ŞƏKİ: UĞURLARIN PRİNSİPİAL İSTİQAMƏTİ

(əvvəli ötən sayımızda)

Bəhs olunan dövrdə Şəkidə əmək haqları, pensiyalar və ünvanlı sosial yardımların əhaliyə çatdırılmasında, əhalinin sosial müdafiəsinin daha etibarlı şəkildə təmin olunması istiqamətində bir sıra işlər görülmüşdür. 2012-cu ilin I yarısında 1557 ailəyə Ünvanlı Dövlət Sosial Yardımı təyin olunmuşdur. Hal-hazırda 2538 ailə Ünvanlı Dövlət Sosial Yardımı alır. Şəki rayonu üzrə hər bir ailə üzvünə təyin edilən Ünvanlı Dövlət Sosial Yardımın orta aylıq məbləği 24 manat , hər ailəyə düşən orta məbləğ isə 107 manat 76 qəpik təşkil etmişdir.

Dövlət Sosial Müdafiə Fondunun Şəki Şəhər Şöbəsi 2012-ci ilin I yarısında 25887 nəfər əmək pensiyaçısına xidmət göstərmişdir.Həmin pensiyaçılardan 17055 nəfəri yaşa görə ,7132 nəfəri əlilliyə ,1700 nəfəri isə ailə başçısını itirməyə görə pensiya alanlardır. Dövlət Sosial Müdafiə Fondunun Şəki şəhər şöbəsi üzrə pensiyanın orta aylıq məbləği 139 manat, 82 qəpik təşkil edir.

Kənd təsərrüfatının inkişafına xüsusi diqqət

Ötən illərdə olduğu kimi, bu ilin I yarısında da məhsul istehsalının artırılması, kənd təsərrüfatında özəl bölmənin daha da genişləndirilməsi diqqət mərkəzində saxlanmış, taxılçılığın, heyvandarlığın, meyvəçiliyin, üzümçülüyün inkişafı üçün bir sıra tədbirlər həyata keçirilmişdir. Respublikamızın ən iri taxılçılıq rayonlarından biri olan Şəkinin fermer təsərrüfatlarında 2012-ci ilin məhsulu üçün 76265 hektar sahədə payızlıq taxıl əkini həyata keçirilmişdir. Yetişən məhsulu tez və itkisiz yığmaq üçün bütün zəruri tədbirlər həyata keçirilmişdir.Belə ki, Şəki Şəhər İcra Hakimiyyəti başçısı yanında Şuranın geniş yığıncağında taxıl biçininin tez və itkisiz başa çatdırılması müzakirə olunmuş və konkret qərarlar qəbul edilmişdir. Həmçinin Şura üzvləri taxıi biçininin gedişi ilə yerində tanış olmaq üçün Səbətli ərazisində olmuş , fermerlərin problemləri ilə maraqlanmış, biçinin vaxtında və itkisiz başa çatdırılması üçün öz tövsiyələrini vermişdir.

Nazirlər Kabinetinin 2012-ci ilin I yarısının yekunlarına və qarşıda duran məsələlərə həsr olunan yığıncağında çıxış edən cənab Prezident iri fermer təsərrüfatlarının yaradılmasının vacib olduğunu bir daha vurğulayaraq demişdir: "Kənd təsərrüfatının inkişafı ilə bağlı görülən tədbirlər öz nəticəsini verir .Kənd təsərrüfatı 10 faizdən çox artmışdır.Kənd təsərrüfatı Azərbaycan iqtisadiyyatının şaxələndirilməsi üçün əsas sahələrdən biridir və məşğulluğun təmin edilməsi üçün demək olar ki, əsas sahələrdən biridir.İri fermer təsərrüfatlarının yaradılması prosesi , nəhayət , başlamışdır. Artıq birinci beş min hektar hazırlanır ki, biz orada iri fermer təsərrüfatlarının yaradılmasına başlayacağıq. Əminəm ki, bu təcrübə uğurlu olacaqdır və biz bundan sonra dövriyyəyə buraxılacaq əkin sahələrinin həcmini böyük dərəcədə artırmalıyıq." Kənd təsərrüfatının inkişafının əhəmiyyətindən danışarkən E.Usubov demişdir:

- Rayonumuzun kənd təsərrüfatının əsas sahələrindən biri də heyvandarlıqdır. Bu sahənin də dinamik inkişafının təmin edilməsi, heyvandarlıq məhsulları istehsalının həcminin artırılması daim diqqət mərkəzində saxlanılır.

Heyvandarlığın inkişafında mal-qaranın cins tərkibinin yaxşılaşdırılması, damazlıq-seleksiya işinin genişləndirilməsi sahəsində də xeyli iş görülmüşdür. İyun ayının 5-də Azərbaycan Respublikası Kənd Təsərrüfatı Nazirliyinin və Şəki Şəhər İcra Hakimiyyətinin birgə təşkilatçılığı ilə rayonımuzda heyvandarlıqda damazlıq - seleksiya işlərinə dair respublika seminar müşavirəsi keçirilmişdir. Seminar müşavirədə kənd təsərrüfatı naziri İsmət Abbasov, həmçinin respublikamızın 52 rayonundan 320 nəfər iştirak etmişdir. Hesab edirəm ki, müşavirə Şəkidə heyvandarlıq məhsulları istehsalının artırılmasına öz müsbət təsirini göstərəcəkdir.

Qeyd etmək lazımdır ki, istər bitkiçilik, istərsə də heyvandarlıq məhsulları istehsalının artırılması ilə yanaşı, emal olunmasının təşkili, yeni emal müəssisələrinin yaradılması, istehsal olunan məhsulların satışna köməklik göstərilməsi, aqroservis xidmətlərinin genişləndirilməsi və s. qarşımızda duran həlli vacib məsələlərdəndir...

Abadlıq və quruculuq işləri davam edir

Məlumdur ki, Şəki Şəhər İcra Hakimiyyəti və Arxitektura Şəhərsalma Komitəsi ilə birlikdə Şəki şəhərinin Baş Planı hazırlanmışdır. Baş Plana uyğun olaraq artıq Şəki şəhərində geniş təmir- tikinti, abadlıq və yenidənqurma işlərinə başlanmışdır. 2012-ci ildə ayrılmış yerli büdcə vəsaiti hesabına bu il şəhərin 17 küçəsində abadlıq işlərinin aparılması , 16 küçədə isə asfalt beton örtük çəkilməklə yolların əsaslı təmir edilməsi nəzərdə tutulmuşdur. Cari ilin I yarısında H.Əliyev, M.Ə.Rəsulzadə, M.F.Axundov prospektlərində, Salman Mümtaz küçəsində müasir işıqlandırma sisteminin qurulması işi davam etdirilmiş, bir sıra çoxmərtəbəli ictimai yaşayış binalarının dam örtükləri, fasadları əsaslı təmir edilmişdir. Bu günlərdə Prezident İlham Əliyevin tapşırığı əsasında "Yay teatrı" nın inşasına başlanmışdır.

Azərbaycan Respublikası Prezidentinin " Mirzə Fətəli Axundzadənin 200 illik yubileyinin keçirilməsi haqqında " Sərəncamına uyğun olaraq M. F. Axundzadənin adını daşıyan Mədəniyyət və İstirahət parkında yenidənqurma və əsaslı təmir işləri başa çatmaq üzrədir. Yubiley tədbirləri ilə əlaqədar dahi ədibin ev muzeyinə gedən yolda , həmçinin, qala divarları qarşısındakı meydanda və onun ətrafıında müasir işıqlandırma sistemi qurulmış, yeni yaşıllıq zolağı salınmışdır. Ümumiyyətlə şəhərimizdə son günlər ərzində yeni yaşıllıqların salınması istiqamətində geniş iş aparılır. Bu məqsədlə müxtəlif ölkələrdən Şəkiyə gətirilən ağac və gül kolları yol kənarlarında, park və meydanlarda əkilir, onlara yüksək səviyyədə aqrotexniki qulluq göstərilir.

(ardı gələn sayımızda)

MƏZAHİR ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-10 avqust.-S.3.