«Azərbaycan ailəsi dünyada ən yaxşı ailə modellərindən hesab edilir»

Layihə çərçivəsində müsahibimiz İsmayıllı Rayon Mədəniyyət və Turizm Şöbəsinin müdiri Azər Abbasovdur:

- Rayonunuzda respublika səviyyəli «Ailə bayramı» keçirildi. Bu tədbirin təşkil edilməsinin əsas məqsədi nə idi?

- İsmayıllıda 15 may-Beynəlxalq Ailə Günü münasibətilə “Ailə bayramı--2012” devizi altında tədbir keçirildi. Ailə, Qadın və Uşaq Problemləri üzrə Dövlət Komitəsi və İsmayıllı Rayon İcra Hakimiyyətinin birgə təşkilatçılığı ilə keçirilən tədbirdə Azərbaycanın bütün rayonlarından gəlmiş 82 nümunəvi ailə iştirak etdi. BMT-nın qərarı ilə 1993-cü ildən etibarən hər il qeyd olunan bu bayram artıq beşinci ildir ki, Azərbaycanda da keçirilir. Tədbirin əsas məqsədi cəmiyyətin diqqətini son dərəcə vacib olan ailə məsələlərinə yönəltməkdən ibarətdir. Hazırda ölkədə iki milyona yaxın ailə var. Bu gün Azərbaycan ailəsi dünyada ən yaxşı ailə modellərindən hesab edilir. Tədbirdə vurğulandı ki, Azərbaycanda tarixən formalaşmış özünəməxsus ənənəvi ailə modeli var. Bu ailə daim yüksək etik-əxlaqi dəyərləri, milli-mədəni sərvətlərimizə hörməti ilə fərqlənib. Əlbəttə, bu gün cəmiyyətdə gedən inkişaf, təbii ki, Azərbaycan ailəsinə də təsirsiz ötüşmür. Bu, ümumbəşəri dəyərlərdən faydalanmaqla yanaşı, həm də mənfi təsirlərdən qorunmaq zərurətini də qarşıya çıxarır. Müstəqillikdən sonra Azərbaycanda ailə siyasətinin formalaşması ümummilli liderimiz Heydər Əliyevin adı ilə bağlıdır. Milli-mənəvi dəyərləri xalqımızın ən böyük sərvəti hesab edən ulu öndər bu dəyərlərin qorunması zərurətini dönə-dönə söyləyib. Ailə dəyərlərinin qorunması, hər bir ailəyə diqqət və qayğı bu gün prioritet məsələlərdəndir. Ölkəmizdə Dağlıq Qarabağ münaqişəsi nəticəsində ciddi sosial-psixoloji çətinliklərlə qarşılaşan qaçqın və məcburi köçkün ailələrinə, habelə aztəminatlı ailələrə maddi yardım və digər güzəştlər məhz bu diqqət və qayğının təzahürüdür. İsmayıllıda keçirlən “Ailə bayramı-2012”də təşkil olunan, ayrı-ayrı bölgələrdən gələn ailələrin əl işlərindən ibarət sərgi, elə oradaca hazırlanan milli mətbəx nümunələri, musiqiçilərin zəngin repertuarlı konserti, gənc idmançıların çıxışları iştirakçılarda yüksək bayram əhval-ruhiyyəsi yaratmışdı. Tədbir çərçivəsində nümunəvi ailələrə mükafatlar verildi. Bayramda iki gəncin nikah mərasimi və Həmzəyevlərin «Brilyant toyu» mərasimi də oldu.

- Rayonda kitabın təbliği istiqamətində hansı işlər həyata keçirilir?

- İsmayıllıda kitabın sevilməsi üçün müxtəlif tədbirlər həyata keçirilir. Məsələn, Heydər Əliyev adına mədəniyyət və istirahət parkında 15 İyun Milli Qurtuluş Gününə həsr edilmiş tədbirlər çərçivəsində «kitab bayramı» keçirmişdik. Tədbir iştirakçıları parkda təşkil edilmiş kitab guşələri və sərgilərinə baxdılar. Tədbirdə, həmçinin Prezidentin sərəncamlarına müvafiq olaraq Azərbaycanın görkəmli sənətkarlarının yubiley mərasimlərinin keçirilməsi məqsədilə hazırlanmış guşədə müxtəlif çap məhsulları nümayiş etdirildi. İştirakçılara rayonda kitabxanaların maddi-texniki bazasının möhkəmləndirilməsi, yeni nəşrlər hesabına kitab fondunun artırılması, kitabxana-informasiya sahəsinin genişləndirilməsi və s. barədə ətraflı məlumat verildi. İyun ayında da rayon mərkəzində geniş ictimaiyyətin iştirakı ilə geniş “Kitab bayramı” qeyd olundu. Bundan savayı Uşaq Yaradıcılıq Mərkəzində Mədəniyyət və Turizm Nazirliyinin və Mirzə Fətəli Axundov adına Milli Kitabxananın dəstəyi və geniş ictimaiyyətin iştirakı ilə “Mirzə Ələkbər Sabir - 150” mövzusunda tədbir keçirilib. Tədbirdən əvvəl Mərkəzləşdirilmiş Kitabxana Sistemi Mirzə Ələkbər Sabirin kitablarından ibarət sərgi təşkil etmişdi. Eləcə də Kürdəmir rayonunda “Mirzə Ələkbər Sabir - 150” mövzusunda keçirilən konfransda iştirak etmişik. Mədəni-maarif müəssisələrində müntəzəm şəkildə fotostendlər hazırlanaraq nümayiş etdirilir. Şəki şəhərində keçirilən Mirzə Fətəli Axundzadənin 200 illik yubileyinə həsr olunmuş “Deyilən söz yadigardır” VI Respublika bədii qiraət müsabiqəsində də iştirak etmişik. Rayon Tarix-Diyarşünaslıq Muzeyində “Muzeylər günü” münasibəti ilə “Açıq qapı günü” elan olunması artıq ənənə halını alıb. Azərbaycanın Milli İncəsənət Muzeyində Heydər Əliyev Fondunun təşəbbüsü və dəstəyi ilə təşkil olunmuş “Fransa inciləri” sərgisində də iştirakımız təmin olunub. Eyni zamanda Bakıda ABŞ-ın Smitson Universitetinin muzeylər assosiasiyasının muzey direktorları üçün təşkil etdiyi seminar-treninqdə rayon nümayəndələri iştirak ediblər. Mədəniyyət və Turizm Nazirliyinin Regionlarla iş şöbəsinin dəstəyi ilə keçirilən “Mədəniyyət abidələrimiz” adlı fotomüsabiqədə iştirak etmişik və diploma layiq görülmüşük. Ümummilli lider Heydər Əliyevin xatirəsinə həsr olunmuş beynəlxalq velosiped turunda rayonun Nizami küçəsi boyunca rayon ictimaiyyətinin, rayon Mədəniyyət Mərkəzinin “Niyal” instrumental ansamblının, folklor qruplarının, mədəni-maarif işçilərinin iştirakı ilə konsert proqramı təşkil olunmuşdu. Rayon İcra Hakimiyyətinin, Mədəniyyət və Turizm Şöbəsinin, Gənclər və İdman İdarəsinin, Milli Olimpiya Komitəsinin dəstəyi ilə “Olimpiya yol yürüşü” proqramı çərçivəsində rayon Mədəniyyət Mərkəzinin qarşısında konsert proqramı da təşkil edilib.

- Rayonda xalq teatrlarının təşkili işində hansı yeniliklər var?

- Qeyd edim ki, iyunun 28-də Mədəniyyət və Turizm Nazirliyinin Mədəniyyətşünaslıq üzrə Elmi-Metodik Mərkəzi Qax şəhərində “Xalq teatrı - problemlər və perspektivlər” mövzusunda zona elmi-praktik seminarı təşkil etmişdi. Seminarda İsmayıllı, Balakən və Oğuz rayonlarında fəaliyyət göstərən xalq teatrlarının rejissor və quruluş hissə müdirləri iştirak ediblər. Tədbirdə Qax Rayon Mədəniyyət və Turizm Şöbəsinin müdiri Nəzir Omarov, Mədəniyyətşünaslıq üzrə Elmi-Metodik Mərkəzin direktor müavini Polad Zeynalov və İncəsənət bilikləri şöbəsinin müdiri Rafiq Quliyev xalq teatrlarının problemləri və onların aradan qaldırılması üçün görüləcək işlər barədə məlumat verdilər. Teatr Xadimləri İttifaqının Yaradıcılıq şöbəsinin baş mütəxəssisi Çingiz Ələsgərli xalq teatrlarında repertuar seçimindən və yaradıcılıq əlaqələrinin inkişaf etməsinin zəruriliyindən danışıb. Ümumittifaq festivalları laureatı, Mədəniyyətşünaslıq üzrə Elmi-Metodik Mərkəzin metodisti Qurbanəli Mürsəlov özfəaliyyət və xalq teatrlarına gənclərin cəlb edilməsi və onlara diqqətin artırılmasının əhəmiyyətindən söz açdı. Seminara dəvət olunan xalq teatrlarının rejissor və quruluş hissə müdirləri mövzu ətrafında çıxış ediblər. Tədbirin sonunda Qax Rayon Xalq Teatrı tərəfindən Məhərrəm Əlizadənin "Şeyx Rəhmətullah" komediyasını seminar iştirakçılarına təqdim edildi.

Anar Miriyev

Palitra.-2012.-3 avqust.-S.11.