıq haqqında sənəd imzalandı. İmzalanma mərasimində çıxış edən Azərbaycanın mədəniyyət və turizm naziri Əbülfəs Qarayev qeyd etdi ki, San Marino ilə Azərbaycan arasında əməkdaşlıq uzun illərdir davam edir. İtaliyanın daxilində yerləşən və Avropanın kiçik ölkələrindən biri hesab edilən San Marino eyni zamanda Avropanın bütün beynəlxalq və dövlətlərarası qurumlarında olduqca fəal rol oynayır. Bu ölkənin nümayəndələri beynəlxalq təşkilatlarda aparıcı mütəxəssislər kimi çıxış edirlər. Ə.Qarayevin sözlərinə görə, San Marino kiçik ölkə olmasına baxmayaraq, onun turizm potensialı kifayət qədər böyükdür: «İtaliyaya səfər edən insanların demək olar ki, 50 faizi mütləq bu ölkəni ziyarət edir. San Marino öz dövlət quruluşu və ənənələri ilə tarixi bir ölkədir. Bu ölkənin də xarici siyasəti Azərbaycanla əməkdaşlığa və Azərbaycanın mövqelərinin dəstəklənməsinə yönəlib». San Marinonun turizm, idman və iqtisadi planlaşdırma naziri Fabio Berardi bildirdi ki, Azərbaycanla hər bir sahədə, xüsusilə turizm sahəsində əməkdaşlıq təmsil etdiyi ölkənin marağındadır. Onun sözlərinə görə, San Marino may ayında Bakıda keçiriləcək «Eurovision» musiqi yarışmasında da iştirak edəcək. Fabio Berardi Azərbaycanla San-Marino arasında turizm sahəsində imzalanacaq sənədi iki dövlət arasında yeni yolun açılması kimi qiymətləndirdi. Sonra Azərbaycanla San-Marino arasında turizm sahəsində əməkdaşlıq haqqında sənəd Azərbaycanın mədəniyyət və turizm naziri Əbülfəs Qarayev və San Marinonun turizm, idman və iqtisadi planlaşdırma naziri Fabio Berardi tərəfindən imzalandı.

Azərbaycan Dünya Turizm Təşkilatı ilə birgə layihə həyata keçirəcək

Aprelin 12-də «AİTF-2012» beynəlxalq turizm və səyahətlər sərgisi çərçivəsində daha bir sənəd Azərbaycan Mədəniyyət və Turizm Nazirliyi ilə Dünya Turizm Təşkilatı arasında birgə layihənin həyata keçirilməsi üzrə imzalandı. Özündə «İrək yolunun tamı: Kulinariya, mədəniyyət və turizm» üzrə beynəlxalq konfransın keçirilməsini ehtiva edən sənədin imzalanma mərasimində çıxış edən mədəniyyət və turizm naziri Əbülfəs Qarayev bildirdi ki, Azərbaycan 2001-ci ildən DTT-nin üzvü olsa da, bu, həmin təşkilatla birgə keçirilən ilk layihədir: «Azərbaycan bu nüfuzlu təşkilatla yaxından əməkdaşlıq edir. Ötən il ölkəmizin turizm üzrə fəaliyyət göstərən üç təşkilatı – Azərbaycan Turizm İnstitutu, Azərbaycan Turizm Assosiasiyası və Bakı Turizm İnformasiya Mərkəzi DTT-nin assosiativ üzvlüyünə qəbul olundu. Bundan başqa, bugünlərdə Azərbaycan Turizm Assosiasiyasının sədri Dünya Turizm Təşkilatına (DTT) qoşulmuş üzvlərin Şurasının vitse-prezidenti vəzifəsinə seçildi. Bu məsələdə DTT-nin baş katibi Taleb Rifainin də böyük rolu oldu. Bir məqamı da qeyd edim ki, DTT gələn il Bakıda keçiriləcək Beynəlxalq Mədəniyyətlərarası dialoq Forumunu dəstəkləyən təşkilatlar sırasına qoşulacaq. Bütün bunlar Azərbaycanın turizm sahəsində dünya ölkələri arasında artan nüfuzundan xəbər verir». Nazir bildirdi ki, imzalanan yeni sənədə görə, bu il sentyabrın 6-7-də Bakıda kulinariya, mədəniyyət və turizm üzrə beynəlxalq konfrans keçiriləcək. ÜTT-nin şöbə müdiri Alla Peresolova isə Azərbaycanla əməkdaşlıqdan məmnun qaldığını və bu əməkdaşlığın gələcəkdə daha da genişlənəcəyinə ümid etdiyini bildirdi.

Azərbaycana gələn turistlər vizanı internet vasitəsilə ala biləcəklər

Prezident İlham Əliyevin göstərişi ilə «Eurovision 2012» müsabiqəsində iştirak etmək üçün Azərbaycana gələnlərə viza hava limanında veriləcək. Mədəniyyət və turizm naziri Əbülfəs Qarayev bunu ciddi addım kimi qiymətləndirərək qeyd etdi ki, Azərbaycana gələn əcnəbilərə vizanın elektron qaydada verilməsi üçün müvafiq proqram hazırlanır: «Proqrama əsasən, Azərbaycana gələn turistlər vizaları 15 gün ərzində internet vasitəsilə əldə edəcəklər. Hazırda bu istiqamətdə ciddi işlər görülür. Düşünürəm ki, bu ilin sonunadək Azərbaycana gələn turistlər vizanı internet vasitəsilə ala biləcəklər». Ə.Qarayev bu kimi addımların ölkədə turizmin inkişafına təkan verəcəyini söylədi: «Ötən il Azərbaycanda turizm sahəsinin artım tempi 14% olub. Ötən ilki artım templərini nəzərə alsaq, bu il sözügedən sektorda artım tempinin 10-15% olacağı gözlənilir».

“Eurovision”la əlaqədar turistlər üçün Bakı və Bakıətrafı qoruqlara, eləcə də regionlara turlar təşkil olunacaq

Mədəniyyət və turizm naziri Əbülfəs Qarayev bildirdi ki, Azərbaycanda keçiriləcək “Eurovision 2012” müsabiqəsi dövründə hotellərdə süni qiymət artımına yol verilməyəcək. Onun sözlərinə görə, nazirlik bütün mehmanxanalardan zəmanət alınıb ki, “Eurovision”a gələn qonaqlar üçün qiymətlərdə heç bir artım olmayacaq: “Üəni hotellər adi vaxtda Azərbaycan vətəndaşlarına hansı qiymətlərlə xidmət göstərirlərsə, “Eurovision”a gələn qonaqlara da həmin qiymətlərlə xidmət göstərəcəklər”. Nazir qeyd etdi ki, ötən il Azərbaycanda fəaliyyət göstərən hotel, mehmanxana və istirahət mərkəzləri qiymətləri təxminən 20% aşağı salıb: “Bu da rəqabət nəticəsində əldə olunub. Hər il ölkədə 40-50 istirahət mərkəzi istifadəyə verilir. Düşünürəm ki, bazar qiymətləri tənzimləyəcək və nə qədər çox turizm mərkəzi olsa, qiymətlər daha da aşağı düşəcək”. Ə.Qarayev bildirdi ki, “Eurovision”la əlaqədar Azərbaycana gələn turistlər üçün Bakı və Bakıətrafı qoruqlara, eləcə də regionlara turlar təşkil olunacaq: “Artıq bunun üçün hər şey hazırdır. Bütün mehmanxanaların qarşısından avtobuslarla ekskursiyalar təşkil olunacaq. “Eurovision” zamanı muzeylər saat 20:00-a, müsabiqə günlərində isə 00:00-a kimi işləyəcək. Eyni zamanda qoruqlara tapşırıq verilib ki, turistlər üçün əlverişli qrafiklər tərtib etsinlər”.

Yay mövsümünün yaxınlaşması ilə əlaqədar bütün turizm obyektləri yoxlanılacaq

Yay mövsümünün yaxınlaşması ilə əlaqədar Azərbaycanda bütün turizm obyektləri, o cümlədən hotel, mehmanxana və istirahət mərkəzləri yoxlanılacağını deyən nazirin sözlərinə görə, Azərbaycanda turizm mövsümü adətən iyunun 15-də açılır: “Ona görə də yoxlamalar may ayının sonunda - iyunun əvvəlində ararılacaq”. Nazir keyfiyyətsiz və lisenziyasız fəaliyyət göstərən turizm obyektlərinin fəaliyyətinin dayandırılacağını vurğuladı.

Regionlarda xüsusi turizm zonalarının yaradılması təklif olunur

Azərbaycanda turizmin ölkədə qeyri-neft sektoru sahəsinin inkişafına təkan verən bir sahə olduğunu deyən nazir bildirdi ki, daxili turizmin inkişafı üçün nəinki ayrı-ayrı tədbirlər, eyni zamanda dövlət proqramı mövcuddur: “Hər bir rayonun inkişaf proqramı tərtib olunanda orada turizmin inkişafına xüsusi önəm verilir”.

Regionlarda xüsusi turizm zonalarının yaradılması təkliflərini hazırlayıb həyata keçirdiklərini vurğulayan nazir turizm sahəsində fəaliyyət göstərən işçilər üçün peşə hazırlığını artırma kurslarının təşkil olunduğunu da qeyd etdi: “Bundan başqa, xaricdə keçirilən turizm sərgilərində Azərbaycanın regionlarını təbliğ edirik. Azərbaycan daxili turizmdə bir neçə istiqaməti - ekoloji turizmi, macəra turizmini və s.-i inkişaf etdirir. Nəticədə ölkəmizə gələn əcnəbi turistlərin sayı ildən-ilə artır”. Ə.Qarayev bildirdi ki, Azərbaycana artan maraq XI Azərbaycan Beynəlxalq Turizm və Səyahətlər (“AITF-2012”) sərgisində də özünü göstərir: “Ötən il bu sərgi ilə yanaşı daxili turizm sərgisi də keçirdik və qərara gəldik ki, bunu iki ildən bir keçirək. Növbəti il bu sərgi ilə yanaşı yenə daxili turizm sərgisi də keçiriləcək”.

Nigar Abdullayeva

Palitra.-2012.-13 aprel.- S.11.