«Muzeylər
insanların mədəni istirahət mərkəzlərinə
çevrilməlidir»
«Heydər Əliyev Mərkəzində
vaxtaşırı olaraq dərnəklərimizdə
iştirak edən şagirdlərin əl işləri və rəsm
əsərlərindən ibarət sərgilər
keçiririk»
Layihə
çərçivəsində müsahibimiz Balakən rayon
Heydər Əliyev Mərkəzinin rəhbəri Leyla
Qarayevadır. O, müsahibəyə rəhbərlik etdiyi mərkəz
haqqında məlumat verməklə başladı:- Balakən
rayon Heydər Əliyev Muzeyinin rəsmi
açılışı 2008-ci ilin 19 sentyabrında olub. Həmin
ildən fəaliyyətə başlayan Heydər Əliyev
Muzeyi rayon icra başçısının 22 iyul 2011-ci il
tarixli 144 nömrəli sərəncamı ilə mərkəzə
çevrilib. Mərkəz binasının daxili quruluşu iki
hissədən ibarətdir. Birinci mərtəbədə fond
otağı, 300 nəfərlik böyük konfrans zalı, dəyirmi
masa, elmi-praktik konfranslar, müəyyən kütləvi tədbirlər,
sərgilərin keçirilməsi üçün dərnək
otağı yerləşir. Burada məktəb şagirdlərinin
asudə vaxtının maraqlı təşkili
üçün Uşaq Yaradıcılıq Mərkəzinin
toxuculuq, Uşaq Texniki Yaradıcılıq Mərkəzinin gənc
dizaynerlər, Uşaq İncəsənət Məktəbinin
rəssamlıq dərnəkləri fəaliyyət göstərir.
İkinci mərtəbədə mərkəz
eksponatlarının nümayişi üçün ekspozisiya
zalı yerləşir. Ulu öndər Heydər Əliyevin
müxtəlif sahələrə göstərdiyi diqqət və
qayğını, onun zəngin həyat və fəaliyyətini
əks etdirən 8 bölmə var. Mərkəzin ekspozisiya
zalında “Heydər Əliyev və Balakən” guşəsi
yaradılıb, mərkəzin nəzdində
yaradılmış Heydər Əliyev irsinin
araşdırılması və təbliği üzrə fəaliyyət
göstərən tədqiqat qrupu üzvlərinin və mərkəz
əməkdaşlarının əldə etdiyi, ulu öndərlə
şəxsən görüşmüş həmyerlilərimizin
fotoşəkilləri və xatirələri həmin guşədə
nümayiş olunur. Həmçinin ekspozisiya zalında
“İlham Əliyev və Balakən” guşəsi
yaradılıb və dövlət
başçısının rayonumuza səfərlərini əks
etdirən materiallar burada toplanıb. - Mərkəzin fonduna nələr
daxildir?- Mərkəzin fondu 746 eksponatdan ibarətdir. Onlardan
428-ni kitablar təşkil edir. 2011-ci il ərzində mərkəzə
gələnlərin sayı 6134 nəfər olub. Müxtəlif xarici ölkələrin
səfirləri, dövlət və hökumət nümayəndələri
mərkəzdə olub, ulu
öndərin çoxşaxəli zəngin fəaliyyəti
ilə yaxından maraqlanıb və mərkəzin xatirə
kitabında xoş təəssüratlarını
qeyd ediblər. Mərkəzdə
2011-ci il ərzində tarixi
və dövlət əhəmiyyətli günlərlə əlaqədar
müxtəlif tədbirlər keçirilib.
Ümummilli lider Heydər
Əliyevin anadan olmasının 88-ci
ildönümünə həsr edilmiş
“Heydər Zirvəsi” poeziya gecəsi, “Heydər
Əliyev Azərbaycan tarixinin müdrik şəxsiyyətidir” adlı
dəyirmi masa təşkil edilib. Ulu öndər Heydər Əliyevin anadan
olmasının 88-ci ildönümü və
«Gül bayramı» Heydər Əliyev
adına Mədəniyyət və İstirahət Parkında rayon səviyyəsində geniş
qeyd edilib və həmin
gün Heydər Əliyev Mərkəzi
gecə saatlarınadək ziyarətçilər üçün açıq olub. Mərkəzimizdə “Muzeylər gecəsi”
adlı aksiya keçirilib
və həmin tədbirdə muzeylərin əhəmiyyəti
haqqında geniş
çıxışlar səsləndirilb. Vurğulanıb ki, muzeylər insanların mədəni istirahət
mərkəzlərinə çevrilməlidir. Tədbirlərimizdə
aktiv şəkildə iştirak
edən məktəb şagirdləri və mədəniyyət
işçiləri tərəfindən şeirlər söylənib,
rəqs nömrələri göstərilib və
dünyanın məşhur muzeyləri haqqında məlumatlar
sərgilənib. Qurtuluş Günü münasibətilə tədqiqat qrupu üzvləri, gənclər və
ziyalıların iştirakı ilə dəyirmi masalar təşkil edirik. Bildiyiniz kimi, ötən il ölkəmizdə «Turizm
ili» elan edilmişdi. Ümumdünya
Turizm Günü
münasibətilə respublikanın bütün
muzeylərində «açıq qapı» günü
elan olunmuşdu. Həmin
gün rayon Heydər Əliyev
Mərkəzində “Turizmin
inkişafında tarix və mədəniyyət
abidələrinin rolu” adlı elmi-praktik konfrans keçirdik. Daha sonra «2011-ci il
turizm ilidir»
başlığı altında rayonun tarixi abidələrini əks etdirən
fotoşəkillərdən ibarət albom,
rayonun tarixi, mədəniyyəti,
flora və faunası haqqında ətraflı
məlumatlar olan kitab
və digər mətbu materiallardan ibarət
sərgi təşkil etdik. Həmin gün mərkəzimizə
xeyli sayda ziyarətçi
gəlib və eksponatlarla tanış olaraq rəy kitabında təəssüratlarını
qeyd ediblər. Ötən il
həmçinin dövlət müstəqilliyinin bərpasının
20 illiyi bütün
ölkə ərazisində yüksək səviyyədə qeyd edildi. Bizim rayonda da müstəqilliyimizin
20 illiyi ilə əlaqədar silsilə tədbirlər
reallaşdı. Bu münasibətlə mərkəzin
və rayon Təhsil Şöbəsi Uşaq Yaradıcılıq Mərkəzi, Uşaq Texniki Mərkəzinin
birgə təşkil etdiyi rəsm əsərləri
və əl işlərindən ibarət
sərgi, inşa müsabiqəsi
keçirildi.Azərbaycan Respublikasının müstəqilliyinin
qorunmasının, ölkəmizin bir
dövlət kimi dünya
miqyasında özünütəsdiqində ulu
öndərin misilsiz xidmətləri bütün tədbirlərdə xüsusi şəkildə vurğulanır.
“Heydər Əliyev Azərbaycan dövlətinin
qurucusu, əbədi lideridir”
başlıqlı dəyirmi masa, “Heydər
Əliyev milli ideologiyamızın
memarıdır”, “Heydər Əliyev ideyaları
hamımıza örnəkdir” adlı mühazirələr
oxunması müstəqilliyin bərpasının 20 illiyinə
həsr edilmiş tədbirlərdəndir.
Noyabrda
dövlət müstəqilliyinin əsas simvollarından olan Bayraq Gününə
həsr edilmiş “Bayrağımız qürurumuzdur” adlı tədbir keçirilib, “Bayraq qürur mənbəyidir”
başlığı altında əl işləri, rəsm əsərlərindən
ibarət sərgi təşkil edilib,
bayraqların yaranma tarixi,
onlarin əhəmiyyəti
haqqında danışılıb və Dövlət Bayraq Meydanının açılış mərasiminə
aid filmə baxılıb.- Mərkəzinizdə
fəaliyyət göstərən dərnəklərin işini necə qiymətləndirirsiniz?- Biz bu işə böyük diqqət ayırırıq. Çünki bu cür dərnəklərdə yeniyetmələrimizin
özlərini ifadə etməsi, yaradıcılıq imkanlarının
üzə çıxarılması və daha
da inkişaf etdirilməsi
mümkün olur. Digər
tərəfdən belə dərnəklərin və onlara cəlb edilən şagirdlərin,
yeniyetmələrin sayının çox
olması onların asudə vaxtının səmərəli
təşkil edilməsinə imkan verir. Bildiyiniz kimi, indi elə
zəmanədə yaşayırıq ki,
gənc nəsli tərbiyələndirmək, onları dövrün mənfi vərdişlərindən
uzaq tutmaq bir qədər çətinləşib. Çünki informasiya-kommunikasiya
texnologiyaları çox inkişaf
edib və gənc nəsil bu
inkişafın müsbət tərəflərindən
yararlandığı kimi, mənfi tərəflərinin
təsirinə də məruz qalır. Bu
inkişafın qarşısını almaq
mümkün deyil. Dünya ilə ayaqlaşmaq
üçün biz də
bu ümumi inkişafa öz töhfəmizi
veririk. Bu gün ölkəmiz bütün
sahələrdə inkişaf edən
dövlətdir. Deməli, qloballaşmanın gətirdiyi
müsbət və mənfi tərəflərin hər birinə
məruz qalacağıq. Sadəcə, bizim
üstümüzə düşən iş
gənclərimizi, yeniyetmələrimizi mənfi vərdişlərdən
qorumaq, onları milli-mənəvi dəyərlərimiz
ruhunda tərbiyələndirməkdir. Bunun üçün hər
birimiz
çalışdığımız sahədə üzərimizə
düşən işi məsuliyyətlə
görməliyik. Ölkəmiz zəngin mədəni dəyərlərə
malikdir. Azərbaycan mədəniyyətinin
inciləri, dəyərlərimiz bütün
dünyada məşhurdur. Onları gənc
nəslə aşılamaq lazımdır. Biz
də Heydər Əliyev Mərkəzi olaraq
bu məsələyə böyük
həssaslıqla yanaşırıq. Mərkəzimizdə
keçirilən tədbirlərdə milli-mənəvi dəyərlərimizin
təbliğinə çalışırıq. Yeniyetmələrlə,
məktəb şagirdləri ilə işi
daha səmərəli şəkildə qurmaq üçün
müxtəlif vasitələrdən yararlanırıq. Heydər
Əliyev Mərkəzində fəaliyyət göstərən
dərnəklərin dərs cədvəli hazırlanır və
buna müvafiq olaraq dərslər keçirilir.
Uşaq Yaradıcılıq Mərkəzindəki
toxuculuq dərnəyində 15 şagird iştirak edir və dərnək Uşaq
Yaradıcılıq Mərkəzinin dərnək rəhbəri
tərəfindən həftədə 2 dəfə keçirilir. Uşaq Texniki Yaradıcılıq Mərkəzindəki
gənc dizayenlər dərnəyində 15 şagird
iştirak edir və dərslər
Uşaq Texniki
Yaradıcılıq Mərkəzinin dərnək rəhbəri
tərəfindən həftədə iki
dəfə keçirilir. Uşaq İncəsənət Məktəbindəki
rəssamlıq dərnəyi həmin məktəbin rəssam
müəllimi tərəfindən həftədə 2 dəfə
keçirilir. Bu dərslər
şagirdlərlə daha sıx təmasda
olmağa, onların potensiallarını
üzə çıxarmağa imkan verir. Mərkəzimizdə vaxtaşırı
olaraq dərnəklərdə iştirak edən şagirdlərin əl
işləri və rəsm əsərlərindən ibarət
sərgilər keçirilir və sərgidə
seçilmiş əsərlərin müəllifləri
mükafatlandırılır. Həmin əsərlər mərkəzdə
saxlanılır. Şagirdlərin asudə vaxtlarının
maraqlı təşkili üçün
onların kompyuterlərdən və yüksək sürətli
internetden istifadəsinə imkan yaradılıb.
Anar Miriyev
Palitra.-2012.-18
aprel.-S.11.